जात के ताल मं नाचत तिर्रा कलाकार

तिर्रा कलाकार एम.के. केलुकुट्टी, एक पईंत एक ठन मंदिर के पवित्र बाग-बगीचा मं अपन प्रस्तुति देवत एक ठन रूख ले एक ठन पाना ला टोर परिस. ओकर पोता एम.के. कुंजीरमन सुरता करत कहिथें, “वो ला वो जगा ला ‘असुदहा’ करे बर चार आना देय ला परिस. ये बात के कोनो फरक नइ परिस के वो ह एक ठन देंवता के रूप मं प्रस्तुति देवत रहिस.”

तिर्रा कलाकार अनुसूचित जाति समाज के होथें, वइसे ऊंच जात के मंदिर मन मं कलाकार के रूप मं वो मन के परघनी होथे, फेर ये जगा मं वो मन बर सीमा हवय. ये औपचारिक नृत्य कावु धन बाग-बगीचा मन के संगे संग मंदिर के आगू घलो करे जाथे. फेर देंवता जिहां बिराजे हवय, उहाँ जाय धन नृत्य करे के मनाही हवय.

कुंजीरमन वन्नन समाज ले हवंय, जेन ह पारंपरिक रूप ले कपड़ा धोय के काम करत रहिन, खासकरके ऊंच जात मन के. केरल मं ये मन ला अनुसूचित जाति के रूप मं सूचीबद्ध करेगे हवय. वो ह बचपना ले अपन ददा अऊ बबा, जेन मन तिर्रा कलाकार रहिन, के संग जावत रहिस. आखिर मं वो ह चालीस बछर के उमर मं नृत्य करे सुरु करिस.

“तलचिलोन, करियातन, कुट्टीचतन, वेट्टकोरुमकन,कन्निकाकरुवोन...’’ 87 बछर के सियान ह अपन निभाय हिंदू देंवता मन के नांव बताइस.

अऊ ओकर बाद कुंजीरमन ‘अंजडि’ अऊ ‘टोट्टम पट्टु’ गाये लगथे. पहिली वो देंवता ला सुमिरन करे बर गाये जाथे जेन ह नर्तकी के भेस धरथे अऊ दूसर कुट्टिचतनके इतिहास बताथे. वइसे कुछेक विद्वान मन के कहना आय के टोट्टम पट्टु’ देवी भगवती के सुमिरन करथे, न कि कुट्टिचतनके, जेकर पूजा सुरच्छा अऊ समृद्धि बर करे जाथे. वोला अपन छाती मं आठ पुल्ली (बिंदु) के संग दिखाय गे हवय.

ओकर संगीत ले भरे आवाज चरों डहर गूँजत हवय. कुंजीरमन बताथें, “कुट्टिचतनके जनम एक झिन वल्लुवा [छोटे जात] दाई अऊ एक झिन नंबूदरी [बाम्हन] ददा के इहाँ होय रहिस. एक पईंत, जब वो ह लइका रहिस, वोला भारी भूख लगिस. वो ह बनेच बखत भूख ले कलबलावत रहिस. ओकर बाद वो ह अपन भंइसा गोहड़ी के एक ठन भंइसा ला मार डारिस अऊ ओकर लहू ला पी लीस. बगियाय, ओकर ददा ह वोला मार डारिस अऊ ओकर 399 टुकड़ा कर दीस.”

कोझिकोड के शिवपुरम गाँव मं अपन दू मंजिला घर के परछी मं बइठे, वो ह ये रिपोर्टर ला बताथे, “आज हमर इहाँ अतक सारा कुट्टिचतनहवंय- पूकुट्टी,टीकुट्टी, करिकुट्टी.”

चेंडा (ताल बाजा) के ताल के नकल करत, वो ह एक ठन कुर्सी मं बइठे ढोल बजावत हवंय. वो ह नायिकेट्टु के बारे मं गोठियावत हवंय - एक ठन प्रच्छन्नवेशम्( जोक्कर/ एक ठन पात्र जेन ह तिर्रा दिखाय बखत बीच मं देखेइय्या मन के मनोरंजन करे आथे). डोकरा सियान ये कलाकार कहिथे, हो सकत हे मंय येला करेइय्या आखिरी मइनखे आंव.

ये तिहार उत्तरी केरल मं मध्य दिसंबर ले अप्रैल तक जगा जगा मनाय जाथे. भगवती तिर्रा जइसने कुछु प्रस्तुति, बीच-बीच मं सुस्ताय के संग 24 घंटा तक चलत रहिथे. कुछेक दीगर नृत्य आधारात धन ओकर बाद सुरु होथे अऊ बिहान होय के पहिली सिरा जाथे.

नृत्य मंदिर के बहिर के जगा मं धन मंदिर के बाग-बगीचा मं होथे – खुल्ला जगा जहाँ जिहां नृत्य करे जाय बखत ऊँच नीच के कोनो फरक नइ रहय. फेर ये हमेसा नइ रहय. कुंजीरामन बताथें, “गर कावु [बाग-बगीचा] मं नंबूदरी धन नायर [ऊंच जात] के काबू मं होथे, त बात अलग होथे.”

ये मामला मं जात के आधार ला लेके सहमत होवत, स्वामीदासन, जेन ह खुदेच तिर्रा कलाकार आंय, वो बखत ला सुरता करथें जब ओकर पनन समाज के लोगन मन मंदिर के देखरेख करेइय्या ऊंच जात के लोगन मन के संग एकेच रद्दा मं जावत नइ रहिन. फेर जब वो मन तिर्रा मं भगवान के भेस धरे नृत्य करत रहंय, त उहिच लोगन मन ओकर आगू आके सिर नवावंय.

स्वामीदासन पानन समाज (केरल मं अनुसूचित जाति के रूप मं सूचीबद्ध) ले हवंय. वो तिर्रा के राजनीतिक भूमका ला लेक भरी चेत राखथे अऊ कहिथे के इही ह वो मन ला आगू बढ़े बर प्रेरित करथे. वो ह स्कूल ले घर लहूटे अपन पोती के मुड़ मं हाथ फेरत कहिथे, “हमन ये समझ बना लेय हवन, अऊ हमन वो मन ला [ऊंच जात] देंवता उपर काबिज होय नइ देवन.”

ओकर मानना आय के तिर्रा करे के खास हक हासिल जात के मनोरंजन के जरूरत के चलते होय रहिस. वो ह बतावत जाथे, ते पायके वो मन हमन ला मंदिर भीतरी जाय ला नइ देवंय, वो बखत घलो जब हमन ‘भगवान’ बने रहिथन.”

वो ह गाँव के एक ठन ऊंच जात के नरकासेरी नायर मंदिर मं भगवती तिर्रा करिस. जिहां वो ह नृत्य करत रहिस, ओकर ले कुछु कदम तरी मं मंदिर के देवी बिराजे रहिस, अऊ वो मन ला मंदिर के वो जगा मं जाय ले रोक देय गीस.

“आयितन [छुआछूत] अभू घलो हवय. चाहे वो ह कावु होय धन मंदिर, गर मालिक ऊँच जात के आय, त उहाँ छुआछूत हवय,” वो ह केरल के कोझिकोड के नानमांडा गाँव मं अपन घर ले करीबन 300 दूरिहा अपन गाँव के मंदिर कोती आरो करत कहिथे.

73 बछर के सियान स्वामीदासन रिटायर तहसीलदार आंय. स्वामीनाथन कहिथें, “तिर्रा दिखाय बखत हमन ला कुछु ‘नियाव ले भरे प्रतिरोध’ के तत्व ला देखे ला मिलथे,” वो ह ये बात के जिकर करथे के कइसने ये कला ला कतको समाज डहर ले जात के ऊंच नीच के विरोध करे बर करे जाय सकथे. वो ह कहिथे, “गर तिर्रा सौ फीसदी आध्यात्मिक होतिस, त ये ह नइ बांचतिस. मोला लागथे के ये ह आंशिक रूप ले समाजिक, सांस्कृतिक, राजनीतिक अऊ आध्यात्मिक हवय”.

वन्नन समाज के तिर्रा कलाकार चेरुवोट्टू बालन कहिथे, “पहिली कोनो ला घलो अपन देशम [इलाका] के छोड़ कोनो घलो मंदिर मं तिर्रा करे के इजाजत नइ रहिस. वो ह आगू कहिथे, “ काय कोनो सिरिफ एकेच ठन मंदिर ले होवेइय्या आमदनी के भरोसे गुजारा करे सकथे? फेर अब बखत बदल गे हवय.” आज कलाकार अलग-अलग मंदिर मं जाके अपन प्रदर्सन करथें.

करीबन 90 बछर के बालन करीबन 70 बछर ले तिर्रा प्रदर्सन करत हवंय. कालिकट जिला के नानमांडा गाँव मं बने ओकर एक मंजिला घर मं तिर्रा लिबास मं ओकर हाल के फोटू फ्रेम मं लगे हवय अऊ एक ठन पठेरा मं रखे हवय.

बालन ह अपन सुरुआत बीस बछर के उमर मं तउन मंदिर ले करिस जिहां ओकर परिवार प्रदर्सन करत रहिस. आज ओकर एक ठन मंडली हवय जेकर सदस्य वन्नन समाज ले हवंय. ओकर कहना आय के ओकर लइका अऊ नाती-पोता मन कभू घलो प्रदर्सन नइ करिन. जेन ह पहिली मजबूरी रहिस, आज ओकर जइसने परिवार मन बर जीविका के एक ठन रद्दा बनगे हवय.

पहिली, ये कला बर नगदी मं चुकारा नइ होवत रहिस, काबर के चुकारा के नगदी तरीका नइ रहिस. बालन अऊ कुंजीरमन के बबा जइसने कलाकार मन ला चऊर, तेल धन कटहर देय जावत रहिस. फेर आज एक ठन मंडली प्रदर्सन करे के मुताबिक करीबन 50,000 ले 80,000 रूपिया कमाथे. ये रकम प्रदर्सन ले जुड़े सब्बो नर्तक अऊ बाजा बजेइय्या मन मं बांटे जाथे, एक झिन कलाकार 2,000 ले 3,000 रूपिया तक ले कमा सकथे.

कोझिकोड के चेलावूर गाँव के ऑटो चालक अऊ तिर्रा कलाकार प्रजीश कहिथें के वो ह 13 बछर के उमर ले तिर्रा सिखिस अऊ अब कतको मंडली के संग प्रस्तुति देथे. प्रजीश कहिथे, “ सिरिफ तीन महिना के तिर्रा करके गुजारा मुस्किल आय, ते पायके हरेक झिन अलग अलग काम बूता करथें. वो मन एक दिन के छुट्टी लेथे धन अपन पारी ला बदलके तिर्रा करे जाथें.” वन्नन होय के सेती, वो नइ चाहय के ओकर लइका मन घलो ओकरेच रद्दा ला धरेंय.“मंय अपन लइका मनले कहिथों के तब तक ले तिर्रा डहर झन जाव जब तक ले पढ़ई अऊ कला ला संभाले नइ सकंय, काबर के येकर आमदनी कभू थिर नइ रहय.”

येकर आयोजन के पहिली के महीना मं, जम्मो परिवार उपास अऊ पूजा करथे अऊ येकर आयोजन मं सामिल होथे. कुंजीरमन सुरता करथे, “ घर के माईलोगन मन, जब अऊ जिहां घलो कटहर काटे जावत रहिस, कटहर के रस ला तिर्रा पोसाक बर गोंद के काम मं लाय बर संकेल के राख लेवत रहिन.”

कैपणी- जेन ह तिर्रा सेती गहन अऊ दीगर सजावट बनाय के कला आय, ये मं कतको समाज के लोगन मन लगे रहिथें. येकर बाद तिर्रा कलाकार के पहिनावा घलो हवय जेन ह भारी जटिल होथे. पारंपरिक, तिरुवुडयडा (पवित्र कपड़ा) ला चऊर के पानी मं धोय जाथे. मुडी (देंवता के केस) शीप, नरियर के पाना अऊ सुपारी के खोल ले बनाय जाथे. मुखातेडुत (चेहरा मं चित्रकारी) अऊ मेलेडुत (देह मं चित्रकारी) बर उज्जर रंगबर आरिचंद (रेहना), पिंयर रंग हरदी ले अऊ लाल रंग चूना पथरा अऊ हरदी ले मिलाके बनाय जाथे.

प्रदर्सन के पहिली, कतको देंवता मन ला तंदन समाज (राज मं अन्य पिछड़ा वर्ग के रूप मं सूचीबद्ध) के एक झिन सियान ह ताड़ी चढ़ाथे. कतको जात- आधार ले बने बेवसाय के लोगन मन ये प्रदर्सन मं सहयोग करथें: मरार (मंदिर मं प्रदर्सन करेइय्या तालवादक), आसारी (बढ़ई), मूसारी (धातुकार), पेरुमकोल्लन (माहिर लोहार) अऊ तट्टन (सोनार) अऊ घलो कतको.

अऊ ऊहाँ (खुद देंवता) सब्बो जात के लोगन मन ला आभार जताथे जेन मन वाक्केनल मं प्रदर्सन मं मदद करिन – प्रदर्सन के बाद पढ़े गीस.

मंझनिया खाय के बखत उनशरम गाय जाथे, जेन ह तिर्रा प्रदर्सन के एक ठन हिस्सा आय. ये सब्बो ला वो मन के पारंपरिक बेवसाय के सुरता कराथे.

एक किसिम ले, ये ह ये रहस्य के आरो आय के कइसने बेवस्था ये तय करथे के लोगन मन अपन पारंपरिक पेशा ले जुड़े रहेंय.