‘देवता’ बन के भी, देवता से दूर

एक बेर के बात बा. थिर्रा कलाकार एक. के केलकुट्टी पवित्तर बगइचा में नाचे-गावे घरिया गाछ से एगोपत्ता तुड़ लेले रहस. उनकर पोता एम. के कुंजीरामन बतइलन, “उनका पर चार आना जुरमाना लगावल गइल काहे कि ऊ ओह स्थान के ‘अपवित्तर’ कर देलन. एह बात से कवनो फरक ना परत रहे कि ऊ ओह घरिया देवता के अवतार में रहस.”

थिर्रा कला साधे वाला लोग अनुसूचित जाति से आवेला. अइसे त, ओह लोग के ऊंच जात के मंदिर सब में कलाकार के रूप में न्योतल जाला. तबो ओह लोग खातिर एह जगह के सीमा बनल रहेला. ई अनुष्ठानिक नृत्य कावु (पवित्तर बगइचा) आ मंदिर के हाता में कइल जाला. बाकिर जहंवा देवता के मूरति रहेला, उहंवा ओह लोग के जाए आ नाचे के मनाही रहेला.

कुंजीरामन पारंपरिक रूप से कपड़ा साफ करे (फींचे) वाला, खास करके ऊंच जात के लोग खातिर, वन्नन समुदाय से आवेलन. केरल में उनका अनुसूचित जाति के रूप में मान्यता मिलल बा. छोट रहस, तबे थिर्रा कलाकार, बाऊजी आ दादा संगे ओह लोग के प्रदर्शन में जाए लगलन. आउर बाद में चालीसवा लागल तब जाके उहो प्रदर्शन शुरू कइलन.

“तललचिलोन, करियाथन, कुट्टिचाथन, वेट्टाकोरुमाकन, कन्निका करुवोन...” 87 बरिस के कुंजीरामन ऊ सभ हिंदू देवता के नाम फटाफट गिनावे लगलन, जेकर ऊ रूप धरत रहस.

एकरा बाद कुंजीरामन ‘अंजडि’ आ ‘टोट्टम पाट्टु’ गावे के सुरु कइलन. पहिल गीत ओह देवता के आह्वान खातिर होखेला, जे नाचे वाला के देह में अवतरित होखेला. दोसर गीत में कुट्टिचाथन के कथा होखेला. अइसे त जानकार लोग के कहनाम बा कि टोट्टम पाट्टु कुट्टिचाथन के ही ना, बलुक देवी भगवती के भी आह्वान के संगीत बा. कुट्टिचाथन के पूजा रक्षा आ समृद्धि खातिर कइल जाला आ उनकर छाती पर आठ पुल्ली (बिंदु) संगे दर्शावल जाला.

राग में डूबल उनकर आवाज गूंजत रहे. कुंजीरामन कहेलन, “कुट्टिचाथन के माई वल्लुवा (छोट जात) आ बाऊजी नम्बूदिरी (ब्राह्मण) रहस. ऊ छोट रहस, त एक बेर उनका बहुते भूख लागल. बहुते दिन ले ऊ भुखले रह गइला चलते एक दिन आपने गौशाला के एगो भैंस के मारके ओकर खून पी गइलन. बाऊजी अइसन बमकलन कि उनका मारके 399 टुकड़ा कर देलन.”

कोझिकोड जिला के शिवपुरम गांव में आपन दू मंजिला मकान के बरंडा में बइठल ऊ एह रिपोर्टर से कहेलन, “आउर एह तरहा हमनी इहंवा आज बहुते कुट्टिचाथन बा: पूकुट्टी, तीकुट्टी, करिकुट्टी.”

चंडा (ताल वाद्य) के थाप के नकल करत ऊ कुरसी के सीट पर अंगुरी चलावत बाड़न. नायिक्केट्टू के बारे में कहलन- ई प्रच्छन्नवेशम बा (एगो अइसन चरित्र जे थिर्रा प्रदर्शन के बीच दर्शक के मनोरंजन खातिर मंच पर आवेला). कुंजीरामन अब बूढ़ा गइल बाड़न. ऊ एह बात के इशारा करत कहलन, “संभवत: एह चरित्र के निभावे वाला हम आखिरी बानी.”

उत्तर केरल में बीच दिसंबर से अप्रिल ले ई उत्सव बड़ पैमाना पर कइल जाला. भगवती थिर्रा जइसन कुछ प्रस्तुति बीच-बीच में विराम संगे चौबीसो घंटा ले चलेला. दोसर प्रस्तुति सब आधा रात, चाहे ओकरा बाद शुरू होखेला आ भोर ले खतम हो जाला.

प्रदर्शन मंदिर के अहाता, चाहे बगइचा में होखेला. ई मंदिर के खुलल हिस्सा होखेला. प्रदर्शन होखेला त ओह लोग के जाति भेद भुला देवल जाला. बाकिर हमेशा अइसन ना होखे. कुंजीरामन कहेलन, “जदि कावु पर नंबुदिरी चाहे नायर जइसन ऊंच जात के लोग के कब्जा रहित, त स्थिति अलग होखित.”

उनकर बात से स्वामीदासनो राजी देखाई पड़लन. उहो थिर्रा कलाकार बाड़न. उनका इयाद बा कि कइसे एक समय में उनकर पनन समुदाय के लोग मंदिर के ऊंच जात के संरक्षक लोग संगे सड़क पर संगे चलियो ना सकत रहे. बाकिर जब थिर्रा में ऊ लोग देवता के रूप में प्रस्तुति देवेला त उहे लोग झुक के अभिवादन करेला.

स्वामीदासन पनन समुदाय से बाड़न (जेकरा केरल में अऩुसूचित जाति मानल जाला). ऊ थिर्रा के राजनीतिक भूमिका के प्रति बहुते सचेत बाड़न. ऊ कहेलन कि इहे उनका प्रदर्शन करे खातिर प्रेरित करेला. उनकर पोती तुरंते स्कूल से लउटली ह. ओकर माथ पर हाथ फेरावत ऊ कहेलन, “हमनी के आंख खुल गइल बा. अब ऊ (ऊंच जात) लोग के भगवान पर कब्जा ना करे देवल जाई.”

उनका हिसाब से ऊंच जात के लोग के मनोरंजन खातिर थिर्रा कला के बिकास भइल. ऊ इहो बतावेलन, “एहि से हमनी के देवता के मूरति लगे ठेके ना देवल जाला. उहो घरिया ना जब हमनी ‘देवता’ के भेष में रहिला.”

ऊ आपन गांव में ऊंच जात के दबदबा वाला नरकास्सेरी नायर मंदिर में भगवती थिर्रा के प्रदर्शन कइलन. जहंवा ऊ प्रदर्शन करत रहस, उहंवा से तनिके दूर देवी के स्थान रहे. बाकिर उनका मंदिर के ओह हिस्सा में ना जाए देवल गइल.

ऊ कहेलन, “आयिथम (छुआछूत) आजो चलन में बा. चाहे ऊ कावु होखे, चाहे मंदिर, जदि ओकर मालिक ऊंच जात के बा, त उहंवा जरूर छुआछूत होई,” अइसन कहत ऊ आपन गांव नानमंडा के मंदिर ओरी इशारा करे लगलन. मंदिर केरल के कोझिकोड में बा आउर उनकर घर से कोई 300 मीटर दूर ब.

तिहत्तर बरिस के स्वामीदासन रिटायर्ड तहसीलदार बाड़न. ऊ बतावेलन कि कइसे एह कला के इस्तेमाल सामुदायिक ऊंच-नीच के खिलाफ कइल जा सकेला, “थिररा के प्रदर्शन में हमनी के‘न्यायपूर्ण प्रतिरोध’ के तत्व नजर आवेला. जदि थिर्रा पूरा तरीका से आध्यात्मिक होखित, त आज ले ई जिंदा ना रहित. हमार मानना बा कि एकरा में एक संगे सामाजिक, सांस्कृत्तिक, राजनीतिक आ आध्यात्मिक सभे तरह के पहलू शामिल बा.”.

वन्नन समुदाय के थिर्रा कलाकार चेर्वोट्टु बालन के कहनाम बा, “हमनी के पहिले कवनो मंदिर में प्रस्तुति देवे के अनुमति ना रहे, जे उनकर आपन देशम (स्थानीय क्षेत्र) के हिस्सा ना रहत रहे.” ऊ इहो कहलन, “का केहू खाली एगो मंदिर से आपन घर के खरचा चला सकेला? बाकिर अब स्थिति बदल गइल बा. आज कलाकार लोग अलग-अलग मंदिर में प्रदर्शन करेला.”

बालन अब 90 के हो चुकलन. पछिला सात दशक से ऊ थिर्रा करत आइल बाड़न. उनकर थिर्रा प्रदर्शन के कुछ फोटो उनके एक मंजिला घर के ताखा पर सजावल बा. उनकर घर कालिकट जिला के नानमंडा गांव में पड़ेला.

बालन कोई बीस के रहस, तबे थिर्रा करे लगलन. ऊ मंदिर में जास जहंवा पहिले उनकर परिवार थिर्रा कला के प्रदर्शन करत रहे. आज उनका लगे कलाकार लोग के एगो बकायदा टोली बा. टोली के लोग वन्नन समुदाय के बा. ऊ बतावेलन कि उनकर बच्चा आ पोता लोग कबो एह प्रदर्शन में हिस्सा नइखे लेले. थिर्रा प्रदर्शन पहिले उनका जइसन परिवार खातिर मजबूरी रहे. पर आज उनका लगे दोसर विकल्पो मौजूद बा.

पहले एह कला से एतना नगदी ना मिलत रहे. एकरा खातिर पइसा में भुगतान ना कइल जात रहे. बालन आ कुंजीरामन के दादा लोग के उनकर लोग के प्रदर्शन के बदला में चाउर, तेल चाहे कटहल देवल जात रहे. बाकिर आज थिर्रा कलाकार के एगो टोली मोटा-मोटी 50,000 से 80,000 ले कमाई कर लेवेला. इसे त ई आमदनी ओह लोग के कइल गइल प्रदर्शन के गिनती पर निर्भर बा. एह आमदनी में प्रदर्शन कर रहल कलाकार आ संगीतकार लोग के भी हिस्सा बा. एगो कलाकार एक कार्यक्रम से कोई 2,000 से 3,000 कमा लेवेला.

प्रजेश कोझिकोड जिला के चेलावूर गांव के रहे वाला एगो थिर्रा कलाकार बाड़न. ऊ ऑटो भी चलावेलन. ऊ बतावत बाड़न कि ऊ 13 बरि में थिर्रा कला सीखले रहस आ अब कइएक टोली संगे प्रदर्शन करेलन. प्रजेश के कहनाम बा, “खाली तीन महीना थिर्रा के प्रदर्शन करके गुजार कइल मुस्किल बा. एहि से सभे कलाकार लोग दोसर-दोसर कामो करेला. ऊ लोग प्रदर्शन खातिर आपन काम से छुट्टी ले लेवेला, चाहे फेरु उहे हिसाब से आपन काम के समय तय करेला.” वन्नव समुदाय से ताल्लुक रखे के चलते ऊ ई ना चाहस कि उनकर बच्चा लोग भी उनके नक्शेकदम पर चले. ऊ कहेलन, “हम आपन बच्चा सब से इहे कहिला कि थिर्रा में तबले मत आव जबले पढ़ाई आ कला दूनो ना संभार सक. क्योंकि एकरा से कबो स्थिर आमदनी ना होखेला.”

कार्यक्रम शुरू होखे के पहिले के कुछ महीना में पूरा परिवार मिलके भुखले रहेला आ कार्यक्रम के हिस्सा बने खातिर प्रार्थना करेला. कुंजीरामन के याद बा, “जबो जहंवा भी कटहल तुड़ल जाला, परिवार के मेहरारू लोग कटहल के लस्सा (रेसिन) इक्ट्ठा करेला ताकि थिर्रा के ड्रेस में ओकर गोंद के रूप में इस्तेमाल कइल जा सके.”

कैपणी थिर्रा खातिर गहना आ दोसर सजावट के सामान तइयार करे के कला बा. एह में अलग-अलग समुदाय के लोग शामिल होखेला. एकरा बाद थिर्रा कलाकार लोग के ड्रेस तइयार करे के बारी आवेला. ई काम बहुते जटिल होखेला. पारंपरिक थिरुवुडयडा (पवित्तर कपड़ा) के चाउर के पानी से धोवल जाला, नरियर के पत्ता आ सुपारी के खोल से बनावल मुडी (देवता के केश). मुखाथेजुथ (चेहरा पर चित्रकारी) आ मेलेजुथ (देह पर चित्रकारी) में उज्जर रंग खातिर अरिचंद (चाउर के घोल), पियर रंग खातिर हरदी आ लाल रंग खातिर चूना आ हरदी के फेंटल जाला.

प्रदर्शन से पहिले तंदन समुदाय (राज्य में दोसर पिछड़ा वर्ग के रूप में सूचीबद्ध) के एगो बूढ़ आदमी देवता लोग के ताड़ी चढ़ावेला. जाति आधारित काम से जुड़ल कइएक लोग प्रदर्शन में आपन योगदान देवेला.

थिर्रा (स्वयं देवता) वाक्केनाल में ओह सभे जाति के लोग के आभार व्यक्त करेलन जे लोग प्रदर्शन में योगदान देलक. एकर पाठ प्रदर्शन के बाद कइल जाला.

दुपहरिया के खाना के बाद ऊनशरम के पाठ होखेला. ई थिर्रा प्रदर्शने के एगो हिस्सा बा. ई सभे के उनकर पारंपरिक पेशा के याद दिलावेला.

अनुवाद: स्वर्ण कांता