جنگل کے ویرانے میں موجود کتابخانہ کے لائبریرین

بزرگ شخص اپنی کرسی سے اٹھ کھڑے ہوئے۔ ان کی آنکھیں آنسوؤں سے نم تھیں۔ جب ترو آننت پورم کے حاضرین، جن میں اسکولی بچے بھی شامل تھے، نے کھڑے ہو کر ان کا استقبال کیا تو وہ اپنے جذبات پر قابو نہ رکھ سکے۔ ان کی زندگی میں کبھی بھی ان کے منفرد کارنامہ کی اس طرح پذیرائی نہیں ہوئی تھی۔ گزشتہ ۹ جنوری کو یہاں منعقد ہونے والے چوتھے کیرالہ قانون ساز اسمبلی بین الاقوامی کتاب میلہ (کے ایل آئی بی ایف) میں موجود حاضرین ان سے متاثر ہوئے بغیر نہ رہ سکے۔ انہوں نے کبھی کسی ایسے شخص کو نہیں دیکھا تھا، جو اپنے پسماندہ قبیلہ کے لیے اپنے خرچ پر لائبریری چلاتا ہو، اور وہ بھی کیرالہ کے دور افتادہ علاقے میں۔ اِڈُکی ضلع کی ایڈامل کُڈی پنچایت ریاست کی واحد قبائلی پنچایت ہے، اور شاید ریاست کا سب سے کم تعلیم یافتہ علاقہ بھی ہے۔

پی وی چنّ تمبی ۸۶ سال کے ہیں اور جلد ہی ۸۷ سال کے ہونے والے ہیں۔

اپنے قیام کے ۱۵ سال بعد بھی جنگل کے ویرانے میں وہ فعال لائبریری موجود ہے۔

ہم نے ۲۰۱۴ میں جس عمارت کا دورہ کیا تھا اسے جنگلی ہاتھیوں نے تباہ کر دیا ہے، لیکن لائبریری برقرار رہی۔

’’مجھے احساس تھا کہ یہ ہونے والا ہے،‘‘ چِنّ تمبی نے ہمیں کے ایل آئی بی ایف میں بتایا۔ کے اے شاجی (جو ان کے ترجمان بھی تھے) اور میں نے ان کے تہنیتی اجلاس میں ان سے بات کی۔ جب ہم ان سے پہلی بار ملے تھے تب بھی انہوں نے کہا تھا کہ جنگل اور آب و ہوا میں ہونے والی تبدیلیاں ہاتھیوں کو متاثر کر رہی ہیں۔

’’میں طویل عرصہ سے اس مسئلہ سے نبرد آزما تھا۔ ہاتھی زیادہ مشتعل ہو رہے تھے۔ مجھے اندیشہ تھا کہ وہ لائبریری پر حملہ نہ کر دیں۔ انجام کار، میں نے فیصلہ کیا کہ اگر میں اسے منتقل کرتا ہوں تو میں اپنا گھر بھی منتقل کروں گا۔ لائبریری سے حاصل ہونے والے علم کی حفاظت ضروری تھی۔‘‘ وہ نہیں چاہتے تھے کہ آموزش کا جو عمل اس سے وابستہ ہے اس میں خلل پڑے۔

چنانچہ انہوں نے لائبریری کو وہاں سے چند کلومیٹر کے فاصلہ پر منتقل کر دیا، حالانکہ وہ اب بھی ایڈامل کُڈی کے جنگلاتی علاقہ میں ہی واقع ہے۔ ’’جس ہفتہ میں وہاں سے منتقل ہوا،‘‘ وہ کہتے ہیں، ہاتھیوں نے ’’منٹوں میں پرانے ڈھانچے کو مسمار کر دیا۔‘‘ لیکن، وہ فخریہ لہجے میں کہتے ہیں، ’’میں نے تمام کتابیں وہاں سے ہٹا دی تھیں۔‘‘ جنگل کے رہائشی کی حیثیت سے وہ سمجھ گئے تھے کہ بڑے جانوروں کے برتاؤ میں کچھ تبدیلی رونما ہو رہی ہے۔ لیکن ان میں ان جانوروں کے خلاف کوئی تلخی نہیں تھی۔ لائبریری کو وہاں سے منتقل کرنا ایک دانشمندانہ فیصلہ تھا، کیوں کہ ہاتھیوں نے پورے ڈھانچہ کو تباہ کر دیا تھا۔ اور سب سے بڑھ کر یہ کہ چنّ تمبی کو اپنے گھر میں مصیبت کو دعوت دینے کی کوئی خواہش نہیں تھی۔

’’میں مُلکودھارا میں منتقل ہو گیا،‘‘ وہ کہتے ہیں، ’’اور لائبریری کو چلانے کے لیے، [بشمول خود کے] ایک ۷ رکنی کمیٹی قائم کرتے ہوئے، ایک نئی شروعات کی۔ آخر ایک نہ ایک دن تو اس دنیا سے جانا ہی ہے۔‘‘

’’علم تعلیم سے زیادہ طاقتور ہے،‘‘ اپنی لائبریری قائم کرنے کے فلسفہ کی وضاحت کرتے ہوئے انہوں نے سامعین سے زور دے کر کہا، ’’اس لیے میں نے ایسا کیا۔‘‘ انہیں معلوم ہونا چاہیے۔ چنّ تمبی کا تعلق ایک غریب لیکن بڑے قبائلی کنبے سے تھا جس کے پاس بمشکل دو ایکڑ زمین تھی، جو اتنی زرخیز نہیں تھی۔ فیملی کی کفالت میں ہاتھ بٹانے کے لیے انہوں نے چھٹی جماعت کے بعد اسکول چھوڑ دیا۔ اور آج مُتووَن قبیلہ کے لیے ویرانے میں ایک شاندار لائبریری چلا رہے ہیں۔

’’میں اِڈُکی کے اِرُمپو پالم میں واقع پہلے آدیواسی اسکول کا طالب علم تھا،‘‘ وہ کہتے ہیں۔ ’’کچھ نے درجہ چہارم تک تعلیم حاصل کی۔ میری طرح کچھ درجہ ششم تک پہنچے۔ لیکن مجھے یقین ہے کہ لوگ کتابیں پڑھ کر کسی اور چیز سے زیادہ سیکھتے ہیں۔‘‘

’’بچے لائبریری کا استعمال کر رہے ہیں،‘‘ انہوں نے ہمیں ۲۰۱۴ میں بتایا تھا۔ اور اسے ثابت کیا تھا۔ ان کے رجسٹروں کے باقاعدہ اندراجات سے ظاہر ہوتا تھا کہ ان کی ۱۶۰ کتابوں میں سے ایک چوتھائی کتابیں سرکولیشن میں تھیں۔ دو عظیم کتب خانوں کے سربراہان نے مجھے بتایا کہ کتابوں کے اسٹاک اور جاری کرنے کے تناسب میں ایسا کچھ نہیں تھا جسے کم تر سمجھا جائے۔

جب ہم نے ۲۰۱۴ میں پہلی دفعہ ’جنگل کے ویرانے میں ایک فعال لائبریری‘ شائع کی تھی تو ان کے پاس ۱۶۰ کتابیں تھیں۔ اس اسٹوری نے کیرالہ اور بیرون ملک دونوں میں پڑھنے والوں کو متاثر کیا۔ امریکہ اور برطانیہ کی لائبریریوں کے منتظمین نے اسے دوبارہ شائع کرنے کی اجازت طلب کی، اور ان کی لائبریری کو کتابیں عطیہ کیں۔ لیکن کیرالہ کے عوام نے اس معاملے میں سب کو پیچھے چھوڑ دیا۔ چند ماہ کے اندر ان کی کتابوں کی تعداد دو ہزار سے تجاوز کر گئی۔ چار نوجوانوں نے کتابوں کی الماری اپنے کندھوں پر اٹھا کر جنگل میں ۱۸ کلومیٹر کی مسافت طے کی۔ ان میں سے ایک صحافی، مرحوم آئی وی بابو شامل تھے، جو ۲۰۱۴ میں ہمارے پہلے دورہ میں ہمارے ساتھ تھے۔ جلد ہی بظاہر خوش اور حیران چِنّ تمبی نے پیغام بھیجا: ’’براہ کرم مزید کتابیں نہ بھیجیں۔ میرے پاس انہیں رکھنے کی جگہ نہیں ہے۔‘‘

کے ایل آئی بی ایف کے اسٹیج پر ہم مرلی کو ’ماش‘ (ماسٹر یا استاد) کہہ کر مخاطب کرتے ہیں۔ چِنّ تمبی کے پسندیدہ سرپرست مرلی ماش ان سے عمر میں ۳۱ سال چھوٹے ہیں۔ ’ماش‘ کا تعلق ملئی ارائن قبیلہ سے ہے۔ یہ وہ قبیلہ ہے جو تعلیم کے حصول کے معاملے میں دوسرے قبائل سے آگے ہے۔ ایڈامل کُڈی (جس کی بستی ایروپو کلّ کُڈی میں پہلی دفعہ لائبریری قائم کی گئی تھی) اس طرح کی ۲۸ بستیوں پر مشتمل ہے اور جہاں ۲۵۰۰ سے کم لوگ آباد ہیں۔ یہ دنیا کی تقریباً پوری مُتووَن آبادی ہے۔

’’مرلی ماش میرے آنے سے ایک سال پہلے ایڈامل کُڈی کے علاقہ میں آئے تھے،‘‘ چِنّ تمبی کہتے ہیں۔ انہوں نے آدیواسیوں کے اسکول میں بطور واحد استاد ملازمت اختیار کی تھی۔ ’’میں نے محسوس کیا کہ مجھے حکومت اور دوسرے لوگوں سے کچھ کتابیں مل رہی ہیں،‘‘ ماش کہتے ہیں۔ اس طرح ایک بڑے ذخیرہ کا خیال پیدا ہوا۔ لیکن مقامی لوگوں میں قبولیت حاصل کرنے کے لیے، وہ کہتے ہیں، ’’ہمیں مُتووَن قبیلہ کے ایک فرد کی ضرورت تھی۔‘‘

ایسے میں چنّ تمبی داخل ہوتے ہیں۔

اور جنگل کے ویرانے میں ایک فعال لائبریری کا جنم ہوتا ہے۔

چِنّ تمبی کو صرف ایک بات کا افسوس ہے۔ جب ہم اپنے ۲۰۱۴ کے دورہ کے بعد جدا ہو رہے تھے، تو ہمیں ۱۶۱ویں کتاب ملی تھی۔ وہ اپنی سوانح عمری لکھ رہے تھے۔ ’’کیا آپ نے اسے مکمل کر لیا ہے؟‘‘ ہم نے دریافت کیا۔ ’’نہیں،‘‘ انہوں نے جواب دیا۔ ’’میں نے تقریباً ۲۵ فیصد مسودہ مکمل کر لیا تھا جب ترو اننت پورم کے ایک صحافی نے مجھ سے لے لیا تھا۔ اس نے اسے مکمل کرنے اور کوئی پبلشر تلاش کرنے میں میری مدد کرنے کا وعدہ کیا تھا۔‘‘

’’میں نے اسے دوبارہ نہیں دیکھا،‘‘ وہ افسوس کرتے ہوئے کہتے ہیں۔

آج انہیں جو پہچان ملی وہ کے ایل آئی بی ایف کی انفرادیت کی مرہون منت ہے۔ ہمیں بتایا گیا ہے کہ کیرالہ واحد ہندوستانی ریاست ہے، جس کی قانون ساز اسمبلی میں ادبی کتابوں کا میلہ منعقد ہوتا ہے۔ یہاں، ہر ضلع (اور کچھ تعلقوں میں بھی) لٹ فیسٹ (ادبی میلہ) کا انعقاد ہوتا ہے۔ ریاست کے ۱۴۰ اراکین اسمبلی میں سے ہر ایک کو اپنے انتخابی حلقوں کے لیے کتابیں خریدنے کی غرض سے ۳ لاکھ روپے دیے جاتے ہیں۔ لیکن یہ صرف پیسے خرچ کر سکتے ہیں۔ ہمیں بتایا گیا کہ پورے ہندوستان سے ۱۷۰ کے قریب پبلشرز کے ایل آئی بی ایف میں آتے ہیں۔ اور اس ایڈیشن میں کتابوں کی تقریباً ۲۴۰ اسٹالیں لگی ہیں۔ حیران کرنے والی بات یہ ہے کہ یہاں صرف ایک ہفتہ میں ۱۰ کروڑ روپے سے زیادہ کی تجارت ہوتی ہے۔ اس دوران اسمبلی کمپلیکس کے تمام گیٹ عوام کے لیے کھول دیے جاتے ہیں۔ ان سات دنوں میں، عوام اندر آسکتے ہیں، انہیں کم سے کم حفاظتی جانچ کا سامنا کرنا پڑتا ہے۔

سیشن کے اختتامی مرحلہ میں ہم نے سامعین اور وہاں موجود صحافیوں سے اپیل کی کہ وہ اس بے ایمان کا سراغ لگائیں اور اس مسودہ کی بازیافت کریں۔ ہم نے اس نامعلوم رپورٹر سے بھی مسودہ واپس کرنے کی اپیل کی۔ چِنّ تمبی نے اعلان کیا کہ اگر کچھ مدد مل جائے، تو انہیں اسے ’’دوبارہ لکھنے میں خوشی ہوگی۔‘‘ کیرالہ تو کیرالہ ہے، سیشن ختم ہونے سے پہلے ہی رضاکاروں کی قطار کھڑی ہو گئی۔

اور شاید ایک دن پوری کہانی سنائی جائے گی۔ ایڈامل کُڈی اور اس کے ہاتھیوں کی۔ ایسے لوگوں کی جو سیکھنے اور علم حاصل کرنے کا جنون رکھتے ہیں۔ کیرالہ کی سب سے چھوٹی لائبریری، مگر شاید دنیا کے عظیم ترین – اور یقیناً سب سے باوقار – لائبریرین کی۔

ایڈامل کُڈی میں ۱۲سال قبل:

یہاں ایک لائبریری؟ ضلع اِڈُکّی کے جنگلات اور ویرانوں میں؟ یہ ہندوستان کی سب سے زیادہ خواندہ ریاست کیرالہ کا نسبتاً کم شرح خواندگی والا علاقہ ہے۔ ریاست کی پہلی منتخب قبائلی ولیج کونسل کی اس بستی میں صرف ۲۵ کنبے آباد ہیں۔ یہاں سے کتاب مستعار لینے کے خواہشمند کسی بھی دوسرے شخص کو گھنے جنگل سے گزر کر ایک طویل سفر طے کرنا پڑے گا۔ کیا وہ واقعی ایسا کریں گے؟

’’ہاں، بالکل،‘‘ ۷۳ سالہ پی وی چِنّ تمبی کہتے ہیں، جو ایک چائے فروش کے ساتھ ساتھ اسپورٹس کلب کے منتظم اور لائبریرین بھی ہیں۔ ’’وہ آتے ہیں۔‘‘ ان کی چھوٹی سی دکان ایڈامل کُڈی کے پہاڑی چوراہے پر واقع ہے۔ یہاں وہ چائے، ’مکسچر‘، بسکٹ، ماچس اور دیگر ضروری اشیاء فروخت کرتے ہیں۔ یہ کیرالہ کی سب سے دور افتادہ پنچایت ہے، جہاں صرف ایک آدیواسی برادری، مُتووَن، آباد ہے۔ وہاں تک پہنچنے کے لیے مونار کے قریب واقع پیٹّی مُڈی سے ۱۸ کلومیٹر پیدل چلنا پڑتا ہے۔ اور چِنّ تمبی کی چائے کی دکان میں موجود لائبریری تک پہنچنے کے لیے اس سے بھی زیادہ دوری طے کرنی پڑتی ہے۔ جب ہم ان کے گھر پہنچتے ہیں تو ان کی اہلیہ کام کے سلسلے میں باہر گئی ہوئی ہوتی ہیں۔ وہ بھی مُتووَن برادری سے تعلق رکھتی ہیں۔

’’چِنّ تمبی،‘‘ میں حیران ہو کر پوچھتا ہوں۔ ’’میں نے چائے پی لی ہے۔ میں خورد و نوش کی چیزیں دیکھ رہا ہوں۔ لیکن آپ کی لائبریری کہاں ہے؟‘‘ وہ اپنی مخصوص مسکراہٹ کے ساتھ ہمیں چھوٹے سے ڈھانچہ کے اندر لے جاتے ہیں۔ ایک تاریک کونے سے جوٹ کے دو بڑے بڑے تھیلے نکالتے ہیں، ایسے تھیلے جن میں ۲۵ کلو یا اس سے زیادہ چاول رکھا جا سکتا ہے۔ تھیلے میں ۱۶۰ کتابیں ہیں۔ یہ ان کی کل کائنات ہے۔ وہ ان تھیلوں کو ایک چٹائی پر احتیاط سے رکھ دیتے ہیں، جیسا کہ وہ لائبریری کے اوقات کے دوران ہر روز کرتے ہیں۔

آٹھ مسافروں کا ہمارا گروپ حیرت سے کتابوں کو الٹ پلٹ کر دیکھتا ہے۔ ہر ایک کتاب ادب کا ایک مرقع ہے، ایک کلاسک ہے، یہاں تک کہ سیاسی موضوعات کی کتابیں بھی ہیں۔ کوئی سنسنی خیز، بیسٹ سیلر یا سستا ادب نہیں ہے۔ تمل رزمیہ نظم ’ سیلاپٹّی کرم‘ کا ملیالم ترجمہ موجود ہے۔ ویکم محمد بشیر، ایم ٹی واسودیون نائر، کملا داس کی کتابیں دستیاب ہیں۔ ایم مکندن، للتامبیکا انترجنم اور دیگر کی کتابیں بھی شامل ہیں۔ مہاتما گاندھی پر کتابچوں کے ساتھ ساتھ مشہور بنیاد پرست پولیمکس تھوپِّل بسی کی ’یو میڈ می کمیونسٹ‘ (تم نے مجھے کمیونسٹ بنا دیا) بھی مل جاتی ہے۔

’’لیکن چِنّ تمبی، کیا یہاں کے لوگ واقعی ایسی چیزیں پڑھتے ہیں؟‘‘ باہر آکر ہم ان سے پوچھتے ہیں۔ مُتووَن، زیادہ تر آدیواسی برادریوں کی طرح، دیگر ہندوستانیوں کے مقابلے میں زیادہ پسماندہ اور تعلیم چھوڑنے کی بدترین شرح کا شکار ہیں۔ جواب میں وہ اپنی لائبریری کا رجسٹر نکالتے ہیں۔ ادھار لی گئی اور واپس کی گئی کتابوں کا یہ ایک بہت احتیاط سے رکھا گیا ریکارڈ ہے۔ خواہ اس بستی میں صرف ۲۵ کنبے آباد ہیں، لیکن ۲۰۱۳ میں ۳۷ کتابیں ادھار لی گئی تھیں۔ یہ ۱۶۰ کتابوں کے کل اسٹاک کا چوتھائی کے قریب ہے، یہ ایک معقول تناسب ہے۔ لائبریری کی یک وقتی رکنیت کی فیس ۲۵ روپے ہے اور ماہانہ فیس ۲ روپے ہے۔ آپ جو کتاب ادھار لیتے ہیں اس کے لیے کوئی علیحدہ ادائیگی نہیں کرنی پڑتی ہے۔ کالی اور بغیر چینی کی چائے مفت میں مل جاتی ہے۔ ’’لوگ پہاڑیوں سے تھکے ہارے اندر آتے ہیں۔‘‘ یہاں صرف بسکٹ، مکسچر اور دیگر اشیاء کی قیمت ادا کرنی ہوتی ہے۔ کبھی کبھی کسی ملاقاتی کو سادہ کھانا بھی مفت مل سکتا ہے۔

کتابیں جاری کرنے اور واپس کرنے کی تاریخیں اور کتابیں لینے والوں کے نام صفائی کے ساتھ ان کے رجسٹر میں درج ہیں۔ اِلانگو کی کتاب ’سیلاپٹّی کرم‘ ایک سے زیادہ بار لی گئی ہے۔ اس سال پہلے ہی کئی اور کتابیں جاری کی جا چکی تھیں۔ معیاری ادب یہاں کے جنگلوں میں پروان چڑھ رہا ہے، جسے ایک پسماندہ آدیواسی گروہ لطف اندوز ہو رہا ہے۔ یہ ایک آئینہ دکھانے والی حقیقت تھی۔ میرا خیال ہے کہ ہم میں سے کچھ ہمارے اپنے شہری ماحول میں پڑھنے کی عادت کی افسوسناک صورتحال کے بارے میں سوچ رہے تھے۔

ہمارے گروپ کے کئی اراکین قلم سے روزی کماتے ہیں، لیکن ان کی انا کو ایک جھٹکا لگنے والا تھا۔ نوجوان وشنو ایس کیرالہ پریس اکیڈمی کے صحافت کے تین طالب علموں میں سے ایک ہیں، جو ہمارے گروپ کا حصہ تھے۔ کتابوں کے ذخیرہ میں سے ایک مختلف قسم کی ’کتاب‘ ان کے ہاتھ لگی۔ یہ کتاب رول دار نوٹ بک پر ہاتھ سے لکھے ہوئے کئی صفحات پر مشتمل تھی۔ ابھی تک اس کا کوئی عنوان نہیں دیا گیا تھا، لیکن یہ تو چِنّ تمبی کی سوانح عمری تھی۔ وہ اس پر زیادہ کام نہیں کر سکے، وہ معذرت خواہانہ انداز میں کہتے ہیں۔ لیکن وہ اس پر کام کر رہے ہیں۔ ’’چِنّ تمبی، ہمیں اس میں سے کچھ پڑھ کر سنائیں۔‘‘ تحریر زیادہ طویل نہیں تھی، لیکن نامکمل تھی۔ یہ نہایت سلیقہ سے سنائی گئی ایک کہانی تھی۔ یہ تحریر ان کے سماجی اور سیاسی شعور کی ابتدائی بیداری کا احاطہ کرتی ہے۔ اس کا آغاز دراصل مہاتما گاندھی کے قتل سے ہوتا ہے جب مصنف کی عمر تقریباً سات سال کی تھی۔ اس سانحہ نے ان پر گہرا اثر ڈالا تھا۔

چِنّ تمبی کہتے ہیں کہ انہیں ایڈامل کُڈی واپس آکر اپنی لائبریری قائم کرنے کی تحریک مُرلی ’ماش‘ (یعنی استاد) سے ملی۔ مُرلی ’ماش‘ ان علاقوں کی ایک معروف اور قابلِ احترام شخصیت اور معلم ہیں۔ وہ خود بھی آدیواسی ہیں، مگر ان کا تعلق ایک مختلف قبیلہ سے ہے۔ یہ قبیلہ اس پنچایت سے باہر منکُولم میں آباد ہے۔ انہوں نے اپنی زندگی کا بڑا حصہ مُتووَن برادری کے ساتھ اور ان کے لیے کام کرتے ہوئے گزارا ہے۔ ’’ماش نے ہی مجھے یہ راستہ اختیار کرنے کو کہا،‘‘ چِنّ تمبی کہتے ہیں، جو خود کو کوئی غیرمعمولی کام کرنے والا نہیں سمجھتے، حالانکہ وہ واقعی ایسا کر رہے ہیں۔

ایڈامل کُڈی یہاں کی ۲۸ بستیوں میں سے ایک ہے، جس کی آبادی ڈھائی ہزار سے بھی کم ہے۔ یہاں دنیا کی تقریباً پوری مُتووَن برادری آباد ہے۔ ان میں سے بمشکل سو افراد ایروپوّ کلّ کُڈی میں رہتے ہیں۔ ایڈامل کُڈی، جو سو مربع کلومیٹر سے زائد جنگلات پر پھیلا ہوا ہے، ریاست کی وہ پنچایت بھی ہے جہاں ووٹروں کی تعداد سب سے کم (بمشکل پندرہ سو) ہے۔ یہاں سے واپسی کے لیے ہمیں اپنا منتخب کردہ راستہ ترک کرنا پڑتا ہے۔ جنگلی ہاتھیوں نے تمل ناڈو کے شہر ولپرئی جانے والے اُس ‘شارٹ کٹ’ پر قبضہ جما لیا ہے، جسے ہم نے اختیار کرنے کا ارادہ کیا تھا۔

اس کے باوجود یہاں چِنّ تمبی بیٹھے ہیں۔ وہ ایک ایسی لائبریری چلاتے ہیں جو شاید دنیا کی ویران ترین لائبریریوں میں سے ایک ہے۔ وہ اسے فعال رکھتے ہیں۔ اپنے غریب مگر کتابوں کے شوقین قارئین کی علم کی بھوک مٹاتے ہیں – اور ساتھ ہی انہیں چائے، ’مکسچر‘ اور ماچس بھی فراہم کرتے ہیں۔ ہم، جو عموماً شور مچانے والا گروہ تھے، اس ملاقات سے متاثر اور دل گرفتہ ہو کر کچھ خاموشی کے ساتھ وہاں سے روانہ ہوتے ہیں۔ آگے درپیش طویل اور پُرخطر راستے پر ہماری نظریں جمی ہیں۔ ہمارے ذہنوں میں پی وی چِنّ تمبی کا خیال گردش کر رہا ہے، جو ایک غیرمعمولی لائبریرین ہیں۔

ترجمہ نگار: شفیق عالم