جنگ اور پلامو: قرض سے بدتر کچھ بھی نہیں

’’لاک ڈاؤن کے دوران، وشاکھاپٹنم سے اپنے گھر پہنچنے کے لیے ہمیں مسلسل ۱۲ دنوں تک پیدل چلنا پڑا تھا،‘‘ ۴۵ سالہ کئل بھوئیاں ۲۰۲۰ میں کووڈ۔۱۹ کے خوفناک تجربے کو یاد کرتے ہوئے کہتے ہیں۔ اُس وقت وہ اگنم پُڈی میںلارسن اینڈ ٹوبروکے تعمیراتی مقام پر بطور دہاڑی مزدور کام کرتے تھے۔

اُس وقت تقریباً ۱۰۰۰ کلومیٹر کا پیدل سفر کر کے جھارکھنڈ جانے والوں میں ان کے ساتھ تقریباً ۸۰ لوگ تھے، جن میں ۱۰ خواتین اور چار بچے بھی شامل تھے۔ ’’ہم رات دن چلتے رہے۔ جب بہت تھک جاتے تو ایک گھنٹہ سو لیتے، پھر دوبارہ چل پڑتے۔‘‘ جھارکھنڈ کے پلامو ضلع کے ربدا گاؤں تک کا پورا سفر انہوں نے اسی طرح طے کیا۔

تقریباً چھ سال بعد، کئل نے ایسا ہی سفر دوبارہ کیا، مگر اس بار وہ ٹرین سے قومی راجدھانی خطہ (این سی آر) سے لوٹے۔ لیکن اس بار ان کی واپسی ایک دوسری خوفناک حقیقت کی طرف ہو رہی تھی۔

وہ ایسے قرض میں ڈوب چکے ہیں جسے وہ ادا نہیں کر سکتے۔

امریکہ و اسرائیل کے ذریعہ ایران کے خلاف جنگ کے باعث پیدا ہونے والی مائع پٹرولیم گیس (ایل پی جی) سلنڈروں کی شدید قلت سے سب سے زیادہ مہاجر مزدور متاثر ہوئے ہیں۔

مارچ کے شروع میں، ’’ہر کوئی یہ کہنے لگا تھا کہ ایک اور لاک ڈاؤن آنے والا ہے،‘‘ وہ یاد کرتے ہیں۔ اُس وقت وہ نوئیڈا میں لارسن اینڈ ٹوبرو کے تعمیراتی مقام پر بطور راج مستری یومیہ ۵۰۰ روپے کی اجرت پر کام کر رہے تھے۔

پھر ایل پی جی کی قیمتیں تین گنا بڑھ گئیں، یعنی ۹۰ روپے فی کلو سے بڑھ کر ۳۰۰ روپے فی کلو ہو گئیں۔ ’’ہم نے [کھانا پکانےکے لیے] شٹرنگ کا سامان اور پلائی ووڈ جلانا شروع کیا،‘‘ وہ کہتے ہیں۔ ’’کسی طرح ہم نے کام چلایا۔‘‘ مگر صرف دس دنوں تک ہی گزارہ ہو پایا۔

لوگ واپس جانے لگے۔ ’’میں نے ٹھیکیدار سے کہا کہ میرا حساب کر دو – میری بیٹی کی شادی ہے اور میں نہیں چاہتا کہ لاک ڈاؤن کی طرح پھر کہیں پھنس جاؤں،‘‘ کئل کہتے ہیں۔ ٹھیکیدار نے پیسے نہیں دیے، اور کئل اپنے ۴۰ ہزار روپے چھوڑ کر ہی واپس آ گئے۔

گزشتہ ۱۰ اپریل کو وہ اور دس دوسرے لوگ نئی دہلی ریلوے اسٹیشن سے کھچاکھچ بھرے ایک جنرل ڈبہ میں سوار ہو گئے۔ ’’پیر رکھنے کی بھی جگہ نہیں تھی۔ ہمارے پاؤں سوج گئے تھے۔ ہم ۱۴ گھنٹے تک کھڑے رہے، پھر ڈیہری پہنچنے کے بعد بس سے گھر آئے۔‘‘

ان کی دو بیٹیاں اور ایک بیٹا ہے – اور ان کے سر پر ایک لاکھ روپے کا قرض بھی ہے۔ جلد ہی بیٹی کی شادی ہونے والی ہے، لہٰذا وہ کہتے ہیں، ’’میں نے ایک مہاجن سے ڈیڑھ لاکھ روپے مزید لیے، جو ہر سو روپے پر پانچ روپے ماہانہ سود لیتا ہے، اور مزید ۵۰ ہزار روپے ایک ٹھیکیدار سے ایڈوانس لیے۔‘‘ انہیں اپنے قرضوں پر ہر ماہ تقریباً ۱۰ ہزار روپے سود ادا کرنا پڑتا ہے۔
’’کیا کریں، شادی ہے، اپنی عزت تو بچانی ہے۔‘‘

پچھلے لاک ڈاؤن کے برعکس، کئل اس بار ۱۸ مہینے تک گھر پر نہیں رکیں گے۔ شادی ۱۵مئی کو ہونے والی ہے اور اس کے صرف دو دن بعد ہی باپ اور بیٹا کام کی تلاش میں چنئی روانہ ہو جائیں گے۔

دوہری شفٹ – یعنی ۱۶ گھنٹے کام کر کے وہ روزانہ ۱۱۰۰ روپے کما سکتے ہیں۔ لیکن، کیا وہ ہر روز اتنا کام کر پائیں گے؟ ’’کرنا پڑے گا۔ جو پیسہ لیا ہے، اسے واپس بھی تو کرنا ہے۔‘‘

کئل اکیلے نہیں ہیں۔ ’’اس ٹولہ [بستی] میں کم از کم ۲۰ لوگ واپس لوٹ آئے ہیں،‘‘ وہ بتاتے ہیں۔

مینا دیوی بھی اُن میں سے ایک ہیں۔

گزشتہ جون میں، بھوئیاں دلت برادری سے تعلق رکھنے والیں مینا دیوی (۳۸) اپنی سہیلیوں سریتا دیوی (۳۴) اور مُنی دیوی (۴۵) کے ساتھ چنئی گئی تھیں، جہاں وہ پیرمبدور میں جے کے ٹائر فیکٹری میں صفائی کا کام کرتی تھیں۔ مینا کہتی ہیں، ’’آٹھ گھنٹے کے ۶۰۰ روپے ملتے تھے۔ یہ اچھی کمائی تھی۔‘‘

انہوں نے پہلی بار ۲۰۲۳ میں اپنی بڑی بیٹی کی شادی کے بعد مزدوری کے لیے باہر جانا شروع کیا۔ اس شادی کے لیے انہوں نے دس روپے سیکڑا (ماہانہ ۱۰ فیصد) کے شرح سود پر ۲۵ ہزار روپے کا قرض لیا تھا۔ صرف دو سال میں یہ قرض بڑھ کر ۸۰ ہزار روپے ہو گیا۔ اس قرض کو چکانے کے لیے انہوں نے ایک مائیکروفنانس گروپ سے ۶۰ ہزار روپے لیے، مگر قرض ادا نہ کر سکیں، پھر دوسرے گروپ سے ۷۵ ہزار روپے مزید قرض لیا۔ اب وہ ہر مہینے ۷۲۰۰ روپے سود ادا کرتی ہیں۔

ان کے شوہر جوکھن بھوئیاں (۴۵) اور بیٹا نریش (۱۷) بھی دہاڑی مزدوری کر کے کچھ پیسے کماتے ہیں۔ ’’پھر بھی یہ کافی نہیں ہوتا۔‘‘

مینا، سریتا اور مُنی جیسی عورتیں ایل پی جی کی قلت ختم ہونے کا انتظار نہیں کر سکتیں۔ ہر صبح وہ ۲۰ کلومیٹر دور ڈالٹن گنج کی مزدور منڈی جاتی ہیں۔ مینا بتاتی ہیں، ’’صبح ۸ بجے مزدوروں سے بھرے تقریباً ۸-۹ ٹیمپو روانہ ہو جاتے ہیں۔ کبھی کبھی ان میں آدھے مزدور عورتیں ہوتی ہیں۔‘‘ کام ملنے پر وہ دن کے ۴۵۰ روپے کما لیتے ہیں، ورنہ خالی ہاتھ واپس لوٹنا پڑتا ہے۔

مینا جو پیسے گھر لاتی ہیں، اسے اکثر ان کا شوہر شراب نوشی میں اڑا دیتا ہے، اور مزاحمت کرنے پر انہیں مارتا بھی ہے۔ مینا کی ایک اور بیٹی ہے، جس کی شادی اگلے سال کرنی ہے۔ ’’ہم یہ قرض آخر کیسے چکائیں گے؟‘‘ وہ پریشانی سے پوچھتی ہیں، کیوں کہ انہیں معلوم ہے کہ ایک اور قرض لینا ناگزیر ہے۔

’’ہم شاید مر جائیں، مگر یہ قرض کبھی ختم نہیں ہوں گے۔‘‘