करजा ले बड़े अऊ कोनो दुरदसा नइ

“लॉकडाउन बखत, विशाखापटनम ले घर जाय बर हमन सरलग 12 दिन तक ले रेंगत जावत रहेन,” 45 बछर के कैल भुइयां कहिथे, जेन ह सन 2020 के कोविड-19 के वो भयंकर बखत ला सुरता करत रहिस. वो बखत, वो ह अगानमपुड़ी मं लार्सन एंड टुब्रो के एक ठन काम के जगा मं रोजी-मजूरी करत रहिस.

वो मन करीबन 80 झिन रहिन-जेन मं 10 झिन माइलोगन अऊ चार झिन लइका रहिन- झारखंड जाय बर करीबन 334 कोस (1,000 किलोमीटर) रेंगत जावत रहिन. “हमन दिन-रात रेंगत जावत रहेन. जब थक जावन, त घंटा भर सुत जावन, अऊ ओकर बाद फिर ले रेंगे सुरु कर देवन.” ये रद्दा झारखंड के पलामू जिला के ओकर घर राबदा गाँव तक के रहिस.

करीबन छै बछर बाद ,कैल ह वइसनेच घर हबरिस, ये दारी ट्रेन मं बइठ के, देस के रजधानी के इलाका ले. एक पईंत अऊ डर के माहौल मं लहूटत.

वो ह घेंच तक ले करजा मं बूड़े हवय, जेन ला वो ह चुकता करे नइ सकत हवय.

ईरान ले अमेरिका-इजरायल के लड़ई सेती रसोई गैस सिलेंडर के भारी कमी के सबले जियादा असर परे लोगन मन मं परदेस जवेइय्या मजूर मन हवंय.

मार्च के सुरु मं, “हर कोनो कहे लगिस के एक ठन अऊ लॉकडाउन अवेइय्या हे,” वो ह सुरता करत कहिथे. वो ह नोएडा मं एक एंड टी के काम वाले जगा मं राजमिस्त्री के काम करत रहिस, वोला रोजी मं 500 रूपिया मिलत रहिस.

ओकर बाद रसोई गैस के दाम तीन गुना बढ़गे – 90 रूपिया ले बढ़के 300 रूपिया किलो हो गीस. “हमन राधें बर ढलाई के टूटे लकरी अऊ प्लाईवुड बारेन,” वो ह कहिथे. “ जइसने- तइसने काम चल गीस. फेर ये ह मुस्किल ले दसेच दिन चले सकिस.

लोगन मन जाय लगिन. कैल कहिथे, “मंय ठेकादार ले अपन हिसाब-किताब करे ला कहेंय- मोर बेटी के बिहाव हवय अऊ मंय लॉकडाउन जइसने फंसे नइ चाहंव.” ठेकादार ह पइसा नइ दिस अऊ कैल अपन 40,000 रूपिया बगेर लेय लहूटगे.

10 अप्रैल के दिन, वो अऊ आने दस झिन, नई दिल्ली रेल टेसन मं जनरल डब्बा मं मवेसी कस भरा गें. “गोड़ राखे के जगा घलो नइ रहिस. हमर गोड़ मन फूलगे रहिस. हमन 14 घंटा डेहरी तक ठाढ़े-ठाढ़े आयेन, अऊ ओकर बाद बस मं बइठ के घर हबरेन.”

ओकर मन के दू झिन बेटी अऊ एक बेटा हवय – अऊ 1 लाख के करजा घलो. बेटी के बिहाव नजीक आय सेती, “मंय एक झिन महाजन ले 1.5 लाख रूपिया अऊ करजा लेंय, जेकर महिना के सैकड़ा पाछू 5 रूपिया बियाज देय ला परही; अऊ येकर छोड़, एक झिन ठेकादार ले 50,000 रूपिया बयाना घलो लेंय.” ओला अपन करजा के बियाज महिना मं करीबन 10,000 रूपिया भरे ला परथे. “काय करबो, बिहाव हवय, हमन ला अपन इज्जत बचायच ला हवय.”

बीते लॉकडाउन के उलट, कैल फिर ले कमाय-खाय जाय बर डेढ़ बरस नइ अगोरय. 15 मई के बिहाव के दू दिन बाद, बाप-बेटा कमाय खाय बर चेन्नई चले जाहीं.

दू पाली -16 घंटा- बूता करके वो ह रोज के 1,100 रूपिया कमा सकथे. काय वो ह रोज अइसने करे सकही? “हमन ला करेच ला परथे. हमन जेन पइसा उधार लेगे हन, हमन ला वोला चुकानाच हे.”

कैल अकेल्ला नो हे. “ये टोला [बस्ती] के कम से कम 20 झिन लहूट आय हवंय,” वो ह कहिथे.

मीना देवी वो मन ले एक झिन आय.

बीते जून मं, 38 बछर के ये माइलोगन ह अपन सहेली -34 बछर के सरिता देवी अऊ45 बछर के मुन्नी देवी –मन के संग, जेन मन भूइयां दलित समाज ले हवंय, पेरुम्बुदुर मं जेके टायर फ़ैक्टरी मं साफ-सफ़ाई के बूता करे चेन्नई रवाना होइन. मीना बताथे, “हमन ला आठ घंटा बूता करे के 600 रूपिया मिलत रहिस, ये ह बढ़िया कमाई रहिस.”

वो ह सबले पहिली साल 2023 मं अपन बड़े बेटी के बिहाव के बाद ले परदेस जाय सुरु करिस, जेकर बर वो ह दस रूपिया सैकड़ा पाछू (10 फीसदी महिना) मं 25,000 रूपिया करजा लेगे रहिस. सिरिफ दू बछर मं ये रकम बढ़के 80,000 रूपिया हो गीस. येला चुकाय बर, वो ह एक ठन माइक्रोफ़ाइनेंस समूह ले 60,000 रूपिया करजा लेगिस फेर वो ह ये करजा छूटे नइ सकिस; तब वो ह एक ठन आने समूह ले 75,000 रूपिया अऊ लीस. अब वोला हरेक महिना 7,200 रूपिया बियाज के चुकाय ला परथे.

ओकर घरवाला 45 बछर के जोखन भुइयां, अऊ ओकर बेटा 17 बछर के नरेश घलो रोजी मजूरी करके कुछु कमा लेथें. “ओकर बाद घलो, नइ पूरय.”

मीना, सरिता अऊ मुन्नी जइसने माईलोगन मन रसोई गैस मिले के रद्दा देखत नइ रहे सकंय. हरेक बिहनिया, वो मन 7 कोस दूरिहा डाल्टनगंज के मज़दूर मंडी (लेबर मार्केट) जाथें. मीना कहिथे, “बिहनिया 8 बजे तक, 8-9 टेम्पो मं भरे मजूर निकरथें. कभू-कभू वो मन मं आधा माइलोगन मन होथें.” गर वो मन ला काम-बूता मिल जाथे, त रोजी मं 450 रूपिया कमा लेथें. गर नइ मिलय, त जुच्छा हाथ लहूट आथें.

मीना जेन पइसा घर लाथे, ओला अक्सर ओकर घरवाला दारु मं उड़ा देथे – जब वो ह मना करथे त ओकर घरवाला ओला मारथे-पीटथे. मीना के एक झिन अऊ बेटी हवय, जेकर बिहाव अवेइय्या बछर होही. “हमन ये करजा मन ला कइसने छूटे सकबो?” वो ह सवाल करत कहिथे, ये जानत के एक ठन अऊ करजा लेगे अब तय हवय.

“हमन मर सकथन, फेर ये करजा नइ.”