लड़ाई आ पलामू: करजा से हारल परदेसिया मजदूर

“लॉकडाउन में हमनी 12 दिन पैदल चलके विशाखापट्टनम से गांव पहुंचनी,” 45 बरिस के काइल भुइंया 2020 के कोरोना काल के ऊ मुश्किल दिन इयाद करत बाड़न. ऊ तब अगनमपुड़ी में लार्सन एंड टर्बो कंपनी के निर्माण साइट पर दिहाड़ी मजूर रहस.

दस ठो मेहरारू आ चार ठो बच्चा सहित 80 लोग कोई एक हजार किमी पैदल चल के झारखंट लउटल रहे. “हमनी दिन रात चलनी. बीच में थक जाईं, त एक घंटा खातिर सुस्ताईं आ फेरो चल दीहीं.” एह तरहा ऊ लोग झारखंड के पलामू जिला में रबदा गांव पहुंचल.

आज ओह घटना के छव बरस बाद, काइल एक बेरा फेरो अइसने एगो यात्रा पर निकलल बाड़न. अबकी एनसीआर (नेशनल कैपिटल रीजन) से, ट्रेन से. दोसरा सिरा पर एगो आउर नया संकट इंतजार में बा.

काइल करजा में गरदन ले डूबल बाड़न आउर एकरा उतारे के कवनो रस्तो नइखे सूझत.

ईरान आ अमेरिका-इजराइल के बीच के युद्ध से पैदा एलपीजी गैस संकट में सबले जादे परदेसिया मजूरे लोग पिसा रहल बा.

मार्च के सुरु में, “हर कोई बोले लागल, एगो आउर लॉकडाउन आवे वाला बा,” ऊ इयाद करत कहलन. ऊ नोएडा में लार्सन एंड टर्बो के निर्माण स्थल पर 500 रुपइया रोज पर, राजमिस्त्री के काम करत रहस.

गैस के दाम तीन गुना बढ़के 90 से 300 रुपइए किलो हो गइल. “मजबूरी में हमनी के खाना बनावे खातिर शटरिंग (कंक्रीट डाले खातिर कामचलाऊ सांचा) वाला लकड़ी के पट्टा आ प्लाईवुड इस्तेमाल करे पड़ल,” ऊ कहलन. “केहूंगे काम चलल.” मात्र दस दिन.

लोग धीरे-धीरे गांव लौटे लागल. काइल बतावत बाड़न, “ठेकेदार से कहनी, हिसाब कर द. गांव में हमार लइकी के बियाह बा. आउर हम इहंवा पहिले वाला लॉकडाउन जेका फेरो फंसे के ना चाहत रहीं.” बाकिर ठिकेदार तनिको ना सुनलक. उनका आपन 40,000 रुपइया मजूरी बकाया छोड़ के घर लउटे पड़ल.

दस अप्रिल के दिन ऊ आपन दस ठो साथी मजूर संगे नई दिल्ली रेलवे स्टेशन, जनरल बोगी में कइसहूं चढ़ गइलन. ऊ बतावत बाड़न, “भीड़ बहुते रहे, गोड़ धरे के एको रत्ती जगह ना रहे. ठाड़-ठाड़ गोड़ फुल गइल. 14 घंटा बाद डेहरी पहुंचनी, तब जाके उहंवा से घरे खातिर बस लेनी.”

उनकर दू ठो लइकी आउर एगो लइका बाडन. आउर माथ पर एक लाख के करजो बा. बेटी के बियाह लगे आवत देख, “घरे आके महाजन से 5 प्रतिशत ब्याज पर डेढ़ लाख के आउरो करजा उठावे पड़ल. ऊपर से ठिकेदार से 50 हजार के एडवांसो लेले रहीं.” उनका हर महीना 10,000 खाली सूद चुकावे के पड़ता. “का करीं, मजबूरी बा. बियाह बा, इज्जत त ना गंवा सकीं.”

पछिला लॉकडाउन जइसन अबकी काइल 18 महीना घर पर रुक ना सकिहन. 15 मई के बेटी के बियाह के दुइए दिन बाद आपन लइका संगे काम खोजे चेन्नई रवाना होखे के पड़ी.

डबल शिफ्ट में काम करके ऊ एक दिन के 1,100 रुपइया कमा सकेलन. का ऊ रोज काम कर सकिहन? “करहीं के पड़ी. ना त करजा कइसे चुकता होई.”

असल में, अकेले काइले के ई हाल नइखे. उनकर कहनाम बा, “हमार टोला के 20 से जादे लोग गांव लउट आइल बा.”

मीना देवी ओही में से बानी.

पछिला जून में 38 बरिस के मीना, आपन सहेली 34 साल के सरिता देवी आ 45 के मुन्नी देवी संगे कमाए खातिर चेन्नई गइली. भुइयां दलित समुदाय से आवे वाला ई मेहरारू लोग पेरंबुदूर में जेके टायर कंपनी के प्लांट में सफाई कर्मचारी बा. मीना बतइली, “कमाई ठीक-ठाक रहे. आठ घंटा के 600 रुपइया मिलत रहे.”

सबसे पहले 2023 में आपन लइकी के बियाह के बाद ई काम खोजे बाहर निकलली. बियाह में उनका दस रुपइए सैंकड़ा के हिसाब से 25,000 करजा उठावे पड़ल रहे. दुइए बरिस में ई करजा बढ़के 80,000 हो गइल. करजा सधावे खातिर ऊ एगो माइक्रोफाइनांस ग्रुप से 60,000 के आउर करजा लेली. बाकिर उहो करजा ना चुका पइली. फेरु दोसरा से 75,000 रुपइया उधार लेली. आज एह सब के चक्कर में महीना के 7,200 खाली सूदे चुकावे में जा रहल बा.

उनकर घरवाला जोखन भुइयां, 45, आउर उनकर लइका नरेश, 17 भी दिहाड़ी मजूरी करेला. “तबो गुजारा नइखे होखत.”

मीना, सरिता आ मुन्नी जइसन मेहरारू लोग रसोई गैस संकट खतम होखे के इंतजारी नइखे कर सकत. ऊ लोग रोज बिहाने 20 किमी दूर डालटेनगंज, मजदूर मंडी पहुंचेला. मीना कहेली, “भोरे 8 बजे ले मजूर से भरल 8-9 टेंपो निकलेला. केतना बेरा त टेंपो में आधा मेहरारुए लोग होखेला.” काम मिलल, त दिन के 450 रुपइया मिल जाला, ना त खालिए हाथे लौटे पड़ेला.

मीना जे कमाएली, ओकरा पर उनकर पियक्कड़ घरवाला के नजर रहेला. रोकेली, त मारल-पीटल जाला. अगिला साल मीना के आपन एगो आउर लइकी के बियाह करे के बा. फेरो करजा लेवे के पड़ी. ऊ पूछेली, “एतना करजा हम कइसे सधाएम?”

“हम खतम हो जाएम, बाकिर ई करजा ना खतम होई.”