मेलघाट के बाघ मामा

हमरा कोरकू समुदाय में, हमनी के मानेनी कि अगर बाघ खेत में आई, त ई शुभ होला. इन्करी गोड़े (पैर) के चिन्हा किसानन खातिर बड़ा सौभाग्य लावेला. इहंवा चारों ओर समृद्धि बा.

हमार नाव रामलाल ह अऊर महाराष्ट्र के एमटीआर (मेलघाट टाइगर रिजर्व) के पायविहिर गांव में पैदा भईल रहनी, और हम, वसन्त, एमटीआर के बीच इलाका के बोरत्याखेड़ा गांव में रहेनी. हमनी के दूनू जने कोरबा जनजाति हईं के, अऊर ई जंगलन में हमनी के कुनबा पीढ़ी दर पीढ़ी रही आइल बानी के.

हमनी के इ जानकारी के साथे बड़ भईल बानी के कि अगर बाघ के पंजा के निशान गायी अऊरी भैंसी के गोबर पर मिल जाला, त इ बहुत शुभ लक्षण ह. गोबर के ऊ चिन्हा वाला हिस्सा अनाजे के डेहरी में ध दिहल जाला, एकरी रहला से घर में अनाज के कवनो कमी नाही होला.

हमनी के मकई, जवार, धान, गेहूं, बाजरा, सोयाबीन, मूंगफली, सूरजमुखी, तिल, अरहर, मूंग, चना अऊरी अन्य दाल भी उगावेनी के. हमनी के एमे से अधिकांश दलहन के उपयोग करी लेनी के अऊर तनी सा हिस्सा बेंची देनी के. हमनी के समुदाय के अधिकतर किसानन के लग्गे जंगल के जमीन पर खेती करे के व्यक्तिगत वन अधिकार बा. हमनी के बरखा पर निर्भर रहेनी के लेकिन खेत पटावला खातिर लग्गे के नदी अऊर इनार के पानी के भी उपयोग करनी के.

ए बाघ अभ्यारण में जे पर्यटक जंगल सफारी पर आवेला ऊ जब जंगल में बाघ देखेला त ओके बड़ा रोमांच अऊर गर्व होला, अऊर ऊ लोग खुद के बाघ कहे लागेला लोग.

लेकिन हमनी के कोरकू लोग ई भी मानेनी के कि बाघ के लगातार लऊकल नीक समाचार नाही ह. “बाघ मामा, हमनी के सामने मती अईहा.” कोरकू भाषा में हमनी के बाघ के ‘मामा’ कहेनी के – जवन माई हमनी के जनम देले ओसे रिश्ता बना के बाघ के मामा (माई के भाई) कही के बोलावेनी के, या ऊ मामा जवन हमनी के सुरक्षा करेला.

एहिलीहे, जबकि हमनी के अपना अपना खेत में इनकरी आवे से जानकारी से ख़ुशी मनावेनी के, लेकिन हमनी के बाघ के देखल नाही चाहेनी के.

एमटीआर में करीब 30-39 बाघ रहेने. इ महाराष्ट्र अउर मध्य प्रदेश के सतपुड़ा पर्वतमाला के तलहटी में स्थित बा, जवन मध्य भारत में 2,769 वर्ग किलोमीटर के शुष्क पर्णपाती वन क्षेत्र में फईलल बा.

(खाली बाघे ना, एह जंगल में तेंदुआ, जंगली कुत्ता, धरियाइल लकड़बग्घा, भेड़िया, सियार, लोमड़ी, भालू, सांभर हरिन, नीलगाय, जंगली भैंसा, पैंगोलिन, चारसिंगा हरिन, जंगली सुअर, चित्तीदार हरिन, ऊदबिलाव, सुस्त भालू, इंडियन चिकारा, बंदर आ दोसर बहुते जंगली जनावर भरल बा.)

हमनी के कोरकू लोग के ई विश्वास होला कि जवन बाघ आदमी पर हमला करेला, ऊ जंगल में पलल पोसल ना हो सकेला. ऊ सब बाहर से आवेने.

हाल में हमनी के देखले बानी के कि बाघ के हमला से ज्यादातर शिकार 20-35 साल के उम्र के नौजवान लोग होला. ओ लोगन के जंगल अऊरी जानवरन के एतना जानकारी नईखे जेतना पुरनिया लोग के रहे जे जंगल के अंदर ही सेयान भईल रहे लोग.

नौजवान लोग के पता नईखे कि बाघ के संघे कईसे व्यव्हार करे के चाही, या बाघ के आस पास रहला या ना रहला के नज़र कईसे रखल जाला. ओ लोगन के एकर तनीको समझ नईखे. ओही लोग पर हमला हो रहल बा.

ओ लोगन के पता नइखे काहे से कि 25 साल से इ जंगल हमनी खातिर बंद रहल ह – जबसे मेलघाट टाइगर रिज़र्व बनल. उ सब बाहर रहल बा लोग, एहिलिये जब उ लोग जाला, त ओ लोगन के पता नाही चलेला कि कईसे व्यव्हार करे के चाही.

(टाइगर रिजर्व के आस-पास आ अंदर रहे वाला लोगन के लिए बढ़त इन्फ्रास्ट्रक्चर प्रोजेक्ट इलाका के पारिस्थितिकी बदल दिहलेबा. एकरा से आजीविका के गंभीर संकट पैदा भइल बा. एसे लोग जंगल के संसाधन पर ज्यादा निर्भर हो गईल बा, जेही से मानव-वन्यजीव संघर्ष के खतरा बरकरार बढ़त बा. दूसरी तरफ, मध्य भारत के इलाका में बाघ के संख्या तेजी से बढ़त बा. ई टाइगर रिजर्व से बाहर निकर के बफर जोन, खेत-खलिहान अउर गांव में घुसत बा. भारत में कुल 3,682 बाघन में 1,439 मध्य भारत अउर पूर्वी घाट में बा, अउर स्टेटस ऑफ टाइगर्स 2022 के अनुसार ताडोबा-अंधारी टाइगर रिजर्व में बाघ के आबादी में जबरदस्त बढ़त भइल बा.)

जब हमनी के समुदाय से केहू भी जंगल में गाय अऊरी भईंस चरावे जाला, अऊरी कुछु जंगली सामान लावे जाला, त गांव वाला ओ लोगन अऊरी आपन जीव जन्तु के सुरक्षा खातिर पूजा पाठ करेला लोग.

(मेलघाट के कबीला में पूजल जाए वाला ढेर सारा देवी देवता में बाघ भी एगो ह.)

अगर हमनी के लागेला कि गांव में बाघ के हमला बढी गईल बा, त पंचायत तक़रीबन 50–100 रुपिया अनुदान मांगेला. ओ पईसा के प्रयोग से नारियल, खरीक (सूखल खजूर), नेबू, झंडी, चीनी, अगरबत्ती, रवा (गेंहू के हलुआ), खाए वाला तेल, बोकूड (बकरी), मरिचा, दहनीय, हरदी, टमाटर, नून, पियाज, लहसुन, चावल आदि कीनल जाला.

बाघ देवता के एगो बकरी चढ़ावल जाला, अऊरी एगो नारियल भी, जेके सेनूर से पोती दिहल जाला, ओके भूमका– पूजन करावे वाला पुजारी के दिहल जाला.

ऊ प्रार्थना करेने: “हमनी के रऊआ के बलि देतानी के. रऊरा से निवेदन बा कि रऊरा हमनी के गांव के भूमि-भाग छोड़ी दीं अऊरी हमनी के जेव-जन्तुवन के नुकसान पहुचावल छोड़ी दीं.”

पुजारी जी प्रार्थना करेनी, फिर परसादी[ पूजन के भोजन-भंडारा] गांव के पुरनिया लोग अऊर युवक लोग के द्वारा बनावल जाला जे पूजन में हिस्सा लेवे आईल बा लोग – मुख्यत: मनई (पुरुष) लोग के द्वारा– अऊर वादी में बांटी दिहल जाला. (वादी साल या पलाश के पतई ह जेके खाए खातिर उपयोग कईल जाला.)

सब लोग खाए खातिर बैठी जाला. कबीला के मुखिया घोषणा करेने कि खईला के बीच में केहू आदमी दूसरे आदमी से बात नाही करी नाही त ओ आदमी के पूजन के पूरा खर्चा उठावे के पड़ी! एकरी पीछे एगो कारण ह, हमनी के मान्यता ह कि अगर केहू पूजन के बीच में बतियाई त पूजन के कवनो लाभ नाही मिली. ई हमनी के मान्यता ह.

ए लिहे लोग खईला के बाद बात करेला.

ए पूजन से आवे वाला पीढ़ी के भी एगो सन्देश मिलेला कि बाघ हमनी के देवता में से एक हवे, अऊर हमनी के उनके इज्ज़त देवे के पड़ी. हमनी के पूर्वज इनकर पूजा करे लोग.

बाघ मामा के एगो पत्थर के मूरत मेलघाट में हमनी के गांव गिरगुटि के अन्दर समुदाय के द्वारा स्थापना कईल बा. कोरकू समुदाय खातिर ई एगो तीर्थस्थान जईसे ह जहां चैत्र (अप्रैल के आस पास) आवल जाला.

अगर कोरकू समुदाय के लोग जंगल में जाला, ‘चिविक’ नाम के एगो चिरई बोली के सबके आगाह करी देले अगर बाघ कहीं आस पास बा त.

ए तरीका से हमनी के आपन जंगल, जीव-जंतु, अऊर समुदाय के सुरक्षित रखेनी के.

लेखक एह कहानी के कोरकू आ मराठी में सुनवले बाड़न. तिरछा आ कोष्ठक में लिखल हिस्सा पारी के संपादकीय टीम के जोड़ल हवे.

लेखक गण टीडीयू बैंगलोर में सह-अस्तित्व फेलोशिप-कार्यक्रम के हिस्सा रहे सब.

अनुवाद: अविनाश कुमार मिश्र