सुंदरबन के सुपरमेन

“जब बघवा (रॉयल बंगाल टाइगर) कोनो गाँव मं खुसर जाथे त उहाँ भारी अफरातफरी मच जाथे,” लुत्फोर मोल्ला कहिथे.

जइसनेच कोनो गाँव मं बघवा खुसर आय के खबर मिलथे, लुत्फोर अपन लोगन मन संग वोला भगाय बर उहाँ हबर जाथे. बीते चार-पांच बछर ले, लुत्फोर राज के वन विभाग के बनाय दू ठन ‘क्विक रिस्पोंस टीम’ के एक ठन के अगुवा रहे हवय, जेन ह सुंदरबन के कुलतुली ब्लाक के गाँव मन ला देखथे.

बघवा भगेइय्या ये टीम के ये अगुवा के बारे मं जाने के बाद, हमन मोइपीट कोस्टल पुलिस थाना के तहत अवेइय्या ओकर गाँव, पुरबोगुरगुरिया बर रवाना हो गेन.

बिन डामर वाले खंचबा-डिपरा वाले रोड ह पैडगरी रद्दा कोती ले जाथे. घुमाव वाले रोड किनारे, मातला नदिया के गहिर, करिया पानी बोहावत हवय. आधा घंटा रेंगत जाय के बखत हमन ला मातला नदिया मं एक ठन घलो डोंगा नजर नइ आइस. नदिया के वो पर बड़े अकन घन जंगल हवय.

पुरबोगुरगुरिया के आबादी 5,600 हवय (जनगणना 2011)- जेन मं अधिकतर हिंदू आंय, फेर संग मं मुसलमान बासिंदा मन के आबादी घलो बनेच हवय. भुवनेश्वरी पंचायत मं अवेइय्या ये गाँव मं मछरी धरे अऊ खेती करे जीविका के दू ठन बड़े जरिया आय.

लुत्फोर के घर बट तला हबरतेच हमन ओकर घर के बारे मं पूछताछ करेन. बट तला ले लगे काली मंदिर के अंगना मं किसोर उमर के एक झिन लइका केंकरा ले भरे झोला ला धरे अगोरत रहिस. हमन ला देख के वो ह पूछिस, “कोलकाता ले आवत होहू? मंय लुत्फोर मुल्ला के बड़े बेटा अंव. मंय तुहंरेच रद्दा देखत रहंय.”

लुत्फोर के घर लकठाच मं हवय. प्रधानमंत्री आवास योजना के तहत करीबन 1,000 वर्ग फुट जमीन मं बने ईंटा के घर मं तीन ठन खोली हवय, सीमेंट के छत ढलाय हवय अऊ एक ठन परछी हवय. सबले बड़े खोली मं गोड़ राखतेच, मोला खटिया मं सुते एक झिन मइनखे के धीरे आवाज सुने ला मिलथे: “काय बतावंव? कुछेक दिन ले मोला जर धरे हवय.” ये लुत्फोर मुल्ला आंय? कमजोरहा मनखे!

40 बछर के लुत्फोर अऊ ओकर सुवारी सलेआ के दो झिन बेटा हवंय. सबले बड़े बेटा, 17 बछर के सलीम ला मिर्गी के बीमारी हवय अऊ वो ह 9 वीं क्लास के बाद स्कूल जाय छोड़ दे रहिस. छोटे बेटा, 12 बछर के सलाउद्दीन, रायदीघी के एक ठन मदरसा मं पढ़थे अऊ हास्टल मं रहिथे. 33 बछर के सलेआ घर-गृहस्थी संभालथे. ये जोड़ा खुद पढ़े लिखे नइ सकिस, फेर वो ह अपन लइका मन के पढ़ई लिखई के बन्दोबस्त करिस. लुत्फोर कहिथे: “न त मोला अऊ न मोर कोनो भाई-बहिनी ला कभू स्कूल जाय के मउका मिलिस. अखबार धन किताब – मंय कुछु घलो पढ़े नइ सकंव.” वइसे, वो ह हमन ला ये बताय ला चाहत रहिस के वो ह खुद होके लिखे अऊ दसखत देय सीख ले हवय.

सलेआ कहिथे, “मोर सपना सलाउद्दीन ला पढ़ाय अऊ वोला आगू बढ़ाय के हवय...”

हमन ला आस रहिस के लुत्फ़ोर अब अपन बघवा मन के कहिनी बताय ला सुरु करही, फेर वो ह अपन जिनगी के कहिनी बताय लगथे. मछुवारा के ये बेटा बर, जेन ह भारी अभाव मं पले-बढ़े हवय, ओकर बर बंगाल टाईगर (पैंथेरा टाइग्रिस्टिग्रिस) कभू घलो रहस्य अऊ रोमांच बने नइ सकय, जइसने के हम दूरिहा के इलाका के सैलानी मन बर होथे. लुत्फ़ोर सेती, ये ह रोजमर्रा के जिनगी आय. अऊ येकरे सेती, अपन जिनगी ले जुड़े दीगर सब्बो कहिनी सुनाथे.

“मोर दाई-ददा भारी गरीब रहिन. दूनों बूता करत रहिन, ओकर बाद घलो मुस्किल ले गुजारा होवत रहिस. वो मन नदिया अऊ खाड़ी मं मछरी अऊ केंकरा धरत रहिन. हमन –तीन भाई, तीन बहिनी, अऊ हमर दाई–ददा – कतको बछर एक ठन माटी के घर मं, कतको मुस्किल ले गुजारे हवन... ये देहतोड़ मिहनत ह दाई अऊ ददा के सेहत उपर खराब असर डारिस अऊ दूनों बीमार पर गीन. मंय अपन माँ अऊ बाबा (दाई-ददा) के बीमारी के इलाज करवाय नइ सकेंय, अऊ वो मन मोर आंखी आगू कलप-कलप के मर गीन.

“14 बछर के उमर ले मोर जिनगी ह जूझे सुरु कर दीस. मंय नदिया मं मिन[ छोटे चिंगरी] अऊ बगदा [बड़े चिंगरी] धरत रहेंय. जब मंय थोकन बड़े होंय, त मंय मछरी धरे बर दीगर मन के डोंगा मं जाय ला सुरु करेंय अऊ हर हफ्ता घर लहूट आंव.”

अपन जर वाले सुस्ती ला छोड़, लुत्फ़ोर खटिया ले उठ जाथे अऊ नदिया के पार मं हबर जाथे. लकठा मं एक ठन डोंगा बंधाय हवय, जेकर मरम्मत करत वो ह चिखला भरे तीर मं बइठ के गोठियाय लगथे. “बघवा के डर बछर भर लगे रहिथे. जड़कल्ला मं जने बखत ,वो मन अक्सर गाँव मन मं आ जाथें. येकर छोड़, जब दू ठन एंर्रा बघवा एक इलाका मं होथें त इलाका मं काबिज होय बर कभू-कभू एकेच बखत तीर के गाँव मन मं हबर जाथें.”

लुत्फ़ोर के अनुभव ह वोला आबादी वाले बस्ती अऊ ओकर तीर-तखार मं बघवा मन के आवाजाही ला लेके फोर के बताथे. वो ह कहिथे, “ वो मन के ठीहा मं शिकार के कमी घलो एक ठन कारन आय.”

वो ह बदलत मऊसम सेती सुंदरबन डेल्टा के लोगन मन अऊ उहाँ के बघवा मं मचे रार अऊ बीते कुछेक बछर मं ओकर मन के जिनगी ला अऊ कठिन बनाय के बारे मं गोठियावत हवंय. लुत्फ़ोर “सुंदरबन के रोज़मर्रा के कतको दिक्कत” के सार ला बताथें. समुन्दर मं बढ़त जल स्तर, नदिया मन के कटाव सेती डूबत टापू, नदिया अऊ नरूवा ले खेती के जमीन डहर बोहावत नुनछुर पानी अऊ कमतियात मैंग्रोव जंगल. नतीजा, “बघवा अपन ठीहा खो देथें अऊ चारा खोजत गाँव मन मं हबर जाथें,” ते पायके मइनखे अऊ बघवा मं आमना-सामना जरुर हो जाथे. पढ़व: केंकरा-मछरी धरत बघवा के डर

लुत्फ़ोर कहिथे, “बघवा ला भगाय बर कतको किसिम के उपाय करे जाथे. जइसनेच बघवा नदिया पर करके गाँव मं खुसरथे, हमन वन विभाग के देय डंडा अऊ ‘चॉकलेट बम’ (पटाखा) धरके चेत जाथन.”

ये मं कोनो संदेहा नइ ये के, बघवा मन ला भगाय बर तोप के जरूरत नइ परय, फेर ओकर कमजोर हथियार मन ह हमन ला चिंता मं डार दीस. वइसे, लुत्फ़ोर आत्मविश्वास ले भरे हवय, “हमन अपन संग एक ठन जाल धरके जाथन अऊ ओकर ले इलाका ला घेर लेथन, तीर के रुख मं जोर-जोर ले लकरी ला फटकथन, चॉकलेट बम फोरथन, अऊ जोर-जोर ले नरियाथन. जल्दीच डेर्राय मामा [ बघवा मन ला इहाँ मोमा धन ममा कहे जाथे] जंगल भाग जाथे.” लुत्फ़ोर गरब ले अपन सधारन हथियार मन के बखान करत कहिथे. “ धियान देवव, बघवा मन ला भगावत अब तक ले कोनो घलो खतरा ह मोला छुये के हिम्मत नइ करे हवय.”

मोला अब गम होइस के लुत्फोर मोल्ला अऊ ओकर टोली असल मं मइनखे अऊ बघवा दूनों के जान बचाथे.

ये चरगोड़िया जानवर मन ला डेर्रावत अऊ जंगल मं खदेड़त, वो मन ये देखथें के गाँव के लोगन मन ये नंदावत जावत जीव ला झन मारेंय. खतरा ले भरे अऊ साहस के काम करेइय्या मुसलमान अऊ हिंदू, दूनों गाँव समाज के सधारन मइनखे आंय, जेकर मन के जीविका सुंदरबन के जंगल अऊ नदिया मन के भरोसे हवय. लुत्फोर कहिथें के वो मन ये भयंकर शिकारी जानवर ले डेर्राय के खतरा मोल नइ लेवंय. कुलतुली मं काम करेइय्या दू ठन टोली, जेन मं हरेक मं 12 धन 13 लोगन मन हवंय. ओकर बाद घलो, ये टोली ला कोनो प्रसिच्छन नइ मिलय. अऊ न वन विभाग ह वो मन के सुरच्छा सेती कोनो किसम के बेवस्था घलो करे हवय.

“बघवा खदेड़े मं हमन ले हरेक ला 1,000 रूपिया मिलथे. अइसने घटना बछर भर मं कम से कम तीन धन चार पईंत होथे. फेर, सिरिफ बघवा भगाय ले हमर पेट नइ भरय,” लुत्फोर बेपरवाही ले कहिथे. येकर मतलब आय के वो ला बछर भर मं 4,000 धन 5,000 रूपियाच मिल पाथे. जाहिर बात आय, अतक पइसा ले ओकर गुजारा नइ होवय. ते पायके लुत्फोर बछर भर के नौ महिना नदिया अऊ नरुवा मं मछरी अऊ केंकरा धरे के संगे संग दीगर काम बूता घलो करथे.

“चइत, बइशाख अऊ जेठ महिना मं [आधा मार्च ले आधा मई तक] नदिया मं मछरी के अंडा फूटथें. हमन वो बखत नदिया मं नइ जावन. मंय मंदरस झारे बर जंगल चले जाथों. बछर के बाकी बखत, मंय मछरी धरके कइसने करके गुजारा करथों.” ये सब्बो किसिम के काम बूता ले लुत्फ़ोर के महिना के कमई 8,000-10,000 रूपिया हवय.

बीते कुछेक बछर मं, लुत्फ़ोर ह तीन ठन डोंगा बनावाय हवय अऊ ओकर मालिक आय. ओकर मुताबिक, “ये डोंगा बछर भर मं नौ महिना कम से कम 20 झिन मछुवारा मन ला, जेन मं कुछु परिवार के जोड़ा दूनों कमाथें. वो मन मछरी अऊ केंकरा धरे संग संग पानी मं उतरथें.” ये मन इहींचे के आंय जेन मन ओकर संग जाथें काबर के अकेल्ला जाय नइ सकाय. वो ह बताथे के मछरी धरे बर जाय बखत, वो मन सरलग 8-9 दिन तक ले घर ले बहिर रहिथें अऊ अधिकतर बखत वो मन के डोंगा नदियाच मं रहिथे. वो मन दिन मं 18 घंटा बूता करथें, हरेक तरह के खतरा ले जूझथें. सुस्ताय के बखतेच नइ मिलय. गाँव लहूटे के बाद, वो मन पांच-छै दिन सुस्ताथें अऊ फिर ले नदिया मं मछरी मारे बर निकर परथें. सलेआ के कहे अऊ ओकर डर मोला सुरता आ जाथे: “ ये बखत (नदिया मं मछरी धरे जाय बखत) मोला भारी डर लागथे अऊ मंय हर घड़ी ओकर बने होके लहूट आय अऊ रोग-रई झन होय के मनौती करत रहिथों. अल्लाह (भगवान), ह एकेच भरोसा आय...”

कुलतुली के बासिंदा अऊ एसोसिएशन फॉर प्रोटेक्शन ऑफ डेमोक्रेटिक राइट्स के कार्यकर्ता मिथुन मंडल बताथें के डेल्टा इलाका मं मछरी धरे बर जाय काबर मुस्किल होवत जावत हवय. राष्ट्रीय बाघ संरक्षण प्राधिकरण के अंदाजा हवय के सुंदरबन टाइगर रिजर्व मं 88 ले 100 ठन बघवा रहिथें जेन ह 2, 584 वर्ग किलोमीटर के दायरा मं हवय. मिथुन कहिथे, “वन विभाग व्यवस्थित रूप ले जंगल के बफर जोन ला एक पईंत अऊ बनावत हवय अऊ येकर जियादा हिस्सा ला कोर एरिया मं सामिल करत हवय. बीते कुछु बछर मं बघवा इलाका [क्रिटिकल टाइगर हैबिटेट] ह बढ़े हवय. कोर एरिया बघवा मन के घूमे बर पोगार के रखे गे हे. ये इलाका मं मंदरस झारे के इजाजत हवय, फेर मछरी अऊ केंकरा धरे के सख्त मनाही हवय. मछरी धरे के इजाजत सिरिफ बफर जोन के भीतरीच हवय. चिंता के बात ये आय के जइसने- जइसने बफर जोन कम होवत जावत हे, लुत्फ़ोर जइसने मछुवारा मन गुजारा बर कोर इलाका मं जाय बर मजबूर हो जाथें.”

वइसे, बघवा मन ला कोनो जगा जाय बर इजाजत के जरूरत नइ परय. जब कोनो बघवा गाँव मं आ जाथे, त लुत्फ़ोर अऊ ओकर टोली ला वोला काबू करे बर बलाय जाथे. ओकर बाद घलो, सरकारी रिकार्ड मं न त बचाय गे लोगन मन के, न ओकर मनके नांव जेकर मनके बहादुरी ले वो मन के जान बचिस, के कोनो आंकड़ा के सबूत मिले मुस्किल आय. मिथुन मंडल कहिथे, “बड़े आस हवंय! अक्सर, (अफसर) सबूत नइ होय सेती बघवा के हमला ले होय मऊत ला ‘अवैध’ करार देथें.” मेन इलाका मं बघवा के हमला ले मरेइय्या लोगन मन के परिवार ह कोनो घलो मुआवजा के हकदार नइ यें.

भलेच लुत्फोर अऊ ओकर संगी मन बघवा अऊ मइनखे मन ला एक-दूसर ले बचाथें, ओकर बाद घलो वो मन भूखाय शिकार करेइय्या जानवर ले जिनगी अऊ देह ला बचाय बर सरलग खतरा के संग गुजारथें.

पूरबोगुरगुरिया मं नदिया तीर, लुत्फोर अभू घलो डोंगा के मरम्मत करत हवय. “हमर जिनगी भारी मिहनत उपर टिके हवय. मंय जुच्छा हाथ आराम के जिनगी ला सोचे घलो नइ सकंव.” ओकर आवाज मं चिंता साफ झलकत हवय.

वो ह थोकन मुचमुचावत बिदा करत कहिथे, “अल्लाह (भगवान) के मरजी होही त हमन फिर भेंट परबो.”

मंय लउहा-लउहा रेंगे लगथों, के कहूँ कोलकाता जवेइय्या ट्रेन छूट झन जाय. मंय पाछू मुड़के देखथों. सुंदरबन के ये सुपरमेन के अपन डोंगा के मरम्मत मं मगन रूप धीरे-धीरे ढरत बेरा के उजियार मं धुंधला परत जावत हे.

आखिर मं : 19 अगस्त, 2025 मं, पर्यावरन, वन एवं जलवायु परिवर्तन मंत्रालय (MoEFCC) के राष्ट्रीय वन्यजीव बोर्ड (NBWL) ह सुंदरवन टाइगर रिज़र्व (STR) के सरहद ला एक बेर अऊ तय करे अऊ 24-परगना (दक्खिन) संभाग के दीगर बघवा-आबादी वाले इलाका ला ये मं शामिल करे बर पश्चिम बंगाल सरकार के प्रस्ताव ला मंज़ूरी दे दीस. संशोधित STR अब 3,629.57 वर्ग किलोमीटर के दायरा मं होही अऊ ये ह देस के दूसर सबले बड़े बघवा अभयारण्य बन जाही. नवा STR के सरहद मं अवेइय्या ये इलाका के बासिंदा, खासकरके मछुवारा मन, चिंता अऊ दुविधा मं हवंय. वो मन के मन्ना आय के ये नियम अऊ रोक वो मन के रोज के जिनगी-जीविका उपर भारी असर डारहीं.

अनुवाद: निर्मल कुमार साहू

ये कहिनी मूल रूप मं बांग्ला भाखा मं लिखे गे रहिस .