बाघ बचावे वाला गुमनाम हीरो के प्रणाम!

“जब रॉयल बंगाल टाइगर गांव में घुसेला त हड़कंप मच जाला,” लुतफर मुल्ला कहेलन.

टाइगर के गांव में घुसला के खबर जइसहीं फईलेला, लुतफर मुल्ला ओके भगावे खातिर अपनी टीम संघे पहुंच जालें. पिछला चार-पांच साल से प्रदेस के वन विभाग के शुरू कइल दू गो ‘क्विक रेस्पॉन्स टीम’ (झटपट बचावे वाला खास टीम) में से एगो के जिम्मा लुतफर पर बा. ई टीम सुन्दरबन के कुलतली ब्लॉक के गांव सब के देखभाल करेला.

बाघ के पीछा करे वाला ए टीम के नेता के बारे में जान के हमनी के मोईपिट कोस्टल पुलिस थाना में पड़े वाला पुर्बा गुरगुरिया गांव खातिर निकल गईनी जा.

बिना डामर वाला उबड़-खाबड़ सड़क पर चलत के हमनी के कच्चा रास्ता पर चलत गईनी जा. घुमावदार रास्ता के किनारे किनारे मातला नदी के करिया पानी बह रहल बा. आधा घंटा पैदल चलला के बादो हमनी के मातला में एक्को नाव ना लउकल. नदी के दूसरी तरफ एगो विशाल घना जंगल रहे.

पुर्बो गुरगुरिया गांव के आबादी लगभग 5,600 (जनगणना 2011) बा.एह में ज्यादातर परिवार हिन्दू बा बाकिर मुस्लिम परिवारन के भी ठीक-ठाक संख्या बा. भुबनेश्वरी पंचायत में पड़े वाला ए गांव में मछरी पकड़ल आ खेती कईल आजीविका के दू गो बड़ जरिया हवे.

लुतफर के बोट टोला पहुंच के हमनी के उनकरी घर के बारे में पूछनी जा. एगो किशोर लईका हाथ में केकड़ा से भरल झोला लिहले बोट टोला के लगे काली मंदिर के अहाते में खड़ा बा. “आप लोग कोलकाता से आईल बानी? हम लुतफर मुल्ला के बड़ बेटा हईं. हम आपे लोगन के इंतजार करत रहनी ह.”

लुतफर के घर लगहीं रहे. प्रधान मंत्री आवास योजना से 1000 वर्गफीट जमीन पर बनावल गइल ए घर में तीन गो पक्का कमरा, कंक्रीट के छत आ एगो बरामदा बा. सबसे बड़का कमरा में गोड़ धरते बिछौना पर ओठंगल एगो कमजोर आदमी के आवाज सुनाला: “का बताईं? कुछ दिन से बोखार चांप देले बा.” इहे लुतफर मुल्ला हवें? हई कमजोर आदमी!

लुतफर (40) आ उनकी मेहरारू सालेया के दू गो बेटा बा. बड़का सलीम 17 बरिस के बाड़न जेके मिर्गी के दौरा पड़ेला. उ नवीं कक्षा के बाद स्कूल गईल छोड़ दिहलस. छोटका बेटा सलाउद्दीन 12 बरिस के बा जवन राइदिघी के मदरसा में पढ़ेला आ होस्टल में रहेला. सलेया (33) घर चलावेली. ई मियां-बीवी के जोड़ी अपने भले ना पढ़लस बाकिर लईकन के पढ़वलस. लुतफर कहेलन: “ना हम आ ना हमारा कवनो भाई-बहिन पढ़ पवलें सन. हम अख़बार चाहे किताब, कुछु ना पढ़ पावेनी.” तब्बो उ हमनी क बतावे के चाहत रहस कि ऊ आपन नाम लिखे आ साईन करे अपने से सिखलें.

हमार सपना हवे कि सलाउद्दीन पढ़े आ दुनिया देखे....” सलेया कहेली.

हमनी सोचत रहीं कि लुतफर अब आपन बाघन वाली कहानी छेड़िहन, बाकिर उ अपने जीवन की कहानी पर अटक गइलन. मछुआरन के ए बेटा के बचपन बहुत अभाव में बीतल. उनकरी खातिर बंगाल टाइगर (पैंथेरा टाइग्रिस) कब्बो वइसन रहस्य आ उत्साह के कारण ना बन पावल जइसन हमनी दूर से आईल आगंतुक लोग खातिर रहल. लुतफर खातिर ई उनकरी दिनचर्या के हिस्सा हवे एसे उ दोसरो कुल कहानी सुनावल जारी रखेलन जवन उनकरी खातिर जरूरी बा.

“हमार माई बाप बहुत गरीब रहे. दूनो जाने काम करे लोग तब्बो बड़ी मुश्किल से गुजारा होखे. उ लोग नदी नाला में मछरी आ केकड़ा पकड़े जात रहे. हमनी के तीन भाई, तीन बहिन आ माई बाप सब बरसों बरस ले कच्चा घर में बहुत मुश्किल से रहनी जा. हाड़तोड़ काम कईला से माई बाप दुनू जाना के तबियत खराब रहे लागल. हम ओ लोगन के बेमारी के इलाज ना करा पवनी. उ लोग हमरी सामने दर्द से तड़प के मर गईलें.

“हमार संघर्ष 14 बरिस के उमिर से शुरू भईल. हम नदी में मिन (टाइगर प्रॉन सीडलिंग्स) आ बागड़ा (टाइगर प्रॉन) पकड़ीं. तनी बड़ भईनी त दूसरी लोगन के नावन में मछरी पकड़े जाए लगनी आ हर सात दिन पर घरे लौटीं.

बोखार के सुस्ती कन्धा से झटक के लुतफर अपनी बिस्तर से उठेलन आ नदी किनारे पहुंचेलन. ओइजा एगो नाव लंगर डाल के रखल बा जेके उ ठीक करे लागेलें, उकरी माटी लागल किनारा पर बईठत के उ बतियावल चालू राखेलें. “बाघन के डर पूरा साल बनल रहेला. सर्दियन में आपन बच्चा बिआए के टाइम घरिया उ अक्सर गावें आवेलन सन. एकरी अलावा जब दू गो नर बाघ एक ही इलाका में होखेलें सन त जगह खातिर लड़ाई चलते भी आसपास के गांव में पहुंच जालें सन” लगभग ओही समय पर.

जीवन के अनुभव से लुतफर के आंख अब तीर जइसन तेज हो गइल बा. इंसानी बस्ती के आसपास बाघ के हलचल ऊ पहिलहीं से चीन्ह जालन. “जंगल में शिकार के कमी भी एगो कारण हवे,” उ कहेलन.

सुन्दरबन डेल्टा में जलवायु परिवर्तन के मार इहंवा के लोग आ बाघ दूनो पर पड़े के बारे में ऊ बतइलन. उ इहो कहलन पिछला कुछ सालन से सबकर परेशानी बढ़ गईल बा. लुतफर ‘सुन्दरबन के रोजमर्रा के समस्या’ के बारे में बतावेलें. समुद्र के जलस्तर बढ़ रहल बा, नदियन के कटाव के वजह से द्वीप डूब रहल बा, नदी आ नाला के माध्यम से खेतन में खारा पानी बह रहल बा आ मैनग्रोव जंगल कम हो रहल बा. परिणाम ई होता कि ‘बाघ के ठिकाना उजड़ जाता आउर ऊ भोजन के तलाश में गांव चल आवता.” ई सब से मानव-बाघ संघर्ष के स्थिति बन जाता. पढ़ीं: बंगाल बाघ के छाया में केकड़ा के शिकार

“बाघ भगावे में बहुत ट्रिक लागेला,” लुतफर बतावेलन. “जईसहीं जानवर नदी से तैरत के गांव में घुसेला, हमनी वन विभाग के देवल लाठी आ चॉकलेट बम (इलाका में बने वाला बारूद वाला पटाखा) ले के तैयार रहेनी जा.”

बाघ भगावे खातिर भले तोप के गोला ना चाहीं बाकिर उनकर एतना कमजोर हथियार सब देख के चिंता हो रहल बा. हालांकि लुतफर में आत्मविश्वास कूट-कूट के भरल बा. “हमनी के अपनी संघे एगो जाल ले जायेनी जा आ ओ इलाका के एसे घेर देवेनी जा. फेरु पास के पेड़ पर डंडा से जोर से मारेनी जा, चॉकलेट बम फोड़ेनी जा आ एक साथे पूरा दम लगा के चिल्लायेनी जा. जल्दिये मामा (बाघन के एइजा अक्सर मामा कहल जाला) डेरा के भाग जाला.” लुतफर गर्व से बतावेलन कि उनकर हथियार केतना असरदार बा. “याद रखीं, आज ले बाघ भगावे में हमके कवनो खतरा ना आईल.”

हमके एहसास भइल कि लुतफर मुल्ला आ उनकर टीम आदमी आ जानवर दूनो के जान बचा रहल बा.

बाघन के डेरवा आ वापस जंगल में भगा के उ लोग पक्का करेला कि गांव के लोग ए संकट में पड़ल जीव के मारे मत. एतना जोखिम आ साहस से भरल काम के अंजाम देवे में गांव के हिन्दू आ मुस्लिम दूनो समुदाय के लोग जुड़ल बा. उ लोग आम आदमी होला जवन आजीविका चलावे खातिर सुन्दरबन के जंगल आ नदी पर निर्भर रहेला. लुतफर कहेलन कि उ ए खूंखार जानवर से ना डेरा सकेलें. कुल्तली में दू गो ‘त्वरित प्रतिक्रिया टीम’ बा जेमे प्रत्येक में 12 से 13 लोग बाड़ें. टीम के कवनो प्रशिक्षण ना मिलेला. वन विभाग भी ओ लोगन के सुरक्षा के कवनो व्यवस्था नइखे कइले.

लुतफर बिना लाग-लपेट के कहेलन, “बाघ भगावे खातिर हमनी के एक बेर में 1000 रुपिया मिलेला. अइसन मौका साल में तीन या चार बेर आवेला. तब्बो एह काम से हमनी के पेट ना भरे.” मतलब ज्यादा से ज्यादा उनके साल के 4,000-5,000 रुपिया मिल सकेला. जाहिर बा एतना पईसा पर त जीवन ना चल सकेला. एसे लुतफर साल के नौ महिना नदी नाला में मछरी आ केकड़ा पकड़े जइसन बाकी काम में भी लागल रहेलें.

“चैत, बैशाख आ ज्येष्ठ (मार्च मध्य से मई मध्य) ले मछरी नदी में अंडा सेवेली सन. ओ समय हम नदी में ना जानी. हम जंगल शहद जुटावे जानी. साल के बाकी समय मछरी मारे पर निर्भर रहे आ केहू तरे काम चलावे पड़ेला.” ई सब कामकाज से मिला के लुतफर के 8,000-10,000 रुपिया महीना के औसत आमदनी हो जाला.

बीतल कइएक साल में लुतफर तीन गो नाव बनवले बाड़ें जेकरी बारे में उनकर कहनाम बा, “ई साल के नौ महीना कम से कम 20 मछुआरा परिवारन के आमदनी जुटावे में मदद करेले. एमे कुछ परिवार के मरद मेहरारू दूनो शामिल बाड़ें. उ लोग संघे संघे मछरी आ केकड़ा पकड़े जाला.” स्थानीय लोग उनकी संघे जाला काहें कि अइसन यात्रा केहू अकेले ना करेला. उ बतावेलन कि मछरी पकड़े के अइसन यात्रा के दौरान उ लोग 8-9 दिन लगातार घर से दूर रहेला आ ओ लोगन के नाव ज्यादातर समय नदी में रहेला. उ लोग दिन में 18 घंटा ले काम करेला आ हर तरह के खतरा के सामना करेला. बहुत मुश्किल से सुस्ताए के समय मिल पावेला. गांव लौटला के बाद उ लोग पांच छह दिन के छुट्टी लेला आ फिर से अपनी नदी के यात्रा पर चल जायेला. सलेया के बात हमरा याद आइल, “हम ए समय (नदी में मछरी पकड़े के यात्रा के दौरान) बहुत डेराईल रहेनी आ उनकी सुरक्षित वापसी खातिर लगातार प्रार्थना करत रहेनी कि उ बेमारियन से दूर रहें. 00...”

कुलतली के रहे वाला आ लोकतान्त्रिक अधिकार सुरक्षा संघ के कार्यकर्ता मिथुन मोंडल समझावेलन कि डेल्टा क्षेत्र में मछरी पकड़े के ई यात्रा के टिकल काहें मुश्किल होखल जाता. राष्ट्रीय बाघ संरक्षण प्राधिकरण के अनुमान बा कि 2,584 वर्ग किलोमीटर में फईलल सुन्दरबन में 88 से 100 बाघ ले रहेलें सन. मिथुन कहेलन, “वन विभाग व्यवस्थित रूप से जंगल के बफर क्षेत्र के फिर से परिभाषित कर रहल बा आ अधिक जंगल के मुख्य वन क्षेत्र में शामिल कर रहल बा. बाघ क्षेत्र (महत्वपूर्ण बाघ निवास) पिछला कुछ सालन में बढ़ गईल बा. मुख्य क्षेत्र बाघन के घूमे खातिर अरक्षित हवे. ए क्षेत्र में शहद एकट्ठा करे के अनुमति बा बाकिर मछरी आ केकड़ा पकड़ल पूरी तरह से मना बा. मछरी पकड़े के खाली बफर जोन में अनुमति बा. विडंबना ई बाटे कि जईसे-जईसे बफर क्षेत्र कम होखत जाई, लुतफर जईसन मछुआरा लोगन के आजीविका खातिर मुख्य क्षेत्र की ओर बढ़े के पड़ी.”

हालांकि बाघन के घुसे खातिर केहू के अनुमति लेवे के जरूरत नईखे. जब गांव में एगो बाघ घुस आवेला त लुतफर आ उनकरी टीम के बाघन के नियंत्रित करे खातिर बोलावल जाला. तब्बो सरकारी दस्तावेजन में ई बात खोजल मुश्किल बा कि केतना लोगन के जान बचावल गईल बा या के ओ लोगन के जान बहादुरी से बचवले बा. “इ ढेर उम्मीद बा!” मिथुन मोंडल कहेलन, “कई बार अधिकारी लोग बाघ के हमला से भईल मौत के (अधिकारी लोग) ‘गैर-कानूनी’ कहि दिहल जाला काहें कि सबूत के आभाव रहेला.” मुख्य क्षेत्र (कोर इलाका) में बाघ के हमला में मरे वाला लोगन के परिवार कवनो तरह के मुआवजा के हकदार ना होला.

लुतफर आ उनकर कंपनी आदमी आ जानवरन के एक दूसरा से बचा त रहल बा, तबो लोगन के जान जाए आ अंग-भंग होखे के खतरा लगातार बनत रहेला.

पुर्बो गुरगुरिया में नदी किनारे लुतफर फिर से नाव के मरम्मत में लागल बाड़ें. “ए कड़ा मेहनत पर ही हमनी के आजीविका टिकल बा. हम हाथ पर हाथ धर के बईठे के सोच भी ना सकेनी.” उनकी आवाज़ में संशय साफ़ झलकता.

उ हल्का मुस्कान संघे विदा लेवेलन, “अल्लाह चहिहें त हमनी फिर मिलम.”

हम तेज-तेज चले शुरू कर देवेनी कि कोलकाता के ट्रेन मत छूटे. पीछे देखनी. सुन्दरबन के ए सुपरहीरो के छाया धीरे-धीरे रौशनी के संघे धुंधला पड़ल जाता जवन अब्बो आपन नाव के मरम्मत कर रहल बा.

पुनश्च: पर्यावरण, वन आ जलवायु परिवर्तन मंत्रालय (एमओईएफसीसी) के नेशनल बोर्ड ऑफ वाइल्डलाइफ (एनबीडब्ल्यूएल) 19 अगस्त 2025 के पश्चिम बंगाल सरकार के प्रस्ताव के मंजूरी दिहलस. एह में सुंदरबन टाइगर रिजर्व (एसटीआर) के सीमा फिर से तय करे आ 24-परगना (दक्षिण) मंडल में अन्य बाघ-आबादी वाला क्षेत्रन के सम्मिलित करे के बात रहे. अब संशोधित एसटीआर 3,629.57 वर्ग किलोमीटर में फइलल रही आ ई देश के दूसर सबसे बड़ टाइगर रिजर्व बन जाई. एह नया एसटीआर क्षेत्र के रहवासी, खासतौर पर मछुआरा लोग चिंता आ शंका में घेराईल बा. उनकर अंदाजा बा कि नियम आ प्रतिबंध उनकी रोजमर्रा के जीवन आ गुजर-बसर खातिर होखे वाला गतिविधि में रुकावट पहुंचा सकेला.

स्टोरी मूल रूप से बांग्ला में रहे.

अनुवाद: विमल चन्द्र पाण्डेय