سیلاب کا منظرنامہ اور استقامت کا مظاہرہ

ایک تاریک اسٹیج ناظرین کا استقبال کرتا ہے، جہاں مردوں اور عورتوں کے سائے ایک ایسے چبوترے پر کھڑے دکھائی دیتے ہیں جو کسی پلیٹ فارم کی مانند نظر آتا ہے۔ ’’سال در سال، بالائی علاقوں سے دریا کے ذریعے لائی گئی مٹی ساحل کے متوازی جمع ہوتی گئی اور سمندری پانی کے ساتھ ساتھ جزیرے بنتے چلے گئے۔‘‘ پسِ منظر میں ایک آواز کیرلم کے ارناکولم ضلع کے ساحلی گاؤوں کی زمین اور تاریخ سے ناظرین کو روشناس کراتی ہے۔ سائے کے پیچھے دکھائی جانے والی تصویری جھلکیاں اس علاقہ کی تاریخ بیان کرتی ہیں، جس کا آغاز ۱۳۴۱ عیسوی سے ہوتا ہے، جب یہ تاریخی بندرگاہی شہر موزیریس کا حصہ تھا۔

جیسے ہی اسٹیج پر مدھم روشنی پھیلتی ہے، ہم دس کرداروں کو ایک گھر کے سامنے سیلاب زدہ سڑک پر گھٹنوں تک گہرے پانی میں چلتے ہوئے دیکھتے ہیں۔ پس منظر میں بجنے والی موسیقی، جو کسی خطرے کی گھنٹی یا سائرن جیسی محسوس ہوتی ہے، تیز ہوتی جاتی ہے اور وہ بھیگے ہوئے، بھاری قدموں کے ساتھ پانی چیرتے ہوئے ناظرین کی طرف بڑھتے ہیں۔

سیلجا کے ایس اِس اسٹیج پر موجود اُن دس افراد میں سے ایک ہیں۔ اس ڈرامے کا نام چیوِٹّورما ہے۔ یہ ایک مقامی کیتھولک رسم کا نام ہے، جس میں مرنے والے شخص کے کان میں تسلی دینے کے لیے آہستہ سے دعائیہ سرگوشی کی جاتی ہے۔ اس ڈرامے میں حصہ لینے والے دیگر تمام افراد کی طرح سیلجا کو بھی اداکاری کا پہلے سے کوئی تجربہ نہیں تھا۔ درحقیقت، یہ اجتماعی تھیٹر ان کے لیے ایک ایسی جگہ ہے جہاں حقیقت اور افسانے کے درمیان فرق دھندلا جاتا ہے۔

’’میں نے اکثر اپنی ماں کو یہ کہتے سنا ہے کہ بچپن میں میں بہت شرارتی تھی۔ صرف شرارتی ہی نہیں، بلکہ ایک چھوٹا سا طوفان تھی۔ ان دنوں وہ مجھے کہانیاں سنا کر کھانا کھلانے کے لیے بہلاتی تھیں۔ ہلکے گرم چاولوں کی دلکش خوشبو اور منہ میں پانی بھر دینے والا ذائقہ، اس میں ناریل کا ہلکا سا تیل اور نمک ملا ہوا…! پھر جب میں تقریباً ۱۲ یا ۱۳ سال کی تھی تو ہاتھ کی لکیریں پڑھنے والا ایک شخص ہمارے گھر آیا۔ اس نے میری ہتھیلی دیکھ کر کہا، ’یہ ایک دن اس گھر کو بالکل خالی کر دے گی، حتیٰ کہ نمک کا آخری دانہ بھی لے جائے گی!‘ اس بات نے مجھے پریشان کر دیا۔ کیا میں کبھی ایسا کر سکتی تھی؟ لیکن سب لوگ ہنس پڑے۔

’’کئی سال بعد، ۲۰۱۸ میں، میری ماں میرے ساتھ تھیں۔ وہ بیچاری صرف چند دن میرے پاس رہنے آئی تھیں۔‘‘ سیلاب کے فوراً بعد اپنی ماں کو کھو دینے کی کہانی سیلجا ایک محو ہو کر سننے والے مجمع کے سامنے ہاتھ میں نمک کی ڈبیہ تھامے بیان کرتی ہیں۔

’’یہ تھیٹر گروپ ایک فیملی کی طرح ہے۔ اس نے میری ذہنی صحت بحال کرنے میں میری مدد کی۔ مجھے احساس ہوا کہ میں بھی کچھ کرنے اور معاشرے کو کچھ واپس دینے کی صلاحیت رکھتی ہوں،‘‘ ذاتی طور پر باروزگار ۵۷ سالہ سیلجا فخر سے کہتی ہیں۔ وہ خود کو ایک گھریلو خاتون کہتی ہیں، لیکن آمدنی کے لیے گھر میں تیار کیے گئے اچار فروخت کرنے والی ایک کاروباری خاتون بھی ہیں۔ اور حال ہی میں انہوں نے زیورات کی ایک دکان پر سیلز کی ملازمت بھی شروع کی ہے۔ ’’کمیونٹی تھیٹر نے مجھے ۲۰۱۸ میں پیش آنے والے واقعہ سے باہر نکلنے اور یہاں دوسروں کے ساتھ اپنے تجربات بانٹنے میں مدد کی، خاص طور پر ان لوگوں کے ساتھ جنہیں یہ اندازہ نہیں ہے کہ ہم [سمندری سیلابوں کا] کس طرح سامنا کرتے ہیں۔‘‘

سیلجا کے ۳۲ سالہ بیٹے ابھیمَنّیو پی جے کہتے ہیں، ’’ہم اپنے گاؤں میں سیلاب کے عادی ہیں۔‘‘ پوتین ویلیکّرا دریائے پیریار اور چلکوڈی کے درمیان واقع ہے اور چاروں طرف سمندری تالابوں اور سمندری پانی سے گھرا ہوا ہے۔ ’’ہر سال، دسمبر کے آس پاس، سمندری لہروں کے بڑھنے کی وجہ سے پانی گھروں میں داخل ہو جاتا ہے یا سڑکوں پر جمع ہو جاتا ہے۔ اور ظاہر ہے کہ مانسون کے دوران بھی شدید بارش ہوتی ہے۔ لیکن ہمیں معلوم ہوتا ہے کہ کیا ہونے والا ہے – ہم پانی کو آتے ہوئے دیکھ سکتے ہیں، وہ آہستہ آہستہ بڑھتا ہے اور اس کا اندازہ لگایا جا سکتا ہے۔ ہم اس صورتِ حال سے نمٹ سکتے ہیں، لیکن ۲۰۱۸ کا حال مختلف تھا۔‘‘

سال ۲۰۱۸ کا سیلاب گزشتہ ۱۰۰ برسوں میں کیرلم میں آنے والا بدترین سیلاب تھا اور پوتین ویلیکّرا ان گاؤں میں شامل تھا جو سب سے زیادہ متاثر ہوئے۔ موسمیاتی تبدیلی پر کام کرنے والی تنظیم ایکوینوکٹ سے وابستہ ڈاکٹر مدھوسودھنن سی جی اور ڈاکٹر شریجا کے جی کی ۲۰۲۰ کی ایک رپورٹ میں ۲۰۱۸ کے غیر معمولی سیلاب کی متعدد وجوہات بیان کی گئی ہیں، جن میں پانی کے بنیادی ڈھانچے کا انتظام، دلدلی علاقوں اور دھان کے کھیتوں میں بڑے پیمانے پر تبدیلیاں، اور موسمیاتی تبدیلی شامل ہیں۔ سیلاب بہت تیزی اور شدت سے آیا، جس میں ۴۰۰ سے زیادہ افراد ہلاک ہوئے اور لاکھوں لوگ بے گھر ہوئے۔ اس تباہی کے نتیجہ میں مویشیوں اور زراعت، ماہی گیری، گھروں اور فصلوں کو بھی نقصان پہنچا، جب کہ سڑکیں، پل اور اسکول تباہ ہو گئے۔ ریاست کو مجموعی طور پر ۱۰ ہزار کروڑ روپے سے زیادہ کا نقصان ہوا۔

سیلجا اور ابھیمَنّیو کا دو منزلہ گھر بھی، ان کے محلے کے بہت سے دوسرے گھروں کی طرح، سیلاب میں بری طرح متاثر ہوا۔ سال ۲۰۱۰ میں اپنی خاندانی زمین پر بنائے گئے اس گھر کا قرض ابھی باقی تھا کہ سیلاب کا پانی نچلی منزل میں داخل ہوگیا۔ پانی تقریباً ۶ سے ۸ فٹ کی بلندی تک پہنچ گیا اور بجلی کے سوئچ بورڈ تک جا پہنچا۔

’’پولیس ہمیں خبردار کرنے اور گھر خالی کرنے کے لیے کہنے ضرور آئی تھی، لیکن ہمیں اندازہ نہیں تھا کہ صورتِ حال اتنی خطرناک ہے۔ ہمیں معلوم ہی نہیں تھا کہ پانی کتنی تیزی سے اور کس قدر بلند ہو سکتا ہے۔ ہم نے اس سے پہلے کبھی ایسا کچھ نہیں دیکھا تھا۔ آخرکار سیلاب کے دوران ہماری فیملی ایک دوسرے سے جدا ہو گئی۔‘‘ فوج نے سیلجا کو ان کی والدہ اور بیٹی کے ساتھ امدادی کیمپ میں پہنچایا۔ جبکہ ابھیمَنّیو، ان کا ایک دوست اور سیلجا کے بھائی دو دن تک اپنے گھر کی چھت پر پھنسے رہے، جس کے بعد انہیں ایک شاپنگ مال منتقل کیا گیا۔

’’میں نے اپنی ۲۴ویں سالگرہ ایک امدادی کیمپ میں منائی، جو ایک شاپنگ کمپلیکس میں قائم کیا گیا تھا۔ حکام کے ذریعہ ہمیں بچا کر کیمپ تک پہنچانے سے پہلے ہم اپنے چچا کے گھر کی چھت پر پھنسے ہوئے تھے اور ۴۸ گھنٹوں تک صرف سادہ چاول کھا کر زندہ رہے۔ ایک دکان کھلی ہوئی تھی، وہاں سے ہم نے کچھ مٹھائیاں کھائیں،‘‘ ابھیمَنّیو آٹھ سال گزر جانے کے باوجود آج بھی یہ تفصیلات یاد کرتے ہیں۔ ’’اس کے بعد سے آج تک ایک بھی ایسا سال نہیں گزرا جب میں نے اس وقت کے بارے میں نہ سوچا ہو۔ اب میری سالگرہ میرے لیے ایک بالکل مختلف معنی رکھتی ہے۔‘‘

سیلجا بتاتی ہیں، ’’تقریباً تین دنوں تک فون کے نیٹ ورک بند رہے۔ ہم ایک دوسرے کی کوئی خبر نہیں لے پا رہے تھے۔ ہمیں معلوم نہیں تھا کہ کون زندہ بچا ہے اور کون نہیں۔ ایسا محسوس ہوتا تھا جیسے امید کے لیے بھی کوئی جگہ باقی نہیں رہی۔‘‘ سیلجا کے شوہر تعمیراتی مزدور ہیں اور کام کے لیے پڑوسی اضلاع میں نقل مکانی کرتے رہتے ہیں۔ اس وقت وہ گھر سے دور تھے۔ سیلجا اگلے تین دنوں تک ان سے رابطہ نہیں کر سکیں، جس کی وجہ سے ان کی بے چینی اور اضطراب بہت بڑھ گیا۔ بالآخر ٹھیکیدار سے رابطہ قائم ہونے کے بعد انہیں اپنے شوہر کے بارے میں معلومات مل سکیں۔

آٹھ سال بعد بھی سیلجا جب بارش ہوتی ہے تو اپنی ذاتی حفاظت کے حوالے سے پیدا ہونے والی بے چینی سے نبرد آزما ہوتی ہیں۔ ’’سیلاب کے دوران گھر کا تمام فرنیچر اور برقی آلات خراب ہو گئے تھے۔ ہم نے کچھ چیزوں کی مرمت کروائی اور کچھ کو تبدیل کیا۔ دیواروں پر اب بھی پانی کے نشانات موجود ہیں،‘‘ وہ کہتی ہیں۔ اور لوگوں کے ذہنوں پر بھی اس کے نشانات باقی ہیں۔ ’’جب ہم واپس آئے اور دوبارہ گھر میں رہنے لگے تو ماں کچھ عرصے تک گھر سے باہر نہیں نکلیں۔ وہ اس وقت کے بارے میں بات کرنا بھی زیادہ پسند نہیں کرتیں۔ جب ہم سب ایک دوسرے سے جدا ہو گئے تھے تو یہ ان کے لیے بہت مشکل وقت تھا۔ آج بھی جب بارش ہوتی ہے تو وہ پریشان ہوجاتی ہیں۔ اس خوف کا اثر اب بھی باقی ہے،‘‘ ابھیمَنّیو کہتے ہیں۔

کوزیکوڈ میں مینٹل ہیلتھ ایکشن ٹرسٹ (ایم ایچ اے ٹی) کے بانی منوج کمار کہتے ہیں، ’’ذہنی صحت پر بہت سے سماجی عوامل اثر انداز ہوتے ہیں، اور اب موسمیاتی تبدیلی ان میں سے بعض مسائل کو مزید بڑھا رہی ہے، جیسے روزگار کے ذرائع تک رسائی۔ قدرتی آفات اور غیر متوقع موسم ان مشکلات میں مزید اضافہ کرتے ہیں۔ سال ۲۰۱۸ کے سیلاب جیسے اچانک اور شدید صدمے بے چینی، ڈپریشن یا عدم تحفظ کے احساس کا باعث بن سکتے ہیں۔ جب کہ سمندری سیلاب جیسے مسلسل مسائل میں مستقل دباؤ اور پریشانی ذہنی صحت کے مسائل پیدا کر سکتی ہے۔‘‘

سیلجا آج بھی اس وقت کو یاد کرتے ہوئے کانپنے لگتی ہیں۔ ’’ہم سمندری سیلاب کے عادی تھے، لیکن ۲۰۱۸ نے ہم سب کو اچانک اپنی گرفت میں لے لیا۔ اس نے ہمیں بہت بری طرح متاثر کیا،‘‘ وہ کہتی ہیں۔ ’’اب جب بھی مسلسل دو دنوں تک شدید بارش ہوتی ہے تو میں پریشان ہوجاتی ہوں۔ ہم اپنے تمام اہم دستاویزات اور الیکٹرانک سامان جمع کرنا شروع کر دیتے ہیں اور اس بات کو یقینی بناتے ہیں کہ انہیں گھر کی سب سے اوپر والی منزل پر رکھا جائے۔ ہم نے پہلے کبھی ایسا نہیں کیا تھا۔‘‘ سیلاب کے بعد سیلجا کے شوہر کو دوبارہ کام ملنے میں تقریباً دو ماہ لگے۔ خود سیلجا کو کام پر واپس آنے میں اس سے بھی زیادہ وقت لگا۔ ’’اس وقت مجھے قرض کی زیرِ التوا قسطوں کی بہت فکر رہتی تھی،‘‘ وہ کہتی ہیں۔ ’’جب چند ماہ بعد ہم نے آہستہ آہستہ دوبارہ کام شروع کیا تو بہت سکون ملا۔‘‘ لیکن ذہنی سکون واپس آنے میں اس سے کہیں زیادہ وقت لگا۔

پوتین ویلیکّرا میں کمیونٹی ریسورس سینٹر چلانے والے ایم پی شجن کہتے ہیں، ’’مختلف لوگوں کے لیے استقامت اور حالات سے دوبارہ سنبھلنے کا مطلب مختلف ہوتا ہے۔ اب ہمارے پاس واٹس ایپ گروپ، سیلف ہیلپ گروپ اور ایک تھیٹر گروپ بھی ہے۔ بہت سے لوگوں نے سیلاب کی وجہ سے اپنا سب کچھ کھو دیا۔ اس نے لوگوں کے روزگار اور ان کے تحفظ کے احساس کو بہت متاثر کیا۔ میری بیوی ایک نرس ہیں اور پرائمری ہیلتھ سینٹر میں کام کرتی ہیں۔ اگرچہ بہت سے لوگ اپنی جسمانی صحت سے متعلق مسائل لے کر وہاں آتے ہیں، لیکن زیادہ تر لوگ یہ نہیں سمجھتے کہ وہ اپنی ذہنی صحت کے لیے بھی علاج اور مدد حاصل کر سکتے ہیں۔‘‘

ایم ایچ اے ٹی کے سینئر کلینیشین، ایلڈہوز سکاریا کے مطابق، اس کی ایک وجہ آج بھی ذہنی صحت سے متعلق مدد حاصل کرنے کے ساتھ جڑا ہوا سماجی داغ ہے۔ یہ صورتِ حال اس حقیقت کے باوجود ہے کہ کیرلم نے ۱۹۹۹ میں ملک کا اولین ڈسٹرکٹ مینٹل ہیلتھ پروگرام (ڈی ایم ایچ پی) شروع کیا تھا، جس کے تحت ہر ضلع میں ماہرِ نفسیات اور ماہرِ نفسیاتی علاج سے لیس ایک دفتر قائم کیا گیا۔

’’اس وقت ہم ۵۷ افراد اور ان کے کنبوں کو ذہنی صحت کی خدمات فراہم کر رہے ہیں۔ ان میں بے چینی اور ڈپریشن میں اضافہ ہو رہا ہے کیوں کہ ذہنی صحت ہمارے اردگرد کے ماحول پر بھی منحصر ہوتی ہے۔ روزگار کا نقصان، وسائل کی کمی – یہ سب چیزیں ایک دوسرے سے جڑی ہوئی ہیں۔ اور اگرچہ ڈی ایم ایچ پی ادویات فراہم کرنے میں مؤثر ہے، لیکن یہ ایک مکمل یا جامع طریقۂ علاج نہیں ہے،‘‘ سکاریا کہتے ہیں۔

سیلجا اور بہت سے دوسرے لوگوں کو جس ذہنی سکون اور بحالی کی ضرورت تھی، وہ انہیں کمیونٹی تھیٹر سے حاصل ہوئی۔ اور دلچسپ بات یہ ہے کہ اس کا آغاز اتفاقاً ہوا۔ سال ۲۰۲۲ میں، مقامی مندر سے واپس جاتے ہوئے ان کی ملاقات اپنی پڑوسن وِلاسنی ٹی پی (۶۳) سے ہوئی، جنہوں نے سیلجا کو اس کیمپ کے بارے میں بتایا جو وہاں منعقد کیا جا رہا تھا۔ یہ کیمپ سیلجا کے لیے ایسی لائف جیکٹ ثابت ہوا جس نے انہیں اپنے اندر کے جذبات کے سیلاب میں ڈوبنے سے بچا لیا۔

’’تھیٹر نے مجھے باورچی خانہ کی چار دیواری سے باہر نکالا۔ میں نے یہ خود کو اور اپنے آس پاس کے لوگوں کو بچانے کے لیے کیا، تاکہ ان مسائل کو بیرونی دنیا اور حکومت تک پہنچایا اور عام کیا جا سکے۔ میں اس ڈرامے میں فیملی کے ایک رکن کا کردار ادا کرتی ہوں، اور جب میں وہ موسیقی سنتی ہوں تو مجھے اپنی روح میں ڈھول کی دھڑکن محسوس ہوتی ہے،‘‘ سیلجا کہتی ہیں۔

ولاسنی بھی سمندری پانی کے کنارے رہتی تھیں اور سیلجا کے گھر سے تقریباً ۱۰ منٹ کی پیدل مسافت پر ان کا گھر تھا۔ انہوں نے بھی ۲۰۱۸ کے سیلاب کی تباہ کاری کا سامنا کیا تھا۔ ان کے شوہر پہلے ہی اپنی ملازمت کھو چکے تھے، جب ان کا ہاتھ اس مشین میں پھنس گیا جو اس کوائر فیکٹری میں استعمال ہوتی تھی جہاں وہ کام کرتے تھے۔ سیلاب آنے کے وقت ولاسنی منریگا سے حاصل ہونے والی آمدنی پر گزارہ کر رہی تھیں۔ ان کے دونوں بیٹے آٹو رکشہ چلاتے ہیں، لیکن ۲۰۱۸ کے بعد کئی ماہ تک انہیں بھی کوئی کام نہیں ملا۔

ان کا گھر مکمل طور پر سیلاب میں ڈوب گیا اور گھر کا سامان خراب ہو گیا۔ ولاسنی اور ان کے شوہر کو کئی دن تک امدادی کیمپ میں رہنا پڑا، جب کہ ان کے بیٹے رشتہ داروں کے ہاں مقیم رہے۔ گھر کو دوبارہ رہنے کے قابل بنانے میں انہیں کئی ہفتے لگے۔ ’’پانی اترنے کے بعد ہم کئی ہفتوں تک ہر روز گھر کی صفائی کرنے آتے تھے۔ کیمپ سے گھر تک کا سفر میرا دل توڑ دیتا تھا۔ سڑکیں تاریک اور سنسان ہوتی تھیں، نہ کوئی آواز ہوتی تھی اور نہ بجلی،‘‘ وہ بتاتی ہیں۔

’’میں جانتی ہوں کہ بہت سے لوگوں نے اپنا سامان پھینک دیا تھا، لیکن ہم ایسا خطرہ مول نہیں لے سکتے تھے۔ میرے بیٹوں کے پاس کوئی کام نہیں تھا اور مستقبل بہت غیر یقینی نظر آ رہا تھا۔‘‘ انہوں نے کچھ بھی نہیں پھینکا، خراب ہو چکا فرنیچر بھی نہیں۔ ’’میں نے ہر چیز کو احتیاط سے صاف کیا اور اس بات کو یقینی بنایا کہ اس پر پھپھوندی نہ لگے۔ سال ۲۰۱۸ کا سیلاب ہماری زندگی میں ایک سنگِ میل ثابت ہوا،‘‘ وہ کہتی ہیں۔ اس سیلاب نے انہیں ہر سال آنے والے سمندری سیلاب کے اثرات کے بارے میں پہلے سے کہیں زیادہ فکرمند بھی کر دیا۔

’’سمندری سیلاب ہر بار اتنا ڈرامائی نہیں ہوتا کہ اسے تباہی یا آفت کے طور پر پہچانا جائے، لیکن یہ آہستہ آہستہ روزمرہ زندگی میں اپنی جگہ بنا لیتا ہے،‘‘ ایکوینوکٹ میں شعبۂ تحقیق کی ڈائریکٹر کے جی شریجا کہتی ہیں۔ ’’پانی بار بار گھروں میں داخل ہوتا ہے، سامان کو نقصان پہنچاتا ہے، کنوؤں کو آلودہ کرتا ہے، صفائی کے نظام کو متاثر کرتا ہے، روزمرہ کے معمولات میں خلل ڈالتا ہے اور رفتہ رفتہ لوگوں کے روزگار کو کمزور کر دیتا ہے۔ بہت سی خواتین بتاتی ہیں کہ سمندری لہروں کے ساتھ زندگی گزارنے کا مطلب مسلسل یہ سوچتے رہنا ہے کہ اگلی بلند لہر گھر میں داخل ہوگی یا نہیں، قیمتی سامان کہاں رکھا جائے، یا یہ سوچنا کہ گھر کی مرمت پر پیسہ خرچ کرنا فائدہ مند بھی ہے یا نہیں۔‘‘

گزشتہ ایک دہائی کے دوران عالمی حدت میں اضافہ اور ہر سال سمندر کی سطح بلند ہونے کے باعث ۲۰۱۱ کے بعد سے سمندری پانی دریا کے دہانوں، چھوٹے آبی ذخائر اور چھوٹی ندیوں کے راستے زیادہ کثرت سے اندرونی علاقوں میں داخل ہونے لگا ہے۔ اس کے علاوہ، ولاّرپڈوم کنٹینر ٹرمینل منصوبہ اور کوچی بندرگاہ کی جہاز رانی کی گزرگاہ کو گہرا کرنا جیسے بعض مقامی عوامل نے بھی صورتِ حال کو مزید خراب کیا ہے۔ اس کے نتیجہ میں ضلع کے نشیبی علاقوں میں اکثر مستقل سیلاب جیسی صورتِ حال پیدا ہو جاتی ہے۔ اسے موسمیاتی تبدیلی کے براہِ راست اور واضح اثر کے طور پر دیکھا جاتا ہے۔ اور ۲۰۲۶ کے ریاستی حکومت کے ایک حکم نامہ میں سمندری سیلاب کو ریاست کے لیے مخصوص آفت قرار دیا گیا ہے۔

’’سال ۲۰۱۸ کے سیلاب اور بار بار آنے والے سمندری سیلاب، دونوں کے مرکز میں پانی کے ساتھ لوگوں کے تعلق میں ایک گہری تبدیلی ہے۔ پانی، جو ہمیشہ سے کیرالہ کی زندگی، روزگار اور ثقافت کا ایک اہم حصہ رہا ہے، اچانک ایک اجنبی چیز بن جاتا ہے۔ وہ بے قابو، غیر متوقع اور آلودہ محسوس ہونے لگتا ہے۔ یہی پانی جو گھروں، کھیتوں اور برادریوں کی پرورش کرتا تھا، انہی میں داخل ہونے لگتا ہے۔ میرے خیال میں جب کوئی اتنی مانوس چیز خوف کا ذریعہ بن جائے تو اس تبدیلی کی نفسیاتی اہمیت بہت زیادہ ہوتی ہے۔ یہ لوگوں کے اپنے ماحول، گھروں اور حتیٰ کہ اپنے تحفظ کے احساس کے ساتھ تعلق کو بھی بدل دیتی ہے،‘‘ شریجا کہتی ہیں۔

یہ آفت لوگوں کے لیے شدید صدمے کا باعث بنتی ہے، کیوں کہ وہ ایک ہی رات میں اپنے گھر، سامان، روزگار، یادیں اور بعض اوقات – سیلجا کی طرح – اپنے عزیزوں کو بھی کھو دیتے ہیں۔ آفت کے دوران اور اس کے بعد فیملی کو جوڑے رکھنے کی پوشیدہ جذباتی ذمہ داری بھی خواتین ہی اٹھاتی ہیں۔

ولاسینی ۲۰۱۸ کے سیلاب کے دوران اپنے ذہن پر پڑنے والے بوجھ کے بارے میں بتاتی ہیں۔ ’’امدادی کیمپ میں ہر شخص بہت پریشان تھا۔ میرے ذہن میں جو کچھ چل رہا تھا، میں نے سب کچھ دوسروں کے ساتھ شیئر نہیں کیا۔ میں ایسا کرنا بھی نہیں چاہتی تھی۔ جب لوگ آپ پر انحصار کرتے ہوں تو اپنے مسائل اپنے تک رکھنا آسان لگتا ہے۔ لیکن صرف اس لیے کہ میں مسکراتی رہتی ہوں، اس کا مطلب یہ نہیں کہ میرے اندر کچھ نہیں چل رہا ہے۔ میں خوش قسمت تھی کہ میرے دونوں بیٹوں نے گھر کی صفائی میں میری مدد کی؛ بہت سے لوگوں کے پاس تو یہ سہولت بھی نہیں تھی۔ مستقبل کو خوف کے ساتھ دیکھنے کا کوئی فائدہ نہیں۔ ہم مسلسل غیر یقینی صورتِ حال میں زندگی گزار رہے ہیں۔ ہم نے دیکھا کہ وایناڈ میں راتوں رات کیا ہوا،‘‘ وہ ۲۰۲۳ میں زمین کے تودے کھسکنے کے واقعے کا حوالہ دیتے ہوئے کہتی ہیں۔ ’’اب میرے لیے تجربہ کرنے کو کچھ باقی نہیں رہا؛ میں سب کچھ دیکھ چکی ہوں۔‘‘

اور ایسے ہی تجربے سے گزرنے والی ولاسنی جیسی خواتین ہی اس تھیٹر پروجیکٹ کا حصہ بنیں۔ یہ تھیٹر کیمپ ممبئی کی ٹی آئی ایس ایس کی ڈاکٹر منجولا بھارتی نے شروع کیا تھا، جو ایکوینوکٹ کی ڈاکٹر جیہ رمن چِلّئیل کی قیادت میں چلنے والے فل برائٹ اَلومنائی پروجیکٹ کا حصہ تھا۔ اس پروجیکٹ کا مقصد کمیونٹی کے سیلاب سے متعلق تجربات اور اس کے تباہ کن اثرات کو ایک ڈرامے کے ذریعے محفوظ اور دستاویزی شکل دینا تھا۔ اس ڈرامے کی ہدایت کاری شریجیت رمَنن نے کی، جو اسکول آف ڈراما، تھریسور کے فیکلٹی رکن ہیں۔

’’اگرچہ ۲۰۱۸ کے سیلاب نے شدید اور اچانک ذہنی صدمہ پیدا کیا، لیکن سمندری سیلاب موسمیاتی تبدیلی سے پیدا ہونے والا ایک دائمی ذہنی دباؤ ہے۔ ایک صورتِ حال پُرتشدد انداز میں اچانک زندگی میں خلل ڈالتی ہے، جب کہ دوسری آہستہ آہستہ اور مسلسل انسان کے تحفظ کے احساس کو کمزور کرتی رہتی ہے۔ لیکن دونوں صورتوں میں صرف جائیداد یا آمدنی ہی ضائع نہیں ہوتی، بلکہ اپنے ماحول اور زمین پر اعتماد بھی مجروح ہوتا ہے۔ جب پانی دوست ہونے کے بجائے ایک غیر متوقع موجودگی بن جائے تو یہ روزمرہ زندگی کو ایسے طریقے سے بدل دیتا ہے جو عملی ہونے کے ساتھ ساتھ گہری جذباتی نوعیت بھی رکھتا ہے،‘‘ کے شریجا کہتی ہیں۔

چیوِٹّورما کا مقصد ایسے حقیقی لوگوں کو اکٹھا کرنا تھا جن کے پاس بدلتے ہوئے ماحول کے بارے میں اپنے حقیقی تجربات اور کہانیاں ہوں۔ جیسا کہ ڈرامے کی ابتدائی سطر میں کہا گیا ہے: ’’یہ کوئی ڈراما نہیں ہے۔ یہ اس سرزمین پر زندگی کی ایک جھلک ہے۔‘‘ اس ڈرامے نے جہاں ناظرین کو موسمیاتی تبدیلی کے باعث آنے والے سمندری سیلاب کے تباہ کن اثرات اور اس کے ایک پوری برادری کی زندگی پر پڑنے والے اثرات سے آگاہ کرنے کی کوشش کی، وہیں اس نے شفا اور امید بھی فراہم کی۔ آخرکار جو دس افراد اداکاری کے لیے آئے، ان میں سے کسی کو بھی تھیٹر کا پہلے سے کوئی تجربہ نہیں تھا، لیکن سب نے خود سیلاب کی حقیقی تباہ کاری کا سامنا کیا تھا۔ ’’ہمیں بالکل اندازہ نہیں تھا کہ وہاں کیا توقع کرنی چاہیے، لیکن شجن صاحب نے ہمیں بلایا تھا، اس لیے ہم چلے گئے،‘‘ ولاسنی کہتی ہیں۔

’’جس دن میں پہلی بار کیمپ گئی، اس کے بعد میں نے اسے کبھی نہیں چھوڑا کیوں کہ اپنی زندگی میں پہلی بار مجھے محسوس ہوا کہ میں نے اپنی قریبی فیملی سے باہر بھی مضبوط تعلقات قائم کیے ہیں۔ میں ہمیشہ تنہا رہتی تھی۔ اب ہم سب ایک دوسرے کے بہت قریب ہیں، اور کسی بھی ضرورت کے وقت وہ میرے ساتھ ہوتے ہیں۔ اس کام نے مجھے زندگی میں ایک بڑے مقصد کا احساس دیا ہے۔ ہم اپنی کہانیاں بہت سے لوگوں تک پہنچانے میں کامیاب ہوئے ہیں،‘‘ سیلجا کہتی ہیں۔

اس کے بعد یہ ڈراما ملک کے مختلف حصوں میں پیش کیا گیا، جس کے ذریعے کیرلم کے ساحلی گاؤوں کے لوگوں کی حقیقی زندگی اور مسائل کو پورے ملک کے سامنے لایا گیا۔ ’’جب میں تھیٹر کرتی ہوں تو مجھے تنہائی محسوس نہیں ہوتی۔ تھیٹر نے مجھے اپنے جذبات کا اظہار کرنے، دوسروں سے جڑنے اور اپنی کہانی بیان کرنے میں مدد فراہم کی ہے،‘‘ وِلاسنی کہتی ہیں۔

’’چیوِٹّورما اس مسلسل غیر یقینی صورتِ حال کے بارے میں ہے جس کا ہمیں پانی جمع ہونے کی وجہ سے سامنا رہتا ہے۔ ڈرامے کے آخر میں لوگ اپنی زمین چھوڑ کر چلے جاتے ہیں، اور حقیقت میں بھی ہم یہی ہوتا ہوا دیکھ رہے ہیں۔ مجھے اپنے گروپ پر بہت فخر ہے، کیوں کہ ہم لوگوں کو یہ محسوس کراتے ہیں کہ ہم کن حالات سے گزرتے ہیں۔ ہمارے کئی شو دیکھنے کے بعد ہم نے لوگوں کو روتے ہوئے دیکھا ہے۔ اب زیادہ لوگ جانتے ہیں کہ ہماری زمین پر رہنا قابلِ عمل نہیں رہا،‘‘ ولاسنی کہتی ہیں۔

سب سے بڑی بات یہ ہے کہ یہ کمیونٹی تھیٹر ان لوگوں کے لیے گروپ تھیراپی – یعنی ۲۰۱۸ کے سیلاب اور بڑھتے ہوئے سمندری سیلاب کے اجتماعی صدمے کو سمجھنے، اس کا سامنا کرنے اور اس سے نکلنے کا ایک ذریعہ بن گیا ہے۔

موسمیاتی تبدیلی اور ذہنی صحت پر مبنی پاری کی ملک گیر سیریز ماری والا ہیلتھ انیشئیٹو کے تعاون سے پیش کی جا رہی ہے۔ اس سیریز میں موسمیاتی بحران کے دیہی ہندوستان اور شہری علاقوں میں رہنے والے دیہی مہاجرین کی ذہنی اور مجموعی صحت، نیز ان کے روزگار پر پڑنے والے اثرات کا جائزہ لیا جائے گا۔