पानी डूबइलक, रंगमंच बचइलक

मंच पर अन्हार बा. कुछ आदमी-औरत लोग के परछाई लउकता. सभे लोग लागता कवनो चबूतरा पर ठाड़ होखे. पाछू से एगो आवाज आवता, “हर साल ऊपर के इलाका से नदी संगे बह के आवे वाला माटी समुद्र तट के किनारे-किनारे जमा होखत चल गइल, आ बैकवाटर (समुंदर किनारे के शांत पानी वाला इलाका) में टापू बनत चल गइल.” पाछू से आवत एगो आवाज केरलम (पहले केरल के नाम से जानल जात रहे) के एर्नाकुलम के समुंदर किनारे बसल गांव सभ के जमीन आ इतिहास के बारे में बतावे लागल. परछाईं के पाछू परदा पर उभरत तस्वीर एह जगह के पुराना कहानी सुनावता. ई कहानी 1341 ईस्वी से सुरु होखेला. तब ई इलाका ऐतिहासिक बंदरगाह शहर मुजिरिस के हिस्सा रहे.

मंच पर मद्धम रोसनी पड़ रहल बा. सोझे एगो घर लगे बाढ़ में डूबल सड़क पर घुटना ले पानी हेल के आवत दस ठो लोग लउकता. ऊ लोग पानी में छप-छप करत, रुक-रुक के चलत दर्शक ओरी आवता. पाछू में बाज रहल संगीत तेज हो जाता आउर ऊ कवनो सायरन जइसन आवाज आवे लागता.

मंच पर मौजूद दस कलाकार में से सैलजा के.एस. भी बाड़ी. एह नाटक के नाम बा- ‘चेविट्टोरमा’. माने स्थानीय कैथोलिक अनुष्ठान. एकरा में अंतिम सांस लेत मनई के कान में फुसफुसा के प्रार्थना कइल जाला आ ढाढ़स बन्हावल जाला. एह नाटक में अभिनय करे वाला बाकी लोग जेका शैलजो के अभिनय के पहिले से कवनो अनुभव नइखे. असल में, ई सामुदायिक रंगमंच ओह लोग खातिर अइसन जगह बा, जहंवा असली जिनगी आ कल्पना के बीच के फरक खतम होन जाला.

“माई अक्सरहा बतावत रहे कि लरिकाई में हमनी खूब शैतान रहीं. शैताने ना, एगो छोट तूफान कहीं. माई खियावे खातिर हमराकहानी सुनावस. नरियर तेल के हल्का धार आ नून संगे हल्का गरम भात के दिव्य स्वाद. एकदम मुंह में पानी ला देवे वाला. ओकरा बाद जब 12-13 साल के भइनी, त एगो ज्योतिषी घरे आइल. हमार हाथ देखत कहलक, ‘ई एक दिन घर के पूरा खाली कर दीहन. नून के एगो कण ना छोड़िहन!’ ई सब सुनके हम परेशान हो गइनी. का सच में हम अइसन कर सकिला? बाकिर घर के लोग हंसे लागल.”

“कइएक बरिस बाद, 2018 में, माई हमरा संगे आके रहे लगली. बेचारी, कुछे दिन के मेहमान बन के आइल रहस.” सैलजा नून के डिब्बा हाथ में धइले ध्यान से सुनत दर्शक लोग के बाढ़ के तुरंते बाद माई के खतम होखे के कहानी सुनावे लगली.

“ई रंगमंच समूह हमनी के परिवार जइसन बा. एह लोग के संगे रहनी, त आपन मन के हालत फेर से ठीक कर पइनी. इहो समझ में आ गइल कि हमहूं कुछ कर सकत बानी आ समाज के कुछ दे सकत बानी,” आपन रोजगार करे वाली सैलजा गर्व से कहली. ऊ अपनी के गृहिणी कहेली. बाकिर उऩकर घर में बनावल अचार के बिजनेस बा. हाले में ऊ एगो गहना के दोकानो में बिक्री के काम पकड़ले बाड़ी. ऊ कहेली, “सामुदायिक रंगमंच 2018 से जुड़ला के बाद हम 2018 के ओह हादसा से उबर पइनी आ आपन कहानी इहंवा लोग से बांट पइनी. खासकर ओह लोग से, जे ना जानेला कि हमनी ज्वार के पानी से आवे वाला बाढ़ जइसन हालात में कइसे रहिला आ एकरा से कइसे निपटिला.”

सैलजा के 32 साल के बेटा, अभिमन्यु पी.जे बतावेलन, “हमनी इहंवा गांव में बाढ़ आइल कवनो नया बात नइखे.” पुथेनवेलिक्कारा ताकतवर पेरियार आ चालाकुडी नदियन के ठीक बाच में पड़ेला. आ चारों ओरी ज्वारीय जलकुंड आ बैकवाटर बा. “हर साल, मोटा-मोटी दिसंबर में, ज्वार चढ़े चलते पानी घर में घुस आवेला, चाहे रोड पर जमा हो जाला. आ बरसात में त पानी बरसबे करेला. बाकिर हमनी के पता होखेला कि अब का होई. पानी आवत हमनी देख सकिला. ई धीरे-धीरे बढ़ेला आ एकर अंदाजा लगावल जा सकेला. हमनी एकरा से बच सकिला. बाकिर सन् 2018 के बाते अलग रहे.”

सन् 2018 के बाढ़ केरलम में पछिला 100 बरिस में आइल बाढ़ में सबले भयावह रहे. पुथेनवेलिक्कारा सबले जादे खराब तरीका से प्रभावित गांव में से एगो रहे. जलवायु परिवर्तन पर काम करे वाला संस्था इक्विनॉक्स्ट से जुड़ल डॉ मदुसूदनन सी.जी. आ डॉ. श्रीजा के.जी के 2020 के एगो रिपोर्ट में 2028 में आइल एह भयावह बाढ़ के कइएक कारण बतावल गइल बा. जइसे जल संसाधन के प्रबंधन से लेके दलदली जमीन आ धान के खेत में भइल बड़ बदलाव, आ हवा-पानी में परिवर्तन भी, सब एकर कारण रहल. बाढ़ बहुते तेजी से चढ़ल आ देखते-देखते तबाही मचा देलक. 400 से जादे लोग मर गइल आ लाखन के तादाद में लोग बेघर हो गइल. मवेशी आ खेती-बारी के नुकसान भइल, मछरी पकड़ के गुजारा करे वाला लोग पर भी असर पड़ल. घर, फसल, सड़क, पुल आ स्कूल सब कुछ बाढ़ में बरबाद हो गइल. राज्य में 10,000 करोड़ रुपइया से जादे के नुकसान दर्ज भइल.

सैलजा आ अभिमन्यु के दू तल्ला घरो के, लगे के दोसर घर जेका, बाढ़ में बहुते नुकसान भइल. 2010 में आपन पारिवारिक जमीन पर बनावल एह घर के करजा सधावल अबही बाकिए रहे. पानी निचलका तल्ला में घुस आइल. कोई 6 से 6 फुट ऊंचाई पर पहुंच गइल. इहंवा ले कि बिजली के स्विच बोर्डो पानी में चल गइल.

“पुलिस चेतावे आइल आ घर छोड़के जाए के कहे लागल. बाकिर हमनी के स्थिति ओतना गंभीर ना लागत रहे, जेतना ऊ लोग बतावत रहे. हमनी के अंदाजे ना भइल कि पानी एतना जल्दी आ एतना ऊपर चढ़ जाई. पहिले अइसन कबो ना देखले रहीं. आखिर में, बाढ़ आइल त पूरा परिवार राई-छित्ती हो गइल.” सैलजा, उनकर माई आ बेटी के लेके सेना के लोग राहत शिविर ले गइल. अभिमन्यु, उनकर एगो दोस्त आ सैलजा के भाई लोग दू दिन ले अपने घर के छत पर फंसल रहल. ओह लोग के बाद में निकाल के एगो मॉल ले जाइल गइल.

“हमार 24वां जन्मदिन शॉपिंग कॉम्लेक्स में लगावल कैंप में मनल. अधिकारी लोग हमनी के बचाके कैंप लइलक, ओकरा से पहिले हमनी आपन मामा के घर के छत पर फंसल रहीं. 48 घंटा ले छूछे भात खाके रहनी. एगो खुलल दोकान से कुछ मिठाइयो कीनल गइल रहे,” अभिमन्यु के आज आठ साल बादो, ओह घरिया के छोट-छोट बात इयाद बा. “तब से अइसन एगो साल नइखे बीतल जब हम ओह हादसा के बारे में सोचले ना होखीं. आज हमार जन्मदिन के मतलब कुछ आउर बा.”

“कोई तीन दिन ले फोन नेटवर्क बंद रहल,” सैलजा बतइली. “हमनी के एक-दोसरा के खबर भी ना ले पावत रहीं. पते ना रहे के जिंदा बा, के मर गइल. हर उम्मीद हार चुकल रहीं.” सैलजा के घरवाला निर्माण मजूर बाड़न आ पड़ोसी जिला में रह के काम करेलन. ओह घरिया ऊ घर पर ना रहस. अगिला तीन दिन ले सैलजा के उनका से कवनो संपर्क ना भ पाइल. ठेकेदार से बात भइला पर उनकर चिंता दूर भइल.

बाढ़ के आठ बरिस बीतलो पर बरखा आवते सैलजा डेरा जाली. “बाढ़ में घर के कुरसी-टेबुल सब, बिजली के सामान सब बेकार हो गइल. कुछ ठीक करवइनी, कुछ के बदल के नया लगावे पड़ल. देवाल पर आजो चढ़ल पानी के निसान बा,” ऊ कहली. बाकिर ई निसानी देवाले पर ना, लोग के मनो पर रह गइल बा. अभिमन्यु बतावेलन, “हमनी जब घर लउटनी आ रहे लगनी, त माई केतना दिन ले बाहर ना निकलली. ऊ ओह घरिया के बातो कइल पसंद ना करेली. हमनी जब छितरा गइल रहीं, उऩका खातिर ऊ बहुते कठिन घड़ी रहे. आजो बरखा होला, त ऊ घबरा जाली. उनकर मन में डर कहीं ना कहीं रह गइल बा.”

“मानसिक सेहत पर रोज के जिनगी आ समाज के बहुते असर होला. जलवायु बदलाव चलते ई परेसानी तेज हो रहल बा, जइस रोजी-रोटी के साधन नइखे मिलत. आपदा आ मौसम के अनिश्चितता एकरा आउर गंभीर बना देले बा. सन् 2018 में आइल बाढ़ जइसन आपदा लोग के मन में सदमा, डर, उदासी आ असुरक्षा के भावना पैदा कर सकेला. ज्वार के पानी से बेर-बेर आवे वा बाढ़ जइसन परेसानी जदि लगातार बनल रहे, त रोज के तनाव धीरे-धीरे मन के सेहत खराब कर सकेला,” कोझिकोड में पड़े वाला मेंटल हेल्थ एक्शन ट्रस्ट (एमएचएटी) के संस्थापक मनोज कुमार कहेलन.

बाढ़ के दिन सब इयाद करत सैलजा के आजो थरथरी छूट जाला. “ज्वार के पानी से आवे वाला बाढ़ त हमनी देखत आइल रहीं. बाकिर 2018 खातिर तइयार ना रहीं. उ हमनी के एकदम झकझोर के रख देलक,” ऊ कहेली. “लगातार दू दिन ले बरखा पड़ेला, त मन डेरा जाला. हमनी घर के जरूरी कागज-पत्तर आ बिजली के सब सामान सब समेट के सबले ऊपर वाला तल्ला में रख देले बानी. पहिले अइसन करे के जरूरत ना पड़ल रहे.” बाढ़ के बाद सैलजा के घरवाला के काम मिले में दू महीना लाग गइल. सैलजा के आपन काम पर लउटे में आउर समय लागल. “ओह घरिया करजा के बकाया किस्त से बड़ा चिंता में रहत रहीं. बाकिर जब कुछ महीना बाद धीरे-धीरे काम मिले लागल, त राहत मिलल,” ऊ बतइली. बाकिर मन के शांति लउटे में आउर समय लाग गइल.

“हर आदमी के मुस्किल समय के बरदास्त करे आ फेर से संभले के तरीका अलग होखेला,” पुथेनवेलिक्कारी के कम्युनिटी रिसोर्स सेंटर चलावे वाला एम.पी. शाजन कहेलन. “अब त हमनी लगे व्हाट्सऐप ग्रुप बा, एक-दोसरा के मदद करे वाला समूह बा, नाटक करे वाला टोलियो बा. बाढ़ में केतना लोग आपन सब गंवा देलक. कमार्ई-धंधा बिगड़ल आ मन असुरक्षित हो गइल. हमार घरवाली प्राथमिक स्वास्थ्य केंद्र में नर्स बाड़ी. लोग देह के बीमारी के इलाज खातिर त खूब आवेला. बाकिर जादेतर लोग ना जाने कि मन परेसान बा, त ओकरो इलाज आ मदद मिल सकेला.”

एमएचएटी के वरिष्ठ चिकित्सक एल्डोज साकरिया आजो मानसिक सेहत खातिर सहायता लेवे में झिझक आ बदनामी के डर के एकर बड़ा वजह मानेलन. ई स्थिति अइसन राज्य, केरलम के बा, जे 1999 में जिला मानिसक स्वास्थ्य कार्यक्रम (डीएमएचपी) सुरु करे वाला पहिल राज्य में से रहे. एह कार्यक्रम में हर जिला में एगो कार्यालय खोलल गइल रहे, जहंवा मनोचिकित्सक आ मनोवैज्ञानिक लोग मदद खातिर मौजूद रहे.

“अबही हमनी 57 लोग आ उनकर परिवार के मानसिक सेहत ठीक करे में मदद देत बानी. एकरा में से कइएक लोग बढ़त घबराहट आ डिप्रेशन से परेसान बा. असल में, मन पर आस-पास के हालात के सीधा असर पड़ेला. कमाई-धंधा छिना गइल, साधन-संसाधन कम पड़ गइल. ई सब एक-दोसरा से जुड़ल बा. डीएमएचपी दवाई देवे में त अच्छा बा, बाकिर मानसिक सेहत के हर पहलू के देखभाल करे में ओतना सक्षम नइखे,” साकरिया कहलन.

सामुदायिक रंगमंच सैलजा आ उनकर जइसन कइएक लोग के मानसिक परेसानी से उबरे में बहुत मदद कइलक. ई सब एगो संजोग रहे. सन् 2022 में एक दिन मंदिर से निकलत घरिया सैलजा के आपन पड़ोसन, 63 बरिस के टी.पी से भेंट भइल. उहे उनका गांव में लागल कैंप के बारे में बतइली.

सैलजा के मन में उफनत बाढ़ से बचावे में कैंप लाइफ जैकेट साबित भइल.

“थियेटर हमरा चूल्हा-चौका से बाहर निकललक. हम ई काम अपना आस-पास के लोग के, अपना के बचावे खातिर कइनी, एह मसला के बाहर के दुनिया आ सरकार ले पहुंचावे खातिर कइनी. नाटक में हम एगो परिवार के सदस्य बानी आउर जब ऊ संगीत सुनाई पड़ेला, त अइसन लागेला जइसे आत्मा में ढोल के थाप पड़त होखे,” सैलजा कहेली.

विलासिनी भी सैलजा के घर से इहे कोई दस मिनट के पैदल दूरी पर बैकवाटर किनारे रहत रहस. सन् 2018 में आइल बाढ़ के कहर उनको झेले के पड़ल रहे. घरवाला के नौकरी त पहिलहीं जा चुकल रहे. नरियर के रेशा (कॉयर) के कारखाना में काम करत घरिया एगो मसीन में उनकर हाथ चल गइल रहे. बाढ़ आवे घरिया विलासिनी मनरेगा के कमाई के भरोसे रहस. उनकर दू ठो लइका लोग ऑटो चलावेला. बाकिर 2018 के बाढ़ के बाद कइएक महीना ले उनकर बइठा-बइठी चलल.

सउंसे घर पानी में डूब गइल, घर के सामान राई-छित्ती हो गइल. विलासिनी आ उनकर घरवाला के कइएक दिन ले कैंप में बितावे पड़ल. बेटा लोग सगा-संबंधी लोग इहंवा रहल. घर रहे लायक बनावे में बहुत दिन लाग गइल. ऊ बतावेली, “पानी उतरल, त कइएक हफ्ता घर साफ करत रह गइनी. कैंप से घर आवे-जाए में बहुत दिक्क होखत रहे. अन्हार आ सून गली. ना बिजली, ना आवाज.”

“केतना लोग बाढ़ में खराब भइल सामान सब फेंक देलक. बाकिर हमनी अइसन जोखिम ना उठा सकत रहीं. हमार लइका लोग लगे काम ना रहे. आगू का होई कुछ पता ना रहे.” ऊ घर के एक्को सामान ना फेंकली, इहंवा ले कि टूटल फर्नीचर भी संभार के रख लेली. “एक-एक सामान संभार के साफ कइनी आ ध्यान से रखनी कि कहीं ऊ भुआ (फफूंद) ना जाए. 2018 के बाढ़ हमनी के जिनगी के बड़ मोड़ साबित भइल.” अब हर साल ज्वार के पानी चलते आवे वाला बाढ़ लेके उनकर मन में चिंता आउर गहरा गइल बा.

“ज्वार के पानी से आवे वाला बाढ़ हर बेर एतना भयानक ना होखे कि ओकरा आपदा मानल जाव. बाकिर ई धीरे-धीरे लोग के जिनगी के हिस्सा बन जाला,” इक्विनॉक्त के शोध निदेसक के.जी श्रीजा कहेली. “पानी घर में घुस जाला, सामान सब खराब कर देवेला, ईनार गंदा हो जाला, साफ-सफाई पर असर पड़ेला. रोज के काम-धंधा में गड़बड़ी आवेला आउर धीरे-धीरे कमाई-धंधा भी कमजोर कर देवेला. केतना मेहरारू लोग बतइलक कि ज्वार संगे जिए के मतलब बा कि राउर दिमाग में हरमेसा इहे चलत रही कि अबकी ज्वार जादे तेज आइल, त घर में घुसी कि ना, कीमती सामान सब कहंवा धइल जाई, घर के मरम्मत पर फिलहाल पइसा लगावल सही रही कि ना…”

बीतल कोई दस बरिस में धरती गरम होखे के रफ्तार बढ़ल आ समुंदर के पानी हर साल ऊपर उठत चल गइल. एह चलते 2011 से समुंदर के पानी नदियन के मुहाना, छोट जलस्रोत आ नाला के रस्ते अंदरूनी इलाका सब में घुसत रहल. एकरा अलावे, वल्लारपाडम कंटेनर टर्मिनल परियोजना आ कोच्चि बंदरगाह के जहाजरानी मार्ग के गहरा कइल जाए से जिला के निचला इलाका सब में स्थायी बाढ़ के हालात बन गइल. एकरा जलवायु में बदलाव के सीधा असर के रूप में देखल जा रहल बा. इहंवा ले कि 2026 में राज्य सरकार ज्वार के पानी से आवे वाला बाढ़ के राज्य-विशेष आपदा के दरजा दे देले बा.

“2018 के बाढ़ आ बेर-बेर आवे वाला ज्वार के बाढ़, दुनो के जड़ में पानी संगे लोग के संबंध में आइल बड़ बदलाव बा. केरलम में पानी हरमेसा से लोग के जिनगी, कमाई-धंधा आ संस्कृति के हिस्सा रहल बा. बाकिर ई पानी अचानक बाइली (अनजान) आ भयावह लागे लागल बा. कब पानी बढ़ी, कब घर में घुस जाई- कवनो भरोसा नइखे रहल. जवन पानी से पहिले घर, खेत आ गांव पलात-पोसात रहे, उहे घर में घुस के तबाही मचावे लागल बा. कवनो जानल-पहिचानल चीज से डर लागे लागे, त मन पर बहुते असर पड़ेला. एह से लोग आपन माहौल, आपन घर आ आपन सुरक्षा के बारे में सोचे के तरीका तक बदल देवेला,” श्रीजा कहेली.

आपदा बड़ा दुख आ सदमा देवे वाला चीज बा. एके रात में केतना लोग आपन घर, सामान, कमाई के जरिया आ बरिसन ले संभारल याद सब गंवा देवेला. सैलजा जइसन कुछ लोग आपन करीबी खो देवेला. बाढ़ के दौरान आ ओकरा बाद परिवार के संभारे के जिम्मेदारी औरतन पर आ जाला. ई अइसन भावनात्मक बोझ हवे, जे बाहर से ना लउके.

विलासिनी 2018 में आइल बाढ़ घरिया अपना पर पड़ल मानसिक बोझ के बारे में बतइली. “कैंप में सभे परेसान रहे. हमरो मन बेचैन रहे, केकरो कुछ कह ना पावत रहीं. कुछ करे के भी ना चाहत रहीं. जब रउआ ऊपर परिवार निर्भर होखेला, त आपन मन के बात आपने तक सीमित रखल आसान लगेला. बाकिर हम हरमेसा हंसत रहनी, एकर मतलब ई ना रहे कि हमरा भीतर कुछ चलत ना रहे. हमार भाग नीमन रहे कि दुनो लइका लोग घर साफ करे आ फेरु से रहे लायक बनावे में मदद कइलक. केतना लोग के भाग में एतनो ना होखेला. आगू के डर के बारे में सोचे से कवनो फायदा ना रहे. लगातार अनिश्चितता में जिनगी बीतत रहे. हमनी देखले बानी वायनाड में रातोंरात का भइल,” ऊ 2023 में भइल भू-स्खलन के बारे में बात करत रहस. “अब कुछ नया देखे के बाकी ना रह गइल बा. सब देख चुकनी.”

बाढ़ के अइसन तबाही के बहुते नजदीक से देखे वाला विलासिनी जइसन लोग डॉ मंजुला भारती (टीआईएसएस, मुंबई) के थियेटर प्रोजेक्ट से जुड़ गइल. ई प्रोजेक्ट इक्विनॉक्त के डॉ. जयरामन चिल्लयिल के अगुवाई में चलावल गइल फुलब्राइट एल्यूमनी प्रोजेक्ट के हिस्सा रहे. एह थियेटर कैंप के मकसद बाढ़ के भयानकर मार से गुजरल समुदाय के अनुभव के नाटक के जरिए दर्ज करे के रहे. एकरा त्रिशूर के स्कूल ऑफ ड्रामा के श्रीजीत रमणन के निर्देशन में नाटक के रूप में दर्ज कइल गइल.

“2018 में आइल बाढ़ गहरा सदमा देलक. जबकि समुंदर के पानी से बेर-बेर आवे वाला बाढ़ से जलवायु से जुड़ल तनाव लगातार बनल रहेला. एगो अचानक आइल बड़ झटका ह, त दोसर मन के सालत रहे वाला, आ असुरुक्षित महसूस करावे वाला. दुनो हालत में खाली घर-दुआर आ कमाइए के नुकसान ना होखे. लोग के आपन जमीन आ आसपास के माहौल पर भरोसा टूट जाला. पानी जब सहारा ना रहे, अचानक तबाही लावे वाला बन जाए, रोज के जिनगी बदल देवेला. मनो पर बहुत असर डालेला.”

चेविट्टोर्मा के मकसद अइसन लोग के साथे लावे के रहे, जेकरा लगे आपन बदलत परिवेस आ ओकरा में आइल बदलाव के असली कहानी रहे. जइसन कि नाटक के सुरुए में कहल गइल, “ई नाटक ना ह, धरती के असल जिनगी के एगो टुकड़ा ह.” नाटक देखे आइल लोग के बतावल गइल कि बदलत जलवायु चलते ज्वार के बाढ़ कइसन तबाही मचा रहल बा, एकर गांव के जिनगी पर कइसन असर पड़ रहल बा. बाकिर ई नाटक खाली डर आ नुकसाने के बात ना करेला, लोग के हिम्मत आ उम्मीदो देवेला. कोई 10 लोग नाटक में अभिनय करे आइल, जेकरा पहिले से थियेटर के कवनो अनुभव ना रहे. बाकिर बाढ़ के असली कहर ऊ लोग आपन आंख से देख चुकल रहे. विलासिनी कहेली, “हमनी के पता ना रहे इहंवा का होई, बाकिर शाजन सर बोलवले रहस, त आ गइनी.”

“जवन दिन कैंप गइनी, उहंई के होके रह गइनी,” सैलजा बतावेली. “काहेकि जिनगी में पहिल बेर लागल कि आपन परिवार के बाहरो हम कुछ लोग से बहुते मजबूत रिस्ता बना सकिला. पहिले हरमेसा अकेला रह जात रहीं. अब हमनी सब एक-दोसरा के बहुते करीब बानी. कवनो चीज के जरूरत होखेला, त सभे लोग हमरा संगे ठाड़ रहेला. एह काम से हमरा एगो बड़ मकसदो मिलल बा. हमनी आपन कहानी एतना जादे लोग तक पहुंचा पइनी.”

इहंवा से ई नाटक देस के अलग-अलग हिस्सा में जा चुकल बा. ई केरलम के समुंदर किनारे के गांव के लोग के असली जिनगी आ परेशान लोग के सामने ले आइल बा. विलासिनी कहेली, “हम जब मंच पर रहिला, त अकेला ना लागे. रंगमंच हमरा आपन बात कहे, दोसरा से जुड़े आ आपन कहानी बांटे में मदद कइलक.”

“चेविट्टोर्मा, जलभराव के बीच जियत हर घड़ी लागे वाला अनजान डर के कहानी बा. नाटक के आखिर में लोग आपन घर-दुआर छोड़ के चल जाला. असल जिनगी में भी त इहे देखे के मिलेल. हमरा आपन टोली पर गुमान बा. काहेकि हमनी लोग के आपन तकलीफ महसूस करा पावत बानी. हमनी पर का गुजरल, नाटक में देख के केतना लोग के लोर बहावत देखनी. अब जादे लोग समझे लागल बा कि एह जमीन पर रह के गुजारा कइल केतना मुस्किल बा,” विलासिनी कहली.

सबसे बढ़के, ई सामुदायिक रंगमंच उनका खातिर आपन मन के बात कहे, दुख-दरद बांटे आ ओकरा से उबरे के जरिया बन गइल. सन् 2028 के बाढ़ आ बढ़त ज्वारीय बाढ़ के तकलीफ ऊ लोग एही मंच पर मिलके जियेला, समझेला आ बांटेला.

पारी के जलवायु बदलाव आ मानसिक सेहत पर देस भर में चल रहल एह सीरिज के मारीवाला हेल्थ इनिशिएटिव के सहजोग प्राप्त बा. एह सीरिज में देखावल गइल बा कि जलवायु संकट चलते गांव के लोग आ शहर में रहे वाला गांव-देहात के लोग के मन आ देह पर, रोजी-रोटी पर कइसन असर पड़ रहल बा.