लरिकन खातिर बड़का बात सोचे वाली टीचर

हमार नाम संध्या धयील गईल. जौना के मतलब होला सांझ के अन्हार. हमार परिवार सोचलस कि हमार करिया रंग प ईहे नाम ठीक रही.

करिया रंग चलते परिवार में हमरा नेह-दुलार ना मिलल. इ हमार लरिकाईं रहे. हम चमड़ी के रंग प होखे वाला भेदभाव महसूस कईनी. इ सब हमेसा हमरा साथे रहल.

1996 में झारखंड के चतरा जिला के संघारी गांव में एगो मुंडा आदिवासी परिवार में हमार जनम भईल. हमरा माई के नाम निर्मला केरकट्टा, औरी बाबू के नाम सुमन लाकर ह. बिहार-झारखंड बॉर्डर पर पड़े वाला चतरा जिला में हमार घर बा. ई चारू ओर से झरना, जंगल, नदी से घेराइल बा.

हमनी खेतिहर रहीं, लगे दू एकड़ जमीन रहे. इहे जमीन में ओकरा, बीन्स, आलू, गोभी, औरी गाजर जइसन तरकारी उगावत रहीं. धानो रोपत रहीं. बाकिर एतना कइलो पर हमनी लगे मस्किल से साल में 30,000 रोपया आवे. बापू चापाकल हलावे औरी सड़क बनावे के काम में दिहाड़ी मजूरियो करस.

हमार परिवार महुआ के दारुओ बनावे. एकरे पइसा से हमनी छव जना के पेट पोसाय. हमार दू बहिन औरी एगो भाई गांव के एगो छोट मिठाई के दोकान प कार करे जेसे हमनी के पढ़ाई के खर्चा में मदद हो सके.

पनरह लोग के बड़हन परिवार में रहे के मतलब बहुत ढेर काम. हम जब बड़ होत रहनी तब अपने घर में हम नोकर रहनी. ओ बेरा जब हम दुसरा कलास में रहनी 7 साल के, तब हम पूरा घर खातिर कार करीं. सब लोग खातिर खयका बनाईं, सब बर्तन भड़िया साफ़ करी. गोठ साफ़ करीं. बकरी औरी गाय खातिर घास ले आयीं. जलावन के लकड़ी बीनीं जंगल से. एही तरे के ढेर कार करीं.

हम 2015 में आपन पढ़ाई पूरा कईनी. आगहूं पढ़ी के हमार मन देख के हमार बापू हमरा 175 किलोमीटर दूर रांची के हॉस्टल में भेजे के बिचार कईलन. ऐतरे हम आपन आगे के पढ़ाई, राजनीति बिज्ञान पढे खातिर रांची के सेंट जेवियर्स कॉलेज गईनी.

कॉलेज में हिंदी में पढ़ाई होखे. घरे सादरी औरी मुंडा बोलल जाय. त हमरा बुझइबे ना करे कि का पढावल जाता. हम अपना घर, गांव जवार से बहरा के दुनिया देखलही ना रहनी. कुल मिला के स्नातक के पढ़ाई हमारा खातिर जिनगी के बड़का चुनौती रहे. घरे औरी परिवार से दूर रह के पढ़ाई कईल हमारा ला मस्किल रहे. बाकिर 2018 में हम बहुत बढ़िया से आपन स्नातक के पढ़ाई पूरा कईनी.

हम आगे पढ़े के चाहत रहनी. एहीसे छोटा नागपुर के लौ कॉलेज में दाखिला के अरजी दहनी. बाकिर हमार परिवार के स्थिति एतना अच्छा ना रहे कि उ हमार खरचा उठा सके

एसे हम वापिस घरे लौट गईनी. बाकिर सरकारी नौकरी खोजल जारी रखनी. ना हमरा नौकरी मिलल ना हम नौकरी पावे खातिर कौनो परीक्षा पास कईनी. बुझात ना रहे का करीं.

लायिकाईयें से हम आपन समाज से बाल बियाह, डाईन प्रथा (जादू टोना) जेमे मेहरारू लोग के डाइन कह के परेसान कइल जाला, जइसन कुरीति के हटावे आ गरीबी, कुपोसन, जंगली जनरवन के हतल, उजाड़ल जाइल, जंगल के कटाई औरी एहीतरे के ढेरे समस्या के दूर करे के चाहत रहीं.

कॉलेज में हम नेहरु युवा केंद्र (नेहरु युवा केंद्र संगठन) के स्वयमसेवक रहनी. इहंवा खेल औरी युवा जागरुकता के कार्यक्रम होखे. एकरा से पहिले बन बिभाग हमरा के संरक्षण औरी शिक्षा, सामुदायिक जागरूकता खातिर सामिल होखे के कहलस. इ पगार वाला कार ना रहे, तब्बो एमे सामिल भईला के हमरा खुसी रहे.

सन् 2022-2023 में हमरा ग्रीन हब फेलोशिप मिलल. इ हमरा जिनगी के बहुत महत्त के बिंदु रहे. हम अपना समुदाय के आगे ले आवे खातिर एगो डॉक्यूमेंट्री, ‘फ्लाइट्स ऑफ़ होप’ बनवनी. इ बहुत मस्किल कार रहे. सुरुआत में बहुत तकनीकी परेसानी भईल. बुझाइल कि हमरा त कुछु आवते नईखे. बाकिर हमरा से बड़ लोग बहुत मदद कईल.

अपना डॉक्यूमेंट्री से हम अपना जवार के लोग के इ बतावे के चाहत रहनी कि हमनी आदिवासी समुदाय के बोली भाखा बहुत तेजी से बिलायिल जाता. औरी हम अपना संस्कृति के रच्छा क के ओकरा के आगहू बढावे के चाहतानी.

लमसम एही बेरा हम अपना समुदाय के छोट लईकन के झरना लगे मोसाफिर लोग से भीख मांगत देखनी. हमरा अपना में बहुत लचारी बुझाईल.

हम हमेसा अपना औरी अपना समुदाय में बदलाव ले आये के सोचीं. बाकिर आपन पढ़ाई औरी हुनर के बादो हम बेसी कुछु ना कर सकनी.

सिक्षा बेवस्था ठीक से ना चलत रहे. लईका कुल ठीक से ना पढ़ पावत रहलें कुल. उ या त पढ़ाई छोड़ दे, या त जिला औरी राज्य छोड़ के बहरा मजूरी करे चल जायं कुल. इ सब बाबा-नाना के जमाना से होखे, काहे से कि हमनी के इलाका में रोजगार नईखे.

भीख मांगत लईका हमरा आंखी में छपल रहलें कुल. एहीसे हम चतरा जिला के सालेड़ गांव के आंगनबाड़ी कार्यकर्ता से भेंट करे गईनी. देखनी कि उंहा सरकारी स्कूल में क्लास 1 से 8 के लईकन खातिर एक्के गो टीचर रहे.

टीचर लोग के बिना स्कूल के लईका अपने पढ़ें, खायें, घूमें औरी फेर घरे चल जाए. एकरा में बेसी आदिवासी आ दलित लइका सब रहे. कक्षा सात के लईकन के अ, आ, क, ख, ग, आ ए, बी, सी, डी तक लिखे-पढ़े ना आवत रहे.

हम ना चाहत रहनी कि एहू लईकन के ओ तरे से तरसे के परे जे तरे हमार लारिकाईं रहे. एसे हम बिना पइसा के टीचर बने के फैसला कयिनीं. स्कूल हमरा घर से पांच किलोमीटर दूर बा. औरी सड़क के हालत खराब बा. हमनी के उंहा पहुंचे खातिर साल (शोरिया रोबस्टा), महुआ, केंदू (डायोस्पायरोस मेलानोक्सिलोन), बांस, पलास (ब्यूटिया मोनोस्पर्मा) खैर (सेनेगलिया कैटेचु) औरी कई तरह के गाछ से भरल जंगल से हो के जाए के परेला.

एही बीचे हमार परिवार के माली हालत खराब होत जात रहे. हम 2022 में बन बिभाग के जागरूकता कार्यक्रम में गईल सुरु क दहनी. समुदाय के जंगल के खतरा, जलावन के लकड़ी के बुद्धिमानी से प्रयोग करे के औरी जैव विविधता के बारे बतावल. इ ठेका के कार ह एमे लमसम 20,000 रोपया ले हर महीना मिल जाला.

अपना समाज में बदलाव खातिर हम लईकन के पढाई के प्रति जागरूक करे के चाहतानी. अगर हम परिवारन के खराब माली हालत सुधारे में कामयाब हो गईनी त हम अपना कार के बहुत महत्त के मानेम. हमारा पक्का बिस्वास बा कि खाली पढाईये (शिक्षा) हमरा गांव के स्थिति सुधार सकेला.

सुरु में हम छोट लईकन के क्लास से पढावे के सुरु कईनी. फेर धीरे-धीरे हम सुरुआती पढ़ाई पढ़ावे लगनी. हिंदी बोलल, लिखल सिखौनी. एक बेरा में 70 लईकन के एके संघे पढ़ावल बहुत मस्किल रहे.

हम ओकनी के खेल औरी दूसर लोभावन तरीका से जंगल, जंगल के जनरवन के रच्छा करे के पढ़वनी. हम ओ सब के फूल, पत्ता औरी जानवर, चिरई के चीन्हे के सिखौनी. हमनी जंगली पियाज (अर्जिनिया इंडिका), हड़जोड़ (सिसस कांड्रैगुलिस), मूसली (क्लोरोफाईटम बोरिविलियनम), चिरौंजी (बुकानानिया लांजन) औरी भिलावा (सेमेकार्पस एनाकार्डियम) जइसन ओधी खोजनी. हम ओ सब के जंगल में भेंटाये वाला जड़ी-बूटी के ओधी औरी पत्ता के चित्र बनावे के कहेनी जेसे ओ सब के इ जानकारी इयाद राखे में आसानी होखे.

हम ओ सब के प्राकृतिक शिक्षा यात्रा प ले गईनी. जहां उ सब जंगले में जैव विविधता के बारे में सीख, जान सके. हम ओ सब लईकन के साथे खेले के सुरु कईनी- हमनी संघही कविता औरी संगीत सीखीं. हम ओकनी के आपन बात बिचार कहे के सहकवनी.

इ सब लईकन के हमरा से हिले-मिले में मदद कईलस. औरी ओकनी के स्कूल आवे में रूचि बढ़े लागल. इंहां ले कि जौन लईका के नाम स्कूल में ना रहे, ऊहो अब स्कूल आवे लागल. ओ सब के स्कूल में उपस्थिति बढ़ गईल.

खुसबू कुमारी सतमा कलास के 13 साल के लईकी रहली, उ कब्बो नियम से स्कूल ना आवस. उनकर माई उनका के घर के कार करे खातिर घरे में रोक लेस. जब उ सांझ के कलास में आवे लगली तब उनकर माई के हमार मेहनत बुझाइल. तब उ रोज खुसबू के भेजे लगली. उनकर घर के कारो तनियक कम भईल.

बहुत माई-बाप अब अपना लईकन के पढ़े खातिर स्कूल भेजे लागल. अभी हेदे ले लईकन के उपस्थिति में बस 16 गो लईका आवें. पूरा स्कूल के 86 गो लईकन में से. बाकिर तीन महीने के भीतरे इ उपस्थिति 72 हो गईल.

जवार के कुछ जवान लईका हमरा साथे मिल के लईकन के पढावे में मदद करे लागल. ओही स्कूल के पढ़ल लईकी जब हम पढ़ाईं त जंगला से झांक के देखे. उ धीरे-धीरे, छोट लईकन के पढावे में हमार मदद करे लगली.

अब हम कौनो दिने स्कूल ना जानी त लईका उदास हो जालें. औरी हमरा आवे के जोहे लें कुल.

बदलाव आ रहल बा. कुछ माई-बाप जे खरचा सह सकेला, उ सब अब अपना लईकन के पढ़े खातिर टाउन भेजता अच्छा पढ़ाई खातिर. सुरुआत में पढाई के महत्त ना बूझे केहू. बाकिर अब लईका पुलिस अफसर, टीचर औरी डॉक्टर होखे के बिचार करतारन कुल.

हमरा अपना जिनगी में एगो लौ बुझाता. लईका पढ़े औरी नीमन जिनगी बनावे के सपना देखतारें कुल. हमरा एकरा से एगो आसा जागता.

इ कहानी मूल रूप से हिंदी में रिपोर्ट भईल बा.

अनुवाद; स्मिता वाजपेयी