بانسری سے ہم آہنگی پھیلانے والے صغیر انصاری

صبح کے پانچ بج رہے ہیں۔ سورج ابھی طلوع نہیں ہوا ہے، مگر بہار کے گوپال گنج ضلع کے اس چھوٹے سے قصبہ، ہتھوا میں دو الگ الگ صدائیں لوگوں کو جگا رہی ہیں۔ ایک طرف جہاں چند مسجدوں کی میناروں سے اذان کی صدائیں بلند ہو رہی ہیں، وہیں دوسری طرف علاقہ کے تین چار مندروں سے بھجن کی آوازیں بھی آ رہی ہیں۔ ’اللہ اکبر! اللہ اکبر! اشہد ان لا الٰہ الا اللہ...‘ کی سریلی صدا، جھانجھ کی تال پر گونجتی ’ہرے رام، ہرے کرشن، ہرے کرشن، ہرے رام‘ کی آوازوں کے ساتھ گھل مل جاتی ہے۔ اور پھر کہیں ذرا قریب سے بانسری کی آواز ابھرتی ہے، جو ان مختلف سُروں کو صبح کی پُرسکون اور دلکش فضا میں پرو دیتی ہے۔

بانسری پر بجتی اس دھن کی کشش اور اس فنکار سے ملنے کا تجسس، مجھے ۱۷۶ سال پرانے گوپال مندر تک لے جاتا ہے۔ یہ عمارت ۱۸۵۰ سے ۱۸۶۶ کے درمیان اُس وقت کی مہارانی شیام سندری کنور نے تعمیر کروائی تھی۔ اس کے اطراف میں پرانا قلعہ، نیا قلعہ اور ایک شیش محل واقع ہیں۔ اس شاہی مندر کے عظیم الشان دروازہ پر ایک سکیورٹی اہلکار پہرہ دے رہا ہے۔ یہ مندر تقریباً چار لاکھ ۵۰ ہزار چاندی کے سکّوں کی لاگت سے تعمیر ہوا تھا، جو آج کی مالیت کے حساب سے تقریباً ۵۵ کروڑ روپے بنتی ہے۔ اس ۱۴ ایکڑ میں پھیلے احاطہ کے اندر باغات، فوارے، تالاب، ایک سنسکرت یونیورسٹی کی عمارت، اور کئی کمروں پر مشتمل مشہور گوپال مندر موجود ہے۔

یہ مندر یہاں کے ایک قدیم شاہی خاندان کے وارثین کی ذاتی ملکیت ہے، جو کبھی ہتھوا کی نوابی ریاست پر راج کرتا تھا۔ اسے صبح اور شام کے اوقات میں عوام کے لیے کھولا جاتا ہے، جب چند عقیدت مند آہستہ آہستہ وہاں آتے دکھائی دیتے ہیں۔ ایک پجاری اندرونی مقدس حصہ میں رکھے رادھا کرشن کے مجسموں کے سامنے آرتی کرتا ہے۔ اس کے سامنے بڑے ستونوں والے ہال کے فرش پر موسیقار اپنے سازوں – طبلہ، ہارمونیم اور جھانجھ – کے ساتھ بیٹھ کر آرتی کرتے ہیں۔ انہی کے درمیان محمد صغیر انصاری بھی موجود ہیں، وہ فنکار جن کے بارے میں میں نے اپنے ساتھیوں سے سنا تھا۔

ستر سالہ مسلم موسیقار، جو گوپال مندر میں دیوی دیوتاؤں کے حضور اپنی بانسری کا نذرانہ پیش کرتے ہیں۔ انہیں اپنے اس کام میں کچھ بھی غیر معمولی محسوس نہیں ہوتا۔ ’’سبھی انسان برابر ہیں۔ ہم میں کوئی فرق نہیں ہے،‘‘ صغیر انصاری کہتے ہیں۔ ’’ہم سب کو محبت اور ہم آہنگی کے ساتھ رہنا چاہیے۔ یہ ایک علم ہے جو خدا نے مجھے دیا ہے، اور علم بانٹنے میں کوئی برائی نہیں ہے۔ میں ایک دہائی سے بھی زیادہ عرصہ سے یہاں بانسری بجا رہا ہوں۔‘‘

صغیر انصاری بتاتے ہیں کہ مہارانی شیام سندری کے زمانے میں آرتی کے وقت مندر کے دروازے پر فنکار شہنائی بجایا کرتے تھے۔ ان کی وفات کے بعد یہ روایت کئی برسوں تک بند رہی۔ قدیم شاہی خاندان کے موجودہ وارث مریگیندر پرتاپ ساہی نے اس پرانی روایت کو دوبارہ زندہ کیا، اور ۲۰۱۵ میں چند فنکاروں کو موسیقی بجانے اور بھجن گانے کے لیے یہاں مقرر کیا۔ یہی وہ وقت تھا، جب ایک دہائی سے کچھ زیادہ پہلے، ہتھوا کے شاہی خاندان کی ایک گاڑی صغیر انصاری کے دروازے پر آ کر رکی۔ وہاں کے منیجر، صغیر کے بڑے چچیرے بھائی کے ساتھ مریگیندر پرتاپ ساہی کا پیغام لے کر آئے تھے، جنہوں نے ہندی اخبار ’ہندوستان‘ میں اس ماہر بانسری نواز کے بارے میں پڑھا تھا۔ اس طرح صغیر انصاری اس مندر کے ساتھ جڑ گئے۔ تب ان کی عمر ۵۹ برس تھی۔

لیکن بانسری کے ساتھ اُن کا رشتہ آج سے چھ دہائی قبل، ۱۹۶۵ میں شروع ہوا تھا، جب وہ صرف نو برس کے تھے۔ صغیر انصاری بتاتے ہیں، ’’بانسریاں ہمارے ہی گھر میں بنتی تھیں۔ آج بھی بنتی ہیں، مگر اب میری صحت اتنی اجازت نہیں دیتی کہ زیادہ تعداد میں بنا سکوں۔ جب میری والدہ حیات تھیں، تو وہ بھی بانسری بنایا کرتی تھیں۔‘‘ بانسری بنانے اور بیچنے کا ہنر انہیں اُن کے دادا، جمراتی میاں نے سکھایا تھا۔

جمراتی میاں نے دسویں جماعت تک تعلیم حاصل کی تھی۔ برطانوی دورِ حکومت میں وہ ہتھوا پوسٹ آفس میں ملازم تھے۔ صغیر یاد کرتے ہوئے بتاتے ہیں، ’’ریٹائرمنٹ کے بعد وہ کسی کام سے کلکتہ گئے تھے اور وہاں سے ایک بانسری لے آئے۔ وہ خود اسے بجایا کرتے تھے؛ یہ اُن کا شوق تھا۔ بعد میں انہوں نے گاؤں کے آس پاس سے سرکنڈے جمع کیے اور بانسری کی نقل بنانے کی کوشش کی۔ جب اُن کی بنائی ہوئی بانسری سے آواز نکلنے لگی تو انہوں نے باقاعدہ بانسریاں بنانا شروع کر دیں – پہلے دن دس، پھر اگلے دن بیس۔

’’شروع میں انہوں نے مقامی میلوں اور بازاروں میں بانسریاں فروخت کرنے کے لیے پہلے دو تین لوگوں کو کام پر رکھا۔ ان لوگوں کا تعلق میر شکار برادری سے تھا۔ اسی نسبت سے اس محلہ کا نام میرشکار ٹولہ پڑ گیا۔ یہ لوگ پرندوں کا شکار کیا کرتے تھے۔ ہتھوا راج نے انہیں کہیں اور سے لا کر یہاں آباد کیا تھا،‘‘ صغیر کہتے ہیں۔ ان کا ماننا ہے کہ آج یہ برادری جمراتی میاں سے سیکھی ہوئی اسی دستکاری کے ذریعہ اپنی روزی کماتی ہے۔ وہ بانسریاں بناتے ہیں اور ملک کے مختلف علاقوں میں جا کر انہیں فروخت کرتے ہیں۔

سال ۱۹۷۰ میں اپنے والد کے انتقال کے بعد، صغیر بھی برسوں تک بہار سے باہر جا کر بانسری بیچنے کا کام کرتے رہے، تاکہ اپنے خاندان کی کفالت کر سکیں۔ وہ مہینہ میں صرف پانچ دن کے لیے گھر لوٹتے تھے، تاکہ اپنی والدہ کو پیسے دے سکیں۔ صغیر بتاتے ہیں، ’’میں الہ آباد (موجودہ پریاگ راج)، لکھنؤ، بنارس، کانپور، کٹنی، بلاسپور، رائے پور، رائے گڑھ، ریوا، ستنا اور جبل پور کے میلوں میں جایا کرتا تھا۔ میلہ ختم ہونے کے بعد بھی میں آس پاس گھوم کر مزید بانسریاں فروخت کرتا تھا۔ میں بانسری بجاتا بھی تھا۔ اُس زمانے میں روزانہ چار سے پانچ سو روپے کمانا ایک بڑی رقم سمجھی جاتی تھی۔‘‘

صغیر گاؤں میں مہاویری جھنڈا کے جلوسوں میں بھی بانسری بجایا کرتے تھے۔ یہ تہوار ہندو دیوتا ہنومان کی یاد میں منایا جاتا ہے، جس میں ملک کے مختلف حصوں سے فنکاروں کو مدعو کیا جاتا تھا۔ اسی دوران ان کی ملاقات فقیرا ماسٹر سے ہوئی، جو چوکٹ میاں (جن کا اصلی نام رحمان تھا) کے بینڈ میں بانسری نواز تھے۔ ’’کسی نے چوکٹ میاں سے میرا ذکر کیا کہ یہاں ایک لڑکا ہے جو بہت اچھی بانسری بجاتا ہے۔ چنانچہ وہ آئے اور مجھے اپنی سرپرستی میں لے لیا۔ پھر جب فقیرا ماسٹر نے مجھے بانسری بجاتے سنا تو وہ کافی خوش ہوئے اور مجھے اپنا شاگرد بنا لیا۔‘‘

فقیرا ماسٹر دھروپد بجانے کے ماہر تھے اور نہایت تیز رفتاری سے بانسری بجاتے تھے۔ صغیر بتاتے ہیں کہ انہیں موسیقی کا گہرا علم تھا۔ ’’میں اُن سے سیکھنے کے لیے بیتاب رہتا تھا۔ جب بھی وہ دریا کی طرف جاتے، ہم چار پانچ لوگ گھاٹ پر بیٹھ جاتے اور وہ ہمارے لیے چند دھنیں بجاتے۔ وہ روزانہ پانچ یا دس منٹ ہمیں سکھاتے تھے۔ اسی طرح میں نے ان سے دو تین راگ سیکھے۔‘‘

ایک سال بعد فقیرا ماسٹر میرٹھ چلے گئے، مگر صغیر نے میلوں اور جلوسوں میں بانسری بجانا جاری رکھا – اپنی شادی کے بعد بھی، بچوں اور پھر پوتے پوتیوں کی پیدائش کے بعد بھی۔ وہ مسلسل سفر کرتے، بانسریاں فروخت کرتے اور بجاتے، یہاں تک کہ ایک دن اس قدیم شاہی خاندان کی طرف سے انہیں مندر میں بانسری بجانے کی دعوت موصول ہوئی۔

اب ۱۰ برس سے زیادہ عرصہ سے، مندر میں آرتی کا آغاز اُن کی بانسری کے نذرانے سے ہوتا ہے۔ صغیر کا خاندان اسے مذہبی ہم آہنگی کی علامت سمجھتا ہے۔ تاہم قصبہ کی نئی نسل کے لیے حالات بدل رہے ہیں۔ پچھلی ایک دہائی کے دوران، ہتھوا کی ۴۳ فیصد مسلم اور ۵۶ فیصد ہندو آبادی کے درمیان ایک ہلکی سی کشیدگی، ایک بمشکل محسوس ہونے والی دوری، آہستہ آہستہ جگہ بنا رہی ہے۔

صغیر ۲۰۱۵ کا ایک واقعہ یاد کرتے ہیں۔ ایک پکے مسلمان ہونے کے ناطے وہ دن میں پانچ وقت کی نماز ادا کرتے تھے۔ وہ کہتے ہیں، ’’اکثر مغرب کی نماز کا وقت شام کی آرتی کے ساتھ آ جاتا تھا۔ شروع شروع میں، جب میں نے یہاں [مندر کے اندر] نماز پڑھنا شروع کی، تو مرکزی دروازہ پر موجود ایک چوکیدار نے جا کر ہتھوا مہاراج سے شکایت کر دی۔ انہوں نے اسے بلایا اور میرے سامنے ہی چوکیدار کو ڈانٹا۔ مجھے یاد ہے، انہوں نے کہا تھا، ’کیا یہ میری زمین کھود کر لے جا رہا ہے؟ یا کسی کو نقصان پہنچا رہا ہے؟ اگر نہیں، تو پھر تم نے شکایت کیوں کی؟’ اس کے بعد سے مجھے یہاں کبھی کوئی پریشانی نہیں ہوئی۔‘‘

یہ اسٹوری اردو میں رپورٹ کی گئی تھی۔