सगीर अंसारी के संझौती बांसुरी

बिहनिया के पाँच बजे हवय अऊ सुरुज देंवता ऊबे नइ ये, फेर दू अलग-अलग किसम के आवाज मन बिहार के गोपालगंज जिला के हथुआ नांव के ये छोटकन शहर ला जगावत हवंय. एक आवाज कुछेक मस्जिद के मीनार मन ले आवत अजान के आय. दूसर आवाज इलाका के तीन-चार मंदिर ले भजन गवेइय्या मन के आय. ‘अल्लाहु अकबर! अल्लाहु अकबर! अशहदु अन ला इलाहा इल्लल्लाह...’ के सुग्घर आवाज़,‘हरे राम, हरे कृष्ण, हरे कृष्ण, हरे राम’ के कीर्तन अऊ मंजीरा मन के ताल के संग घुल-मिल जाथे. अऊ ओकर बाद, अकास मं गूँजत, कोनो लकठा ले आवत बांसुरी के आवाज, अलग-अलग सुर मन ला मिलाके शांत अऊ सुग्घर माहौल बना देथे.

मोला खींचत बांसुरी के ये धुन अऊ कलाकार ले मिले के उछाह ह मोला 176 बछर जुन्ना गोपाल मंदिर तक ले जाथे. हथुआ के ओ बखत के महारानी श्याम सुंदरी कुंवर के साल 1850 अऊ 1866 के बीच बनवाय गे ये मंदिर जुन्ना किला, नवा किला अऊ शीश महल ले घिराय हवय. ये शाही मंदिर के बड़े बड़े दरवाजा मं एक झिन पहरेदार हवय: येला करीबन 4, 50,000 चांदी के सिक्का ले बनवाय गे रहिस, जेन ह आज के जमाना मं करीबन 55 करोड़ के बरोबर आय. अहाता भीतरी 14 एकड़ जमीन मं बगीचा, फव्वारा, तरिया, संस्कृत यूनिवर्सिटी के इमारत अऊ कतको खोली के ये नामी मंदिर बने हवय.

ये मंदिर तउन पुराना रईस परिवार के वंशज मन के निजी संपत्ति आय, जेन मन कभू हथुआ रियासत मं राज करत रहिन. ये मंदिर बिहनिया अऊ संझा आम लोगन मन बर खुलथे, जिहां कुछु भगत मन इहाँ आवत-जावत दिखथें. मंदिर के गर्भगृह मं बिराजे राधा-कृष्ण के मूर्ति मन के पुजारी आरती करथे. ओकर थीम आगू मं, बड़े खंभा वाले हॉल मं तरी मं बइठके संगीतकार अपन बाजा – जइसने तबला,हारमोनियम अऊ मंजीरा के संग रहिथें. अऊ उहिच टोली के बीच मं बइठे हवंय मोहम्मद सगीर अंसारी, उही कलाकार जेकर बारे मं मंय अपन संगी जहुंरिया मन ले सुने रहेंय.

गोपाल मंदिर मं देंवता मन ला अपन बांसुरी चढ़ावत 70 बछर के एक झिन मुस्लिम संगीतकार. ओला अपन ये काम ह कुछु घलो अटपटा नइ लगय. वो ह कहिथे, “सब्बो मइनखे एक बरोबर आंय. हमर बीच मं कोनो फरक नइ ये. हमन सब्बो ला मिलजुरके रहे ला चाही. यह एक ज्ञान है जो खुदा ने मुझे दिया है. और ज्ञान बांटने में कुछ भी गलत नहीं है. मंय इहाँ दस बछर ले जियादा बखत ले बांसुरी बजावत हवंव.”

रानी श्याम सुंदरी के जमाना मं, कलाकार आरती बखत मंदिर के मुहटा मं शहनाई बजावत रहिन. ओकर गुजर जाय के बाद ये परंपरा कतको बछर तक ले बंद रहिस. पहिली के रज परिवार के ये बखत के मुखिया, मृगेंद्र प्रताप साही ह ये जुन्ना परंपरा ला फिर ले सुरू करिस अऊ साल 2015 मं बाजा बजाय अऊ भजन गाय बर कुछु कलाकार मन ला रखिस. ये बात 10 बछर ले घलो पहिली के आय, जब हथुआ के राज परिवार के एक ठन कार सगीर अंसारी के घर के आगू आके रुकिस. राज के मैनेजर, सगीर के बड़े चचेरा भाई ह मृगेंद्र साही के न्योता ले के आय रहिस: साही ह हिंदुस्तान अखबार मं बांसुरी के ये माहिर कलाकार के बारे मं पढ़े रहिस. अइसने करके मंदिर संग ओकर नाता जुड़ गिस. सगीर 59 बछर के आय.

फेर बांसुरी संग ओकर नाता 60 बछर पहिली, 1965 मं सुरू होय रहिस जब वो ह सिरिफ 9 बछर के रहिस. वो ह कहिथे, “ बांसुरी हमर घरेच मं बनत रहिस. हमन अभू घलो बनाथन,फेर मोर सेहत मोला ओतक बांसुरी बनाय नइ देवय. जब मोर महतारी जिंयत रहिस, त वो घलो बांसुरी बनावत रहिस.” ओकर बबा, जुमराती मियाँ ह वोला बांसुरी बनाय अऊ बेचे सिखाय रहिस.

जुमराती मियाँ ह 10वीं क्लास तक पढ़े रहिस. अंगरेज राज बखत वो ह हथुआ पोस्ट ऑफ़िस मं काम करिस. “रिटायर होय के बाद एक पईंत वो ह कोनो काम ले कलकत्ता गए रहिस अऊ उहाँ ले एक ठन बांसुरी लेके आइस, सगीर सुरता करत कहिथे. वो ह खुदेच बजावत रहिस; ये ह ओकर शौक रहिस. बाद मं, वो ह गाँव के तीर-तखार ले बांस जुटाइस अऊ वइसनेच बांसुरी बनाय मं लग गिस. जब ओकर बनाय बांसुरी ले सुर निकरे लगिस, त वो ह बांसुरी बनाय सुरू करिस – पहिली दिन दस, दूसर दिन बीस.

सगीर कहिथे, “सुरू मं वो ह इहाँ के मेला अऊ बजार मन मं बांसुरी बेचे के काम मं कुछेक लोगन मन ला राखत रहिस. वो लोगन मन मीरशिकार समाज के रहिन. ओकरेच मन के नांव मं ये इलाका के नांव मीरशिकार टोला परिस. वो मन चिड़ीमार रहिन. हथुआ राज मं वो मन ला कोनो आने जगा ले लाके इहाँ बसाय गे रहिस.” ओकर कहना आय के आज ये समाज जुमराती मियाँ ले सीखे हुनर/ कला ला अपनाए हवंय अऊ बांसुरी बनाके वोला बेचके गुजारा करत हवंय; येकरे सेती वो मन देस के अलग-अलग जगा मं जाथें.

साल 1970 मं ददा के गुजर जाय के बाद, घर चलाय बर सगीर ला खुदेच कतको बछर तक ले बिहार ले बहिर काम करे जावत रहिस. वो ह महिना के सिरिफ पांच दिन बर घर लहूटत रहिस जेकर ले वो ह अपन दाई ला पइसा दे सकय. वो ह कहिथे, “मंय इलाहाबाद (अब प्रयागराज), लखनऊ, बनारस, कानपुर, कटनी, बिलासपुर, रायपुर, रायगढ़, रीवा, सतना अऊ जबलपुर जइसने शहर मन मं लगेइय्या मेला मन मं जावत रहेंय. मेला के बाद, मंय अऊ सामान बेचे बर तीर-तखार के इलाका मन मं जावत रहेंय. मंय बांसुरी घलो बजावत रहेंय. वो बखत रोज के चार-पाँच सौ रूपिया कमाय एक ठन बड़े बात होवत रहिस.”

सगीर ह गाँव मं महावीर झंडा जुलूस मं घलो सामिल होय रहिस, जेन ह हिंदू देंवता हनुमान के तिहार आय. ये मं सामिल होय बर देस के अलग-अलग जगा के कलाकार मं ला बलाय जाथे. इहींचे ओकर भेंट फ़कीरा मास्टर ले होइस, जेन ह चोकट मियाँ (जेकर असल नांव रहमान रहिस) के बैंड मं बांसुरी बजावत रहिस. “कोनो चोकट मियाँ ला मोर बारे मं बताइस के इहाँ के के झिन लइका ह भारी सुग्घर बांसुरी बजाथे. त वो ह आइस अऊ मोला संग ले गिस. अऊ जब फ़कीरा मास्टर ह मोला बांसुरी बजावत देखिस, य वो ह खुस होके मोला अपन चेला बना लिस.”

फकीरा मास्टर ध्रुपद बजाय मं माहिर रहिस अऊ भारी तेजी ले बजावय. सगीर बताथे के वोला संगीत के भारी बढ़िया समझ रहिस. “मोला ओकर ले सीखे के उछाह रहिस. जब घलो वो ह नदिया मं जावत रहिस, हमन चार पांच झिन घाट मं बइठ के ओकर धुन सुनत रहेन. वो हमन ला रोज के पांच दस मिनट सिखावत रहिस. अइसने करके मंय दू तीन राग सीख लेंय.”

बछर भर बाद उस्ताद मेरठ चले गिस, फेर सगीर मेला अऊ जुलूस मन मं बांसुरी बजावत रहय: इहाँ तक के ओकर बिहाव हो गिस अऊ लइका-पोता घलो हो गिन, तभू घलो वो ह बजावत रहिस. वो ह घूम घूम के बांसुरी बेचय अऊ बजावय, तक तक के ओला राज परिवार ले बुलावा नइ आ गिस.

बीते 10 बछर ले जियादा बखत ले, मंदिर मं आरती ह सुरू ओकर बांसुरी के धुनेच ले होथे. सगीर के परिवार येला धार्मिक मेल मिलाप बर बजाय जवेइय्या संगीत मानथे. वइसे, शहर के नवा पीढ़ी बर हालत बदलत हवय. बीते एक दस बछर धन ओकर ले जियादा बखत मं, शहर के 43 फीसदी मुस्लिम अऊ 56 फीसदी हिंदू आबादी के बीच मं एक ठन हल्का बेचैनी अऊ नजर नइ आवत दूरी जनम लेवत हवय.

सगीर साल 2015 के एक ठन घटना सुरता करथे. वो ह पक्का मुसलमान आय अऊ दिन मं पाँच बेर नमाज पढ़थे. “अक्सर मगरिब के नमाज़ के बखत ह संझा के आरती के बखत ले टकरावत रहिस. ते पायके, जब मंय इहाँ [मंदिर भीतरी] नमाज़ पढ़े सुरू करेंय, मेन गेट के चौकीदार ह हथुआ महाराज ले येकर सिकायत करिस. वो ह चौकीदार ला बलाइस अऊ मोर आगूच ओला भारी खिसिआइस. मोला सुरता हवय के वो ह कहे रहिस, “काय वो मोर जमीन खनके ले जावत हवय? काय वो ह ककरो नुकसान करत हवय? गर नइ, त तंय काबर सिकायत करत हवस?” तब ले मोला इहाँ कभू घलो कोनो दिक्कत नइ होइस.”

ये कहिनी मूल रूप मं उर्दू मं लिखे गे रहिस.