’سب سے میٹھا رس ماگھ میں ملتا ہے‘

’’انہوں نے میرے دو برتن چُرا لیے!‘‘

آنندو لوہار کو غصہ آ رہا ہے۔ دن کی شروعات ہی خراب ہو گئی ہے۔ گوال پاڑہ کے رہنے والے آنندو نے نہ صرف وہ رس گنوا دیا جو انہیں برتنوں میں ملنا تھا، بلکہ ان کو ۹۰ روپے کا نقصان بھی ہو گیا۔ یہ قیمت اُن دو برتنوں کی ہے، جنہیں وہ اپنے گھر سے تین کلومیٹر سے کچھ دور سوناجھُری سے خریدتے ہیں۔

آنندو کو کھجور یعنی ہندوستانی کھجور کے درخت (فینکس سِلویسٹرِس) کا میٹھا رس جمع کرنے کے لیے برتن چاہیے۔ وہ شیولی ہیں، یعنی وہ لوگ جو کھجور کے درختوں پر چڑھتے ہیں، ان کا تنا کاٹ کر رس نکالتے اور جمع کرتے ہیں۔ یہ کام موسم میں ہی ہوتا ہے، جو اکتوبر سے جنوری تک چلتا ہے۔ وہ بنگالی مہینہ اشوِن میں سرگرم ہو جاتے ہیں، جو خزاں کے موسم کے آس پاس آتا ہے۔ ایک اور اہم بات، شیولی رات میں کھِلنے والے اُس پھول کا نام بھی ہے، جو بنگال میں خزاں کے موسم کے آنے کا اشارہ ہے۔

اپنی عمر کے سبب کچھ جھکے ہوئے سے نظر آتے ۶۵ سالہ آنندو تقریباً چھ سات سال سے یہ کام کر رہے ہیں۔ یعنی تب سے، جب بولپور شہر میں وہ اینٹ بھٹّہ بند ہوا، جس میں وہ کام کرتے تھے۔

آنندو اپنے برتنوں کے چوری ہونے سے پریشان ہیں اور بڑبڑا رہے ہیں، ’’ہر موسم میں یہی ہوتا ہے۔‘‘ ہم اگلے درخت کی طرف بڑھنے لگے ہیں جن پر وہ چڑھیں گے۔ ہمارے پیروں کے نیچے خشک تاڑ کے پتوں کے چرمرانے کی تیز آوازیں آ رہی ہیں۔ دسمبر کی سرد صبح ہے اور آنندو نے ٹھنڈ سے بچنے کے لیے ٹوپی پہن رکھی ہے۔ پٹّہ (لیز) پر لیے گئے ان کے درخت مانساتلا میں ان کے مٹی کے گھر سے تھوڑی دور تقریباً ۳۰۰ میٹر کے فاصلہ پر ہیں۔ مگر دمّہ کا مریض (سانس لینے میں تکلیف) ہونے کے سبب ان کے لیے زیادہ محنت کرنا مشکل ہوتا ہے۔ واپسی میں ان کے لیے تقریباً سات آٹھ کلو تازہ رس لاد کر لانا اور بھی مشکل ہو جاتا ہے۔

انہوں نے یہ کام ۲۰ سال پہلے اپنے سالے سے سیکھا تھا۔ شیولی لفظ کے بارے میں انہیں معلوم نہیں۔ ان کے مطابق، جو لوگ درخت پر چڑھنے کا کام کرتے ہیں، انہیں گاچھیا کہا جاتا ہے۔ خود کو وہ اس نام سے بلانے میں ہچکچاتے ہیں کیوں کہ یہ صرف ایک موسمی کام ہوتا ہے۔ سال کے باقی وقت وہ اپنی گائے، بکریاں چراتے ہیں۔

آنندو کا تعلق لوہار برادری سے ہے، جو ریاست میں درج فہرست ذات کے طور پر درج ہے۔ روایتی طور پر وہ دھات کا کام کرتے ہیں۔ یہ پیشہ ان کے خاندان نے کچھ نسلوں قبل چھوڑ دیا تھا اور کھیتی کرنے لگا تھا۔ کھجور کے درختوں کے ارد گرد کھیتوں میں آنندو اپنے کھانے اور بیچنے کے لیے آلو اور دوسری سبزیاں اُگاتے تھے۔ وہ زمین اب فروخت ہو چکی ہے۔ کبھی یہاں سے گزرنے والی کوپائی ندی اب دور بہتی ہے، جس وجہ سے سینچائی کرنا مشکل ہو گیا ہے۔

ان کی تشویش یہ ہے کہ اگر نئے مالک نے پٹّہ پر لیے گئے کھجور کے یہ درخت کاٹ دیے، تو ان کی اس موسمی کمائی پر اثر پڑے گا۔ آنندو کی پانچ رکنی فیملی موسم میں ہونے والی تقریباً ۲۶ ہزار روپے کی اس کمائی پر منحصر رہتی ہے۔ اس کے علاوہ، فیملی کے ارکان یومیہ اجرت پر بھی کام کرتے ہیں۔

دوسرے شیولیوں کے برعکس، آنند پٹّہ پر لیے گئے درختوں کے لیے نقد پیسے نہیں دیتے۔ اس کے بجائے مقامی مالکوں کو وہ ہر درخت کے لیے ایک کلو گڑ دیتے ہیں۔ اس لیے ۳۰ درختوں کے لیے انہیں ایک سیزن میں ۹۰۰۰ روپے کا گڑ دینا پڑتا ہے۔ بچا ہوا گڑ زیادہ تر مقامی لوگوں کو بیچ دیا جاتا ہے۔

اکیلے کام کرتے ہوئے وہ عموماً دن میں ۲۰ درختوں پر چڑھتے اترتے ہیں۔ تقریباً دو برتن رس جمع کرتے ہیں اور تب گھر جاتے ہیں۔ اس میں سے کچھ تازہ ہی پیا جاتا ہے، بقیہ کو جھولا گُڑ بنانے میں استعمال کیا جاتا ہے۔ یہ ضروری کام زیادہ تر ان کی فیملی کی عورتیں کرتی ہیں۔

ان کی بیوی اُنّتی کہتی ہیں، ’’اگر آسمان صاف نہ ہو، تو رس بھی صاف نہیں ہوتا۔‘‘ ۵۰ سال کی اُنّتی برتن دھو رہی ہیں، جب کہ آنندو آگ جلا کر اسے تیز کر رہے ہیں۔ انّتی اور ساتھی (ان کی پوتی) ایک پتلا سفید کپڑا چھلنی کی طرح پکڑ لیتے ہیں اور آنندو تازہ جمع کیا ہوا رس اس میں سے ایک گول کڑھائی میں ڈالتے ہیں، جسے بعد میں دھیرے دھیرے ابلنے کے لیے رکھ دیا جاتا ہے۔

بالکل صبح کا وقت ہے۔ آنندو اور اُنّتی کے چھوٹے سے آنگن میں لوگ ادھر ادھر گھوم رہے ہیں۔ کچھ مرغیاں تیزی سے دوڑ بھاگ کر رہی ہیں اور بکریاں خاموشی سے دیکھ رہی ہیں۔ رس اُبلنے لگا ہے۔ ہوا میں میٹھی، دھوئیں والی سوندھی خوشبو بھر گئی ہے۔ جیسے جیسے رس ابلے گا، دھیرے دھیرے اس کا رنگ بدلتا جائے گا، صاف سے گہرا بھورا۔ آنندو اسے ’’چائے کا رنگ‘‘ کہتے ہیں۔

گڑ بنانے کا زیادہ تر عمل اندازہ سے چلتا ہے۔ رس ابالنے کے دوران وقت کا کوئی حساب نہیں ہوتا۔ وقت دیکھنے کے لیے کوئی گھڑی نہیں ہوتی۔ بس جسے معلوم ہوتا ہے، اسے معلوم ہوتا ہے۔

آنندو کو یہ معلوم ہے۔ جب رس گہرا بھورا ہو کر گاڑھا ہو جاتا ہےہ، تو وہ برتن کو آگ سے اتار لیتے ہیں۔ پھر جھولا گڑ کو ڈبوں میں ڈال کر ۲۲۰ روپے کلو کے حساب سے بیچا جائے گا۔ وہ پاٹالی گڑ نہیں بناتے، کیوں کہ اس میں وقت اور توانائی زیادہ لگتی ہے اور زیادہ رس بھی جمع کرنا پڑتا ہے۔ وہ سینکڑوں فٹ کی چڑھائی کے بارے میں بتاتے ہیں، جو اس سیزن کے دوران انہیں کرنی ہوتی ہے، ’’یہ مشکل ہوتا ہے اور میں جلد ہی تھک جاتا ہوں۔‘‘

گوال پاڑہ میں آنندو ان تین مقامی لوگوں میں سے ہیں، جو یہ کام کرتے ہیں۔ بیر بھوم ضلع میں باقی جگہوں پر زیادہ شیولی مہاجر مرد ہیں، جو ندیا جیسے ضلعوں سے آتے ہیں۔ ان کے اسٹال، ورک اسٹیشن اور عارضی گھر مرکزی سڑک کے دونوں جانب بنے ہیں، جس کے دونوں طرف گوال پاڑہ آباد ہے۔

بیر بھوم ضلع میں گوال پاڑہ تقریباً ۲۰۰۰ کی آبادی (مردم شماری ۲۰۱۱) والا ایک چھوٹا سا گاؤں ہے۔ یہاں کے رہائشی زیادہ تر زرعی مزدور یا دہاڑی مزدور ہیں۔ حالیہ برسوں میں اس چھوٹے سے شہر میں ہوم اسٹے اور ہوٹلوں میں تیزی سے اضافہ ہوا ہے۔ اس کی ایک وجہ شانتی نکیتین کی بڑھتی ہوئی سیاحتی صنعت ہے، جو رابندر ناتھ ٹیگور کے ذریعہ قائم کردہ آشرم اسکول اور یونیورسٹی اور آس پاس کے دیگر ثقافتی اور تاریخی مقامات کے ارد گرد مرکوز ہے۔

اس علاقہ میں کھجور کے درخت کثرت سے پائے جاتے ہیں اور انہیں کسی کھیتی کی ضرورت نہیں ہوتی۔ وہ جنگل میں اُگ آتے ہیں۔ ان کا مالکانہ حق اس سے طے ہوتا ہے کہ وہ کس کی زمین پر کھڑے ہیں۔

موسم کی ذائقہ دار چیز، کھجور کا گڑ کئی بنگالی گھروں میں ملتا ہے۔ اس کا استعمال پاییش اور پِٹھّے جیسی میٹھی چیزیں بنانے میں ہوتا ہے یا اسے ایک دو روٹی کے ساتھ کھایا جا سکتا ہے۔ اس کا استعمال رس گُلّا بنانے میں بھی ہوتا ہے، جو مٹھائی کی دکانوں میں فروخت ہوتا ہے۔

اس گُڑ کو بنانا پرانی روایت ہے۔ اس کا ابتدائی ذکر ۱۶ویں صدی کے شاعر کبی کنکن مُکند رام چکرورتی کے ذریعہ کیا گیا ہے۔ ’’سیولی نگرے بوئیسے کھیجوریر کاٹی رسے گُڑ کورے بیبیدھو بیدھانے [شیولی شہر میں کھجور کے درخت کے رس سے کئی طریقوں سے گڑ بنتا ہے]۔‘‘

سیولی یا شیولی کا ذکر ۱۹۱۶ میں شائع بنگالی زبان کی لغت (ڈکشنری) میں ایک ایسی برادری کے طور پر ملتا ہے، جو کھجور کے درخت کاٹتی ہے اور گڑ بناتی ہے۔ سال ۱۹۳۲۔۳۳ کی ایک اور لغت میں یہ لفظ شامل کیا گیا کہ ۲۴ پرگنہ خطہ میں ’’سیولی کوئی برادری نہیں ہے، بلکہ وہ انسان ہے جو معاشرہ کے نچلے طبقہ سے آتا ہے۔‘‘

موسم کے دوران تاڑ کا رس نکالنے اور گُڑ بنانے کا کام عبادت شیخ اور عبدل (ان کے چچیرے بھائی) جیسے مہاجرین کو کھینچ لاتا ہے، جو پچھلے سات سال سے ہر موسم میں ندیا ضلع کے دیب گرام میں اپنے گھر سے یہاں آتے ہیں۔ عبادت مقامی سطح پر شیولیوں کی کمی کا ذکر کرتے ہوئے بتاتے ہیں، ’’جب ہم آئے تو یہاں کے لوگ خوش تھے۔ انہوں نے کہا کہ اب وہ رس پی پائیں گے اور گڑ کھائیں گے۔‘‘

اکتوبر سے جنوری تک اُن جیسے سینکڑوں مہاجرین اس میں اپنی محنت جھونکتے ہیں۔ عبادت درخت پر چڑھنے کی تیاری کرتے ہوئے بولتے ہیں، ’’ایئی کاجے پروچور کھاٹنی۔ ایٹو رِکس کیئو نائے نا۔ بھوئے کانٹاٹے ہاتی دیبے نا [اس کام میں کافی محنت ہے۔ اتنا رِسک یا خطرہ کوئی نہیں لیتا۔ ڈر کے مارے کوئی کانٹوں کو ہاتھ بھی نہیں لگائے گا]۔‘‘

کمر اور تنے کے چاروں طرف موٹی ناریل کی رسی باندھ کر عبادت کو درخت پر چڑھنے میں صرف ۶۰ سیکنڈ لگتے ہیں۔ اوپر پہنچ کر وہ درانتی سے کام شروع کرتے ہیں، ان کے پیر مضبوطی سے ٹکے ہیں۔ وہ لمبی شاخوں کی چھال اتارتے ہیں، کانٹے دار حصوں کو کاٹتے ہیں اور کچھ پتیاں چھانٹتے ہیں۔ وہ ایک ماہ سے زیادہ وقت تک اسی عمل کو بار بار دہرائیں گے، تاکہ اندر کے تنے تک پہنچ سکیں جس سے رس نکلے گا۔ پھر گھر سے لائے گئے مٹی کے برتن لٹکانے کا وقت آئے گا۔

شیولی عبادت اور عبدل ایک دن میں ۳۰ درختوں پر چڑھتے اترتے ہیں، جو کل ملا کر ۶۰۰ فٹ ہوتا ہے، یعنی ۶۰ منزلہ عمارت کی اونچائی کے برابر۔ عبادت کہتے ہیں، ’’ہم نے ڈیڑھ سو درخت لیز پر لیے ہیں۔ ہر درخت کے لیے ہم پورے سیزن کے ۲۵۰ روپے دیتے ہیں۔‘‘ پورے سیزن کے لیے وہ فی درخت ۲۵۰ روپے ادا کرتے ہیں، جو مہاجر شیولیوں کے درمیان عام چلن ہے۔ انہیں کل ۳۷ ہزار ۵۰۰ روپے پہلے ہی دینے ہوتے ہیں۔ ہر درخت سے تقریباً دو سے تین لیٹر رس نکلتا ہے۔

ان کے کام کا دن اندھیرے میں شروع ہوتا ہے، جب درجۂ حرارت تقریباً ۱۲ ڈگری سیلسیس رہتا ہے۔ ایک گزرتی ٹرین کی لمبی سیٹی صبح کی خاموشی کو توڑتی ہے۔

برتن لانا اور رس ڈالنا ایسا کام ہے، جس میں تیزی چاہیے۔ کوئی بھی ماہر شیولی آپ کو بتا سکتا ہے کہ اگر رس کو زیادہ دیر تک رکھا، تو وہ کھٹّا ہو جائے گا اور استعمال کے لائق نہیں رہے گا۔

عبادت بتاتے ہیں، ’’سب سے میٹھا رس ماگھ میں ملتا ہے اور سب سے زیادہ مقدار پوش میں ملتی ہے، لیکن اس میں زیادہ مٹھاس نہیں ہوتی۔‘‘ وہ سردیوں کے مہینوں کو ذائقہ میں تبدیلی سے جوڑتے ہیں۔ میٹھی چیزوں کے زمرہ میں ایک نئی چیز ہے نالین گُڑ آئس کریم۔ عبادت کہتے ہیں کہ انہوں نے اس کے بارے میں سنا تو ہے، مگر اسے کبھی چکھا نہیں۔

دوپہر ہو چکی ہے اور عبادت کے پاس شام ۵ بجے تازہ برتن لٹکانے کا کام شروع کرنے سے پہلے کچھ خالی وقت ہے۔

عبادت پاری کو بتاتے ہیں، ’’جب ہم پہلی بار یہاں آئے تھے، تو اس علاقہ [گوال پاڑہ] میں ہم صرف چار لوگ تھے۔ اب ۱۲-۱۵ ہیں۔ کمائی نیچے چلی گئی ہے۔‘‘

پھر بھی عبادت اور عبدل نے مل کر پچھلے سیزن میں چار لاکھ روپے کمائے۔ وہ کہتے ہیں کہ یہ ایک ریکارڈ رقم ہے۔ لیکن اپنے اسٹال کے بغل میں پتھر کی ایک سل پر بیٹھے عبادت فکرمندی کا اظہار کرتے ہوئے کہتے ہیں، ’’اس سیزن میں حالات اچھے نہیں دکھائی دے رہے ہیں۔‘‘

وہ خرچ کم کرنے کی پوری کوشش کرتے ہیں۔ انہوں نے بانس کے کھمبوں اور کھجور کے درختوں سے گھر بنایا ہے، جسے ڈھکنے کے لیے وہ ترپال لگاتے ہیں۔ سیال گُڑ نکالنے کے لیے وہ ناریل کے خول والی ہاتھ سے بنی کفگیر (کرچُھل) استعمال کرتے ہیں۔ آگ کے لیے عبدل عام طور پر خشک کھجور کے پتّے اور گھاس اکٹھا کرتے ہیں۔ وہ بتاتے ہیں، ’’نہیں تو ہمیں جوالانی (جلاون یا ایندھن کی لکڑی) کے لیے تقریباً ۲۰ ہزار روپے دینے پڑتے۔‘‘

تقریباً ۴۲ سال کے عبادت نے یہ موسمی کام اس لیے شروع کیا، کیوں کہ ندیا ضلع میں گھر پر چھ رکنی فیملی کا پیٹ پالنے کے لیے کھیتی کافی نہیں رہ گئی تھی۔ سال کے باقی دنوں وہ زیادہ تر کولکاتا میں اور دوسرے حصوں میں درزی کا کام کرتے ہیں۔ اپنے گھر ندیا میں وہ ایک فیکٹری میں درزی کا کام کرتے ہیں، مگر کہتے ہیں کہ وہاں اجرت کم ہے، جس کی وجہ سے انہیں مہاجرت کرنی پڑتی ہے۔

فیملی سے بات کرنے کے لیے عبادت دن میں کئی بار گھر پر فون کرتے ہیں۔ وہ کہتے ہیں، ’’نیجیر باڑیر تھیکے پرتھبیر آر کونو جیگا بھالو لاگے نہ [اپنے گھر سے زیادہ دنیا میں کوئی اور جگہ اچھی نہیں لگتی]۔‘‘

ان کے چچیرے بھائی عبدل، کولکاتا کی ایک کمپنی میں ٹرک ڈرائیور ہیں اور جب وہ یہاں شیولی کا کام نہیں کرتے، تو ملک بھر میں گھومتے رہتے ہیں۔ انہیں بھی گھر کی یاد ستاتی ہے۔ ۳۴ سال کے عبدل کہتے ہیں، ’’ایکھان تھیکے باڑی جابو۔ ایک ڈیڑ ماش آرام کورا نہ اوبدی آر کوتھاؤ جابو نا [یہاں سے گھر ہی جاؤں گا۔ اور جب تک وہاں ایک ڈیڑھ مہینے آرام نہ کر لوں، تب تک کہیں نہیں جاؤں گا]۔‘‘

دیب گرام میں ان کے گھر پر ان کی فیملی کے پاس ۷-۸ بیگھہ (تقریباً ڈھائی ایکڑ) آبپاشی والی زمین ہے، جس پر وہ اپنے کھانے لائق دھان اور سبزیاں اُگاتے ہیں۔ بچا ہوا اناج وہ فروخت کر دیتے ہیں، لیکن وہ فائدہ مند نہیں ہے۔ سسٹم سے اپنی مایوسی کا اظہار کرتے ہوئے عبدل کہتے ہیں، ’’اماری چال آمار تھیکے کوم دام اے کِنبے، بیچبے ہائی دامے۔ چاشی چاش نہ کورلے مانوش کھیتے پارے نا۔ اوتھوچھو شیئی چاشیری کونو مان اِجّت نائی [میرا ہی چاول مجھ سے کم دام میں خریدیں گے، زیادہ دام میں بیچیں گے۔ کسان کھیتی نہ کرے تو لوگ کھا نہیں سکتے۔ پھر بھی اُس کسان کی کوئی عزت نہیں ہے]۔‘‘

عبدل نہیں چاہتے کہ ان کا ۱۱ سال کا بیٹا شیولی کے بطور ان کے نقش قدم پر چلے اور انہیں شک ہے کہ اگلی نسل ایسا مشکل کام کرنا چاہے گی۔

گاہک صبح ۶ بجے سے ہی عبادت کے اسٹال پر لائن میں کھڑے ہو جاتے ہیں۔ پرہلاد رائے بولپور شہر سے ہیں۔ وہ گھر لے جانے کے لیے کچھ پاٹالی (گُڑ کی سلّی) لیتے ہوئے کہتے ہیں، ’’میں ان سے تین سال سے خرید رہا ہوں۔‘‘ پاٹالی کی قیمت ۳۵۰ روپے کلو ہے۔ پاٹالی گڑ اکثر گھروں میں سال بھر کے لیے جمع کر کے رکھا جاتا ہے۔

عبادت اپنے باقاعدہ گاہکوں کا استقبال مسکرا کر اور ’’بھالو آچھین [آپ کیسے ہیں]؟‘‘ کہہ کر کرتے ہیں۔

تازہ جوس بھی بیچا جاتا ہے۔ یہ تازگی بھرا مشروب ہے جو صرف ان لوگوں کو ملتا ہے، جو ٹھنڈی سردیوں میں صبح کو جلدی اٹھ پاتے ہیں۔ عبادت نے پاری کو بتایا، ’’اگر پتّے لال ہیں، تو رس میٹھا ہوگا۔ اگر درخت اونچا ہے تو بھی یہی ہوگا۔‘‘ ایک گلاس جوس ۱۰ سے ۱۵ روپے میں فروخت ہوتا ہے اور ایک لیٹر کی قیمت آتی ہے تقریباً ۱۲۰ روپے۔

اپنی قیمتوں کو زیادہ قابل مقابلہ بنائے رکھنے کے لیے کچھ لوگ گُڑ کو چینی والی چاشنی میں ملا کر بیچتے ہیں۔ یہ ’ملاوٹی‘ گُڑ قیمت پر فروخت ہوتا ہے، مگر اس سے کم فروخت والے دنوں میں بھی کمائی ہوتی ہے۔

آنندو لوہار اور ان کی فیملی کی طرح نوجوان اور زیادہ متحرک عبدل اور عبادت صرف سیال جھولا گڑ تک ہی محدود نہیں ہیں، بلکہ پاٹالی گُڑ بھی بناتے ہیں جو سلّی کی شکل میں بیچا جاتا ہے۔ یہ ایک مشکل عمل ہے اور صحیح اندازہ لگانا بہت ضروری ہوتا ہے۔ اگر گرمی بہت زیادہ ہوگی تو جوس نیچے چپک جائے گا اور اگر بہت کم ہوگی تو گُڑ جمے گا نہیں۔

جوس کو آنچ سے ہٹانے کے بعد فکرمند عبادت کہتے ہیں، ’’اسے ایک منٹ اور چاہیے تھا۔‘‘ انہیں لگ رہا ہے کہ ان سے گڑبڑ ہو گئی ہے۔ جب سِلّی کو سانچے سے نکالنے کا وقت آتا ہے، تو کچھ ان کے ہاتھ میں ہی ٹوٹ جاتی ہیں، کیوں کہ وہ اب بھی بہت نرم ہے۔ وہ انہیں پلاسٹک کے جار میں رکھ دیتے ہیں۔ اسے بھی شہد جیسے رنگ کی گُڑ کی دوسری صحیح گنبد نما سِلّیوں کے ساتھ بیچا جائے گا، جنہیں اب پلاسٹک کے کریٹ میں رکھ دیا گیا ہے۔

ایک بار پاٹالی کی کھیپ تیار ہونے کے بعد ان کے چچیرے بھائیوں کو کچھ دیر آرام مل پاتا ہے۔ شام ہوتے ہی عبادت پھر سے کھیت میں جائیں گے اور مزید ۳۰ برتن لٹکائیں گے اور یہ سلسلہ چار مہینے سے زیادہ وقت تک ہفتہ در ہفتہ چلتا رہے گا۔

باقی دن گاہکوں سے نمٹنے میں گزر جاتا ہے اور جب رات کو آخری گاہک تقریباً ساڑھے آٹھ بجے جاتا ہے، تب جا کر عبادت اور عبدل کا دن ختم ہوتا ہے۔

مسکراتے ہوئے عبادت کہتے ہیں، ’’ابار تو شیئی بھور بیلائی اٹھتے ہوبے [اب تو ہمیں پھر صبح اٹھنا پڑے گا]۔‘‘

رپورٹر اس کہانی میں مدد کے لیے پرلے مَنّا کی شکر گزار ہیں۔

ترجمہ نگار: قمر صدیقی