محبت کی میٹھی آواز

’واء یا‘ آسانی سے کسی بالغ انسان کی ہتھیلی میں سما جاتا ہے۔ یہ ساز، جو ’واء‘ (بانس) سے بنا ہے، ساڑھے چار انچ سے تھوڑا ہی لمبا ہوتا ہے، اور ’’رومانس کی علامت تصور کیا جاتا ہے،‘‘ ناپ لو بانس کی چھوٹی سی پٹّی کو اپنے ہونٹوں تک لے جاتے ہوئے کہتی ہیں۔

ناگالینڈ کے مون ضلع میں رہنے والی ناپ پہلے کسان ہوا کرتی تھیں۔ ہم سے بات کرتے وقت وہ اپنا چھوٹا آلہ موسیقی نکالتی ہیں، جسے انہوں نے اپنی آستین میں دبا رکھا ہے۔ اپنے بائیں ہاتھ سے وہ بانس اور دھاگے کا ایک سرا پکڑتی ہیں۔ دائیں ہاتھ سے وہ اُس دھاگے کو پکڑتی ہیں، جس کے سرے پر رنگ برنگے پھندنے لٹکے ہوئے ہیں۔ اور پھر وہ ’واء یا‘ بجانا شروع کرتی ہیں۔

ناپ کے بغل میں ان کی بچپن کی سہیلیاں یینگ لیہہ اور نیئیلی بیٹھی ہیں، اور سبھی کی عمر ساٹھ سال سے زیادہ ہے۔ وہ تینوں اؤلیئنگ کے لیے ساتھ آئی ہیں، جو مون گاؤں میں بیپٹسٹ چرچ کے بغل میں واقع میدان میں منعقد کیا جا رہا تھا۔

اؤلیئنگ چھ دنوں کا جشن ہے، جسے کونیاک برادری ہر سال موسم بہار میں مناتی ہے، جس میں جھوم کے کھیتوں میں بیج بونے کے بعد دیوتاؤں سے آشیرواد مانگنے اور اچھی فصل کی تمنا کے لیے برادری ایک جگہ جمع ہوتی ہے۔ ’’نوجوانوں نے اس جشن کی اہمیت کو بھُلا دیا ہے،‘‘ ناپ کہتی ہیں، جو ریاست میں درج فہرست قبیلہ کے طور پر درج کونیاک برادری سے تعلق رکھتی ہیں۔

’’ہمیں تاریخ اور وقت کا نہیں پتہ، لیکن لال پھولوں والا کورل کا پیڑ کھلنے لگا، تو ہمیں پتہ چل گیا کہ اؤلیئنگ کا سیزن آ گیا ہے،‘‘ ناپ کہتی ہیں۔ وہ اپنی بات کو آگے بڑھاتے ہوئے کہتی ہیں کہ ان حصوں میں عیسائیت کی آمد کے بعد، خاص کر ۱۹۶۰ کی دہائی سے معاشرہ میں کافی تبدیلی آئی ہے، جس کی وجہ سے اس تہوار کی اہمیت کم ہو گئی ہے۔ ’’عیسائیت کے آنے کے بعد، اؤلیئنگ سے متعلق کئی روایتیں فراموش کر دی گئی ہیں۔‘‘

ناپ کے مطابق، اس قسم کی تبدیلیوں کا پتہ رابطہ کے لیے موبائل فون کے استعمال سے ملتا ہے۔ ’’جب وہ نوجوان تھے، ہم فون پر بات نہیں کر سکتے تھے، اس لیے ہم اس کا استعمال کرتے تھے،‘‘ وہ کہتی ہیں۔

یینگ کی طرح، نیئیلی کے پاس بھی وہ ساز ہے، حالانکہ وہ اسے باہر نہیں نکالتیں۔ اگلے دن تینوں سہیلیوں کو جشن میں موجود مجمع کے سامنے پرفارم کرنا ہے۔

ناپ کا ساز ان کے شوہر نے بنایا اور انہیں تحفہ میں دیا تھا۔ اپنی آنکھوں میں چمک کے ساتھ وہ سمجھاتی ہیں، ’’مرد جن لڑکیوں کو پسند کرتے تھے، انہیں یہ تحفہ میں دیتے تھے۔‘‘ تو ناپ کو اپنی جوانی میں ایسے کتنے تحفے ملے تھے؟ اس کے جواب میں ناپ زور سے ہنس پڑتی ہیں اور ان کی سہیلیاں بھی ان کے ساتھ اس قہقہہ میں شامل ہو جاتی ہیں۔

اس اسٹوری میں مدد کے لیے پاری، اتھک کونیاک سی کا شکریہ ادا کرنا چاہتا ہے۔

ترجمہ نگار: قمر صدیقی