मया के मयारू धुन

वाह्या आसानी ले सियान मनखे के हथेली मं धरा जाथे. वाह (बांस) ले बने ये बाजा, साढ़े चार इंच ले थोकन लंबा होथे, अऊ ये ह “मया के चिन्हारी” आय, बांस के नानकन पट्टी ला अपन होंठ मं धरत नप लो कहिथे.

नप नागालैंड के मोन जिला मं किसान रहिस. हमन ले गोठियावत, वो अपन बांहा मं धरे एक ठन नान कन बाजा ला निकारथे. अपन डेरी हाथ ले वो ह बांस अऊ डोरी के एक मुड़ी ला धरथे. जउनि हाथ ले वो ह तार ला धरथे जेकर मुड़ी मं रिंगी-चिंगी सुत लटके हवय. अऊ ओकर बाद वो ह बजाय सुरु कर देथे.

नप के बगल मं ओकर बालपन के सहेली यिंग ली अऊ निलइ बइठे हवंय, सब्बो साठ बछर के हवंय. ये तीनों झिन मोन गांव मं बैपटिस्ट चर्च के बगल के मैदान मं होवेइय्या अवलेंग सेती एके संग जावत हवंय.

अवलेंग कोंयाक समाज के हरेक बछर बसंत मं मनाय जवेइय्या छै दिन के तिहार आय, जेन मं समाज के लोगन मन झूम खेत मं बीजा डारे के बाद देंवता मन ले आशीष लेय अऊ बढ़िया फसल सेती सुमिरन करे बर एक जगा जुरथें. ये समाज अइसने आय जिहां झूम (खेती बदल के) अभू घलो भारी चेत धरे करे जाथे. कोंयाक समाज (राज मं अनुसूचित जनजाति के रूप मं सूचीबद्ध) के नप कहिथे, “नवा पीढ़ी के लइका मन ये तिहार के महत्तम ला भूलागे हवंय.”

“हमन ला तारीख अऊ बखत पता नइ रहिस, फेर जब कोरल रुख ह फूले लगिस, त हमन ला पता चल गे के अवलेंग के सीजन आगे हवय.” नप कहिथे अऊ वो ह बतावत जाथे के बदलत समाज, खास करके 1960 के दसक मं ये इलाका मन मं ईसाई धरम आय के बाद ले, येकर महत्ता कम होगे. “ईसाई धरम अपनाय के बाद, कतको अवलेंग रीत-रिवाज बिसोर देय गीस.”

नप येकर आगू कहिथे के बदलत बखत के चिन्हारी मोबाइल फोन ले अपन मन के बात अऊ भाव के इजहार करे जाथे. वो ह कहिथे, “जब हमन जवान रहेन, त हमन फोन मं बात नइ करे सकत रहेन, येकरे सेती हमन येला काम मं लावत रहेन.”

निलइ करा घलो एक ठन हवय, जइसने के यिंग करा हवय, वइसे वो ह येला बहिर नइ निकारे. दूसर दिन, तीनों सहेली ला तिहार मं लोगन मन के आगू बजाय ला हवय.

नप ला ये बाजा ओकर घरवाला वोला भेंट मं देय रहिस. वो अपन चमकत आंखी के संग बताथे, “टूरा मन येला अपन पसंद के टूरी मन ला देवत रहिन.” अऊ जब वो ह जवान रहिस त वोला कतक बाजा मिले रहिस? जुवाब मं नप जोर ले हँस परथे अऊ ओकर सहेली मन घलो ओकर संग हँस परथें.

पारी ये कहिनी मं मदद सेती अथक कोंयाक सी. के आभार जतावत हवय

अनुवाद: निर्मल कुमार साहू