طلوع آفتاب، درخشاں ماہتاب

’’چکی چلانے میں ماں کی مدد کرتے ہوئے میں نے ان سے اناج پیسنا اور اووی گانا سیکھا تھا،‘‘ بھامبرڈے گاؤں سے تعلق رکھنے والے بَبن دیگھے کہتے ہیں۔ یہ ۵۵ سالہ گلوکار گرائنڈمل سانگس (چکّی کے گانوں) کے ڈیٹابیس کے لیے ریکارڈ شدہ خواتین گلوکاراؤں اور اداکاراؤں کے درمیان واحد مرد رکن ہیں۔

ان کی ماں کی موت کے بعد ان کے والد نے دوسری شادی کر لی۔ سوتیلی ماں ان کے ساتھ سوتیلا رویہ اختیار کرتے ہوئے اکثر انہیں کھانے کو نہیں دیتی تھیں۔ لہٰذا انہیں چھوٹے موٹے کام کر کے اپنا پیٹ بھرنا پڑا۔

ببن دیگھے نے گرائنڈ مل گیتوں کے مجموعہ کو ۱۹ نغمے دیے جن میں سے ۱۷ کی صدابندی کی گئی ہے اور گانے کے کلپ میں پیش کیا گیا ہے۔ جب دسمبر ۲۰۲۳ میں ان سے ہماری ملاقات ہوئی تو انہوں نے ہمیں چار نئے گیت سنائے، جن کی ہم نے ویڈیو ریکارڈنگ کر لی تھی۔ ببن کہتے ہیں، ’’جب میں جوان تھا، تو میری آواز میٹھی اور اس سے بھی زیادہ باریک [سریلی] تھی۔‘‘

اس ویڈیو میں ببن نے طلوع آفتاب سے متعلق گیت گایا ہے۔ انہوں نے آفتاب کو خدا کہا ہے، اور اس کی کرنوں کو بھائی کی جوانی کی تابانی سے تشبیہ دی ہے۔ بھائی کے لیے ’پُتالا‘ نام استعمال کیا ہے، جس سے ایک نہایت خوبصورت نوجوان کی شبیہ ابھرتی ہے۔ گلوکار سورج یعنی خدا سے جلد آنے اور مستقبل کو نمایاں کرنے کی گزارش کرتا ہے۔

آڈیو کلپ میں شامل ۱۷ گیتوں کا لب لباب یہ ہے کہ اگر غریب اور کم نصیب لوگوں کے لیے رحم یا ہمدردی کا جذبہ نہ ہو، تو مذہبی رسومات پر عمل کرنا بے معنی ہے۔ کسی غریب کو اس کی حالت زار دیکھ کر اس کا مذاق اڑانا یا اس کی تذلیل کرنا ایک انسان کا دوسرے انسان کے ساتھ بدترین سلوک ہے۔ جو بھی ضرورت مندوں کی مدد کرتا ہے وہ خدا کا کام کرتا ہے۔

گلوکار ہم سے کہتا ہے کہ ’’دوسروں کو دینے میں فراخ دل بنو۔‘‘

جب بھائی مشکل میں ہوتا ہے اور غربت میں زندگی گزار رہا ہوتا ہے تو بہن کہتی ہے کہ حالات بہتر ہوں گے، جیسے چاند سے بادل ہٹ جائیں تو چاند پھر سے چمک اٹھتا ہے۔

صبح سویرے دروازے پر کون گوساوی* آیا؟
کیا بتلاؤں دیوی تم کو کچھ دان (خیرات) اسے دلوا دو!

صبح سویرے سنت چنگونی نے کیا ہے دان دھرم کا کام
صدقہ دے کر چنگونی نے کیا ہے رب کا کام

وہ تھی رسم و راہ سے واقف، رہی اسی پر گامزن
یہ مت کہنا کہ میں نے بگاڑا، خدا ہے ان کا گواہ

بھوک مٹانا لوگوں کا، ہے دین و دھرم کا کام
پسند کریں پانڈو رنگ، تو کیوں ہو بیکار یہ کام

جس کی ماں ہے دیندار، بیٹی اس کی پیروکار
خواہ پکڑے جنگل کی راہ، مدد کرے گا پروردگار

دان کروگے، تمہیں ملے گا جیون سے نجات
ہلکی ہوا کے زور سے اڑ جاتے ہیں نازک پات

بھوکوں کو زمین پر جب بھی دو خیرات
دیتے رہو تمام عمر فراخ دلی کے ساتھ

جب بھی آیا میرے در پہ، میں نے بجھائی اس کی پیاس
لوٹ گئے یَم راج بھی، جب ہوئی ان کو بھوک کی پہچان

میرے مقدر میں تھا جو بھی، میں نے وہ سب پایا
مندر جا کر دھرم کا مطلب میری سمجھ میں آیا

غربت نے کیا رسوا مجھ کو، کب تک سہتا میں ان کو
ہاتھ اٹھا کے رب کو پکاروں، کتنا کٹھن ہے جیون مجھ کو

غربت میں اپنے کپڑوں پر گرہ لگا کر جیتا ہوں
عزت خواہ بچا لوں میں پھر بھی طعنہ سہتا ہوں

غربت میں جینا سیکھ لیا ہے، بھائی تم بے خوف رہو
چاند کے چہرے سے ایک دن کالا دھبہ مٹ جائے گا

غربت میں ہمت مت ہارو، ڈور کو اس کی تھامے رہو
چاند کے چہرے سے ایک دن کالا دھبہ ہٹ جائے گا

کیسے ہنسی اڑاؤگے تم، غربت کو بھی جانا ہے
بھری دوپہری کو بھی تو آخر آخر ڈھل جانا ہے

کون اڑاتا ہنسی ہے میری، غربت کی یہ حالت دیکھ
وقتِ مرگ وہ سب کہہ دے گا، کھل جائے گا سارا بھید

ہنس کر اس کی غربت پر، توڑے تُو نے رشتے سارے
ہوا کی زد میں آ کر گرے، یاسمن و موگرا پیارے پیارے

پچھلے جنم کے قصے سارے، بیت گئے اور راہ لیے
مجھ کو نہ بہلائے کوئی، بس یہی بات میں کہتا ہوں

*گوساوی وہ مرد ہے جس نے دنیاوی کاروبار، لذتوں وغیرہ سے کنارہ کشی اختیار کر لی ہو۔ وہ اینٹ کے گرد جیسے رنگ کے کپڑے پہنتا ہے۔ یہ ایک برادری کا نام بھی ہے، جس کے لوگ مذہبی سرگرمیوں میں مصروف رہتے ہیں۔

آفتاب طلوع ہوتا ہے…

خدا [سورج] طلوع ہوا، میں نے اسے نکلتے دیکھا
میرا بھائی پُتالا، باہر کھڑا رہا

خدا [سورج] طلوع ہوا، میں نے نکلتے دیکھا
میرے بھائی پُتالا نے بکھرے ہوئے گلال کو دیکھا

خدا [سورج] طلوع ہوا، گھر کے قریب آیا
میرے بھائی پُتالا کی جوانی، جیسے سورج کی روشنی

میں خدا کو دیکھنے گیا، مندر کے پیچھے کھڑا
ہاتھ جوڑے کہتا ہوں، جلد آؤ، سناؤ اپنے دل کی صدا

فنکار/گلوکار: ببن دیگھے

گاؤں: بھامبرڈے

بستی: گنپتی واڑی

تعلقہ: مُلشی

وادی: مُلشی

ضلع: پونے

جنس: مرد

برادری: مراٹھا

عمر: ۵۵ سال

تاریخ: اس گیت اور ان میں شامل کچھ معلومات کی ریکارڈنگ ۱۴ اکتوبر ۱۹۹۵ کو کی گئی تھی۔ گلوکار کی فوٹو اتارنے اور ویڈیو ریکارڈ کرنے کی تاریخ ۳ دسمبر ۲۰۲۳ ہے۔

پوسٹر: اُرجا

ہیما رائیرکر اور گی پائیٹواں کے ذریعہ بنیادی طور پر قائم کردہ ’’گرائنڈ مل سانگس پروجیکٹ‘‘ کے بارے میں پڑھیں۔

ترجمہ نگار: شفیق عالم