جذام سے جڑی بدگمانی پیچھا نہیں چھوڑتی

’’لوگ آج بھی اس مغالطہ میں مبتلا ہیں کہ اگر وہ کسی ایسے شخص کے رابطے میں آ گئے، جسے جذام تھا – خواہ ۶۰ سال پہلے ہی کیوں نہ رہا ہو – تو وہ بھی اس بیماری کا شکار ہو جائیں گے۔‘‘

نعمت اللہ کی عمر ۷۰ سال سے زیادہ ہو چکی ہے۔ وہ تقریباً چھ دہائی قبل جذام کے مرض سے صحت یاب ہو چکے تھے، لیکن ان کا کہنا ہے کہ اس بیماری کا کلنک اب بھی باقی ہے۔ وہ کہتے ہیں، ’’میرے اہل خانہ میری عزت کرتے ہیں، لیکن اپنی اس حالت کی وجہ سے میں دوسروں سے ایسی امید نہیں رکھ سکتا۔‘‘

لوگوں کی کراہت اور ترحم بھری نظروں کی تاب نہ لا کر، انہوں نے بالآخر کپواڑہ میں اپنا گھر اور فیملی کو چھوڑ دیا اور ۲۰۲۵ میں سرینگر کی ’بہرار جذام کالونی‘ میں منتقل ہو گئے۔

’’میں یہاں اس لیے منتقل ہوا کیونکہ یہاں سب برابر ہیں۔ میں اپنے گاؤں میں جس طرح خود کو تنہا محسوس کرتا تھا اب ویسا محسوس نہیں کرتا،‘‘ ۷۶ سالہ نعمت اللہ کہتے ہیں۔ ’’یہ جگہ بالکل اپنے گھر جیسی لگتی ہے۔ میں نے فیصلہ کر لیا ہے کہ مرتے دم تک یہیں رہوں گا۔‘‘

جذام ایک دائمی لیکن قابلِ علاج متعدی بیماری ہے جو مائیکو بیکٹیریم لیپری نامی بیکٹیریا کی وجہ سے لاحق ہوتی ہے۔ سال ۲۰۲۴ میں ہندوستان میں اس بیماری کے ایک لاکھ معاملے درج ہوئے تھے، جو نئے معاملوں کے لحاظ سے دنیا میں دوسرے مقام پر موجود برازیل کے مقابلے میں پانچ گنا زیادہ ہیں۔ ہندوستان میں ہمیشہ سے ہی جذام (جسے ہینسن ڈزیز بھی کہا جاتا ہے) کے مریضوں کی تعداد دنیا میں سب سے زیادہ رہی ہے۔

نعمت جب جذام کا شکار ہوئے تو اس وقت ان کی عمر تقریباً ۱۰ سال تھی۔ وہ پاری کو بتاتے ہیں، ’’میرے جسم پر زخم بننے لگے تھے۔ کبھی وہ کم ہو جاتے، تو کبھی زور پکڑ لیتے تھے۔ میں نے اس پر زیادہ دھیان نہیں دیا اور اپنا کام کرتا رہا۔‘‘

کسان گھرانے سے تعلق رکھنے کی وجہ سے، انہیں کھیتوں میں کام کرنے کے لیے بھیجا جاتا تھا۔ ’’آہستہ آہستہ یہ بیماری بڑھتی گئی۔ میرے ہاتھ اور پاؤں کی انگلیوں کی حس ختم ہونے لگی۔ مجھے یاد ہے کہ ایک دفعہ میں برف میں گھاس کاٹنے گیا تھا اور مجھے احساس تک نہیں ہوا کہ میری انگلیاں جل گئی ہیں۔ بعد میں وہ ایک ایک کر کے گرنے لگی تھیں۔‘‘

ان کا کہنا ہے کہ گاؤں والے ان کے ساتھ عزت سے پیش آتے تھے، لیکن بیماری کے پھیلنے کے حوالے سے شک و شبہ کا شکار تھے۔ ’’لوگ پس پشت کیا کہتے ہیں… مجھے نہیں معلوم،‘‘ وہ کہتے ہیں۔ ان کی آواز میں اُن دنوں کا درد صاف جھلکتا ہے۔ ان کی موجودگی میں دوسروں کی بے اطمینانی انہیں ہمیشہ تکلیف دہ حد تک محسوس ہوتی تھی۔

یہ ۱۹۶۰ کی دہائی کا واقعہ ہے۔ جذام کئی دہائیوں سے بڑے پیمانے پر پھیل رہا تھا۔ سال ۱۹۸۳ کے اعداد و شمار کے مطابق ہر ۱۰ ہزار کی آبادی پر ۵۷ مریض تھے۔ یہ تناسب آج نمایاں طور پر بہتر ہے – آج ہندوستان میں ۱۰ ہزار لوگوں میں ایک سے بھی کم معاملے ہیں۔ یہ کمی ۱۹۸۲ میں متعارف کرائے گئے ایم ڈی ٹی (کثیر الادویاتی علاج) پروگرام کی وجہ سے ہے۔

بہرار جذام کالونی میں تقریباً ۲۰۰ لوگ رہتے ہیں، جن میں سے ۵۷ جذام کے مریض ہیں۔

میں ساری زندگی سرینگر کا رہائشی رہا ہوں، اور اس جذام کالونی کا نام اس وقت سنا جب میں دارالحکومت میں پرورش پا رہا ایک نوعمر بچہ تھا اور ہمیں اس کالونی کے لیے چندہ جمع کرنے کی ہدایت دی گئی تھی۔ میں نے ہمیشہ جذام کالونی کا تصور ایک اداس، ویران اور پریشان کن جگہ کے طور پر کیا تھا، جہاں بھیک مانگنے والے لوگوں کا ہجوم ہوتا ہے۔ لیکن جب میں وہاں گیا، تو حقیقت اس سے بالکل برعکس تھی۔

یہاں وقت جیسے تھم گیا ہو۔ سرینگر کی نگین جھیل، جو اپنے پرسکون پانی اور خوبصورت ہاؤس بوٹ کے لیے مشہور ہے، اس خاموش کالونی کو اپنے کنارے پر پناہ دیتی ہے۔ لال بازار کے بھگوان پورہ میں ۴۰ ایکڑ اراضی پر پھیلی یہ کالونی، دارالحکومت کی گہما گہمی سے دور ایک الگ ہی دنیا ہے۔ پرانی اور خستہ حال جھونپڑیوں کے ساتھ بنی یک منزلہ کوارٹرز کی قطاریں اس بستی کی طویل تاریخ کی یاد دلاتی ہیں۔

اس کالونی کو انیسویں صدی کے اواخر میں انگریزوں نے کشمیر میڈیکل مشن کے تحت قائم کیا تھا۔ یہ کالونی جذام سے متاثرہ لوگوں کی کئی نسلوں کا مسکن رہی ہے۔ اس کے احاطہ کے اندر ایک چھوٹا سا ہسپتال، ایک مسجد اور ایک قبرستان بھی ہے۔

یہ ریاست کا واحد جذام یونٹ ہے، اور یہاں قومی انسداد جذام پروگرام (این ایل ای پی) کے تحت جذام کی روک تھام، تشخیص، علاج اور باز آبادکاری کے لیے عوامی صحت کی سہولیات بالکل مفت فراہم کی جاتی ہیں۔ یہ قومی صحت مشن کی مرکز کے تعاون سے چلنے والی ایک اسکیم ہے۔

برسوں پہلے نعمت اللہ ایک ڈاکٹر سے ملاقات کرنے کے لیے، شمال میں واقع کپواڑہ سے سرینگر آئے تھے۔

’’رمضان کے دن تھے، اور میں روزے سے تھا،‘‘ وہ کہتے ہیں۔ ’’جب میں جہانگیر چوک پہنچا تو میں نے افطاری کے لیے دو روپے کے پکوڑے خریدے۔ میرے پاس اتنے ہی پیسے تھے۔ مجھے رات گزارنے کے لیے ایک جگہ چاہیے تھی، اس لیے میں ٹنکی پورہ چلا گیا اور ایک مسجد میں داخل ہوا۔‘‘

مسجد کے نگراں نے انہیں کھانے کی پیشکش کی، جسے نعمت نے یہ کہتے ہوئے مسترد کر دیا کہ انہیں صرف سونے کے لیے جگہ کی ضرورت ہے۔ بات چیت کے دوران انہوں نے دروازہ پر ایک عورت کو کھڑا دیکھا۔

’’جب میں نے دریافت کیا کہ وہ وہاں کیوں کھڑی ہیں، تو انہوں نے کہا کہ وہ برتن لینے آئی ہیں، کیونکہ بھکاری کھانے کے بعد انہیں چرا لیتے ہیں،‘‘ وہ یاد کرتے ہیں۔

نعمت کو شدید رنج ہوا۔ ’’میں نے کھانا چھوڑا اور مسجد سے نکل کر ڈاکٹر سے ملنے کے لیے ایس ایم ایچ ایس (شری مہاراجہ ہری سنگھ ہسپتال) کی جانب روانہ ہو گیا۔‘‘ وہاں پتہ چلا کہ انہیں جذام ہے۔ انفیکشن پھیل رہا تھا، اس لیے انہیں علاج اور نگرانی کے لیے دو ماہ تک ہسپتال میں رکھا گیا۔

وہ یاد کرتے ہوئے بتاتے ہیں، ’’جب مجھے (ہسپتال سے) چھٹی ملی، تو میں گھر واپس آیا اور خود سے کہا کہ میری فتح نہیں ہوئی ہے – میں ہار گیا ہوں۔ بیماری اب بھی وہیں تھی اور میرے جسم کو مسلسل نقصان پہنچا رہی تھی۔ اس وقت اس کا کوئی مناسب علاج بھی دستیاب نہیں تھا۔‘‘

نعمت اللہ اکثر امیرا کدل میں چھوٹے موٹے کام کیا کرتے تھے جیسے ناڑے (ازاربند) فروخت کرنا۔ انہوں نے عوام کی توجہ اپنی طرف مبذول کروائی – کیونکہ جسمانی معذوری کا شکار ہونے کے باوجود وہ روزی روٹی کمانے کی کوشش کر رہے تھے۔ ’’اخباروں میں میری بہت سی تصویریں چھپی ہیں۔ ایک بار میری تصویر اسی صفحہ پر شائع ہوئی تھی جس پر سابق وزیر اعظم منموہن سنگھ کی تصویر چھپی تھی،‘‘ نعمت دل کھول کر ہنستے ہیں۔

انہیں اس حقیقت پر فخر ہے کہ انہوں نے کبھی بھیک نہیں مانگی، بلکہ ہمیشہ اپنی کفالت کے لیے کام کیا۔ ’’لیکن اب اپنی زندگی کے آخری پڑاؤ پر مجھے لگتا ہے کہ میں مزید کام نہیں کرسکتا۔ یہ بھی اس کالونی میں آنے کی ایک وجہ ہے،‘‘ وہ مزید کہتے ہیں۔ یہاں خوراک جیسی بنیادی ضروریات مفت فراہم کی جاتی ہیں۔

ان کے گھر والے کبھی کبھار ان سے ملنے آتے ہیں۔ انہوں نے کبھی شادی نہیں کی کیونکہ ان کے بقول اس بیماری نے اسے ناممکن بنا دیا تھا - جذام کے مرض والے خاندان میں شادیاں اب بھی ناگوار خیال کی جاتی ہیں۔ ’’میرے بھائی کا بیٹا میرے اپنے بچے کی طرح ہے،‘‘ وہ اس رپورٹر کو بتاتے ہیں۔

دوسروں کی طرح، نعمت کا بھی کہنا ہے کہ وہ برادری کی حمایت اور ہمدردی سے حوصلہ پاتے ہیں، لیکن ڈیجیٹل نظام سے اخراج کے منفرد چیلنجز اب بھی برقرار ہیں۔ نعمت اللہ نے انگلیوں سے محروم اپنا ہاتھ دکھا کر ہنستے ہوئے کہا، ’’ایک بار جب میں کپواڑہ میں اپنے گاؤں کی سرکاری راشن کی دکان سے راشن لینے گیا، تو مجھے بتایا گیا کہ میری انگلیوں کے نشانات کام نہیں کر رہے ہیں۔‘‘

’’سماجی بدگمانی اب بھی موجود ہے،‘‘ جہانگیر کہتے ہیں، ان کی آواز میری توجہ اپنی جانب مبذول کرا رہی ہے۔

جہانگیر ۱۹۸۶ میں چار سال کی عمر میں اپنی ماں کے ہمراہ جذام کی کالونی پہنچے تھے۔ ان کی ماں اس بیماری میں مبتلا تھیں، جس کی وجہ سے ان کے شوہر نے انہیں طلاق دے دیا تھا۔

’’میں اس کالونی میں اپنی والدہ کے ساتھ ۴۱ سال تک رہا ہوں، اور مجھے کبھی انفیکشن نہیں ہوا،‘‘ وہ کہتے ہیں۔ ان کی ماں نے کالونی کے دوسرے بہت سے مکینوں کی طرح جذام کے ایک اور مریض سے دوبارہ شادی کر لی تھی۔ اب صورتحال میں بہت کچھ تبدیلی آ چکی ہے اور بہت سے لوگ باہر شادی کر رہے ہیں، جیسا کہ ۴۵ سالہ جہانگیر نے کیا ہے۔

لیکن کالونی سے باہر رہنے کے لیے منتقل ہونا تقریباً ناقابل تسخیر رکاوٹ ہے، یہاں تک کہ اعلیٰ سرکاری عہدوں پر فائز افراد کے لیے بھی۔ جب لوگوں کو معلوم ہوا کہ ان کے والدین جذام کی کالونی کے مریض ہیں تو انہیں واپس جانے پر مجبور ہونا پڑا۔

ہم لکڑی کے ایک ایسے بنچ پر بیٹھے ہیں جو کالونی کے بزرگوں کو گپ شپ کے لیے اپنی طرف راغب کرتا ہے۔ یہ ان کی پسندیدہ جگہ ہے، کیونکہ یہاں سے اس کھانے اور امداد تک فوری رسائی مل جاتی ہے جو سب سے پہلے وارڈن کے دفتر تک پہنچتی ہے! یہ کہتے ہوئے ان کی آنکھوں میں ایک چمک آ جاتی ہے۔

جہانگیر کو آج بھی اس بات کا دکھ ہے کہ انہیں اپنا آبائی گھر چھوڑنا پڑا۔ ’’ہم اپنی زمین اور اپنی ملکیت پیچھے چھوڑ آئے تھے۔ اگر میں وہاں واپس بھی جاؤں، تو وہ سب مجھے کون لوٹائے گا؟‘‘

اگر لوگ ان کو پہچان بھی لیتے ہیں، تو ان کو جب یہ احساس ہوتا ہے کہ یہ اپنا حصہ دوبارہ حاصل کرنے کے لیے آئے ہیں تو اپنا منہ موڑ لیتے ہیں۔ ’’جب وہ سنتے ہیں کہ ہم [وہ اور ان کی ماں] اپنے حصہ کا دعویٰ پیش کرنے آئے ہیں، تو وہ ایسا احساس دلاتے ہیں گویا ہمیں پہچانتے ہی نہ ہوں۔‘‘

لہٰذا، وہ ۲۰۰۹ میں مٹی کی جھونپڑیوں کی جگہ نئے مکانات تعمیر کرنے کے لیے حکومت کے مشکور ہیں۔ ’’سو سال بعد ہی سہی مگر پھر بھی یہ ہوا تو۔ لیکن اب ہماری گزارش ہے کہ ان کوارٹرز کا باضابطہ الاٹمنٹ کر دیا جائے، جیسا کہ دوسری بستیوں میں کیا گیا ہے،‘‘ وہ تبت کالونی کے معاملے کا حوالہ دیتے ہوئے کہتے ہیں جہاں تبت سے ہجرت کرکے آنے والے لوگوں نے اپنے نام پر زمین حاصل کی تھی۔

قانونی ملکیت کی عدم موجودگی مسلسل عدم تحفظ کو ہوا دیتی ہے۔ وہ کہتے ہیں، ’’ہمارا سب سے بڑا خوف یہ ہے کہ ہمیں کسی بھی وقت بے دخل کیا جا سکتا ہے۔ ابھی پچھلے ہی مہینہ، یہاں ایک شخص کا انتقال ہوا۔ اس کا کوارٹر فوری طور پر دوسرے مریض کو الاٹ کر دیا گیا۔‘‘ ان مریضوں کے لیے جو یہاں اپنے اہل خانہ کے ساتھ رہتے ہیں، یہ بات غیر واضح ہے کہ ان کی موت کے بعد ان کے گھر والوں کا کیا ہوگا۔

’’ہم صرف اس چیز کا قانونی الاٹمنٹ چاہتے ہیں جو ہمارے لیے تھی۔ ہم اس جگہ کو چھوڑ دیں گے، لیکن باہر گھر خریدنے کے لیے پیسے کہاں سے لائیں گے؟‘‘ وہ پوچھتے ہیں۔

یہ اسٹوری پاری سینئر فیلوشپ ۲۰۲۵ کے تحت شائع کی گئی ہے۔