दाग़ु माज़ूर जो मारे माज़ूरें….

दुनिया में कोढ़ जे मरीज़नि जो सभ खां वॾो तइदादु भारत में आहे। कश्मीर में, श्रीनगर में बहरार वसंदी सूबे जे सभिनी कोढ़ जे मरीज़नि जो वाहिदु ठिकाणो आहे

“माण्हू अञा ताईं यक़ीनु कनि था त जेकॾहिं उहे कंहिं अहिड़े माण्हू सां लहु-विचुड़ में ईंदा जंहिं खे भले 60 साल पहिरीं कोढ़ु थियो हुजे पर पोइ बि उहे विचुड़जी वेंदा।”

नियामत उल्लाह ख़ान जी उमिरि सतरि खां वधीक आहे ऐं कोढ़ मां आजो थिए छहनि ॾहाकनि खां वधीक अरिसो गुज़िरी चुको आहे, पर हुन जे मुताबिक़ि इन जो दाग़ु दाइमी आहे। “मुंहिंजो परिवारु मुंहिंजी इज़त करे थो, पर मां पंहिंजे हालति जे करे ॿियनि खां इहा साॻी उमेद नथो रखी सघां,” हू दलील ॾिए थो।

तरसु ऐं ॿियाई खे वधीक बर्दाश्त न करण जी सूरत में, हुन नेठि कुपवाड़ा में पंहिंजो घरु ऐं परिवारु छॾे ॾिनो ऐं 2025 में श्रीनगर जे बहरार कोढ़ु कालोनी में अची वियो।

नियामत (76) चवे थो, “मां इनकरे हिते अची वियुसि, छाकाणि हिते सभेई बराबर आहिनि। मूंखे हिते धारियाई जो अहिसासु नथो थिए, जीअं पंहिंजे ॻोठ में थींदो हो। ही जॻहि मूंखे घरु जहिड़ी लॻंदी आहे। मूं तइ कयो त मां पंहिंजे आख़िरी पसाह ताईं हिते ई रहंदुसि।”

कोढ़ु (लेप्रोसी) घणे अरिसे ताईं रहंदड़ु, लेकिनि क़ाबिले इलाज विचुड़ंदड़ मर्ज़ु आहे जेको माइकोबैक्टीरियम लेप्री नाले जे जीवाणू सां थिए थो। भारतु 2024 में 1 लखु मामला दर्जु कया, जेको नंवनि मामलनि जे तइदाद जे लिहाज़ खां ॿिऐ नम्बर ते रहंदड़ ब्राज़ील जे तइदाद खां पंजूणो आहे। दुनिया में कोढ़ जे मरीज़नि जो तइदादु भारत में सभु खां वधीक रहियो आहे। इन बिमारी खे हैनसन रोॻु बि चयो वेंदो आहे।

नियामत अटिकल 10 सालनि जो हिकु नढिड़ो छोकरो हो जॾहिं खेसि कोढ़ु थियो। हू पारी खे ॿुधाए थो, ”मूंखे फुरड़ियूं थियण लॻियूं। कॾहिं उहे घटिबी हुईयूं, कॾहिं वधंदियूं हुयूं। मूं घणो ध्यानु न ॾिनो ऐं कमु जारी रखियो।”

हिक हारी परीवार मां हुजण करे, खेसि ॿनीअ में कमु करण लाइ मोकिलियो वियो “आहिस्ते आहिस्ते, बीमारी वधंदी वेई। मुंहिंजे हथनि ऐं पेरनि जी आङरियुनि में अहिसासु ख़तमु थियण लॻो। मूंखे यादि आहे त हिक भेरो बर्फ़ में गाह वढण वयुसि ऐं पंहिंजियूं आङिरियूं साड़े वेठुसि। बिना कंहिं अहिसास जे पोइ, उहे हिकु हिकु करे किरंदियूं वेयूं।”

हू चवे थो त ॻोठाणनि साणुसि इज़त वारो सुलूक कयो, पर बीमारीअ जे विचुड़ण बाबति पके तौर ते चई न थे सघिया।हू चवे थो, “माण्हू मुंहिंजे पुठियां छा चवंदा आहिनि…. मां नथो ॼाणां।” संदसि आवाज़ में उन दौर जो सूरु अॼु बि महिसूसु थिए थो; संदसि मौजूदगीअ में ॿियनि जी बेचैनी हुन खे अंदरि ताईं कुहे रही हुई।

1960 जे ॾहाके जी ॻाल्हि आहे। कोढ़ु केतिरनि ई ॾहाकनि खां वॾे पैमाने ते विचुड़ियलु हो। 1983 जी ॻणप मुताबिक़ि फ़ी 10,000 जी आबादीअ में 57 रोॻी हुआ। अॼु हालात काफ़ी बहितर आहिनि ऐं भारत में 10,000 माण्हुनि में हिक खां बि घटि मामला ॾिसण में अचनि था। हिन घटिताई जो लाॻापो 1982 में शुरू थियल एमडीटी (मल्टी ड्रग ट्रीटमेंट) सां जुड़ियलु आहे।

बहरार कोढ़ु कालोनी में लॻभॻि 200 माण्हू रहनि था जिनि मां 57 कोढ़ जा मरीज़ आहिनि।

मां पंहिंजी सॼी ज़िंदगी श्रीनगर जो रहवासी रहियो आहियां, ऐं हिकु ई दफ़ो जॾहिं मूं कोढ़ु कालोनी बाबति ॿुधो हो तॾहिं मां राॼधानी में वॾो थींदड़ हिकु नढिड़ो छोकरो हुयुसि, असां खे उन लाइ चंदो गॾु करणु जी हिदायत कई वेई। मूं हमेशा कोढ़ु कालोनी जो तसवुरु हिकु उचाटु, परेशान कंदड़ु जॻह तौर कयो हो – जेका बेखारियुनि सां भरियल हुजे। पर जॾहिं मां नेठि हिते अची वयुसि, त हक़ीक़त बिल्कुलु अलॻि हुई।

हिते ॼण त वक़्त जो समाउ न हुजे। माठीणे पाणी ऐं सुहिणियुनि हाउसबोटुनि जे लाइ मशहूर, श्रीनगर जी नगीन ढंढ जे किनारे इहा वसंदी आबादि आहे। लाल बाज़ार जे भगवानपोरा इलाइक़े में 40 एकड़ में पखिड़ियल, हीअ राॼधानी जे शहर खां हिक अलॻि दुनिया आहे। हिक माड़ी वारे मकाननि जूं क़तारूं ऐं उन्हनि सां गॾु झूनियूं झूपिड़ियूं इन वसंदीअ जी तवील तारीख़ जी यादि ॾियारीनि थियूं।

इन खे 19 सदीअ जे आख़िर में अंग्रेजी हुकूमत पारां कश्मीर मेडीकल मिशन जे तहति क़ाइमु कयो वियो हो, ऐं कोढ़ खां मुतासिर माण्हुनि जी पीढ़ियुनि जो घरु रहियो आहे। हिक नंढी इस्पतालि, मस्जिद ऐं क़ब्रिस्तानु उन जे अहाते जे अंदरि ठहियल आहिनि।

हीअ सूबे जी वाहिदु कोढ़ रोॻु इकाई आहे। हिते राष्ट्रीय कुष्ठ रोग उन्मूलन कार्यक्रम (एनएलईपी) जे तहति कोढ़ जी रोकथाम, जाचि, इलाजु ऐं पुनर्वास जूं मुफ़्त सहूलियतूं ॾिनियूं वञनि थियूं – जेका राष्ट्रीय स्वास्थ्य मिशन जी हिक मर्कज़ी योजिना आहे।

सालु अॻु, हिक डाक्टरु खे ॾेखारण लाइ नियामत उतर में कुपवाड़ा खां श्रीनगर आयो हो।

हू चवे थो, ”रमज़ान जो महीनो हो, ऐं मां रोज़े ते हुयुसि। जॾहिं मां जहांगीर चौकु पहुतुसि, मूं इफ़तार जे लाइ ॿिनि रुपियनि जा पकोड़ा ख़रीद कया – मूं वटि एतिरा ई पैसा हुआ। मूंखे राति गुज़ारण लाइ हिक जॻह जी ज़रूरत हुई, तंहिं करे मां पंधु करे टांकीपोरा वयुसि ऐं हिक मस्जिद में दाख़िलु थियुसि।”

मस्जिद जे संभालींदड़ि खेसि मानीअ जी आछ कई, जंहिं खां नियामत इन्कारु कयो ऐं चयो त खेसि सिर्फ़ सुम्हण लाइ जॻह जी ज़रूरत आहे। इहा ॻाल्हि ॿोलि जारी हुई त हिन दरवाज़े ते हिक औरत खे बीठल ॾिठो।

हू यादि कंदे चवे थो, “जॾहिं मूं पुछियो त हूअ उते छो बीठल हुई, त चयाईं त हूअ बासण वठण लाइ आई आहे, छाकाणि त फ़क़ीर मानी खाइण खां पोइ बासण चोराए वेंदा आहिनि।”

नियामत दिलि शिकस्तो थी वियो। “मां मानी हुते ई छॾे मस्जिद मां निकरी आयुसि ऐं एसएमएचएस [श्री महाराजा हरि सिंह अस्पताल] में डॉक्टर खे ॾेखारणु अची वियुसि।” सूबाई इस्पताल में हुन खे कोढ़ थियण जो पतो पियो। मर्ज़ विचुड़ी चुको हो, इन करे इलाज ऐं नज़रदारीअ लाइ ॿ महीना इस्पताल में रखियो वियो।

“जॾहिं इस्पताल मां मोकल मिली, त घर अची वियुसि, त पाण खे च‍युमि त मां आजो न थियो आहे अञा नाचाकु आहियां। रोॻुु अञा बि मुंहिंजे सरीर खे नुक़्सानु रसाए रहियो हो ऐं उन वक़्त ताईं को बि असिराइतो मौजूदु थियणो न हो।”

नियामत अक्सरि अमीरा कदल इलाइक़े में नंढिड़ा कम कंदो हो, जीअं अॻठ विकणणु। जॾाई हुअण जे बावजूदि रोज़ीअ जे लाइ संदसि जफ़ाकशी माण्हुनि में कशिश पैदा कंदी हुई। अख़िबारुनि में मुहिंजा केतिराई फ़ोटो आहिनि। “हिक भेरो, मुंहिंजो फ़ोटो अॻूणे प्रधानमंत्री मनमोहन सिंह वारे ई-पेज ते छपियो हो”, नियामत खिलंदे चवे थो।

हुन खे इन ॻाल्हि ते फ़ख़ुरु आहे त हुन गदाई न पर महिनत सां गुज़ारो कयो। हू वधीक चवे थो, “पर हाणे, पंहिंजी ज़िंदगीअ जे आख़िरी वक़्त में, मां महसूस करियां थो त मां वधीक कमु नथो करे सघां। इहो पिणु हिकु सबबु आहे जो मां इन कालोनी में अची वियुसि।” हिते बुनियादी जरूरतूं जहिड़ोकि खाधो मुफ़्त ॾिनो वेदों आहे।

संदसि परीवारु कॾहिं कॾहिं खांउसि मिलण ईंदो आहे। हुन कॾहिं बि शादी न कई छाकाणि त हुन जे मुताबिक़ि बीमारी जे करे इहा ॻाल्हि ज़रे घटि अणिथियणी ई हुई।अॼु बि कोढ़ जे मरीज़नि जे कुटुंबन जी माइटी हलाइण खे अजोॻी ॻाल्हि मञियो वेंदो आहे। हू इन रिपोर्टर खे ॿुधाए थो, “मुंहिंजो भाइटियो मूं लाइ पुटनि जहिड़ो आहे।”

ॿियनि वांगुरु, नियामत बि चवे थो त बिरादरीअ जी एकता हुन खे सहारो ॾींदी आहे पर डिजिटल महरूमी जहिड़ियूं अजीबु मुश्किलूं अञा ताईं बरक़रार आहिनि। हेकरि मां जॾहिं पंहिंजे ॻोठि कुपवाड़ा में ‘उचित मूल्य जे दुकान’ ते सीधो वठण जे लाइ वियुसि, त मूंखे चयाऊं त मुंहिंजा फ़िंगरप्रिंट न पिया अचनि। नियामतउल्लाह ख़ान खिलंदे पंहिंजी बिना आङरियुनि वारियूं तिरियूं ॾेखारे थो।

जहांगीर चवे थो,“समाजी बदगुमानी अञा ताईं मौजूदु आहे।”संदसि आवाज़ु मुंहिंजो ध्यानु छिकाइण लाइ चढ़ी वेंदो आहे।

जहांगीर1986 में कोढ़ु कालोनी में आयो हो। हू चइनि सालनि जो हो ऐं पंहिंजी माउ सां गॾु आयो हो। जंहिं खे बीमारी थी वेई ऐं उन जे करे संदसि मुड़िस खेसि तलाक़ ॾेई छॾी हुई।

हू चवे थो, ”मां हिन कालोनी में पंहिंजी माउ सां गॾु 41 सालनि खां रहंदो पियो अचां, ऐं मूंखे कॾहिं बि इन्फ़ैक्शन न थियो।”संदसि माउ हिते ॿीहर शादी कई – हिक ॿिए कोढ़ जे मरीज़ सां, जीअं कालोनीअ में केतिरनि ई ॿियनि माण्हुनि कयो। इहो हाणे तब्दील थी चुको आहे ऐं केतिराई ॿाहिरि शादी कनि था, जीअं 45 सालनि जे जहांगीर कयो।

पर वसंदीअ खे छॾे करे ॿाहिरि आबादु थी वञण ज़रे -घटि न थियण जोॻो आहे, एतिरे क़दुरु त उन्हनि माण्हुनि जे लाइ पिणु जेके सरकारी नौकरियुनि में वॾनि उहिदनि ते पहुची चुका आहिनि। जीअं माण्हुनि खे ख़बर पवे थी त संदसि माउ-पीउ कोढ़ जे मर्ज़ जी वसंदीअ जा रहिवासी हुआ, तीअं उन्हनि खे मोटण ते मजबूरु थियणो पवे थो।

असीं लकड़ी जी हिक बेंच ते वेठा आहियूं, जिते कचहरी करण जे लाइ बिरादरी जा पोढ़ा गॾु थियनि था। “इहा जाइ संदनि वणंदड़ि जाइ आहे छाकाणि हिते विहंदड़नि खे वार्डन जे दफ़्तर में खाधे जे दान जी समक सभ खां पहिरीं पेइजी वेंदी आहे,” चर्चे जे अंदाज़ में इहो चवंदे संदसि अखियुनि में चमक अची वेंदी आहे।

जहांगीर अञा ताईं पंहिंजो अबाणो घरु छॾण जो ॾुखु महिसूसु करे थो, “असां पंहिंजी ज़मीन ऐं हर उहा शइ जेका असां जी हुई, उहा पुठियां छॾे आयासीं जेकॾहिं मां हाणे वापिस वञां, त केरु उहा मूंखे वापिस कंदो?”

जेके सुञाणे वठनि उहे हुन खां अखियूं चोराइनि था, जॾहिं खेनि अहिसासु थिए थो त उहे मिल्कियत में पंहिंजो हिस्सो घुरण जे लाइ आया आहिनि। हू चवे थो, “जीअं ई पतो पवेनि थो त असां [माउ-पुटु] पंहिंजो हक़ु घुरण जे लाइ आया आहियूं, उहे इएं कनि था ॼणु असां खे सुञाणनि ई नथा।”

तंहिंकरे, हू सरकार जो थोराइतो आहे, जंहिं 2009 में मिटीअ जे संदनि पुराणनि घरनि जी जाइ नवां मकान अॾाराया। हू चवे थो, “भले ई इहो 100 सालनि बैदि थियो हुजे, पर थी वियो इहा ई सुठी ॻाल्हि आहे। हाणे असांजी घुर आहे त इहे मकान दस्तूरी तौर ते असांजे नाले ते कया वञनि, हू तिब्बती कालोनीअ जो मिसालु ॾींदे चवे थो जिते तिब्बत मां लॾे आयल माण्हुनि खे संदनि नालनि ते ज़मीन मिली हुई।

क़ानूनी मालिकी न हुजण जे करे सदाईं ओनो रहे थो। हू चवे थो, “असांखे वॾो अंदेशो आहे त असांखे कॾहिं बि हितां नेकाली ॾेई सघिजे थी।अञा कुझ महीना पहिरीं ई हिक शख़्स जो मौतु थियो। संदसि क्वार्टरु तुरत ई ॿिए कंहिं रोॻी खे ॾिनो वियो।” जेके मरीज़ हिते पंहिंजे कुटुंबनि सां गॾु रहनि था, उन्हनि लाइ इहो साफु़ नाहे त मरीज़ जे मौतु थियण खां पोइ छा थींदो।

हू पुछे थो, “असांखे रुॻो इन शइ जो क़ानूनी हक़ खपे जेका असां लाइ तामीरु कई वेई। असां हितां हलिया वञूं, त ॿाहिरि घर ख़रीदण जे लाइ पैसा किथां ईंदा?”

इहा स्टोरी पारी सीनियर फ़ेलोशिप 2025 जे तहति शाया कई वेई।