छूतहा के भाव छूटे नइ ये ...

“लोगन मन आज घलो मानथें के गर वो मन अइसने कोनो मइनखे के तीर मं आथें जेन ला कुष्ठ रोग (कोढ़) रहिस - भलेच 60 बछर पहिली – त वो ह ओ मन ला घलो धर लिही.”

सत्तर बछर के नियामत उल्लाह खान बीते 60 बछर ले घलो जियादा बखत ले कुष्ठ रोग ले बने हो चुके हवय, फेर ओकर कहना आय के येकर ले जुड़े कलंक अभू घलो बने हवय. वो ह कहिथे, “मोर परिवार मोर सम्मान करथे, फेर अपन ये हालत सेती मंय दीगर लोगन मन ले वइसनेच सम्मान के आस नइ करे सकंव.”

घिन भरे दया ले देखेइय्या नजर ला अऊ झेले नइ सके सेती, आखिर साल 2025 मं वो ह कुपवाड़ा के अपन घर-परिवार ला छोड़ दिस अऊ श्रीनगर के बेहरार कुष्ठ रोग कॉलोनी मं जाके बस गिस.

“मंय इहाँ येकरे सेती आ गेंय, काबर के इहाँ हर कोनो बराबर हवंय. मोला इहाँ वइसने अकेलापन मसूस नइ होवय, जइस अपन गाँव मं होवत रहिस,” 76 बछर के नियामत कहिथे. “ये जगा मोला अपन घर जइसने लागथे. मंय तय कर ले हवंव के परान जाय तक ले मंय इहींचे रइहूँ.”

कुष्ठ रोग (कोढ़) एक ठन जुन्ना, फेर ठीक हो जवेइय्या छूतहा रोग आय, जेन ह माइकोबैक्टीरियम लेप्री नांव के बैक्टीरिया सेती होथे. देस मं साल 2024 मं 1,00,000 मामला उजागर होय रहिस, जेन ह ब्राज़ील के बनिस्बत पाँच गुना जियादा रहिस; नया मामला मं ब्राज़ील दुनिया मं दूसर जगा मं रहिस. देस (भारत) मं हमेसा ले कुष्ठ रोगी मन के संख्या सबले जियादा रहे हवय (येला हैनसेन रोग घलो कहे जाथे).

नियामत करीबन 10 बछर के लइका रहिस, जब वोला कुष्ठ रोग हो गिस. “मोर देह मं घाव बने लगिस. कभू वो ह कम जावय, त कभू अऊ खराब हो जावय. मंय येकर उपर जियादा चेत नइ धरंय अऊ अपन काम करत रहंय,” वो ह पारी ला बताथे.

किसान परिवार ले होय सेती वोला खेत मन मं काम करे बर भेजे गिस. “धीरे-धीरे बीमारी बढ़त गिस. मोर हाथ-गोड़ के ऊँगली मन मरे लगिन. मोला सुरता हवय के, एक बेर मंय बरफ के तीर कांदी लुये ला गे रहेंय अऊ मोला पता नइ चलिस के मोर ऊँगली मन जर गीन. बाद मं एक एक करके खतम होय लगिस.”

वो ह कहिथे के गाँव के लोगन मन ओकर मान-आदर करत रहिस, फेर वो मन ला बीमारी बगरे के चिंता रहय. “लोगन मन मोर पीठ पाछू का कहिथें... तेला मंय ह नइ जानों,” वो ह कहिथे. ओकर बोली मं वो बखत के पीरा झलकथे: दीगर लोगन मन के मन मं ओकर रहे के बैचेनी के भान आज घलो वोला तकलीफ देथे.

ये ह 1960 के दसक के बात आय. कुष्ठ रोग कतको दसक ले भारी बगरे रहिस. साल 1983 के आंकड़ा मन के मुताबिक, हरेक 10,000 के आबादी मं 57 रोगी रहिन. ये अनुपात अब बनेच सुधर गे हवय – ये बखत भारत मं 10,000 लोगन मन मं एक ले घलो रोगी आगू आय हवंय. ये सुधार मं हाथ 1982 मं सुरु करे गे एमडीटी (मल्टी-ड्रग ट्रीटमेंट) कार्यक्रम के हवय.

बेहरार कुष्ठ रोग कॉलोनी मं करीबन 200 झिन रहिथें जेन मं 57 झिनकुष्ठ रोगी आंय.

मंय अपन सरी जिनगी श्रीनगर के रहेइय्या रहेंय, अऊ मंय कुष्ठ रोगी कालोनी के बारे मं सिरिफ सुने रहेंय, जब मंय रजधानी मं बढ़त लइका रहेंय; वो बखत हमन ला ओकर बर चंदा जुटाय ला कहे गे रहिस. मंय हमेशा कुष्ठ रोगी कालोनी ला अंधियार, डरावना जगा सोचत रहेंय – जिहां भीखमंगा मन के भारी भीड़ रहिथे. फेर जब मंय ह आखिर उहां गेंय, त असलियत निच्चट अलग रहिस.

इहाँ बखत थम जाथे. श्रीनगर के नगीन झील, जेन ह सांत पानी अऊ सुंदर हउसबोट बर जाने जाथे, अपन पार मं ये सांत बस्ती ला आसरा दे हवय. लाल बजार के भगवानपुरा मं 40 एकड़ मं बसे ये बस्ती, रजधानी शहर ले अब्बड़ दुरिहा एक अलग दुनिया आय. एक मंजिला मकान के कतार मन जुन्ना कुरिया मन के संग बने हवय – जेन ह ये बस्ती के लंबा इतिहास ला सुरता कराथे.

येकर स्थापना 19 वीं सदी के आखिर मं कश्मीर मेडिकल मिशन के तहत अंगरेज मन करे रहिन, अऊ ये ह कुष्ठ रोगी मन के कतको पीढ़ी के घर रहे हवय. येकर अहाता भीतरी एक ठन नान कन अस्पताल, एक ठन मस्जिद अऊ कब्रिस्तान हवय.

ये ह राज के अकेल्ला कुष्ठ रोग इकाई आय, अऊ इहाँ राष्ट्रीय कुष्ठ रोग उन्मूलन कार्यक्रम (एनएलइपी) – जेन ह राष्ट्रीय स्वास्थ्य मिशन के एक ठन केंद्र प्रायोजित योजना आय – ओकर तहत कुष्ठ रोग के रोकथाम,निदान, इलाज अऊ पुनर्वास बर सरकारी इलाज के सुविधा फोकट मं करे जाथे.

कतको बछर पहिली, नियामत उत्तर कुपवाड़ा ले श्रीनगर एक डाक्टर ला दिखाय बर आय रहिस.

“रमज़ान के महीना रहिस अऊ मंय रोज़ा (उपास) राखे रहेंय,” वो ह कहिथे. “ जब मंय जहांगीर चौक हबरें, त मंय अपन रोज़ा खोले (उपास टोरे) बर दू रूपिया के पकौड़ा बिसोंय – मोर करा बस अतकेच पइसा रहिस. रात गुजारे बर मोला एक ठन ठीहा के जरूरत रहिस, ते पायके मंय रेंगत जावत टंकिपोरा गेंय अऊ एक ठन मस्जिद मं चले गेंय.”

उहाँ के रखवार मन वोला खाय-पीये बर दीन, जेन ला नियामत ह ये कहत मना कर दिस के वोला बस सुते के जगा चाही. ये गोठ-बात चलतेच रहिस के तभिचे फेरका मं वो ह एक झिन माईलोगन ला ठाढ़े देखिस.

“जब मंय ओकर ले पूछेंय के वो ह उहाँ काय सेती हवय, त वो ह कहिथे के वो ह बरतन लेगे ला आय रहिस, काबर के खाय के बाद भिखारी मन ओला चुरा के ले जाथें,” वो ह सुरता करथे.

नियामत के दिल टूट गे. “मंय खाय-पिये के अऊ मस्जिद छोड़ देंय, अऊ डॉक्टर ला दिखाय बर रेंगतेच एसएमएचएस [श्री महाराजा हरि सिंह अस्पताल] चले गेंय.” सरकारी अस्पताल मं पता चलिस के वोला कुष्ठ रोग हवय. देह मं बगरत रहिस, येकरे सेती वोला इलाज अऊ नजर मं राखे बर दू महीना तक अस्पताल मं राखे गीस.

“जब मोला छुट्टी देय गीस, त मंय घर लहूट आंय अऊ अपन आप ले कहेंय के मंय जीते नइ अंव- मंय हार गे हवं. बीमारी ले बने नइ होय रहेंय, मोर देह ला नुकसान करत जावत रहिस, अऊ वो बखत येकर कोनो सही इलाज घलो नइ रहिस,” वो ह सुरता करत कहिथे.

नियामत अक्सर अमीरा कदल मं छोट-मोट काम करय, जइसने नाड़ा (पायजामा बांधे के सूती डोरी) बेचे. वो ह लोगन मन के नजर मं आवय – एक झिन अइसने मइनखे जेन ह अपंग होय के बाद घलो अपन गुजारा खुदेच करे मं लगे रहिस. “अखबार मन मं मोर कतको फोटो छपे हवय. एक पईंत त मोर फोटो उहिच पन्ना मं छपे रहिस, जेन मं पूर्व प्रधानमंत्री मनमोहन सिंह के फोटो रहिस,” नियामत ठहाका लगावत कहिथे.

वोला ये बात के गरब हवय के वो ह कभू भीख नइ मांगिस, फेर अपन गुजर बसर बर हमेसा काम करिस. “फेर अब, अपन जिनगी के आखिरी ठीहा मं, मोला लागथे के मंय अब अऊ काम करे नइ सकंव. येकरे सेती मंय ये कालोनी मं आके बस गेंय,” वो ह कहिथे. इहाँ खाय-पिये के जइसने रोज के जिनिस फोकट मं देय जाथे.

ओकर घर के लोगन मन कभू-कभार ओकर ले भेंट करे आथें. वो ह बिहाव नइ करिस काबर के ओकर कहना रहिस के ये बिमारी ले ये होय नइ सकत रहिस – जेन परिवार मं कुष्ठ रोग होय उहाँ बिहाव करे आज घलो बने नइ माने जावय. “मोर भाई के बेटा मोर अपन लइका जइसने आय,” वो ह ये रिपोर्टर ला बताथे.

आने लोगन मन के जइसने, नियामत घलो कहिथे के वोला समाज के जुड़ाव ले सहारा मिलथे, फेर डिजिटल दुनिया ले कटे जइसने कुछु खास चुनोती अभू घलो बने हवय. नियामत उल्लाह हांसत कहिथे, “एक पईंत जब मंय कुपवाड़ा मं अपन गाँव के सरकारी रासन दुकान मं रासन लेय गेंय, त मोला बताय गिस के मोर फिंगरप्रिंट काम नइ करत हवय,” अइसने कहत वो ह अपन ओ हाथ ला दिखाइस जेन मं उंगली मन नइ रहिन.

“समाजिक कलंक (छुआछूत) आज घलो हवय,” जहांगीर ऊंच आवाज मं कहिथे जेकर ले मोर धियान ओकर डहर जावय.

जहाँगीर साल 1986 मं कुष्ठ रोग कॉलोनी मं आय रहिस. वो ह चार बछर के रहिस अऊ अपन दाई के संग रहिस जेन ला ये रोग होगे रहिस अऊ येकरे सेती ओकर घर वाला ह वोला तलाक (छोड़) देय रहिस.

“मंय अपन दाई संग ये कालोनी मं 41 बछर ले रहत हवंव, अऊ मोला कभू ये रोग नइ लगिस,” वो ह कहिथे. ओकर दाई ह इहींचे दूसर बिहाव करिस, एक झिन कुष्ठ रोगी ले, जइसने के कालोनी मं रहेइय्या कतको दीगर लोगन मन घलो करे रहिन. अब ये हालत बदल गे हवय अऊ कतको लोगन मन येकर बहिर बिहाव करथें, जइसने के 45 बछर के जहांगीर ह करिस.

फेर कालोनी के बहिर जाके रहे एक ठन बड़े बाधा आय जेन ला पार करे नइ सकाय –इहाँ तक के वो लोगन मन बर घलो जेन मन बड़े सरकारी पद मन मं काम करत हवंय. वो मन ला लहुट के आय ला परिस, जब लोगन मन ला पता चलिस के ओकर दाई-ददा कुष्ठ रोग कालोनी के मरीज आंय.

हमन लकरी के एक ठन बेंच उपर बइठे हवन, जिहां समाज के सियान लोगन मन अक्सर गप मारे बर आथें. ओकर आंखी मं चमक लेय कहिथे के ये ओकर पसंद के जगा आय काबर के इहाँ ले वोला खाय बर चंदा आसानी ले मिल जाथे जेन ह सबले पहिली वार्डन के दफ़्तर मं जाथे!

जहांगीर ला अभू घलो अपन माटी-महतारी ला छोड़े के दुख हवय. “हमन अपन जमीन अऊ अपन सब्बो कुछु उहिंचे छोड़ आयेन. गर अब मंय लहूट जावं, त मोला वो सब कोन लहूटाही?”

जेन मन वोला पहिचान जाथें वो मन ये समझ के मुंह छिपा लेथें के वो ह अपन हिस्सा मांगे ला आय हवय.” “ जेन घड़ी वो मन ये सुनथें के हमन (ओ अऊ ओकर दाई] अपन हक मांगे आय हवन, वो मन अइसने दिखाथें के जइसने वो मन हमन ला जानतेच नइ होंय.”

ते पायके, साल 2009 मं सरकार के नवा घर बनाय जाय सेती वो ह सरकार के आभारी हवय: ये घर मं तेन माटी के कुरिया के जगा ले ले हवंय जेन मं वो मन पहिली रहत रहिन. वो ह कहिथे, “भलेच ये मं 100 बछर लग गे, फेर आखिर बन गे. फेर अब हमन ये खोली मन ला सरकार ले बांटे के बिनती करत हवन, ठऊका वइसनेच जइसने आने बस्ती मन ला मिले हवय,” अऊ वो ह तिब्बती कालोनी के उदाहरन देथे, जिहां तिब्बत ले आय लोगन मन ला वो मन के नांव मं जमीन मिले रहिस.

कानूनन मालिकाना हक नइ होय सेती हर घड़ी चिंता लगे रहिथे. वो ह कहिथे, “हमर सबले बड़े डर ये आय के हमन ला कोनो घलो बखत बेदखल करे जा सकथे. अभी बीते महीना, इहाँ एक झिन गुजर गिस. ओकर खोली ला तुरते कोनो दीगर मरीज ला बाँट दे गिस.” जेन मरीज इहाँ अपन परिवार संग रहिथे, ओकर मन बर ये साफ नइ ये के मरीज के गुजर जाय के बाद वो मन के काय होही.

“हमन त सिरिफ वो जिनिस के कानूनन बंटवारा चाहत हवन, जेन ह हमर बर रहिस. हमन चले घलो जातेन, फेर बहिर मं घर बिसोय बर पइसा कहां ले लाबो?” वो ह सवाल करत कहिथे.

ये कहिनी पारी सीनियर फेलोशिप 2025 के मदद ले लिखे गे हवय.