काजर से कारी कुष्ठ रोग के कलंक

"आजो लोग मानेला कि जेकरा साठ बरिस पहिले कुष्ठ रोग रहल होखे, ओकरा लगे जाए से भी ई रोग पकड़ लीही.”

सत्तर पार नियामत उल्लाह खान साठ बरीस से निरोग बाड़न. बाकिर उनकर कहनाम बा कि एकर कलंक अभिनो बनल बा. उ कहलन, “हमार परिवार हमार आदर करेला, बाकिर अपना हालत में हम दुसरा से अइसन उम्मीद नइखी कर सकत.”

दया औरी घिन से देखल गयील जब बर्दाश्त ना भइल तब आखिर में उ कुपवाड़ा में आपन घर आ परिवार छोड़ के 2025 में श्रीनगर के बहरार कोलोनी में आ के बस गईलन.

“हम एहिजा एसे अयिनी कि इहां हर केहू बराबर बा. हमरा एहिजा ओहीसन अकेला ना बुझाला जइसन अपना गांव में बुझाए.” 76 साल के नियामत कहलन, “इ जगह हमरा आपन घर जइसन लागेला. हम सोच लेले बानी कि आपन आखिरी सांस ले हम एहीजा रहेंम.”

कुष्ठ रोग एगो पुरान, बाकिर इलाज से ठीक हो जाए वाला छुतिहर बेमारी ह. ई ‘माइकोबैक्टीरियम लेप्री’ नाम के जीवाणु से होला. 2024 में भारत में एकर 1,00,000 मामला सामने आइल. ई नयका मामला के संख्या के हिसाब से दोसर स्थान पर रहे वाला ब्राजील से पांच गुना बेसी रहे. नयका मामला में ब्राजील दुनिया में दुसरका नंबर प रहे. भारत हमेसा से कुष्ठ रोग (जेकरा के हैनसन रोग भी कहल जाला) के मरीजन के गिनती में सबसे आगे रहल बा.

नियामत जब 10 साल के छोट लयिका रहलन तब उनका इ रोग हो गयील. “हमारा देह में घाव होखे लागल रहे. कब्बो उ कम हो जाए औरी कब्बो औरी खराब हो जाए. हम ए प बेसी ध्यान ना दहनी औरी आपन करत रह गईनी,” उ पारी के बतवलन.

एगो खेतिहर परिवार के होखे के चलते उनका के खेत में काम करे भेजल जाय. “धीरे-धीरे बेमारी बढ़त गयील. हमरा अंगूरी औरी गोड़ के अंगूरी सुन्न पड़े लागल. हमरा इयाद बा एक बेर हम बरफ में घास काटे गयील रहनी औरी हमरा पतो ना परल कि हमर अंगूरी जर गयील. बाद में, उ पारा-पारी झरे लागल.”

उ कहलन कि गांव के लोग उनका से प्रेम से बोले, बाकिर ओ सब के इ बात के डरो रहे कि इ रोग ओ सब के ना पसर जाए. “लोग हमरा पीठ पीछे का कहता... हमरा ए बात के पता नईखे.” इ कहत उनका बोली में ओ बेरा के तकलीफ झलकता. उनका लगे रहे वाला लोग के बेचैनी के अहसास उनका के आजो तकलीफ से भर देला.

इ 1960 के बेरा के बात ह. कोढ़ कई साल से पसरल रहे. 1983 के आकड़न के मोताबिक हर 10,000 लोग प 57 गो मरीज रहे. आज इ अनुपात बहुत बेहतर हो गयील बा. आज भारत में हर 10,000 लोग में से कम से कम एको से कम बेक्ती इ बेमारी से पीरा में बा. इ गिरावट के संबंध 1982 में सुरु भईल मल्टी-ड्रग-ट्रीटमेंट, एमडीटी प्रोग्राम से मानल जाता.

बहरार कुष्ठ रोग कोलोनी में लमसम 200 लोग रहेला. एकरा में 57 लोग कुष्ठ रोगी बा.

हम आपन पूरा जिनगी एहिजा श्रीनगर में रहल बानी. हम इ कोलोनी के बारे पहिले खाली सुनलही रहनी, जब हम राजधानी ए एगो छोट लयिका रहनी औरी एकरा खातिर हमनी के चंदा बटोरे के कहल रहे. हम हमेसा इ जगह के बारे में सोची कि एगो उदास औरी बेचैन करे वाला जगह होई, जहां भीख मांगे वाला लोग के भीड़ होई. आखिर में जब हम उहां गयिनी त सच्चाई एकदम फरके रहे.

इहां बेरा रुक जाला जईसे. श्रीनगर के निगीन झील जेकरा के संत पानी औरी शानदार हाउसबोट खातिर जानल जाला, अपना आर प इ सांत बस्ती के सरन देला. भगवानपोरा, लाल बजार में 40 एकड़ में पसरल इ जगह राजधानी शहर से एकदम फरके बा. इ जईसे एगो दुसरे दुनिया ह. एक मंजिला अपार्टमेंट के पांत पुरान झोपड़ी के संघे खड़ियायिल बा, जौन इ बस्ती के लमहर इतिहास के बारे में बतावता.

एकरा के 19 वां सदी के आखिर में अंग्रेज कुल ‘कश्मीर मेडिकल मिशन के तहत बनवले रहे. औरी तब्बे से इ कुष्ठ रोगी लोग खातिर कई पीढी के घर रहल बा. एकरा मैदान में एगो छोट अस्पताल, एगो मस्जिद, औरी एगो कब्रिस्तानो बा.

इ राज्य के एकमात्र कुष्ठ रोग इकाई ह. इहां राष्ट्रीय कुष्ठ रोग उन्मूलन कार्यक्रम (एनएलईपी) के तहत रोग के रोकथाम, पहचान, इलाज औरी रोगी के बसावे ला एकदम मुफ्त में सुविधा दहल जाला. इ राष्ट्रीय स्वास्थ्य मिशन के केंद्र प्रायोजित योजना ह.

कई साल पहिले नियामत उत्तर के कुपवाड़ा से श्रीनगर आईल रहलन, डाक्टर से अपना के देखावे.

“उ रमजान के महीना रहे, औरी हम रोजा रहनी,” उ कहलन. “जब हम जहांगीर चौक पहुंचनी, त रोजा खोले खातिर हम दू रोपया के पकौड़ी कीननी, हमरा लगे बस एतनही रहे. हमरा रात काटे खातिर एगो जगह चाहत रहे. एसे हम पैदल चल के टाकीपोरा के मस्जिद में चल गईनी.”

उहां के देख रेख करेवाला उनका के खायका दहलन, जेकरा के नियामत इ कहत मना क दहलन कि उनका बस सूते के जघे चाहीं. इ बातचीत चलत रहे कि तब्बे उ दुआरी प खड़ियायिल एगो महिला के देखलन.

“जब हम उनका से पुछनी कि उ उहां काहे रहली, त उ कहलें कि उ बर्तन उठावे आइल रहली. काहे से कि भिखारी खाए के बाद बर्तन चोरा ले जात रहलें,” उ इयाद कइलन.

नियामत के मन दुखा गयील. “हम खयका औरी मस्जिद छोड़ दहनी औरी श्री महाराजा हरी सिंह अस्पताल में डाक्टर के देखावे खातिर पैदले चल गयिनी.” राज्य के अस्पताल में उनका कुष्ठ रोग के पता चलल. छूत पसरत रहे, एहिसे उनका के इलाज औरी निगरानी खातिर दू महीना ले अस्पताल में राखल गयील.

“जब हमरा डिस्चार्ज मिलल त हम घरे लौट गयिनी औरी अपना से कहनी कि हम जीतल नयीखीं, हम हार गयील बानी. बेमारी अब्बो ओहीजा रहे, हमारा देह के नोकसान पहुंचावत जात रहे. औरी ओ बेरा एकर कौनो इलाजो ना रहे.” उ इयाद करत कहलन.

नियामत अक्सर अमीरा कदल में छोट-मोट कार करत रहलन. जईसे पजामा बान्हे खातिर नाड़ा बेचल. उनका प लोग के ध्यान जाए, एगो अइसन आदमी जौन देह से अक्षम होखला के बादो रोजी कमाए के कोसिस करता. “अखबारन में हमार कई गो तस्वीर छपल बा. एक बेर त हमार तस्वीर ओही पन्ना प चपल रहे जौना प पहिले के परधानमंत्री मनमोहन सिंह के तस्वीर छपल रहे,” नियामत ठठा के हंसत कहलन.

उनका इ बात के गरब कि उ कब्बो भीख ना मंगलन. हमेसा अपना गुजारा खातिर काम कयिलन. उ आगे कहतारन, “बाकिर अब, अपना जिनगी के आखिरी बेरा में हमरा बुझाता कि हमरा से औरी कार ना होई. एहीसे हम हम इ कोलोनी में आ के रहे लगनी”. इहां जिनगी के जरूरियात खयका जइसन चीज मुफ्त में मिल जाला.

उनकर परिवार कब्बो-कब्बो उनका से भेंट करे आवत रहेला. उ कब्बो बियाह ना कईलन, काहे से कि इ बेमारी के चलते अइसन ना हो सकत रहे. जौना परिवार में कुष्ठ रोग होखे, उ परिवार में लोग आजो बियाह करे के नीमन ना मानेला. उ इ रिपोर्टर के बतवलन, “हमरा भाई के बेटा हमार आपन लयिका जईसन बा.”

दोसरा लोग के तरे नियामतो कहलें कि समुदाय के एक रहला से सहारा मिलेला. बाकिर डिजिटल दुनिया से फरके रहला जईसन कुछ चुनौतियों बा. नियामत उल्लाह हंसत कहलन, “एक बेर गांव के रासन के दोकान प रासन लेवे गईनी त हमरा से कहल गईल कि हमार फिंगरप्रिंट काम नइखे करत.” औरी अइसन कहत उ आपन उ हाथ देखवलन, जौना में अंगुरिये ना रहे.

“समाज के कलंक त आजो बा.” जहांगीर तेज आवाज में बोललन कि हमार ध्यान खींच सकस.

जहांगीर 1968 में कुष्ठ कोलोनी आइल रहलन. ओ बेर उ चार साल के रहलन औरी अपना माई के संघे आइल रहलन. उनका माई के इहे बेमारी हो गइल रहे एहीसे उनकर मरद उनका के तलाक दे दहलन.

“हम 41 साल से अपना माई के संघे एही कोलोनी में रहतानी. हमरा इ बेमारी कब्बो ना भईल.” उ कहलन. उनकर माई एहीजा दूसर बियाह कईली, एगो औरी कुष्ठ रोगी से, जईसन कि कालोनी में रहे वाला दूसर कई गो लोग कईल. अब इ स्थिति बदल गइल बा. औरी कइ लोग बहरो बियाह करता, जइसन कि जहांगीर कयीलन.

बाकिर कालोनी के बहरा जा के रहल एगो बड़का बाधा बा. इहां ले कि जे ऊंच सरकारी पद प रहे, ओहू लोग के वापस लौटे के मजबूर होखे के परल, जब लोग के पता चलल कि ओ लोग के माई-बाप कुष्ठ कालोनी के बाशिंदा बा.

हमनी एगो लकड़ी के बेंच प बईठल बानी, जहां समुदाय के बूढ़-पुरनिया लोग अक्सर बतियावे खातिर बईठेला. आंख में चमक लेले ऊ लोग बतावेला कि इ जगह ओ सब के पसंदीदा जगह ह, काहे से कि खाए के दान इहां सबसे जल्दी मिल जाला, जौन सबसे पहिले वरदान के दफ्तर पहुंचेला!

जहांगीर के आजो आपन घर छोड़े के दुःख होला, “हमनी आपन जमीन औरी सब कुछ पीछे छोड़ आईल बानी. जे हम वपिसो गईनी त हमरा के इ सब के लौटाई?”

जे लोग उनका के चीन्हेला, उ तुरंते दूर हट जाला जब ओ लोग के इ पता चलेला कि इ भेंट आपन हिस्सा पावे खातिर ह. “जइसही ओ सब के पता चलेला कि हमनी (उ औरी उनकर माई) आपन हक़ लेवे आइल बा, उ हमनी ना चीन्हे के नाटक करेला.”

एहिसे उ सरकार के मानेलन कि 2009 में माटी के घर के जघे नया घर बनवलस. “भले एकरा में 100 साल लाग गइल, बाकिर आखिरकार इ बनिए गइल. अब हमनी इ क्वाटर के सरकारी दाखिल के अरदास करतानी. ठीक ओहीतरे जे तरे दूसर बस्ती कुल के मिलल बा. उ तिब्बत कालोनी के उदाहरन दहलन, जहां तिब्बत से आइल लोग के ओ लोग के नाम प जमीन मिलल रहे.

कानूनी दाखिला ना भइला से हमेसा भय बनल रहेला. “हमनी के सबसे बड़का डर इहे बा कि हमनी के कौनो बेरा बेदखल कइल जा सकता. उ कहलन, “अभिये पछिला महीना, इहां एगो आदमी के मौत भइल. उनकर क्वाटर तुरंते कौनो दूसर मरीज के नामे हो गइल.” जौन मरीज इहां अपना परिवार के साथे रहता, उनका खातिर इ साफ़ नईखे कि मरीज के मुअला के बाद का होई.”

“हमनी के खाली ओही प कानूनी दाखिल चाहीं जौन हमनी ला रहे. हमनी चल जाइल जाई, बाकिर बहरा घर कीने खातिर पइसा कहां से आई?” ऊ पूछलन.

ई स्टोरी पारी सीनियर फेलोशिप 2025 के अंतर्गत प्रकाशित भइल बा.