मेल-मिलाप के मिसाल पटना के सिपार कारीगर

पटना के सड़क मन मं कांच के सिपार निकरथे, त झिलमिलावत गुंबदनुमा ढांचा देखे के लइक होथे. शहर के शान कांच के सिपार के बारे मं बतावत नजरे इमाम कहिथे, “तलवार ले लेके ढाल तक अऊ इहाँ तक ले अनार घलो (सजावटी दरमी) जेन ह तलवार के नोंक मं छेदत दिखथे, सब्बो कुछु कांच ले तरासे गे हवय.”

भारी कारीगरी वाले कांच के सिपार मुहर्रम के जुलूस बखत पटना मं देखे ला मिलथे. कोनो जमाना मं लड़ई के मैदान मं लेके जवेइय्या सजे धजे हथियार मन के खजाना के सुरता करावत ये सिपार मं तलवार, ढाल, तीर-धनुष समेत सब्बो किसिम के हथियार सजे होथे. ये सिपार ला अतक सुग्घर ढंग ले सजाय गे होथे के येकर सजावट मं कम से कम दर्जन भर कारीगर मन के जरूरत परथे.

इहाँ ले करीबन आधा कोस ले कम दूरिहा, पटना शहर के रक्सहूँ दिग मं 40 बछर के मोहम्मद निसार ह अभिचे अभिचे सिपार के काम ला सिरोय हवय अऊ काम करे के जगा के मुहटा तीर मं अपन बेटी मन के संग खड़े होके अपन कारीगरी ला आखिरी बार एक नजर मारत हवय. ओकर कारीगरी के सबले बढ़िया नमूना परछी मं रखाय हवय. बाग़ कालू खान के ये जुन्ना इलाका मं तीर-तखार मं कुछेक घर अऊ एक ठन मजार हवय.

“ये ह एक झिन मनखे के हाथ के बस के बात नो हे,” कारीगर निसार कहिथे. “येला बनाय मं अलग-अलग हुनर वाले लोगन मन के जरूरत परथे. कुछेक त इहींचे बिहार के बासिंदा आंय, अऊ दूसर लोगन मन देस के अलग-अलग जगा ले आथें.”

वो ह आरी,ज़रदोज़ी, काशीदाकारी, छापा, नग अऊ कभू-कभू मीनाकारी जइसने कारीगरी के उदाहरन देथे, जेन ला सिपार बनाय के काम मं बऊरे जाथे. (आरी एक अइसने कलाकारी आय, जेन मं कपड़ा मं एक हुक वाले सूई ले बारीक़ कढ़ाई करे जाथे: जरदोजी मं कढ़ाई बर धातु के धागा काम मं लाय जाथे; काशीदाकारी बिहार मं करे जवेइय्या कश्मीरी-शैली के कढ़ाई आय अऊ छापा धातु जइसने दिखेइय्या रंग के लकरी के सांचा ले करे जवेइय्या छपाई आय.)

सिपार मं मीनाकारी अऊ नग के कलाकारी घलो होथे, जेन मं बारीक़ ढंग ले तरासे गे रत्न मन ला चिपकाय जाथे.

नासिर मुहर्रम के जुलूस के जिकर करत कहिथे, "पटना के सिपार मन ले अइसने ढंग ले बनाय जाथे, के इहाँ के कारीगर कर्बला के शहीद मन ला अपन श्रद्धांजलि दे सकंय." मुहर्रम मं सिपार ऊपर सबके नजर लगे रहिथे.

पटना के बाग कालू खान के वर्कशॉप मं सिपार ला नासिर ह राजू, इज़हार अऊ फिरोज के संग मिलके बनाय हवय. राजू जरदोज़ी (धातु के महीन कढ़ाई) मं माहिर हवय अऊ अवेइय्या बिहनिया जुलूस निकारे के पहिली सिपार ला आखिरी रूप देवत हवय.

“ज़रदोज़ी सिपार के परान आय. येला सेहरा मं देखे जा सकथे, जेन ह सिपार बर बड़े महत्तम के होथे,” ये हुनर मं माहिर कारीगर राजू मुचमुचावत बताथे, “ सेहरा बगेर सिपार पूरा होयेच नइ सकय, अऊ ज़रदोज़ी बगेर सेहरा अधूरा आय.”

“असल बात त ये आय के ज़रदोज़ी तब तक ले ज़रदोज़ी नइ होय जब तक ले वो ह राजू भाई के हाथे ले बनाय नइ गे होय.” इज़हार हसन अपन संगवारी ले हँसी-ठिठोली करत हवय. ओकर मुंह मं पान भरे हवय. ये सब्बो लोगन मन मुहर्रम अऊ सफर (इस्लामिक कैलेंडर के पहला अऊ दूसर महीना) के महीना मं मिलके सिपार बनाय के काम करथें.

47 बछर के इजहार सिपार बनेइय्या माहिर कारीगर मन ले एक आय, अऊ वो ह पटना के जामा मस्जिद के तीर मं बने बाग कालू खां के ये वर्कशॉप के मालिक घलो आय. कारीगर मन के ये हँसी-ठिठोली मं सामिल होवत वो ह घलो मानथे के ज़रदोज़ीच ह सिपार के परान आय, फेर ये घलो कहिथे के, “सिरिफ उहिच ह काफी नो हे!”

“ये शहर मं अइसने कोनो दूसर कारीगर नइ ये जेन ह हुनर मं इजहार भाई के आगू ठहर सकय.” उहाँ रहेइय्या दीगर कारीगर फिरोज कहिथे, जेन ह रानी भाई के नांव ले मशहूर हवय. ये नांव मजाक मं ओकर संगवारी मं राखे हवंय काबर के वो ह अतक बारीक कारीगरी वाले डिज़ाइन बनाथे जइसने कोनो रानी के पहिरे के कपड़ा बनावत होय.

अपन प्रसंशा सुनके मुचमुचावत इजहार बताथे के सिपार ला लेके वो ह जेन घलो कुछु सिखे हवय वो ह ओकर उस्ताद (गुरु) सुलेमान मियाँ के सीखाय आय. “जइसने मोहम्मद रफ़ी [नामी गायक] ला भगवान ह सुग्घर आवाज दे रहिस, वइसनेच सुलेमान मियाँ ला घलो सुग्घर हुनर मिले रहिस. वो ह अपन मुहटा मं अवेइय्या हरेक मनखे ला ये कला सिखाइस- हिंदू होय धन मुसलमान दूनों ला, फेर कोनो घलो ओकर जइसने महारत हासिल नइ करे सकिस,” इजहार कहिथे. वो ह नजरे इमाम ला जोहार करे बर मुड़थे, जेन ह कांच कारीगर आय अऊ सिपार ला मान देय बर अभिचे अभिचे भीतरी मं जाय हवय.

नज़रे इमाम अऊ ओकर भाई मेहदी इमाम दूसर पीढ़ी के कांच के कारीगर आंय. इज़हार अपन जुन्ना संगवारी ले मिलावत कहिथे, “कांच के पहिली सिपार ओकर ददा मंजर हसन ह बनाय रहिस अऊ ओकर दूनों बेटा ओकर कला ला आगू ले जावत हवंय.”

“हमन अपन ददा ले जेन घलो सीखे हवन, वोला जी-जान लगा लगाके करथन.कांच के एक ठन सिपार ला पूरा करे मं कम से कम दू महिना लाग जाथे. लकरी के खांचा ला छोड़ के, काम आय सब्बो जिनिस कांच के बने होथें,” 57 बछर के नज़रे इमाम बताथे.

दूनों भाई ये कारीगरी साल 1992 ले करत अऊ दिखावत चले आवत हवंय. वो मन कहिथें के धरम अऊ अध्यात्म के बात ला छोड़ दे जाय, त वो मं ये काम पटना के इतिहास के नांव सेती घलो करत हवंय. नजरे इस्लाम कहिथे के बखत बीते के संगे संग पटना घलो कतको मायना मं बदल गे हवय. येकरे सेती पहिली के सांस्कृतिक बखत के कतको परंपरा नंदा गे हे. वो ह कहिथे, “सिपार बनाय के कला आज घलो चलत हवय, फेर ये घलो नंदा जाय के हालत मं हवय.”

ओकर भाई मेहदी कहिथे, “ये शीशे की सिपार पटना के गुजरे बखत के आखिरी जिंदा मिसाल आय जऊन ह कभू कांच के कारीगरी सेती जाने जावत रहिस.” वो ह सिपार के आगू राखे बर अगरबत्ती बारथे.

दूनों भाई के कहना आय के पटना के पारंपरिक कांच कारखाना बंद होगे हवंय. शहर मं ये बखत जऊन घलो कांच के काम होवत हे, वो सब्बो मसीन ले बने हवय अऊ वो मं चीन के समान काम मं लाय जाथे. “हमर ददा मंजर हसन, गोपाल जी, राम दास जी अऊ राम जानकी जी के संग शहर के आखिरी कांच कारीगर रहिन,” नजरे ह पारी ला बताइस, अऊ कहिथे के वो मन के गुजर जाय के बाद ये कला घलो नंदा गे.

दूनों भाई मन अपन कारीगरी ला संगीदालान मं दिखाय रहिन, जिहां ओकर ददा ह घलो येला दिखाय रहिस. संगीदालान अब भीड़-भड़क्का वाले बजार आय अऊ इहाँ पटना के सबले जुन्ना इमामबाड़ा मन ले एक आय, जेन ला दूलीघाट के नवाब सैयद अहमद अली ख़ान क़यामत ह बनावाय रहिस.

एक ठन सिपार बनाय मं करीबन एक महीना लागथे, फेर कतको बेर ये मं दू धन तीन महीना घलो लग सकथे. शीशे की सिपार बनाय के काम मं सबले पहिली एक धड्डी- धन मेहराब बनाय जाथे, जऊन ह गुंबद के अकार के लकरी ले बने अधार होथे. हड्वा –धन दूधारी तलवार के एक ठन नकल ला ये लकरी के अधार ले बांध देय जाथे. अक्सर पांच हड्वा बांधे जाथे, ये ह सात घलो हो सकथे. तलवार मन ला सबले ऊपर बांधे जाथे, अऊ जब ये काम हो जाथे, तब एक ठन एनी ला सिपार ले जोड़े जाथे, जेन ह आगू के जोड़े के काम बर अधार के काम करथे.

“हफ्ता भर तो बस इहीच काम मं लाग जाथे,” मास्टर कारीगर इजहार बताथे.

सिपार के पाछू डहर के काम घलो कम मिहनत वाला नो हे. अलग-अलग किसिम के कपड़ा मन बर कपड़ा के कतको परत लपेटके अधार बनाय जाथे अऊ ओकर बाद झालर ला जोड़े जाथे. बिहार के नामी अऊ हाथ ले बने पारंपरिक कपड़ा मन के नाव ला गिनाव्त इजहार बताथे के ये हाथ ले बने छापा,आरी धन बूटा जइसने रिंगी चिंगी कपड़ा मन के लंबा पट्टी होथे.

आखिरी काम सब्बो हिस्सा ला एक संग जोड़े आय. “सेहरा ला कारीगर मं अलग ले तियार करथें अऊ अब वोला सिपार ले बांधे जावत हवय. सेहरा के संग फूल के लड़ी मन ला अऊ अर्जी, बूटी अऊ पट्टा (अलग पारंपरिक कपड़ा) घलो बंधे जाथे.

“येकर बाद ये मं कांच के दरमी डारे जाथे.” इजहार कहिथे.

ये नाजुक कांच मन मं अतक बारीकी ले काम करे सेती कारीगर मं ला कतको दिक्कत उठाय ला परथे. वो मन करा सुरक्षा के साजो-सामान धन स्वास्थ्य बीमा सुविधा घलो नइ रहय. “मंय अब डोकरा सियान होवत जावत हवं अऊ मेहदी घलो डोकरा होवत जावत हवय, हमर आंखी पहिली जइसने नइ ये अऊ कमजोर नजर ले कांच के काम करे अऊ घला मुस्किल होवत जावत हवय,” नजरे इमाम कहिथे.

कांच के फुदका आंखी मं परके जलन करथे, येकरे सेती मोतियाबिंद एक ठन आम समस्या आय, संगे संग आंखी आय (कंजंक्टिवाइटिस) अऊ धुंधला नजर ले घलो हमन जूझत रइथन. “कांच के काम मं जियादा उजियार करे घलो नइ जाय सकाय,” नजरे इमाम ह माहोल ला हल्का बनाय बर भारी धीरे हँसत कहिथे.

थोकन बखत कलेचुप रहे के बाद इजहार कहिथे, “मोला येकर गरब हवय फेर मोला नइ मालूम के ये ह कतक दिन तक ले चलत रहे सकही.” काबर के दूसर दिन चेहल्लुम के जुलूस निकरेइय्या रहिस, येकरे सेती कारीगर मन तीर मं संकलाय रहिन. संझा के नजरे इमाम अपन सिपार लेके हबर गे रहिस अऊ वोला दरसन बर राख दे गे रहिस. ओकर ददा के बखत ले ये ह एक ठन सलाना रिवाज रहे हवय अऊ ये ह मगरिब (संझा) के नमाज के बाद सुरु होथे. इहाँ के लोगन मन धीरे-धीरे जुरे लगथें अऊ सुरता मं मोमबत्ती अऊ अगरबत्ती जलाय लगथें.

*****

मुहर्रम के दसवां अऊ ग्यारहवां दिन दिखायेच बर सिपार ला बनाय जाथे, अऊ येकर बीसवां अऊ इक्कीसवां दिन घलो येला एक पईंत अऊ करे जाथे.

जइसने-जइसने सिपार भीड़ ले होवत गुजरथे, आजू-बाजू ठाढ़े हजारों लोगन मन, जेन मं हिंदू अऊ मुसलमान दूनों हवंय, जगा बनाय बर आपस मं ठेले-पेले लगथें. सड़क मन मं स्टाल अऊ दूकान सजे हवय, जेन मं खिलौना, आइसक्रीम अऊ खाय पीये के दीगर जिनिस मन बेचे जावत हे. इहाँ करीबन मेला जइसने माहोल हे, जेन ह मुहर्रम के बखत निकरेइय्या शिया मुसलमान मन के जुलूस ले अलग नजर आथे, जेन मं ओकर मनेइय्या मन सदियों पाहिले इमम हुसैन के शहादत मं अपन सीना पीटथें, शोक मनाथें अऊ रोथें.

इस्लामिक इतिहास मुताबिक, करीबन 1,385 बछर पहिली, कर्बला (ये बखत के इराक़) मं, पैगंबर मुहम्मद के पोता हुसैन ला ओकर भाई मन के, संगवारी अऊ लइका मन के संग मुहर्रम के दसवां दिन निरदयी ढंग ले मार दे गे रहिस, ये घटना ला आशूरा के नांव ले जाने जाथे अऊ येला शोक के दिन के रूप मं मनाय जाथे. ओकर मन के शहादत के चालीसवां दिन ला चेहलुम धन चालीसवां के रूप मं मनाय जाथे. इहीच दिन हुसैन के परिवार के लोगन मन ला कैद ले छोड़े गे रहिस, जेकर ले वो मन अपन इमाम के मौत के शोक मनाय सकंय.

बिहार के रजधानी पटना मं हुसैन के शहादत ला शोकगीत अऊ दुख के सार्वजनिक प्रदर्सन के जरिया ला सुरता करे जाथे. ये प्रदर्सन के मूल मं शीशे की सिपार होथे जेन ह कर्बला के लड़ई के अवशेष मन के अगुवई करथे. सिपार अशोक राजपथ ले शेरशाह रोड मं बने तकिया शाह बाकर तक जाथे.

करीबन 28 बछर के शहज़ाद, बाग़ कालू ख़ान मं रहिथे जेन ह पटना सिटी के एक ठन जुन्ना इलाका आय. वो ह चेहल्लुम के मऊका मं अपन मान देय बर संगीदालान आय हवंय. चेहल्लुम, शिया मुसलमान मन के बीच मं इमाम हुसैन के शहादत के चालीसवां मनाय बर, मुहर्रम के 40 दिन बाद मनाय जाथे.

“वो कला जऊन ला बिहार मं कभू भारी सराहे जावत रहिस अऊ मान देवेइय्या मन के कभू कमी नइ रहिस, अब धीरे-धीरे नंदावत जावत हे,” अपन मान जताय बर मोमबत्ती जलावत वो ह पारी ले कहिथे.

फेर दीगर लोगन मन येकर ले सहमत नइ यें. कम से कम एक अखाड़ा मं नवा पीढ़ी ये परंपरा ला आगू ले जाय के साध रखे हवय. अखाड़ा तऊन कमेटी ला कहिथें जेन ह जुलूस के तियारी के देखरेख बर बने होथे. पटना के हम्माम मं सिपार प्रदर्शन करेइय्या अखाड़ा-मुखिया ह ये बदलाव ला देखे हवय जब ख़लीफ़ा (अखाड़ा के चुने नेता अऊ सिपार कनेटी के अध्यक्ष) अपन पद ले रिटायर होवत हे अऊ नवा पीढ़ी के कारीगर नौशाद, भानु, राहुल, साहिल, निहाल, शाहिद, अमान अऊ आसिफ मन अब आपस मं अपन जिम्मेवारी बांट ले हवंय.

पटना शहर के अधिकतर जुन्ना इलाका मन मं एक ठन अखाड़ा अऊ अपन सिपार हवय. हरेक अखाड़ा अपन सिपार के संग जुलूस निकारथे, अऊ हरेक जुलूस के संग ओकर म्यूजिक सिस्टम होथे जेन मं दुख अऊ जसगीत के गीत-संगीत बजथे, नवा पीढ़ी के लइका मन मं सिपार ला अपन खांध मं बोहके गली मन ले होवत मेन रोड तक ले जाय के होड़ लगे रहिथे.

पटना मं हिन्दू अऊ मुसलमान दूनोच सिपार बनाया अऊ ओकर जुलूस निकारे मं रुचि राखथें.ये भावना शहर के गंगा-जमुनी तहज़ीब के एक झलक आय.

राजीव रंजन बताथें के ओकर पुरखा के काशी लाल कसीरा शहर के जाना-माना माहिर कारीगर रहिस. ओकर परिवार 1840 ले हरेक बछर चेहल्लुम के मऊका मं शहर के गुज़री बजार मं अपन घर ले एक ठन सिपार निकारत आवत हवय. “ओकर [काशी लाल कसीरा] के विरासत ला आगू ले जाय के अब हमर जिम्मेदारी हवय. येकरे सेती हरेक बछर ओकर पोता-पोती मन कर्बला के शहीद मन ला सुरता करे बर जुरथें.”

काशी लालजी कसीरा के बनाय सिपार हर बछर लोगन मन ला दिखाय बर घर के एक ठन खोली मं रखे जाथे, जिहां हनुमान देंवता के मूर्ति घलो रखाय रहिथे.एके संग दू ठन परंपरा के ये दरसन ला लेके परिवार के नरेश कुमार कहिथे, “जइसने परंपरा अजीमाबाद मं रहिस, उहिच चीज पटना मं हवय,” वो ह 1857 के पहिली पटना ला जेन नांव ले जाने जावत रहिस, ओकर डहर आरो करथें. शहर के गरब भरे इतिहास ला सुरता करत पटना के सियान लोगन मन आज घलो इहीच नांव ला लेय पसंद करथें.

अनुवाद: निर्मल कुमार साहू