पटना के गुनी सीपर कलाकार

पटना के रोड पर जब सिपर आपन पूरा सानो-सौकत से निकलेला, त सभे के नजर ओही पर टिक जाला. गुंबद जइसन चमचमात सिपर देखे में बड़ा सुन्नर लागेला. “तलवार होखे, ढाल होखे, चाहे ओह पर सटल अनार होखे, सभे चीज कांच से बनल रहेला,” पटना के शान सीसा के सिपर के बारे में नजरे इमाम कहेलन.

मुहर्रम के मौका पर पटना में ई बारीक तरासल सीसा के सिपर देखे के मिलेला. ई पुरान जंग के मैदान में ले जाए वाला कवनो सजल-धजल हथियार-घर के इयाद दिलावेला. एह में तलवार, तीर-धनुष, ढाल आ अनेकों कला के खुबसूरती समाइल बा. एतना सुंदर से सजावल रहेला कि एकरा सजावे के काम मं ही कमो ना त दरजन भर कारीगर के जरूरत पड़ेला.

पटना सिटीर के दक्खिन एक किलोमीटर ले, 40 बरिस के मोहम्मद निसार आपन सिपर के काम निपटा के बेटियन संगे कारखाना के दुआर पर ठाड़ होके आपन बनावल सामान सब के आखिरी बेर निहारत बाड़न. नफीस कारीगरी से सजल सिपर बरामदा में रखल बा. लगहीं बाग कालू खान के पुरान मोहल्ला में कुछेक घर आउर एगो मजारो बा.

कारीगर निसार कहेलन, “ई काम अकेला आदमी के नइखे. एह में कइएक तरह के कारीगरी मिलल बा. कुछ बिहार के ह, त कुछ देस के दोसर हिस्सा से आइल बा.”

उनकर कहनाम बा कि एह सिपर में आरी, जरदोजी, कसीदाकारी, छापा, नग आ कबो-कबो मीनाकारी जइसन कइएक गो कारीगरी देखे के मिलेला. (आरी एगो अइसन कलाकारी बा जेकरा में कपड़ा पर एगो हुक वाला सूई से महीन डिजाइन बनावल जाला. जरदोजी में कढ़ाई खातिर धातु के बनल धागा इस्तेमाल होकेला. कसीदाकारी बिहार में होखे वाला कस्मीरी ढंग के कढ़ाई हवे. आ छापा धातु जइसन देखाई देवे वाला रंग के लकड़ी के ब्लॉक से होखे वाला छपाई के कइल जाला.)

सिपर में एनामेल पेंट से होखे वाला मीनाकारी आ नग के कलाकारी भी होखेला. नग कला में बारीक तरासल गइल नग सब के कपड़ा पर साट के सजावल जाला.

“पटना में सिपर के कुछ एह तरीका से बनावल जात रहे कि इहंवा के लोग कर्बला में शहीद भइल लोग के याद कर सको,” निसार बतावेलन. उनकर आशय मुहर्रम के जलूस से बा जेकरा में एकर खास जगह होखेला.

पटना के बाग कालू खान के कारखाना में निसार, राजू, इजहार आ फिरोज संगे मिलके सिपर बनावेलन. जरदोजी यानी धातु के कढ़ाई, करे में माहिर राजू अब सिपर के आखिरी सिंगार करत बाड़न. सिपर काल्ह सबेरे जलूस में निकले वाला बा.

“जरदोजी सिपर के जान बा. एकर काम सिपर के ठीक बीच में रहे वाला सेहरा (सजावटी परदा) पर कइल जाला,” कारीगर राजू मुस्कियात कहलन, “सिपर के शोभा सेहरा से बा, आ सेहरा जरदोजी बिना सुन्न लागेला.”

इजहार हसन पान चबावत अपना संगे काम करे वाला कारीगर के चिढ़ावत कहलन, “असल में जरदोजी, जरदोजी तब्बे बा जब ऊ राजू भाई के हाथ से बनल होखे.” मुहर्रम आ सफर (इस्लामिक कैलेंडर के पहिलका आ दोसरका महीना) में सभे कारीगर लोग मिलके सिपर बनावेला.

सैंतालीस बरिस के इजहार सिपर बनावे में मास्टर बाड़न. ऊ पटना के जामा मस्जिद लगे स्थित बाघ कालू खान के करखाना चलावेलन. ऊ हंसत कहेलन, “जरदोजी सिपर के दिल बा, बाकिर खाली दिल से का होई!”

कारीगर फिरोज कहेलन, “सहर में इजहार भाई जइसन जानकार मिलल कठिन बा.” उनका लोग मजाक में रानी भाई पुकारेला, काहे कि ऊ एतना सुन्नर आ नफीस कारीगरी करेलन, जइसे कि कवनो राजघराना के रानी के परिधान बनावत होखस.

आपन तारीफ सुनके मुस्कात इजहार कहेलन कि सिपर के बारे में ऊ जेतना कुछ जानत बाड़न, ऊ सब उनकर उस्ताद सुलेमान मियां के बदौलत बा. इजहार कहेलन, “जइसे मोहम्मद रफी सुर के जादूगर रहस, वइसहीं सुलेमान मियां कारीगरी के जादूगर बाड़न. अपना लगे आवेला सभे के ऊ ई कला सिखावेलन, चाहे हिंदू होखे त, चाहे मुसलमान होखे त. बाकिर उनकर कवनो शार्गिद उनका जइसन महारथ ना पा सकल.” इजहार बतावेलन. ऊ सीसा के कारीगर नजरे इमाम के पलट के जोहार करत बाड़न, जे अभी-अभी सीपर के दरसन करे आइल बाड़न.

नजरे इमाम आ उनकर भाई मेहदी इमाम दोसरका पीढ़ी के कांच के कारीगर बाड़न. इजहार कहेलन, “पहिलका कांच के सिपर उनकर वालिद मंजर हसन बनवले रहस, आ अब उनकर दुनो भाई लोग उनकर एह बिरासत के जोगावे के काम कर रहल बा,” इजहार आपन पुरान संगी नजरे इमाम के परिचय देत कहत बाड़न.

सनतावन साल के नजरे इमाम बतावत बाड़न, “बाऊजी के सिखावल टोटल बात सब हम आपन काम में उतरनी. सीसा के एगो सिपर बनावे में मोटा-मोटी दू महीना लाग जाला. लकड़ी के बनल आधार छोड़ देवल जाव, त बाकी सब चीज कांच के बनल रहेला.”

दुनो भाई लोग 1992 से ही सिपर बनावे आउर सजावे के काम कर रहल बा. ऊ लोग के कहनाम बा कि ई काम खाली धरम चाहे आस्थे ना, पटना के पुरान इतिहास जिंदा रखे खातिर हो रहल बा. नजरे कहेलन कि जमाना बदल रहल बा, आ समय के साथे पटना के कइएक गो सांस्कृतिक परंपरा भी मिट रहल बा. नजरे कहेलन, “सिपर बनावे के कला आजो बचल बा, बाकिर अब इहो खतम होखे के कगार पर बा.”

उनकर भाई मेहदी हसन के कहनाम बा, “ई सीसा के सिपर पटना के ओह जमाना के आखिरी कारीगरी बा, जब ई सहर सीसा कला खातिर जानल जात रहे.” ऊ सिपर के आगू अगरबत्ती जरा के रख रहल बाड़न.

भाई लोग बतावत बा कि पटना के सभे पुरान करखाना, जेकरा में सीसा बनत रहे, अब बंद हो चुकल बा. “अब त सीसा के जेतना काम हो रहल बा, ऊ सब मसीन से हो रहल बा उर एह में चीन के माल इस्तेमाल हो रहल बा.” नजर पारी से कहेलन, “गोपाल जी, राम दास जी आ राम जानकी जी संगे हमार बाऊजी मंजर हसन पटना के अंतिम सीसा कारीगर रहले. ऊ लोग चल गइल, त ओह लोग संगे ई कला भी चल गइल.”

ऊ लोग आपन काम संगीदलान में देखावेला, ठीक ओही जगहा जहंवा उनकर वालिद देखवले रहस. संगीदलान अब एगो भीड़-भाड़ वाला बजार हो गइल बा. इहंवा पटना के सबले पहिल इमामबाड़ा में से एगो स्थित बा, जवन दूलीघाट के नवाब सैयद अहमद अली खान कयामत बनवले रहस.

एगो सिपर बनावे में मोटा-मोट महीन भर लाग जाला, बाकिर कबो-कबो त दू-तीन महीना ले भी खिंचा जाला. सबले पहिल काम धड्डी बनावे के होखेला. ई सिपर खातिर एगो मेहराब जइसन लकड़ी के आधार बा. धड्डी पर दुईधारी तलवार जइसन हदवा कस के बांधल जाला. आमतौर पर पांच गो हदवा बन्हाला, बाकिर कइएक बेरा एकर गिनती सात से जादे भी हो सकेला. ऊपर तलवार (मुड़ल तलवार) बान्हल जाला. फेरू ओकरा बाद सिपर में एगो आइनी जोड़ल जाला, जे ढाल खातिर आधार के काम करेला.

“एतना करे में पूरा हफ्ता लाग जाला,” उस्ताद कारीगर इजहार समझइलन.

सिपर के पिछलका हिस्सा बनावे में कवनो कम मिहनत ना लागे. पहिले कइएक गो कपड़ा लपेट के आधार के मजबूत कइल जाला. फेरू एकरा में झालर लगावल जाला. ई झालर लमहर रंग-बिरंगा कपड़ा होखेला. एह में बिहार के कइगो पुरान हस्तकला, जइसे कि छापा, आरी आ बूटा के काम रहेला, इजहार नाम गिनावत समझइलन.

अंत में सब भाग के एके साथे जोड़ल जाला. “सेहरा अलग से बनावल जाला. अब एकरा सिपर से जोड़ दियाई. फूल के लड़ी, अरजी, बूटी आ पत्ता संगे सेहरा में सजावल जाला.”

“एकरा बाद कांच के अनार जोड़ल जाला,” इजहार बतइलन.

कांच के महीन काम करे से कारीगर लोग के आंख आ हाथ पर जोर पड़ रहल बा. अफसोस कि ओह लोग लगे ना त कवनो सुरक्षा उपकरण बा, ना इलाज के सुविध बा. नजरे इमाम बतावत बाड़न, “हमनी के बूढ़ हो रहल बानी आ इहे हाल मेहदी के भी बा. आउर हमनी के आंख अब पहिले जइसन ना रहल. कमजोर आंख से कांच के बारीक काम कइल पहाड़ हो जाला.”

कांच के गरदा आंख में चुभेला. एकरा से मोतियाबिंद, आंख लाल होखे आ धुंधला देखाई देवे के परेसानी आम बात बा. माहौल के हल्का बनावे खातिर नजरे हंसत धीरे से कहलन, “कांच के काम करे घरिया रउआ जादे रोसनी के इस्तेमालो ना कर सकीं.”

तनी ठहर के इजहार कहलन, “हमरा एकरा पर बहुते नाज बा. बाकिर मालूम ना ई परंपरा आउर केतना दिन ले जिंदा रही.” चहल्लुम के एक दिन पहिले सब कारीगर लोग जुटल रहे. नजरे इमाम संझा में सिपर लेके अइलन आ ओहिजा सजा के रख देलन. ई रसम उनकर बाऊजी के जमाना से चलल आ रहल बा. मगरिब (सांझ) के नमाज के बाद इलाका के लोग मोमबत्ती आ अगरबत्ती जरावेला आ सिपर के सोझे श्रद्धा जतावेला.

*****

सिपर आमतौर पर मुहर्रम के दसमा, चाहे ग्यारहमा दिन ही बन के तइयार कर देवल जाला. आ सफर के बीसमा-इक्कीसमा दिन भी इहे प्रक्रिया के दोहरावल जाला.

सिपर जइसहीं भीड़ में आगू बढ़ेला, हजार के तादाद में हिंदू-मुसलमान लोग जगह बनावे खातिर धक्का-मुक्की करे लागेला. चारों ओरी तरह-तरह के खाए-पिए के स्टॉल, खिलौना आ आइसक्रीम वगैरह के दोकानो लागल रहेला. ई एगो मेला जइसन होखेला, जे मुहर्रम के दौरान शिया मुसलमानन के जलूस से अलगे होखेला. एह में अनुनायी लोग सदियन पहले इमाम हुसैन की भइल शहादत पर आपन छाती पीटेला, मातम मनावेला आउर रोवेला.

इस्लामिक इतिहास के हिसाब से, आज से 1,385 साल पहिले कर्बला (अब इराक) में मुहर्रम के दसमा (आशूरा) के दिन, पैगंबर मुहम्मद के पोता हुसैन के उनकर भाई, दोस्त आ बाल-बच्चा सभ संगे बेरहमी से कत्ल कर देवल गइल रहे. उहे दिन के इयाद में आज के दिन मातम मनावल जाला. हुसैन के शहादत के चालीसवां दिन चेहलुम, चाहे चालीसवा के रूप में मनावल जाला. उहे घड़ी उनकर परिवार के कैद से रिहाई मिलल रहे आ ऊ लोग के आखिरकार आपन इमाम के शहादत पर रोवे के मौका मिलल.

बिहार के राजधानी पटना में हुसैन के कुरबानी के शोकगीत आ पीड़ा के सार्वजनिक प्रदर्शन के जरिए इयाद कइल जाला. एह प्रदर्शन के केंद्र में सीसा के सिपर होखेला जे कर्बला के युद्ध के अवशेष सभ के प्रतिनिधित्व करेला. सिपर अशोक राजपथ से गुजरत शेरशाह रोड पर स्थित तकिया शाह बाकर ले जाला.

शाहजाद, 28 बरिस, पटना शहर के पुरान इलाका बाग कालू खान के रहे वाला बाड़न. ऊ चेहलुम के मौका पर संगीदलान में सिपर के दरसन करे आ सजदा करे आइल बाड़न. चेहलुम शिया मुसलमान सब के बीच इमाम हुसैन के चालीसवां मनावे खातिर मुहर्रम के 40 दिन बाद मनावल जाला.

ऊ आपन सम्मान जाहिर करे खातिर मोमबत्ती जरावत पारी से कहलन, “पहिले जवन कला के बिहार में कदरदान के कबो कवनो कमी ना रहल, अब धीरे-धीरे मिटे लागल बा.”

सभे कोई ना माने कि ई परंपरा खतम हो रहल बा. कम से कम एगो अखाड़ा में जवान लोग आजो ई परंपरा के आगू बढ़ावे में लागल बा. पटना के हम्माम अखाड़ा में सिपर देखावे के परंपरा में बदलाव आ गइल बा. पुरान खलीफा जे सिपर कमेटी के अध्यक्ष रहस, अब रिटायर हो रहल बाड़न. अब नौशाद, भानु, राहुल, साहिल, नेहल, शाहिद, अमान आ आसिफ जइसन नवजवान कारीगर लोग मिलके काम संभार रहल बा.

पटना के पुरान इलाका के जादेतर मोहल्ला में आपन अखाड़ा आ सिपर होला. हर अखाड़ा आपन सिपर के जलूस में लेके चलेला. सभे ग्रुप आपन-आपन बाजा बजावेला, जवन मातम आ गुस्सा के धुन पर होखेला. जवान लइका लोग में सिपर के आपन कान्हा पर उठा के गली से मेन रोड तक ले जाए के होड़ मचल रहेला.

पटना में मुसलमान आ हिंदू दुनो लोग मिल के सिपर बनावे आ सजावेला. ई शहर के गंगा-जमुनी तहजीब के एगो झलक ह.

राजीव रंजन के कहनाम बा कि उनकर पुरखा, कासी लालजी कसीरा पटना के नामी सिपर कारीगर रहस. 1840 से उनकर परिवार हर साल आपन गुजरी बजार में चेहलुम के मौका पर सिपर सजावत आ रहल बा. राजीव के हिसाब से, “कासी लालजी कसीरा के सिपर बनावे के परंपरा अब हमनी के जिम्मेदारी बन गइल बा. हर साल उनकर पोता-पोती आ परपोता-परपोती लोग एकजुट होके करबला के शहीदन के श्रद्धांजलि देवेला.”

कासी लालजी कसीरा के बनावल सिपर हर साल उहां के ओहि कमरा में रखल जाला, जहंवा भगवान हनुमान जी के मूरति बा. दूगो परंपरा के एक साथे देखावल जाए के बारे में परिवार के सदस्य नरेश कुमार कहत बाड़न, “ ऊ लोग जइसे अजीमाबाद में रहे, ओहि तरह पटना में बा.” ऊ पटना के पुरान नाम के जिकिर कइल जे 1857 से पहिले इस्तेमाल होखत रहे. बड़-बुजुर्ग लोग पटना के पुरान आ भव्य इतिहास के संदर्भ में एकर इस्तेमाल करत रहे.

अनुवाद: स्वर्ण कांता