چھتیس گڑھ کی فرض شناس ہیلتھ آفیسر

سنجیونی انہیں ’ماں‘ کہتا ہے، لیکن وہ اسُنتا کا بیٹا نہیں ہے۔

اسُنتا ٹوپو، دھرم جے گڑھ بلاک کے مریگوڈا میں واقع ذیلی طبی مرکز میں دیہی طبی افسر (آر ایچ او) ہیں، جہاں وہ تقریباً دو دہائیوں سے تعینات ہیں۔ کچھ سال پہلے ان کے سامنے ایک معاملہ آیا جہاں ایک عورت کی زچگی کے دوران حالت کافی خراب تھی۔ اس عورت کا بلڈ پریشر بہت زیادہ تھا اور ہیموگلوبن سات گرام سے بھی کم تھا۔ اسُنتا بتاتی ہیں، ’’جب وہ عورت ہمارے طبی مرکز پہنچی، تب تک اسے درد زہ شروع ہو چکا تھا۔ ہم اسے میز پر لے بھی نہیں پائے تھے کہ بچہ کی پیدائش ہو گئی۔‘‘

ذیلی طبی مرکز (جسے مقامی سطح پر اُپ سواستھیہ کیندر کہا جاتا ہے) میں ڈیلیوری کے بعد بچہ کی حالت ٹھیک نہیں تھی۔ اسُنتا بتاتی ہیں، ’’یہاں ہمارے پاس آکسیجن کی سہولت نہیں تھی اور ماں کی حالت بھی اتنی ہی نازک تھی۔‘‘ عورت کے جسم سے بہت زیادہ خون بہہ رہا تھا اور اسُنتا یہ طے نہیں کر پا رہی تھیں کہ پہلے ماں کی دیکھ بھال کریں یا بچہ کی۔

اسُنتا بتاتی ہیں، ’’پہلے ہم انہیں دھرم جے گڑھ لے گئے۔ وہاں ایک ڈاکٹر تھیں، جن کا نام میں نہیں لینا چاہوں گی۔ انہوں نے ناراضگی جتائی اور پوچھا کہ ہم ماں اور بچہ کو اتنی سنگین اور نازک حالت میں ان کے پاس لے کر کیوں آئے؟‘‘ لیکن اسُنتا نے ماں اور بچہ کی صحت کے لیے ڈاکٹر سے بحث کی۔ ’’میں نے ان سے کہا، اگر آپ نہیں کر سکتیں تو رہنے دیجئے۔ بس میری تھوڑی مدد کر دیجئے۔ وہ غصہ ہو گئیں۔‘‘

اسُنتا نے بچہ کو اٹھایا اور ایمبولنس منگائے جانے کی بات کی۔ آخرکار، ڈاکٹر نے ان کی بات مانی اور بچہ کو ایک انجیکشن لگایا۔ اسنتا بتاتی ہیں کہ ان کے ساتھ آئی میتانِن (تربیت یافتہ سماجی طبی کارکن) نے ان کی بہت مدد کی۔ اس نے بچہ کو منہ سے سانس دے کر زندہ رکھنے کی کوشش کی۔

آخرکار، ریاست کے طبی ہیلپ لائن نمبر ۱۰۸ نے جواب دیا، ایک ایمبولنس آئی اور ایک ڈاکٹر نے عورت کے علاج کی ذمہ داری اٹھائی۔ وہ چھتیس گڑھ کے رائے گڑھ شہر واقع رائے گڑھ میڈیکل کالج کے لیے روانہ ہوئے، جو بہت بڑا اسپتال ہے۔ اسنتا کہتی ہیں، ’’میں بچہ کو اپنی گود میں لیے ہوئی تھی۔‘‘ اور وہ راستے بھر منہ سے سانس دے کر بچہ کو زندہ رکھنے کی کوشش کرتی رہیں۔ جب اسنتا نوزائیدہ بچے کو لے کر وہاں کے ڈاکٹر کے پاس پہنچیں، تو انہیں بتایا گیا کہ وہ بچہ بچ نہیں پائے گا۔ وہ بتاتی ہیں، ’’ماہر اطفال ڈاکٹر نے بتایا کہ اس کے بچنے کی کوئی امید نہیں ہے۔‘‘

حالانکہ، اسنتا یوں مایوس ہونے کے لیے بچے کے ساتھ ۸۰ کلومیٹر کا سفر طے کر کے نہیں آئی تھیں، اس لیے انہوں نے ڈاکٹروں پر اپنا کام کرنے کے لیے دباؤ ڈالا۔ اسنتا لمبی سانس بھرتے ہوئے کہتی ہیں، ’’ماں اور بچہ دونوں بچ گئے۔ اس سے مجھے کافی سکون ملا۔‘‘ اس کے بعد وہ کہتی ہیں، ’’اب پانچ سال ہو گئے ہیں، وہ پوری طرح ٹھیک اور صحت مند ہے۔‘‘

وہ چھوٹا بچہ مریگوڈا گاؤں میں اپنی کسان فیملی کے ساتھ رہتا ہے۔ اسنتا مسکرا کر کہتی ہیں، ’’میں نے اس کا نام ’سنجیونی‘ رکھا ہے! کیوں کہ پہلی بار مجھے اس کے لیے سنجیونی سیوا [ایمبولنس] کا سہارا ملا تھا!ٍ‘‘ اسنتا کو مقامی لوگ اکثر ’سسٹر‘ (نرس) کہہ کر پکارتے ہیں۔

دیہی ہیلتھ آرگنائزر، اسنتا ٹوپو کا تعلق اوراؤں برادری سے ہے اور وہ چھتیس گڑھ کے دھرم جے گڑھ بلاک (جسے پہلے ادے پور کے نام سے جانا جاتا تھا) میں راٹھیا، بیگا اور بیرہور آدیواسیوں سمیت ۴۰۰۰ سے زیادہ َلوگوں کی صحت کی دیکھ بھال کرتی ہیں۔ یہاں زیادہ تر لوگ معاش کے لیے کھیتی اور جنگل سے لکڑی، مہوا، چار، تیندو پتے وغیرہ اکٹھا کرنے پر منحصر ہیں۔

یہ برادریاں مریگوڈا، نکانہ، بھنور کھول اور سیمی پالی خورد گاؤوں میں آباد ہیں اور طبی ضروریات کے لیے مریگوڈا گاؤں کے طبی مرکز پر منحصر ہیں، جہاں اسُنتا کام کرتی ہیں۔

اسنتا اب یہیں کی رہائشی بن گئی ہیں۔ وہ بتاتی ہیں، ’’میں یہاں ۲۰۰۵ سے ہوں۔ میں نے کافی تبدیلی دیکھی ہے۔ پہلے آمد و رفت کے ذرائع بہت مشکل تھے اور مجھے ایک ہی دن میں ۱۵-۲۰ کلومیٹر پیدل چل کر الگ الگ گاؤوں تک پہنچنا پڑتا تھا۔‘‘

سال ۲۰۱۵ میں جب سڑکیں ایسی نہیں تھیں کہ ان پر گاڑیاں چل سکیں، تو پتھری ڈانڈ گاؤں کی ایک حاملہ عورت کو ایکلمپسیا ہو گیا۔ اسنتا بتاتی ہیں، ’’ہم اسے چارپائی میں باندھ کر بڑی مشکل سے یہاں لائے۔ بچے کی پیدائش یہیں ہوئی۔‘‘

اسنتا اپنے پرانے تجربات کا ذکر کرتے ہوئے بتاتی ہیں کہ کیسے جنگل سے ہو کر جاتے وقت انہیں جنگلی جانوروں کا لگاتار خطرہ محسوس ہوتا تھا۔ پیچھے مڑ کر دیکھتے ہوئے وہ کہتی ہیں، ’’تب ڈائریا اور موسمی بیماریاں زیادہ ہوا کرتی تھیں۔ اب یہ کم ہو گئی ہیں۔ ہائی بلڈ پریشر اور ذیابیطس کی شکایت کم ہوئی ہے۔ مسلسل جانچ اور دواؤں کی وجہ سے۔‘‘

ہندوستان میں ملیریا کا اثر بہت زیادہ ہے، اور چھتیس گڑھ کا ریکارڈ اس معاملہ میں بہت خطرناک ہے جہاں ملیریا کے مریضوں کی تعداد کے معاملے میں چھتیس گڑھ ملک بھر میں تیسرے مقام پر ہے۔ نیشنل سینٹر فار ویکٹر بورن ڈیزیز کنٹرول کے ذریعہ جاری اعداد و شمار کے مطابق، ریاست میں جولائی ۲۰۲۴ میں ملیریا کے ۱۷۷۶۵ معاملے تھے، جو ۲۰۲۳ کے اعداد و شمار (۳۱۷۰۶) کے مقابلے کم ہیں۔ اسنتا کہتی ہیں کہ بیداری مہم، مسلسل سروے اور دواؤں سے لیس مچھردانی کے استعمال کی وجہ سے ان معاملوں میں کمی آئی ہے۔

بعد میں ہم اسنتا کے ساتھ سنجیونی کے گھر گئے، جہاں وہ اپنے دوستوں کے ساتھ کھیل رہا تھا۔ سنجیونی کی ماں وملا اپنے دھان کے کھیت میں کام کر رہی تھیں، لیکن سسٹر اسنتا کو دیکھ کر وہ کام روک کر ہم سے بات چیت کرنے آئیں۔

اس علاقہ کی کمیونٹی ہیلتھ آفیسر (سی ایچ او) نیہا کھالکو کہتی ہیں، ’’لوگوں میں سسٹر اسُنتا کے تئیں جو اعتماد ہے اس کی وجہ سے وہ یہاں آتے ہیں۔ جب سے وہ [اسنتا] یہاں ہیں، تب سے دھرم جے گڑھ بلاک کے مریگوڈا ذیلی طبی مرکز میں ۳۰۰۰ سے زیادہ بچوں کی پیدائش ہو چکی ہے۔‘‘

اسنتا بتاتی ہیں، ’’پہلے بیرہور [آدیواسی] لوگ اسپتال نہیں آتے تھے۔ ان کے بچے گاؤں کے باہر ہی پیدا ہوتے تھے۔ بچوں کی نال بھی پتھر سے کاٹی جاتی تھی۔‘‘

اسنتا، بیرہور (خاص طور سے کمزور قبائلی گروہ) برادری کی ایک عورت کا قصہ سناتی ہیں جو ساتویں بار بچے کو جنم دے رہی تھی۔ اس عورت کی پوری بچہ دانی باہر آ گئی تھی۔ اسُنتا کو اسے اندر کرنے کے لیے فوری کارروائی کرنی پڑی۔

لیکن گاؤں میں باقاعدگی سے ہونے والے یوم صحت، صفائی اور غذائیت سے متعلق پروگراموں، زچگی سے قبل کی جانے والی ضروری جانچوں اور صحت کے شعبہ میں غیر سرکاری تنظیموں کے تعاون سے (یہی وہ تنظیمیں ہیں جو میتاننوں کو ٹریننگ دیتی ہیں) حالات کو کچھ بہتر بنایا گیا ہے، جس کی وجہ سے گاؤں میں تبدیلی ممکن ہوئی ہے۔

جب یہ مضمون نگار مریگوڈا کے ذیلی طبی مرکز پہنچا، تب وہاں میتاننوں (آشا کارکنوں) کی میٹنگ چل رہی تھی۔ جولائی کا مہینہ تھا، حال ہی میں بارش ہوئی تھی اور طبی مرکز چاروں طرف سے سرسبز دھان کے کھیتوں سے گھرا ہوا تھا۔

وہاں ایک ڈاکٹر انتہائی خطرے والی زچگی کی پہچان سے متعلق ٹریننگ دے رہے تھے۔ مریگوڈا کی سی ایچ او نیہا کھالکو کہتی ہیں، ’’اب ہم پیچیدہ اور انتہائی خطرے والے معاملوں کو دھرم جے گڑھ کے سول اسپتال میں ریفر کر رہے ہیں اور ان معاملوں پر گہری نظر رکھ رہے ہیں۔ بھلے ہی ہمارے ذیلی مرکز میں تمام سہولیات نہیں ہیں، لیکن ہم اس کے منظم استعمال کی پوری کوشش کر رہے ہیں۔‘‘

ٹیکنالوجی سے بھی کافی مدد ملی ہے۔ لیکن اسُنتا جیسے طبی ملازمین کی بدولت لوگوں میں صحت کے نظام کے تئیں جو بھروسہ اور اعتماد پیدا ہوا ہے، اس کی جگہ دوسرا کوئی نہیں لے سکتا۔ یہی وہ کارکن ہیں، جن کی بدولت سرکاری طبی سہولیات سبھی کے لیے آسان بن پائی ہیں۔

اس اسٹوری کا ایک پرانا ورژن عظیم پریم جی فاؤنڈیشن کی ویب سائٹ پر بھی موجود ہے۔

ترجمہ نگار: قمر صدیقی