जचकी करेइय्या ‘सिस्टर’

वो ह वोला ‘मां’ कहिथे ,फेर संजीवनी असुंता के बेटा नो हे.

असुंता टोप्पो धरमजयगढ़ ब्लॉक के मिरिगुडा स्वास्थ्य उपकेंद्र मं ग्रामीण स्वास्थ्य संयोजक (आरएचओ) हवंय. जिहां वो ह करीबन 20 बछर ले काम करत हवंय. कुछेक बछर पहिली, वोला भारी जोखिम वाले जचकी के काम ला संभाले ला परिस. महतारी के ब्लड प्रेशर भारी बाढ़गे रहिस अऊ हीमोग्लोबिन कम रहिस, सात ग्राम ले घलो कम. असुंता सुरता करथे, जब तक वो हमर स्वास्थ्य उपकेंद्र मं हबरे सकतिस, जचकी के पीरा सुरु होगे रहिस. येकर पहिली के हमन वोला टेबल उपर राखे रहितन, लइका के जनम होगे.”

स्वास्थ्य उपकेंद्र, जेन ला इहाँ उपस्वास्थ्य केंद्र के नांव ले जाने जाथे, मं जचकी के बाद लइका के हालत बने नइ रहिस. असुंता सुरता करत कहिथे, “इहाँ हमर तीर ऑक्सीजन के सुविधा नइ रहिस अऊ महतारी के हालत घलो ओतकेच नाजुक रहिस.” भारी जियादा खून जावत रहिस अऊ आरएचओ ह समझे नइ सकत रहय के महतारी के जतन करे धन लइका के.

“हमन पहिली वो मन ला धरमजयगढ़ ले गेन. उहाँ एक झिन डाक्टर रहिस, मंय ओकर नांव बताय ला नइ चाहंव. वो ह खिसियावत हमन ले पूछिस के हमन महतारी अऊ लइका ला अतक खराब अऊ नाजुक हालत मं काबर लाय हवन,” वो ह सुरता करथे. फेर असुंता डाक्टर ले झगर परिस. “मंय ओकर ले कहेंय, गर तंय कुछु करे नइ सकस, त रहन दे. बिनती हवय के मोर थोकन मदद कर. वो ह बगियागे.”

असुंता ह लइका ला धरिस अऊ एम्बुलेंस बलाय के गुहार करिस. येकरे बीच डाक्टर ह नरम होगे अऊ एक ठन सूजी (इंजेक्शन) लगाइस. असुंता कहिथे के ओकर संग रहे मितानिन (मान्यता प्राप्त सामाजिक स्वास्थ्य कार्यकर्ता) ह भारी मदद करिस काबर के वो ह लइका के मुंह ले मुंह लगाके जियाके वोला बचाय बर जूझत रहिस.

राज्य स्वास्थ्य हेल्पलाइन नंबर 108 ह आखिर मं जुवाब दीस, एक ठन एम्बुलेंस आइस अऊ एक झिन डाक्टर ह महतारी के देखभाल करिस. वो मन छत्तीसगढ़ के रायगढ़ शहर मं बड़े अऊ बढ़िया सुविधा वाले अस्पताल रायगढ़ मेडिकल कॉलेज बर रवाना होइन. आरएचओ ह कहिथे, “मंय तुरते जन्मे लइका ला अपन कोरा मं धर लेंय,” अऊ वो ह मुंह ले मुंह लगाके वोला चेत मं राखे बर लगे रहंय. जब असुंता ह तुरते जन्मे लइका ला ऊहां के डॉक्टर मन ला सौंप दीस, त वोला बताय गीस के वो ह बांचे नइ सकय. “बाल रोग विशेषज्ञ ह कहिस के कोनो आस नइ ये, वो ह सुरता करत कहिथे.

फेर असुंता ह लइका ला धरके 27 कोस (80 किमी) दूरिहा सोझेच नइ आय रहिस, त वो ह डाक्टर मन ला अपन कोसिस करे बर कहिस. “महतारी अऊ लइका दूनों बांच गे. येकर ले मोला भारी संतोष होइस.” असुंता लंबा साँस लेवत अपन कहिनी ला सिरोईस अऊ कहिथे, “अब पांच बछर होगे हे, अऊ वो ह बढ़िया अऊ तंदुरुस्त हवय.”

नानचिक लइका मिरिगुडा गांव मं अपन किसान दाई -ददा संग रहिथे. “ मंय ओकर नांव ‘संजीवनी’ रखेंय! काबर के मोला पहिली बेर संजीवनी सेवा [एम्बुलेंस] मिले रहिस,” असुंता कहिथे, जउन इहाँ के लोगन मन ‘सिस्टर’ (नर्स) कहिके बलाथें.

ग्रामीण स्वास्थ्य संयोजक, असुंता टोप्पो ओरांव समाज ले हवंय अऊ छत्तीसगढ़ के धरमजयगढ़ ब्लॉक (जएन ला पहिली उदयपुर के नांव ले जाने जावत रहिस) मं 4,000 के जियादा लोगन मन – राठिया, बैगा अऊ बिरहोर आदिवासी – के देखभाल करथे. अधिकतर लोगन मन छोटे जोत वाले अपन जमीन मं खेती करथें अऊ तीर-तखार के जंगल मन ले गैर लकरी वन उपज – जलावन लकरी, मऊहा, चार अऊ तेंदूपत्ता- संकेलथें.

वो मन मिरिगुडा, नकाना, भौनरखोल अऊ सेमिपाली खुर्द गाँव मं रहिथें अऊ मिरिगुडा के स्वास्थ्य केंद्र के भरोसे हवंय जिहां असुंता काम करथे.

असुंता अब ये इलाका के बासिंदा बनगे हवय, वो ह कहिथे, “मंय साल 2005 ले इहाँ हवंव. मंय कतको बदलाव देखे हवं. पहिली आय जाय मुस्किल रहिस अऊ एक दिन मं अलग-अलग गाँव जाय बर 5-7 कोस रेंगे ला परत रहिस.”

साल 2015 मं जब सड़क मं गाड़ी मन चले नइ सकत रहिन, तब पथरीडांडगांव के गरभ धरे एक झिन माइलोगन ला गरभसुल (एक्लेम्पसिया) मारत रहिस. वो ह हमन ला बताथे, “हमन वोला खटिया मं धरके, भारी मुस्किल ले इहाँ लायेन. लइका के जनम इहींचे होइस.”

आरएचओ सुरता करथे के कइसने वोला जंगल ले गुजरे बखत जंगली जीव-जन्तु के खतरा लागत रहय. बीते बखत के बात बतावत, वो ह कहिथे, “वो बखत डायरिया अऊ मौसमी बीमारी मन घलो जियादा होवत रहिन. अब बखत मं जाँच अऊ दवई-पानी सेती ये ह कम होगे हवय, संगे संग हाई ब्लडप्रेशर अऊ शक्कर के बीमारी घलो कम होगे हवय.”

भारत मं मलेरिया के मामला बनेच जियादा हवंय अऊ छत्तीसगढ़ ह मलेरिया के मामला मं तीसरे नंबर मं हवय- नेशनल सेंटर फॉर वेक्टर-बोर्न डिजीज कंट्रोल डहर ले जारी करे गे ये आंकड़ा के मुताबिये बछर जुलाई (2024) तक 17,765 मामला दरज करे गे हवय. ये ह साल 2023 मं 31,706 ले कम हवय. असुंता कहिथे के जागरूकता अभियान, बखत मं सर्वे अऊ औषध वाले मच्छरदानी ह येला कम करे मं मदद करे हवय.

बाद मं हमन असुंता संग संजीवनी के घर जाथन जिहाँ वो ह अपन संगवारी मन के संग खेले मं मगन हवय. सिस्टर असुंता ले देखके संजीवनी के दाई विमला धान के खेत मं करत अपन बूता ला छोड़के हमर ले गोठियाय बर रहिस.

“सिस्टर असुंता के भरोसा कतको लोगन मन ला इहाँ खीच के ला आथे,” ये इलाका के सामुदायिक स्वास्थ्य अधिकारी (सीएचओ) नेहा खालको कहिथे.”जब ले वो ह [असुंता] इहां आय हवय, धरमजयगढ़ ब्लॉक के मिरिगुडा स्वास्थ्य उपकेंद्र मं 3,000 जचकी हो चुके हे.

असुंता कहिथे, “पहिली बिरहोर [आदिवासी] लोगन मन अस्पताल नइ आवत रहिन. वो मं गाँव के बहिर जचकी करावत रहिन.वो मन के लइका के गर्भनाल पखना ले काटे जावत रहिस.”

असुंता ह एक झिन बिरहोर (विशेष रूप ले कमज़ोर आदिवासी समूह) महतारी ला सुरता करथे, जेन ह अपन सातवाँ लइका ला जनत रहिस, वो बखत ओकर जम्मो गरभ घलो बहिर आगे रहिस. आरएचओ ला येला अपन जगा डारे बर तेजी ले काम करे ला परिस.

फेर बखत बखत मं गाँव इलाज, सफई अऊ पोषण दिवस, जचकी पहिली जाँच अऊ स्वास्थ्य क्षेत्र मं काम करत गैर-सरकारी संगठन मन के मदद अऊ मितानिन मन ला प्रसिच्छन देय ले बदलाव आय हे.

जेन बखत ये लेखक ह मिरिगुडा के स्वास्थ्य उपकेंद्र मं हबरिस त उहाँ मितानिन मन (मान्यता प्राप्त सामाजिक स्वास्थ्य कार्यकर्ता) के बइठका चलत रहिस. जुलाई के महिना रहिस, हालेच मं पानी घलो गिरे रहिस अऊ स्वास्थ्य केंद्र धान के हरियर खेत मन के मंझा मं रहिस.

एक झिन डाक्टर ह मितानिन मन ला भारी जोखम वाले जचकी के जाँच करे ला सिखावत रहिस. “अब हमन जटिल अऊ भारी खतरा वाले मामला मन ला धर्मजयगढ़ के सिविल अस्पताल मं पठोवत हवबी अऊ ये गरभवाले महतारी उपर नजर राखत हवन. वइसे हमर हमर उप-केंद्र मं सब्बो सुविधा नइ ये, ओकर बाद घलो हमन येला संभाले के पूरा कोसिस करत हवन,” मिरिगुडा के सीएचओ नेहा खलको कहिथे.

ये मं कोनो संदेहा नइ ये के तकनीक मदद करत हवय. फेर ये असुंता जइसने आरएचओ अऊ कामेच ह आय जेन ह इहाँ के लोगन मन मं आत्मविश्वास अऊ भरोसा जगाथे. ये उहिच आंय जेन मन सरकारी स्वास्थ्य सेवा ला सब्बो बर सुभीता के बनाथें.

ये कहिनी के एक ठन जुन्ना संस्करण अज़ीम प्रेमजी फाउंडेशन के वेबसाइट मं छपे रहिस.

अनुवाद: निर्मल कुमार साहू