لوپونگپاٹ: اسُر زبان کا ملنگ گلوکار

ہر شاعر کو سامعین کی تلاش ہوتی ہے۔

اس سے پہلے کہ دنیا اس کی تخلیق کا مطالعہ کر سکے، کوئی ایسا ضرور ہوتا ہے جو اس کے نغمہ کو سن چکا ہوتا ہے۔ تقریباً ۱۸ سال سے شردھانند اسُر کے گیتوں کے اولین سامعین تبدیل نہیں ہوئے ہیں۔

’’میں کوئی نغمہ تیار کرتا ہوں تو اتھناس کو سناتا ہوں،‘‘ وہ کہتے ہیں۔ ’’میں نے پہلا نغمہ ’ییشو گیت‘ لکھا تھا، اور اتھناس کے لیے لکھا تھا۔‘‘ اتنا کہہ کر وہ اپنے دوست اتھناس کی طرف دیکھتے ہیں، اور دونوں دوست زور سے ہنسنے لگتے ہیں۔

شردھانند اور اتھناس جھارکھنڈ کے لوپونگپاٹ گاؤں سے ہیں۔ دونوں ساتھ میں رومن کیتھولک پرائمری اسکول میں پڑھتے تھے۔ ایک دن شردھانند نے دیکھا کہ اتھناس کافی تناؤ میں ہے۔ وہ بتاتے ہیں، ’’اسے اگلے دن اسکول میں باقی بچوں کی طرح گیت گا کر سنانا تھا۔‘‘ اس کے عوض نمبر دیے جانے تھے، جو سالانہ امتحان کے نتیجے میں مدد کرتے۔

دونوں دوست اسُر برادری سے تعلق رکھتے تھے، جو جھارکھنڈ میں خاص طور پر کمزور قبائلی گروپ (پی وی ٹی جی) کے طور پر درج ہے۔ اتھناس کے بائیں ہاتھ کی نمو پیدائشی طور پر نہیں ہو پائی تھی۔ شردھانند بتاتے ہیں، ’’اس وجہ سے لوگ اسے ’لولا یا ٹھوٹھا‘ کہہ کر مذاق اڑاتے تھے۔‘‘

اس لیے، اتھناس لوگوں کے درمیان گیت سنانے کی بات سے ڈرتے تھے۔ اس وقت وہ پہلی جماعت میں تھے اور شردھانند دوسری جماعت میں پڑھتے تھے، لیکن وہ ان کے سب سے اچھے دوست تھے، اس لیے ان کی مدد کرنا شردھانند کے لیے ضروری تھا۔ وہ کہتے ہیں، ’’میں نے دماغ لگایا اور ایک ییشو گیت سے اس کے لیے سادری زبان میں گیت بنا دیا۔‘‘ اتھناس نے اس گیت کو زبانی یاد کر لیا اور اگلے دن اپنی کلاس میں سنایا۔

گیت میں ییشو (مسیح) سے اتھناس کی جسمانی معذوری کو دور کرنے کی فریاد کی گئی تھی۔

گیت کو سن کر بچے ہنسنے لگے، جنہیں ڈانٹ کر ٹیچر نے خاموش کرایا۔ اتھناس کو ڈانٹتے ہوئے پوچھا گیا کہ یہ گیت کہاں سے سیکھا۔ اتھناس نے جب گیت کے پیچھے کی کہانی بتائی، تو ٹیچر پہلے ہنس پڑی اور پھر اس نے شردھانند کی پیٹھ تھپتھپائی۔

’’اس واقعہ کے بعد سے اسکول کے ٹیچر مجھے روزانہ گیت سنانے کو کہتے اور میں سناتا تھا۔ شاید اسی وجہ سے میں کہیں رہوں، کہیں جاؤں، گیت لکھے بغیر نہیں رہ پاتا،‘‘ شردھانند کہتے ہیں۔

اپنے دوست کی مدد کے لیے گیت لکھنے سے شروع ہوا شردھانند کا قلمی سفر آج بھی جاری ہے۔ آج تقریباً ۲۴ سال کے ہو چکے شردھانند کہتے ہیں، ’’مجھے نہیں معلوم تھا کہ ایک دن میں نغمہ نگار بننے کا خواب دیکھوں گا۔‘‘ ان کی برادری کی زبان اسُر – جسے اسُری بھی کہا جاتا ہے – آسٹرو ایشیائی زبان ہے، جسے ۱۰ ہزار سے بھی کم لوگ بولتے ہیں۔ یونیسکو نے اسُر کی نشاندہی ’یقینی طور پر معدومیت کی شکار‘ زبان کے طور پر کی ہے۔

لیکن شردھانند نے اسُر زبان میں گیت لکھنا نہیں شروع کیا تھا۔ وہ شروع میں سادری زبان میں گیت لکھتے تھے، جس کا استعمال آدیواسی برادری کے لوگ علاقہ میں دیگر آدیواسی زبانوں کے لوگوں سے بات چیت کے لیے کرتے ہیں۔ وہ کہتے ہیں، ’’جب میں اسکول میں تھا، تو سادری بولنی پڑتی تھی۔‘‘ ساتھ ہی، ہندی میں بات کرنا بھی مجبوری تھی، کیوں کہ پڑھائی کا ذریعہ وہی تھا۔

گزشتہ چند دہائیوں میں، اسُر بولنے والے تمام لوگ سادری اور ہندی کا استعمال کرنے لگے ہیں۔ ایسے میں شردھانند کو اپنی زبان پر منڈلاتے بحران کا پورا اندازہ ہے۔ وہ کہتے ہیں، ’’میں اب اسُر زبان میں گیت لکھتا ہوں۔‘‘

ہندوستانی زبان کے سینسس کی رپورٹ ان کے ڈر کی تصدیق کرتی ہے اور بتاتی ہے کہ ایک نسل سے دوسری نسل کے درمیان اسُر زبان کی منتقلی بند ہو گئی ہے۔ اسکول اور روزمرہ کی زندگی میں سادری کے بڑھتے استعمال کے سبب ان کی کثیر لسانی برادری کے تمام لوگ اپنی زبان سے دور جانے لگے ہیں۔

شردھانند کا گاؤں لوپونگپاٹ گُملا ضلع میں واقع ہے، جہاں کی پتیاں، چھپّر، چہرے اور پتھریلے راستے باکسائٹ کی کانوں کے اڑتے غبار سے سرخ نظر آتے ہیں۔

جب پاری نے سال ۲۰۲۴ میں گاؤں کا دورہ کیا تھا، تب کسی کو نہیں معلوم تھا کہ شردھانند کہاں ہیں۔ ان کی تلاش شروع ہوئی اور پتہ چلا کہ وہ اپنے دوست کے ساتھ ’ٹائم پاس‘ کرنے کے لیے ٹرک پر باکسائٹ کے پتھر ڈھونے چلے گئے ہیں۔

عام طور پر علاقہ کے زیادہ تر بچے پڑھائی کے لیے رانچی جیسے شہروں کا رخ کرتے ہیں۔ شردھانند کی پڑھائی بھی وہیں سے ہوئی۔ بارہویں پاس کرنے کے بعد انہوں نے گھر والوں کے کہنے پر رانچی کے ایک کالج میں بی اے میں داخلہ لے لیا، لیکن پہلے سال میں ہی پڑھائی چھوڑ دی۔ وہ اس کی وجہ بتاتے ہیں، ’’میں صرف گیت لکھنا چاہتا ہوں۔ جب میں رانچی میں تھا، تو بھاگ بھاگ کر گاؤں آ جاتا تھا۔‘‘

جب ہماری ان سے ملاقات ہوئی، تب شردھانند پتھر ڈھونے کے بعد گاتے گنگناتے گاؤں لوٹ آئے تھے اور اپنے رشتہ دار کے گھر دوپہر کا کھانا کھا رہے تھے۔ گفتگو کے دوران انہوں نے کہا، ’’میرا اب من نہیں کرتا پڑھنے کا۔‘‘ ان کی حرکتیں دیکھتے ہوئے ان کے گاؤں والے اور ان کی خود کی فیملی انہیں ملنگ قسم کا انسان بتاتی ہے۔

ان کی فیملی کو یہ سب راس نہیں آتا، جو رانچی کے اورمانجھی علاقہ میں رہتی ہے۔ ان کے والد روبینتوس اسُر بطور بلاک ملازم اورمانجھی میں کام کرتے ہیں اور ان کے بھائی بہن کالج کی پڑھائی کر رہے ہیں۔ شردھانند بتاتے ہیں،، ’’گھر والے پہلے ڈانٹتے تھے، لیکن اب انہوں نے بولنا چھوڑ دیا ہے۔‘‘

ایسا نہیں ہے کہ شردھانند نے کام کرنے کی نہیں سوچی۔ سال ۲۰۲۳ کی شروعات میں وہ کیرالہ چلے گئے تھے اور وہاں ایک فیملی کے گھر کے کام کاج سنبھالتے تھے۔ اس کے عوض انہیں ہر مہینہ ۱۲ ہزار روپے مل جاتے تھے، جو بعد میں بڑھ کر ۱۵ ہزار ہو گیا تھا۔ ’’لیکن وہاں رہتے ہوئے مجھے گاؤں کے لوگوں، یہاں کے پہاڑوں کی بہت یاد آتی تھی۔ اس لیے، میں سال کے آخر میں واپس چلا آیا،‘‘ شردھانند بتاتے ہیں۔

’’میں جب کیرالہ میں تھا، مجھے لگتا تھا کہ یہاں سڑکیں، بجلی، پانی، سب کچھ ہے اور زندگی بہت آسان ہے۔ لیکن ہمارے گاؤں میں کوئی ذریعہ نہیں ہے،‘‘ وہ گاؤں کی بنجر زمین کی طرف اشارہ کرتے ہوئے کہتے ہیں۔ ’’آپ حالات کا اندازہ اسی بات سے لگا سکتے ہیں کہ بجلی کی لائن ۲۰۱۵ میں بچھا دی گئی تھی، لیکن آج تک ہمارے گاؤں میں بجلی نہیں پہنچی ہے۔‘‘

یہ بھی پڑھیں: لوپونگپاٹ کی گرام سبھا میں جمہوریت کا نظارہ

سال ۲۰۱۱ کی مردم شماری کے مطابق، ان کے گاؤں لوپونگپاٹ میں تقریباً ۶۰۰ لوگ رہتے ہیں، اور گزر بسر کے لیے بنیادی طور پر کھیتی اور جنگلاتی پیداوار پر منحصر ہیں۔ شردھانند بھی گاؤں میں فیملی کی زمین پر دھان اور مکئی کی کھیتی کرتے ہیں، جو خود کے استعمال کے لیے اُگائی جاتی ہے۔ ’’کبھی فوری پیسوں کی ضرورت پڑ جائے، تو اس حالت میں پیداوار کو بیچ کر کام چلایا جاتا ہے،‘‘ وہ مزید کہتے ہیں۔

صرف کھیتی کے سہارے گزارہ مشکل ہونے کے سبب گاؤں کے کافی لوگ باکسائٹ کی کانوں میں بھی مزدوری کرتے ہیں۔ کانوں کی تعداد بہت زیادہ ہونے کی وجہ سے علاقہ کی سڑکوں پر ٹرک دن رات دوڑتے نظر آتے ہیں، اور حادثات ہوتے رہتے ہیں۔ ’’میں اپنے گیتوں کے ذریعہ گاؤں کے مسائل کو بھی اجاگر کرنا چاہتا ہوں۔‘‘ انہوں نے سڑک حادثہ کو اپنی گیت کا موضوع بنایا ہے، جو کانوں کا چکر لگاتے ٹرکوں کی وجہ سے آئے دن ہوتے رہتے ہیں۔

دوپہر کے کھانے کے بعد، گاؤں کے کھیتوں میں گھومتے ہوئے شردھانند اپنی نوٹ بُک نکال لیتے ہیں۔ درخت کے سایہ میں بیٹھ کر وہ صفحہ پلٹتے ہیں اور پاری کو بتاتے ہیں: ’’پہلے میں گیتوں کو صرف یاد رکھتا تھا اور گا دیتا تھا۔ لیکن کچھ وقت بعد کچھ کچھ لائنیں بھول جاتا تھا۔‘‘ اب انہوں نے گیتوں کو لکھ کر رکھنا شروع کر دیا ہے۔

’’کبھی لکھنے کا من نہ بھی ہو، تب بھی گیتوں کے بول میرے دماغ میں چلتے رہتے ہیں،‘‘ وہ کہتے ہیں۔ ہم ان سے ان کے گیتوں کے تخلیقی عمل کے بارے میں سوال کرتے ہیں، تو وہ فوراً جواب دیتے ہیں، ’’جو نظر آتا ہے وہ لکھ دیتا ہوں۔ خاص کر اپنے گاؤں کے بارے میں۔‘‘ ان کے کہنے کا مطلب ہے کہ انہیں لکھنے کے لیے کسی خاص تخلیقی عمل یا یکسوئی کی ضرورت نہیں پڑتی اور وہ آتے جاتے، اٹھتے بیٹھتے کبھی بھی گیت لکھ دیتے ہیں۔ ’’گیت لکھنا ہی میری قسمت میں ہے،‘‘ وہ کہتے ہیں۔

گیت بنانا اب ان کے بائیں ہاتھ کا کھیل ہے، لیکن وہ تحریر سے وابستہ ذمہ داریوں کو بھی پوری طرح سمجھتے ہیں۔ وہ اپنی برادری کے ان چند لوگوں میں سے ہیں، جو اسُر زبان میں لکھ رہے ہیں۔ وہ پورے ادراک سے گیتوں کے موضوعات کا انتخاب کرتے ہیں۔ ’’میں گاؤں کے بزرگوں سے قصہ کہانی سنتا رہتا ہوں، ان سے بات کرتا ہوں،‘‘ وہ کہتے ہیں۔ انہوں نے بچپن میں اپنی دادی سے سنی ہوئی کہانیاں یاد رکھی ہیں اور ان پر بھی گیت لکھے ہیں۔

اب وہ اپنی برادری کے کئی بچوں کو اپنے تحریر کردہ گیت دیتے ہیں اور انہیں گانے کو کہتے ہیں۔ اتنا ہی نہیں، چین پور کے ایک چھوٹے سے اسٹوڈیو میں وہ ان گیتوں کو ریکارڈ بھی کرتے ہیں، ’’تاکہ گیتوں کو محفوظ رکھا جا سکے۔ آئندہ کبھی ان پر ویڈیو بھی بناؤں گا۔ اتنا تو اپنی زبان کے لیے کر ہی سکتا ہوں،‘‘ وہ کہتے ہیں۔

اتھناس جیسے دوست بھی انہیں گیت لکھنے کے لیے آمادہ کرتے ہیں۔ وہ ہنستے ہوئے بتاتے ہیں، ’’شروع شروع میں وہ مذاق کرتے تھے، اور کہتے تھے خراب گیت لکھا ہے۔‘‘ لیکن دھیرے دھیرے انہوں نے شردھانند کو سمجھا اور ان کے گیتوں کی تعریف کرنے لگے۔ ’’اب یہ کہتے ہیں کہ تم کو نغمہ نگار بننا چاہیے۔‘‘

اتھناس (۲۳) بغل میں کافی دیر سے خاموش بیٹھے ہیں، اور دوست کی یہ بات سن کر ٹوک دیتے ہیں، ’’میں تو اسے کہتا رہتا ہوں کہ کیوں گاؤں میں پڑے رہ کر اپنا ٹیلنٹ خراب کر رہے ہو، کسی بڑے شہر جاؤ۔‘‘

یہ بات سن کر شردھانند ہنس پڑتے ہیں اور جواب دیتے ہیں، ’’ایسے بول رہے ہو، جیسے وہاں لوگ میرا انتظار کر رہے ہوں۔ میں گاؤں چھوڑ کر کہیں نہیں جاؤں گا۔

میرا گاؤں اتنا خوبصورت ہے۔ ہماری زبان و ثقافت اتنی اچھی ہے۔ میں نہیں لکھوں گا ان کے بارے میں تو کون لکھے گا۔‘‘

اس اسٹوری کو ممکن بنانے میں مدد کے لیے آدیواسی شاعر وندنا ٹیٹے اور برنباس ٹوپّو کا شکریہ۔

اسٹوری میں شامل گیت بنیادی طور پر اسُر اور سادری زبانوں میں شردھانند نے لکھا ہے۔ گیتوں کا ہندی ترجمہ دیویش نے کیا ہے، اور انگریزی ترجمہ پرتشٹھا پانڈیہ نے کیا ہے۔

عظیم پریم جی یونیورسٹی کی مدد سے پاری نے ’معدومیت کی شکار زبانوں کا پروجیکٹ‘ شروع کیا ہے۔ اس پروجیکٹ کا مقصد ہندوستان کی معدوم ہوتی زبانوں کا، انہیں بولنے والے عام لوگوں اور ان کی زندگی کے تجربات کے ذریعہ دستاویز بندی کرنا ہے۔

یہ اسٹوری بنیادی طور پر ہندی میں رپورٹ کی گئی تھی۔

ترجمہ نگار: قمر صدیقی