लुपूंगपाठ के मनमौजी गीतकार

हरेक कवि ह सुनेइय्या खोजत रइथे.

येकर पहिली के दुनिया ओकर लिखे ला पढ़ सकय, कोनो त होवय जेन ह ओकर लिखे ला सुन चुके होथे. करीबन 18 बछर ले श्रद्धानंद असुर के गीत मन के पहिली सुनेइय्या बदले नइ ये.

“मंय येला अथनास ला सुनाथों,” वो ह कहिथे. “मंय पहिला गीत यीशु गीत लिखे रहंय, अऊ अथनास बर लिखे रहंय,” ये कहिके वो ह अपन संगवारी अथनास डहर देखथे, अऊ दूनों संगवारी जोर ले हंसे लगथें.

श्रद्धानंद अऊ अथनास, झारखंड के लुपूंगपाठ गाँव के आंय. दूनों एके संग रोमन कैथोलिक प्रायमरी स्कूल मं पढ़त रहिन. एक दिन श्रद्धानंद ह देखिस के अथनास भारी चिंता मं हवय, वो ह बताथे, “वोला दूसर दिन स्कूल मं आन लइका मन के जइसने गीत सुनाय ला रहिस.” गीत के नंबर दे जावत रहिस, जेन ह सलाना परिच्छा के नंबर मं जुड़त रहिस.

दूनों संगवारी असुर समाज ले हवंय, जेन ह झारखंड मं अति कमज़ोर जनजाति (पीवीटीजी) के रूप मं सूचीबद्ध हवय. जनम लेच अथनास के डेरी हाथ के विकास नइ होय रहिस. श्रद्धानंद बताथे, “तेकरे सेती लोगन मन वोला ‘लूला धन ठुठा’ कहिके मजाक उड़ावंय,”

ते पायके, अथनास लोगन मन ला गीत सुनाय के बात ले डेर्राय. वो बखत वो ह पहिली क्लास मं रहिस अऊ श्रद्धानंद दूसरी क्लास मं पढ्त रहिस, फेर वो ओकर सबले बढ़िया संगवारी रहिस, येकरे सेती ओकर मदद करे श्रद्धानंद बर जरूरी रहिस.वो ह कहिथे, “मंय जुगत लगायेंव अऊ एक ठन यीशु गीत ओकर बर सादरी भाखा मं बना देंय.” अथनास ह वो गीत ला रट लीस अऊ दूसर दिन क्लास मं सुनाइस.

गीत मं यीशु ले अथनास के देह के दिक्कत ला दूर करे के गुहार करे गे रहिस.

गीत ला सुनके लइका मन के हँसी निकरगे, टीचर ह खिसियावत वो मन ला चुप कराइस. अथनास ला डांटत पूछिस के वो ह ये गीत कहाँ ले सिखिस. अथनास ह जब गीत बनाय के कारन ला बताइस, त टीचर ह पहिली हांस परिस अऊ ओकर बाद वो ह श्रद्धानंद ला साबासी दीस.

“तउन घटना के बाद ले स्कूल के टीचर ह मोला हरेक दिन गीत सुनाय ला कहय अऊ मंय सुनावत रहंय. हो सकत हे ते पायके अब मंय कहूँ रहंव, कहूँ जावं, गीत लिखे बगेर रहे नइ सकवं,” श्रद्धानंद कहिथे.

अपन संगवारी के मदद बर गीत लिखे ले सुरु होय श्रद्धानंद के लेखन अब तक ले चलत हवय. ये बखत करीबन 24 बछर के श्रद्धानंद कहिथे, “मोला पता नइ रहिस के एक दिन मंय गीतकार बने के सपना देखहूँ,” ओकर समाज के भाखा असुर (जेन ला असुरी घलो कहे जाथे) ऑस्ट्रो-एशियाई भाखा आय, जेन ला 10,000 ले घलो कम लोगन मन बोलथें. यूनेस्को ह असुर ला भारी बिपत मं परे भाखा के रूप मं चिन्हारी करे हवय.

फेर श्रद्धानंद ह असुर भाखा मं गीत लिखे सुरु करे नइ रहिस. वो ह सुरु मं सादरी भाखा मं गीत लिखत रहिस, जेन ला आदिवासी समाज के लोगन मन इलाका मं आन आदिवासी भाखा के लोगन मन ले गोठियाथें. वो ह कहिथे, “जब मंय स्कूल मं पढ़त रहंय, त सादरी बोले ला परत रहिस,” संगे संग, हिन्दी मं बात करे घलो मजबूरी रहिस, काबर के वो ह पढ़ई के माध्यम रहिस.

बीते कुछेक दसक ले, जम्मो असुर-बोलेइय्या सादरी अऊ हिन्दी ले काम चलाय लगे हवंय, अइसने मं श्रद्धानंद ला अपन भाखा मं मंडरावत संकट के पूरा-पूरा अंदाजा हवय. वो ह कहिथे, “मंय अब असुर भाखा मं गीत लिखथों,”

भारतीय भाषा जनगणना के एक ठन रिपोर्ट ह ओकर डर के सबूत आय, जेन मं बताय गे हवय के एक पीढ़ी ले दूसरी पीढ़ी मं असुर भाखा के बोलचाल बंद होगे हे. स्कूल अऊ रोज के जिनगी मं सादरी के बढ़त दबदबा सेती ओकर बहुभाषी समाज के जम्मो लोगन मन अपन भाखा ले दूरिहा चले जावत हवंय.

श्रद्धानंद के गाँव लुपूंगपाठ गुमला जिला मं हवय, जिहां के इलाका बॉक्साइट के खदान मन ले उड़त लाल माटी के गर्दा ह डारा पाना, खपरा, अऊ लोगन मन के चेहरा मं जमे देखे ला मिलथे.

जब पारी ह साल 2024 मं ये गाँव मं हबरिस, तब कोनो ला पता नइ रहिस के श्रद्धानंद कहां हवय. वोला खोजत पता चलिस के वो ह अपन संगवारी संग ‘बखत काटे’ ट्रक मं बॉक्साइट पथरा लादे चले गे हवय.

अक्सर ये इलाका के लइका मं पढ़े बर रांची जइसने शहर मं चले जाथें. श्रद्धानंद के पढ़ई घलो इहींचे होईस. 12 वीं पास करे के बाद वो ह अपन परिवार के कहे मुताबिक रांची के एक ठन कालेज मं बीए मं नांव लिखाइस,फेर पहिलीच बछर मं वो ह पढ़ई छोड़ दीस. येकर पाछू के बात ला वो ह बताथे, “मंय सिरिफ गीत लिखे ला चाहथों, जब मंय रांची मं रहत रहंय, त घेरी-बेरी भाग के अपन गाँव आ जावत रहंय.”

जब हमर ओकर ले भेंट होईस, तब श्रद्धानंद पथरा ढोय के बाद गीत गुनगुनावत गाँव लहूट आय रहिस अऊ अपन रिश्तेदार के घर मंझनिया खावत रहिस. गोठ-बात बखत वो ह कहिथे, “मोर मन अब पढ़ई मं नइ लगय.” ओकर हरकत मन ला देखत ओकर गाँव वाले अऊ खुद ओकर परिवार के लोगन मन वोला मलंग (मनमौजी) किसिम के मइनखे कहिथें.

रांची के ओरमांझी ब्लॉक मं रहेइय्या ओकर घर के लोगन मन ओकर ये फइसला ले खुश नइ यें. ओकर ददा रुबेंटस असुर ब्लॉक कर्मी हवय; ओकर भाई-बहिनी मन कालेज मं हवंय. वो ह कहिथे, “पहिली वो मन खिसियावत रहिन, अब वो ह घला बंद होगे हे.”

अइसने नो हे के श्रद्धानंद काम-धाम के बारे मं नइ सोचिस. साल 2023 के सुरु मं वो ह केरल चले गीस अऊ उहाँ एक ठन घर के काम-बूता करत रहिस. वोला 12,000 रूपिया महिना मिलत रहिस, जेन ह बाद मं बढ़के 15,000 रूपिया होगे रहिस. “फेर उहाँ रहत मोला गाँव के लोगन मन के, उहाँ के डोंगरी मन के सुरता आवत रहिस. येकरे सेती साल के आखिर मं मंय लहूट आंय,” श्रद्धानंद कहिथे.

“मंय जब केरल मं रहंय, मोला लगत रहिस के इहाँ रोड, बिजली, पानी सब्बो कुछु हवय अऊ जिनगी भारी सुभीता हवय. फेर हमर गाँव मं कोनो साधन नइ ये,” वो ह गाँव के पथरा वाले भूंइय्या डहर आरो करत कहिथे, “तुमन हालत के अंदाजा येकर ले लगाय सकथो के बिजली के लाईन साल 2015 मं लग गे रहिस, फेर आज तक ले हमर गाँव मं बिजली हबरे नइ ये.”

पढ़व: लुपुंगपत के ग्राम सभा सब्बो कुछु बदल दीस

ओकर गाँव लुपूंगपाठ के आबादी करीबन 600 (जनगणना 2011) हवय. अऊ गुजारा बर लोगन मन खेती अऊ जंगल के उपज के भरोसे हवंय. श्रद्धानंद घला गाँव मं घर के खेत मं धान अऊ जोंधरा कमाथे, जेन ला खुद के खाय बर कमाय जाथे. “कभू आपत-बिपत मं पइसा के जरूरत पर जाय त बेंच के काम चलाय जाथे,” वो ह बतावत जाथे.

सिरिफ खेती के सहारे गुजारा मुस्किल होय के सेती गाँव के बनेच अकन लोगन मन बॉक्साइट के कतको खदान मं मजूरी घलो करथें. बनेच अकन खदान होय के सेती रोड मं दिन-रात कतको ट्रक चलत रहिथे, अऊ एक्सीडेंट (अलहन) होवत रहिथे. “मंय अपन गीत ले गाँव के समस्या मन ला घलो बताय ला चाहत हवं.” वो ह सड़क मं होय अलहन ला अपन गीत के बिसय बनाय हवय, जेन ह खदान मन के फेरा लगावत कतको ट्रक सेती आये दिन घटत रहिथे.

मंझनिया खाय के बाद, गाँव के खेत मन मं किंजरत श्रद्धानंद अपन कापी निकार लेथे. रुख के छाँव मं बइठे वो ह कापी के पन्ना ला पलटथे अऊ पारी ला बताथे: “पहिली मंय गीत मन ला सुरता राखत रहंय अऊ गावत रहंय. फेर कुछु बखत बीते कुछु कुछु लाइन ला भूला जावत हवं.” अब वो ह गीत मन ला लिखके राखे सुरु कर दे हवय.

“गीतों के बोल मेरे दिमाग़ में चलते रहते हैं,” वो ह कहिथे. हमन ओकर ले गीत रचे के काम ला लेके सवाल करथन त वो ह झट ले कहिथे, “जेन ह दिखथे वो ला लिख देथों. खास करके अपन गाँव के बारे मं.” ओकर कहे के मतलब आय के वोला लिखे बर कोनो खास बखत के धन अकेल्ला होय के जरूरत नइ परय अऊ वो ह आवत-जावत, उठत- बइठत कभू घलो गीत लिख देथे. “गीत लिखेच ह मोर किस्मत मं हवय,” वो ह कहिथे.

गीत लिखे अब ओकर डेरी हाथ के काम आय, फेर वो ह लिखे ले जुड़े जम्मो जिम्मेवारी ला घलो पूरा समझथे. वो अपन समाज के गिनती के लोगन मन ले हवय, जेन मन असुर भाखा मं लिखत हवंय. वो ह भारी सोच-समझ के गीत के बिसय ला छांटथे. “मंय गाँव के डोकरा-सियान मन ले किस्सा-कहिनी सुनत रहे हवं, वो मन ले गोठ-बात करथों,” वो ह कहिथे. वो ह बचपना ले अपन डोकरी दाई (दादी) ले सुने कहिनी मन ला सुरता राखे हवय अऊ वोला लेके घलो गीत लिखे हवंय.

अब वो अपन समाज के कतको लइका मन ला अपन लिखे गीत देथे अऊ वो मन ला गाये ला कहिथे. अतकेच नइ, चैनपुर के एक ठन नान कन स्टूडियो मं वो ह वो गीत मन ला रिकार्ड घलो कराथे, “जेकर ले गीत मन ला संभाल के रखे जा सकय. अवेइय्या बखत कभू ओकर उपर वीडियो घलो बनाहूँ. अतक त अपन भाखा सेती करेच सकथों,” वो ह कहिथे.

अथनास जइसने संगी घलो वोला गीत लिखे बर प्रोत्साहित करथें. वो ह हंसत बताथे, “ सुरु-सुरु मं वो मन मजाक उड़ावत रहिन, अऊ कहंय खराब गीत लिखे हस.” फेर धीरे-धीरे वो मन श्रद्धानंद ला समझिन अऊ ओकर लिखे गीत मन ला सराहे लगिन. “अब वो मन कहिथें के तोला गीतकार बने ला चाही.”

23 बछर के अथनास बगल मं बनेच बखत ले कलेचुप बइठे रहिस, अपन संगवारी के बात सुनके टोकथे, “मैं तो इसे कहता रहता हूं कि क्यों गांव में पड़े रहकर अपना टैलेंट ख़राब कर रहे हो [मंय तो येला कहितेच रइथों के काबर गाँव मं परे रहिके अपन बुद्धि खराब करत हस], वोला कोनो बड़े शहर मं जाय ला चाही.”

ये गोठ ला सुनके श्रद्धानंद हंस परथे अऊ कहिथे, “जैसे वहां लोग मेरा इंतज़ार कर रहे हों! [ जइसने लोगन मन मोला अगोरत होंय!]. मंय गाँव छोड़के कहूँ नइ जावं.

मोर गाँव अतक सुग्घर हवय. हमर भाखा-संस्कृति अतक बढ़िया हवय. मंय नइ लिखहूँ येकर बारे मं, त कोन लिखही.”

ये कहिनी लिखे मं मदद सेती आदिवासी कवि वंदना टेटे अऊ बर्नबास टोप्पो के आभार.

कहिनी मं सामिल गीत मूल रूप मं असुर अऊ सादरी भाखा मं श्रद्धानंद ह लिखे हवय. गीत मन के हिन्दी अनुवाद देवेश ह करे हवय, अऊ अंगरेजी अनुवाद प्रतिष्ठा पांड्या ह करे हवय.

पारी के नंदावत जावत भाखा परियोजना (ईएलपी), अजीम प्रेमजी यूनिवर्सिटी ले मिले मदद के हिस्सा आय. येकर मकसद भारत के खतरा मं परे भाखा मन ला, ओकर बोलेइय्या मन के बात ला अऊ अनुभव के दस्तावेजीकरन करे आय.

मूल रूप ले ये कहिनी हिंदी मं लिखे गे हवय.

अनुवाद: निर्मल कुमार साहू