امیر ترین ریاست کا غریب ترین ایم ایل اے

جب انہیں احساس ہوا کہ وہ مہاراشٹر کے اسمبلی انتخابات میں حصہ لے رہے ہیں، تو ان کے پاس اپنے نام پر کوئی بینک اکاؤنٹ بھی نہیں تھا۔ ان کی بیوی نے انہیں ۱۵ ہزار روپے قرض دیے تھے، جو ایک آدیواسی رہائشی اسکول میں بطور ٹیچر کام کرتی تھیں۔ ان کی پارٹی کے کارکن اپنی بساط بھر جو کچھ کرسکتے تھے، انہوں نے وہ کیا اور انتخابی درخواست جمع کرنے سے قبل ۵۲ ہزار روپے کا چندہ جمع کر لیا تھا۔

ونود نکولے کے لیے حالات اس سے زیادہ ناسازگار نہیں ہوسکتے تھے۔ ان کے اصل حریف موجودہ رکن قانون ساز اسمبلی (ایم ایل اے)، دَھنارے پاسکل جَنیا تھے، جنہوں نے ۲۰۱۴ میں دہانو اسمبلی حلقہ سے ۱۶۰۰۰ سے زیادہ ووٹوں کے فرق سے کامیابی حاصل کی تھی۔ ان کا تعلق بھارتیہ جنتا پارٹی (بی جے پی) سے بھی تھا، جس نے اس سال اسمبلی انتخابات میں ۸۲ کروڑ روپے سے زیادہ کے اخراجات کا باضابطہ طور پر اعتراف کیا تھا۔

لیکن جب نتائج کا اعلان ہوا تو وسائل کی کمی آڑے نہیں آئی۔ نکولے تقریباً ۵۰۰۰ سے کچھ کم ووٹوں کے فرق سے رکن قانون ساز اسمبلی منتخب ہو چکے تھے۔

’’میرے کزن بھائی نے مجھے تقریباً ۷۰ ہزار روپے کا قرض دیا تھا۔ انتخابات سے پہلے میرے پاس صرف وہی۷۰ ہزار روپے تھے، وہ قبائلی اکثریتی ضلع پالگھر میں واقع دہانو شہر میں اپنے دفتر کے باہر پلاسٹک کی کرسی پر بیٹھتے ہوئے طنزیہ مسکراہٹ کے ساتھ کہتے ہیں۔

یہ کسی ایسے ہندوستان کی کہانی معلوم ہوتی ہے، جو اب موجود نہیں ہے۔ لیکن یہ سب کچھ حال ہی میں وقوع پذیر ہوا ہے، پہلے ۲۰۱۹ میں اور پھر ۲۰۲۴ میں۔ ایک ایسے دور میں جب بی جے پی ایک کے بعد ایک انتخابات میں اپوزیشن کو روندتی جا رہی ہو، اور سیاست ایک ایسا کھیل بن چکی ہو جس میں پیسے کے بے دریغ استعمال کے بغیر انتخابات میں کامیابی حاصل کرنا ناممکن ہو گیا ہو، اس دور میں کمیونسٹ پارٹی آف انڈیا (مارکسسٹ) سے تعلق رکھنے والے ۴۸ سالہ نکولے بڑی آسانی سے اپنی دوسری مدت کار میں داخل ہو چکے ہیں۔ وہ بھی ایسی ریاست میں، جہاں ۹۳ فیصد ایم ایل اے کروڑ پتی ہیں۔ مجموعی ریاستی گھریلو پیداوار (جی ایس ڈی پی) کے لحاظ سے مہاراشٹر ملک کی امیر ترین ریاست ہے۔

دہانو شہر سے چار کلومیٹر کی دوری پر واقع واکی گاؤں میں اینٹ بھٹہ مزدوروں کے گھر پیدا ہونے والے نکولے مہاراشٹر کے سب سے غریب ایم ایل اے ہیں۔ مہاراشٹر ایک ایسی ریاست ہے، جس کو ملک میں سب سے زیادہ انتخابی اخراجات کرنے کے حوالے سے جانا جاتا ہے۔ نکولے پولنگ سے قبل نہ تو پیسے بانٹ سکتے ہیں اور نہ ہی اپنے ایجنڈے کو فروغ دینے کے لیے سوشل میڈیا کی کوئی بڑی ٹیم کھڑی کرسکتے ہیں۔ ان کا اصل سرمایہ زمین پر موجود رہ کر کام کرنا، نچلی سطح کی عوامی تحریکوں میں حصہ لینا اور عام لوگوں، خاص طور پر قبائلی کسانوں اور مزدوروں کے لیے ہمہ وقت دستیاب رہنا ہے۔

اس سال جنوری میں، محض ۱۰ دنوں کے اندر سی پی آئی (ایم) سے وابستہ آل انڈیا کسان سبھا (اے آئی کے ایس) نے پالگھر، ناسک اور اہلیہ نگر (سابقہ ​​احمد نگر) کے قبائلی علاقوں میں آدیواسی کسانوں کے دو بڑے احتجاجی مارچوں کا اہتمام کیا۔ ۱۹ جنوری ۲۰۲۵ کو ۵۰ ہزار کسانوں نے پالگھر کے ضلع کلکٹر کے دفتر کی جانب مارچ کیا، اور دیگر مطالبات کے علاوہ زمین کے حقوق اور روزگار کے بہتر مواقع کا مطالبہ کیا۔

اس کے تقریباً ایک ہفتہ کے بعد، ناسک سے ہزاروں کسانوں نے ریاستی حکومت پر دباؤ ڈالنے کی کوشش میں ممبئی کی جانب مارچ کیا۔

سال ۲۰۰۶ میں حکومت ہند نے تاریخی قانون جنگلات کے حقوق کا قانون (ایف آر اے) منظور کیا تھا۔ یہ قانون درج فہرست قبائل اور جنگلات کے دیگر روایتی باشندوں، جو نسل در نسل ان علاقوں میں رہتے آئے ہیں، انہیں جنگلات کی زمین اور وسائل کے حقوق فراہم کرتا ہے۔ گرام سبھائیں دعووں پر کارروائی کا آغاز کرتی ہیں، اور سب ڈویژنل اور ضلعی کمیٹیوں کے ذریعہ ان کی تصدیق کی جاتی ہے۔ دعووں پر حتمی فیصلہ آنے تک یہ قانون ان باشندوں کو بے دخلی سے تحفظ فراہم کرتا ہے۔

تاہم، زمینی سطح پر قانون کا نفاذ اب بھی مشکوک ہے۔ اے آئی کے ایس نے اپنے ایک بیان میں اس بات کی تصدیق کی ہے کہ کسانوں کی دو ریلیوں نے ریاستی حکومت کی توجہ جس سب سے اہم حقیقت کی جانب مبذول کرائی ہے، وہ ہے ایف آر اے کے تحت مسترد شدہ دعووں کو دوبارہ زیر غور لانا۔

نکولے، جو خود ایک وارلی آدیواسی ہیں، ان دونوں ریلیوں میں پیش پیش رہے تھے۔ انہوں نے کسانوں کے ساتھ پیدل مارچ کیا، سب کے ساتھ فرش پر سوئے، اور وہی کھانا کھایا جو سب نے کھایا۔ اے آئی کے ایس کے صدر اشوک دھوَلے کہتے ہیں، ’’ان کی ایک خوبی یہ ہے کہ وہ خود کو ایک اجتماعی قیادت اور متحدہ تحریک کا حصہ خیال کرتے ہیں۔‘‘

اِشوتی گَہلا، جو اپنی عمر ۶۰ سال بتاتی ہیں، ایک احتجاجی مارچ کا حصہ تھیں۔ وہ کہتی ہیں کہ کسی ایم ایل اے کا عام لوگوں کی طرح ریلی میں شرکت کرنا انتہائی اطمینان بخش ہے۔ ’’آپ کو آج کل یہ نظر نہیں آتا،‘‘ وہ کہتی ہیں۔ ’’اس سے آپ کو یہ محسوس ہوتا ہے کہ آپ کی آواز کی صحیح معنوں میں نمائندگی ہو رہی ہے اور اسے سنا جا رہا ہے۔‘‘

پالگھر ضلع کے جمشیت گاؤں سے تعلق رکھنے والی اِشوتی بھی وارلی آدیواسی ہیں۔ ان کی فیملی کے پاس گاؤں میں دو ایکڑ کھیتی کی زمین ہے، جہاں وہ دوسرے کسانوں کی طرح مانسون کے موسم میں دھان کی کھیتی کرتے ہیں۔ ’’ہم صرف ایک فصل کاٹتے ہیں،‘‘ وہ مجھے بتاتی ہیں۔ ’’آبپاشی کے بغیر ہم باقی سیزن میں زیادہ کچھ نہیں کر سکتے۔‘‘

’’یہ علاقہ آدیواسیوں کی اکثریت والا علاقہ ہے، اس لیے یہاں کے دو اہم ترین مسائل مزدوروں کے حقوق اور زمین کے حقوق ہیں،‘‘ نکولے کہتے ہیں۔ ’’یہاں ۵۰-۶۰ کمپنیوں میں ہماری یونینیں ہیں، اور ہم ان سے بہتر اجرت کے لیے باقاعدگی سے مذاکرات کرتے ہیں اور اس بات کو یقینی بناتے ہیں کہ کمپنیوں کو نقصان نہ اٹھانا پڑے۔‘‘

دہانو میں جس دن میں نے نکولے سے ملاقات کی، اس دن وہ بائسر کے قصبہ سے – جو وہاں سے تقریباً ایک گھنٹہ کی مسافت پر واقع ہے – ٹھیکہ مزدوروں کے ایک اجلاس سے خطاب کرنے کے بعد پہنچے تھے۔ ’’ہم ان کی ماہانہ تنخواہ ۱۲ ہزار روپے سے بڑھا کر ۱۳۰۵۰ روپے کرانے میں کامیاب رہے،‘‘ وہ کہتے ہیں۔

یہاں اڈانی گروپ کا ایک تھرمل پاور پلانٹ بھی ہے۔ اسے پہلے انل امبانی سنبھالتے تھے۔ نکولے کا کہنا ہے کہ پاور پلانٹ میں بھی ان کی پارٹی کی ایک یونین ہے، جہاں انہوں نے ٹھیکہ مزدوروں کی اجرت میں اضافہ کے لیے مستقل جدوجہد کی ہے۔ انہوں نے مزید کہا کہ ’’جب لیڈر بک جاتے ہیں تو یونینیں غیر مؤثر ہو جاتی ہیں۔ ہمارے ساتھ ایسا کبھی نہیں ہوگا۔‘‘

تھرمل پلانٹ میں ٹھیکہ پر کام کرنے والے ۵۴ سالہ مزدور سریش جادھو کہتے ہیں کہ ۲۰۱۰ میں جب انہوں نے پہلی بار یونین میں شمولیت اختیار کی تھی تو ان کی تنخواہ ۲۶۰۰ روپے تھی۔ نکولے اس وقت ایم ایل اے نہیں بنے تھے، لیکن یونین کی کارگزاریوں کو دیکھتے تھے۔ ایم ایل اے بننے کے بعد بھی وہ وہاں کے عہدیدار ہیں، لیکن اب ان کی ذمہ داریاں بڑی ہو گئی ہیں۔

جادھو کہتے ہیں، ’’سال ۲۰۱۰ میں تھرمل پلانٹ میں کام کرنے والے ہم تقریباً ۱۰۰۰ مزدور تھے۔ آج ہم ماہانہ ۲۸ ہزار روپے کماتے ہیں۔‘‘

یہ ۱۶سال کے عرصہ میں تنخواہ میں تقریباً ۱۰۰۰ فیصد کا اضافہ ہے، جو اس زمانے کے مزدوروں کے لیے بالکل ناقابلِ تصور تھا۔

جادھو، جن پر پلانٹ کے ماحولیاتی اثرات کی جانچ کی ذمہ داری ہے، کہتے ہیں کہ چونکہ ایم ایل اے ان کے ساتھ ہیں، اس لیے ان کی آواز میں خود بخود زیادہ وزن پیدا ہو جاتا ہے۔ ’’سال ۲۰۱۹ سے پہلے ہمیں نظر انداز کرنا آسان تھا،‘‘ جادھو کہتے ہیں۔ ’’اب ہمارے مطالبات کو زیادہ سنجیدگی سے سنا جاتا ہے۔‘‘

عام لوگ نکولے سے ملنے اور اپنے مسائل بیان کرنے کے لیے قطار میں کھڑے ہوتے ہیں۔ وہ ان کے خدشات کو دور کرتے ہیں اور اپنے رابطہ کے لوگوں کو فون کر کے ان کے مسائل پر کارروائی کی پیش رفت کا جائزہ لیتے ہیں۔ ’’یہ واحد طریقہ ہے جس سے میں انتخابات جیت سکتا ہوں،‘‘ وہ کہتے ہیں۔ ’’ہر صبح ۱۰ بجے کے بعد آپ مجھے یہاں میرے دفتر کے باہر تلاش کرسکتے ہیں۔ کوئی بھی شخص یہاں آ کر مجھ سے بات کر سکتا ہے۔‘‘

سال ۲۰۲۴ میں جب نکولے نے اپنے دوسرے انتخاب کے لیے حلف نامہ داخل کیا تھا، تو اس میں ان کے اعلان کردہ اثاثوں کی مالیت ۸۷ لاکھ روپے تھی۔ ان اثاثوں کا زیادہ تر حصہ حال ہی میں خریدی گئی ۸۷ء۰ ایکڑ اراضی اور اس پر تعمیر شدہ معمولی سے مکان پر مشتمل ہے۔

جب وہ ۲۰۱۹ میں ایم ایل اے منتخب ہوئے، تو انہیں ڈیڑھ لاکھ روپے تنخواہ ملنی شروع ہوئی، جو مہاراشٹر میں ۲۰۲۴ کے انتخابات کے بعد بڑھ کر دو لاکھ روپے ہوگئی۔ انہیں ۴۱ سال کی عمر میں اپنی زندگی میں پہلی بار مناسب ماہانہ آمدنی مل رہی تھی۔ انہوں نے اس رقم سے اپنے اور اپنے اہل خانہ لیے ایک گھر تعمیر کروایا۔

’’اس سے قبل پارٹی مجھے ہر مہینہ ۳۰۰۰ روپے دیتی تھی،‘‘ نکولے کہتے ہیں۔ ’’میں آج بھی اپنی تنخواہ کا نصف حصہ پارٹی کو عطیہ کرتا ہوں۔‘‘

اس کے برعکس، جب ایسوسی ایشن آف ڈیموکریٹک ریفارمز (اے ڈی آر) نے ۲۰۲۴ میں اپنی مدت کار پورا کرنے والی مہاراشٹر اسمبلی کا تجزیہ کیا، تو ۹۳ فیصد رکن اسمبلی کروڑ پتی نکلے۔ وہاں کے امیر ترین ایم ایل اے نے ۵۰۰ کروڑ روپے مالیت کے اثاثوں کا اعلان کیا تھا۔ سال ۲۰۲۴ کے اسمبلی انتخابات کے اختتام کے بعد، جس میں بی جے پی نے کلین سویپ کیا تھا، اے ڈی آر نے ایک تجزیاتی رپورٹ جاری کی، جس سے معلوم ہوا کہ تجزیہ شدہ ۲۷۹ کروڑپتی فاتحین میں سے ۱۵۷ (۵۶ فیصد) نے ۵۰ فیصد یا اس سے زیادہ ووٹوں کے فرق سے کامیابی حاصل کی۔

حزب اختلاف کی جماعتوں نے حقائق کے ساتھ اس بات کی نشاندہی کی ہے کہ بی جے پی ہر انتخابی مہم کا آغاز واضح برتری کے ساتھ کرتی ہے، کیوں کہ ان کے اور حکمراں جماعت کے وسائل کے درمیان بہت بڑا فرق ہوتا ہے۔ صرف مالی سال ۲۰۲۴-۲۵ میں بی جے پی نے قومی سطح پر ۶۰۰۰ کروڑ روپے سے زیادہ کا عطیہ حاصل کیا۔ یہ رقم حزب اختلاف کی سب بڑی جماعت کانگریس کو ملنے والی رقم سے ۱۲ گنا زیادہ تھی۔ یہاں مساوی مواقع کا سرے سے وجود ہی نہیں ہے۔

مہاراشٹر کے بلدیاتی انتخابات میں بھی ایک ماہ سے بھی کم عرصہ میں صرف آن لائن اشتہارات پر ۵۵ کروڑ روپے خرچ کیے گئے۔ اور انتخابات سے پہلے ووٹروں کے درمیان کروڑوں روپے تقسیم کیے گئے۔

لیکن نکولے کہتے ہیں کہ اس برتری کو بھی کم کیا جاسکتا ہے، بشرطیکہ آپ ’’ووٹروں کے دل و دماغ میں گھر بنا لیں۔ آپ کو ان کا اعتماد حاصل کرنا ہوگا،‘‘ وہ مزید کہتے ہیں۔ ’’لہذا، جب دوسرے امیدوار انہیں خریدنے کی کوشش کریں گے تو پھر ووٹر اپنا ووٹ نہیں بیچیں گے۔ میرے بی جے پی کے مخالف نے جتنی رقم خرچ کی وہ شاید میرے خرچ سے ۱۰۰ گنا زیادہ تھی۔‘‘

سال ۲۰۱۹ کے اسمبلی انتخابات میں کسی بھی جماعت کو حکومت سازی کے لیے واضح اکثریت نہیں ملی تھی۔ شیو سینا نے بی جے پی کے ذریعہ اپنے لوگوں کا شکار روکنے کے لیے اپنے ۵۹ا راکین اسمبلی کو راتوں رات ایک ریزورٹ میں منتقل کر دیا تھا۔ ایک ایسے وقت میں جب حزب اختلاف کے باقی اراکین اسمبلی ریزورٹس میں جمع تھے، نکولے کھلے عام دہانو میں گھوم پھر رہے تھے۔

’’بے وقت ہونے والی بارشوں نے ہمارے علاقہ میں کسانوں کو شدید نقصان پہنچایا تھا،‘‘ وہ کہتے ہیں۔ ’’میں نے اس کا معائنہ کیا اور اپنے کام میں مصروف رہا۔ میری پارٹی یا میرے ووٹروں کو میری وفاداری تبدیل کرنے کے بارے میں فکرمند ہونے کی ضرورت نہیں تھی۔‘‘

نکولے مالی مشکلات کی وجہ سے کالج چھوڑنے کے بعد دہانو میں ایک کینٹین میں کھانا کھلانے اور برتن صاف کرنے کا کام کرنے لگے تھے۔

سی پی آئی (ایم) کے ایک سینئر لیڈر نے انہیں دیکھا اور انہیں پارٹی میں شمولیت اختیار کرنے پر راضی کیا۔ ’’اس وقت ممبر شپ فیس ۵ روپے تھی،‘‘ وہ یاد کرتے ہیں۔ نکولے نے اس سینئر لیڈر سے طنزیہ انداز میں پوچھا تھا: ’’آپ نے میری کینٹین میں ناشتہ کیا ہے، اور مجھے آپ کو پانچ روپے دینےہیں؟ کیا اس کے برعکس نہیں ہونا چاہیے؟‘‘

لیڈر نے ۵ روپے کی رسید کاٹنے کے بعد جواب دیا، ’’اب آپ پارٹی کے ممبر ہیں۔‘‘

’’میں اس وقت اس کا مطلب نہیں سمجھ پایا،‘‘ نکولے کہتے ہیں۔ ’’لیکن انہوں نے مجھے اپنے تحفظ میں لے لیا، اور میں نے پارٹی کے لیے کام کرنا شروع کر دیا۔‘‘

دہانو سے انتخابی میدان میں اترنے سے بہت پہلے، نکولے اپنے ساتھیوں کے ساتھ کئی عوامی تحریکات میں پیش پیش رہے تھے اور طاقتور لوگوں کا مقابلہ کیا تھا۔

سال ۲۰۱۳ اور ۲۰۱۵ کے درمیان، پولیس نے نکولے کی فعالیت کی وجہ سے ان پر غیرقانونی اجتماع کرنے اور فسادات برپا کرنے کے الزامات میں مقدمات درج کیے۔ یہاں تک کہ انہیں پانچ اضلاع میں داخلہ پر پابندی عائد کر دی گئی تھی۔ لیکن دہانو پولیس اسٹیشن کے باہر ۲۵ ہزار کسانوں کے احتجاج نے اس حکم کو منسوخ کرنے پر مجبور کر دیا۔ ’’ایم ایل اے منتخب ہونے کے بعد بھی میں زمین سے غائب نہیں ہوا،‘‘ وہ کہتے ہیں۔ ’’دراصل، میں اور زیادہ فعال ہوگیا ہوں۔ میں آنے والے دنوں میں اس بات کو یقینی بنانا چاہتا ہوں کہ ہم اپنے حلقہ میں ایک فرسٹ کلاس ہسپتال بنوائیں، جو ابھی تک موجود نہیں ہے۔‘‘

ترجمہ نگار: شفیق عالم