پلامو کا زہر آلود پانی

پرینکا کماری ایک تیز دوڑ لگانے والی لڑکی ہیں۔ ان کے والد لال دیو اوراؤں اپنی ۱۸سالہ بیٹی کی رفتار کا تذکرہ فخر سے کرتے ہیں۔ ’’بہت تیز دوڑتی تھی بچپن سے،‘‘ وہ کہتے ہیں۔

یومیہ اجرت پر کام کرنے والے اس مزدور کے چار بچوں میں سب سے بڑی، پرینکا ایس ایس سی جی ڈی (نیم فوجی دستوں کے لیے ہونے والے مشترکہ داخلہ امتحان) کی تیاری کر رہی ہیں۔

’’ہم کو وردی پہننا ہے،‘‘ وہ شرماتے ہوئے کہتی ہیں۔

پریانکا ہر روز ایک ایسے امتحان کے لیے ٹریننگ حاصل کر رہی ہیں جس کے لیے شاید وہ اب اہل ہی نہ رہیں۔ نیم فوجی دستوں میں بھرتی کے لیے ہونے والے میڈیکل ٹیسٹ میں فلوروسس کی جانچ کی جاتی ہے، اور ان کے دانتوں پر موجود داغ اور جوڑوں کا درد (دونوں اس بیماری کی علامات ہیں) ان کی نااہلی کا سبب بن سکتے ہیں۔

گزشتہ نومبر سے انہوں نے اپنے گاؤں کے قریب کھلے کھیتوں میں پریکٹس شروع کی تھی۔ انہیں ۵ء۸ منٹ میں ۱۶۰۰ میٹر کی دوڑ مکمل کرنی تھی۔ ’’پہلا دن ہم ۷ منٹ میں ہی دوڑ گئے،‘‘ پرینکا فخریہ لہجے میں بتاتی ہیں۔

لیکن اس پہلی دوڑ کے بعد ہی گھٹنوں میں درد شروع ہو گیا۔ ان کے والد نے درد کش دوا لینے کا مشورہ دیا، جسے انہوں یہ کہہ کر لینے سے انکار کر دیا کہ ’’اگر میں اسے ایک بار لے لوں گی تو اس کی عادت بن جائے گی۔‘‘ دراصل ان کے آس پاس ہر بالغ شخص ناقابل برداشت درد کی صورت میں درد کش دوا کا سہارا لیتا ہے۔ انہوں نے جھارکھنڈ کے پلامو ضلع میں اپنی پوری زندگی کے دوران یہی دیکھا ہے۔

چُکرو کے لوگ جن میں سے زیادہ تر کا تعلق درج فہرست قبائل سے ہے، فلوروسس کا شکار ہیں۔ یہ ایک لاعلاج بیماری ہے جو پینے کے پانی میں فلورائیڈ کی بہتات کی وجہ سے لاحق ہوتی ہے۔ فلورائیڈ قدرتی طور پر چٹانوں، مٹی اور زیرِ زمین پانی میں پایا جاتا ہے۔ نائس اور گرینائٹ، جو پلامو کے زمین کی اندرونی چٹانوں کا زیادہ تر حصہ تشکیل دیتے ہیں، فلورائیڈ کے حامل معدنیات سے مالا مال ہیں۔ جب پانی ان چٹانوں کے درمیان سے گزرتا ہے، تو فلورائیڈ رس کر اس میں شامل ہو جاتا ہے۔

بیورو آف انڈین اسٹینڈرڈز کے مطابق فلورائیڈ کی قابلِ قبول حد ۱ سے ۵ء۱ ملی گرام فی لیٹر ہے۔ محکمہ آب رسانی کے ایک انجینئر نے نام ظاہر نہ کرنے کی شرط پر بتایا کہ چُکرو میں (فلورائیڈ کا) اوسط اس سے تقریباً تین گنا (۴ سے ۵ء۴) زیادہ ہے۔

علاقے کے ہینڈ پمپوں پر سرخ کراس کا نشان لگایا گیا ہے تاکہ یہ ظاہر کیا جا سکے کہ اس کے پانی میں فلورائیڈ کی مقدار خطرناک حد تک زیادہ ہے۔ اگست ۲۰۲۵ کی ریاستی محکمہ صحت کی رپورٹ کے مطابق، جسے پاری نے دیکھا ہے، چکرو کے تمام ۲۰ ہینڈ پمپوں میں فلورائیڈ کی آلودگی موجود تھی۔

نشانات لگے ہونے کے باوجود، گاؤں والوں کے پاس آلودہ پانی کے ذرائع کو استعمال کرنے کے علاوہ کوئی دوسرا چارہ کار نہیں ہے۔ پانی خریدنے کے متبادل بہت مہنگے ہیں، اور حکومت اس صورت حال سے آنکھیں چرا رہی ہے۔

’’گاؤں کے لوگ جانتے ہیں کہ کون سا پانی غیر محفوظ ہے اور کون سے ذرائع بہتر ہیں… کچھ ہینڈ پمپ محفوظ ہیں،‘‘ پینے کے پانی اور صفائی ستھرائی کے محکمہ کے ایگزیکٹو انجینئر جیسن ہوروہ کہتے ہیں۔ لیکن ہوروہ نہ تو ان پمپوں کی نشاندہی کر سکے، اور نہ ہی فلوروسس سے متعلق آگاہی پھیلانے والے کسی پروگرام کا ثبوت پیش کر سکے۔‘‘

فلورائیڈ کی زائد مقدار کی وجہ سے جسم میں آہستہ آہستہ زہر پھیل جاتا ہے۔ بچوں میں سب سے پہلے دانتوں کا فلوروسس ہوتا ہے، جس سے ان کے دانت داغدار اور بے رنگ ہو جاتے ہیں۔ بعد میں یہ بیماری ہڈیوں کے فلوروسس تک پہنچ جاتی ہے – جس سے جوڑ اکڑ جاتے ہیں، ہڈیاں کمزور ہو جاتی ہیں اور ان کی ساخت بگڑ جاتی ہے۔

’’فلورائیڈ دانتوں، ہڈیوں، اور جہاں بھی کیلشیم موجود ہوتا ہے اس کی جگہ لے لیتا ہے،‘‘ پلامو کے سول سرجن اور چیف میڈیکل آفیسر (سی ایم او) ڈاکٹر انل کمار شریواستو بتاتے ہیں۔

فلورائیڈ رسالہ میں شائع ہونے والی ایک رپورٹ میں بتایا گیا تھا کہ ۲۰۰۸ میں چُکرو گاؤں میں جانچ کیے گئے ہر ۱۰ میں سے آٹھ بچوں میں ڈینٹل فلوروسس پایا گیا تھا، اور سروے کے دوران تقریباً آدھی بالغ آبادی میں ہڈیوں کی بیماری (اسکیلیٹل فلوروسس) دیکھی گئی تھی۔‘‘

’’سال ۲۰۱۶ میں اس وقت کی مرکزی وزیرِ مملکت برائے صحت اور خاندانی بہبود، انوپریہ پٹیل نے پارلیمنٹ کو بتایا تھا کہ ملک بھر میں تقریباً ۲ء۴۶ لاکھ افراد کے فلوروسس سے متاثر ہونے کا شبہ ہے۔ تاہم، اس جریدہ میں لکھنے والے ہندوستانی سائنسدانوں نے یہ تعداد ۲۶ گنا زیادہ یعنی ۶۶ ملین (۶ کروڑ ۶۰ لاکھ) بتائی ہے۔ رپورٹ میں یہ انکشاف بھی کیا گیا ہے کہ ہندوستان دنیا بھر میں زیر زمین پانی کے فلورائیڈ اور آرسینک سے سب سے زیادہ متاثرہ ملک ہے۔‘‘

ہندوستان میں فلوروسس کی روک تھام اور کنٹرول کے لیے ایک قومی پروگرام موجود ہے۔ سنٹرل گراؤنڈ واٹر بورڈ نے جھارکھنڈ کے ۲۴ میں سے ۱۲ اضلاع کو فلورائیڈ کی آلودگی کے لیے نشان زد کیا ہے۔ پلامو ان میں شامل ہے۔

اس کے باوجود جب پاری نے متعدد سرکاری دفاتر کا دورہ کیا – جن میں پلامو کے ڈپٹی کمشنر، دلیپ پرتاپ سنگھ شیخاوت، پینے کے پانی اور صفائی کے محکمہ کے ایگزیکٹیو انجینئر، اور سول سرجن اور چیف میڈیکل آفیسر (سی ایم او) شامل تھے – تو ہمیں بتایا گیا کہ ضلع میں فلوروسس سے متاثرہ لوگوں کی تعداد کا کوئی ریکارڈ دستیاب نہیں ہے۔

پرینکا کے دادا دادی دونوں اس بیماری سے معذور ہو گئے تھے۔ لال دیو کی والدہ سکھنی دیوی ۲۰۱۷ میں بستر تک محدود ہوکر رہ گئی تھیں۔ ایک سال بعد ان کے والد بدھ اوراؤں بھی اس بیماری میں مبتلا ہوگئے۔ ان دونوں کی موت ۲۰۲۱ میں ایک ماہ کے وقفہ سے ہوئی تھی۔

اس کنبے کے تین کمروں کے مٹی کے گھر کے سامنے ایک ہینڈ پمپ کھڑا ہے جس پر سرخ کراس کا نشان لگا ہوا ہے۔ پرینکا اس سے پانی بھر رہی ہیں۔

’’ہم کیا کر سکتے ہیں؟‘‘ لال دیو کہتے ہیں۔ ’’ہم پانی خریدنے کے متحمل نہیں ہیں۔‘‘

وہ معدودے چند لوگ جو گاڑی چلا سکتے ہیں، ۳۰ روپے میں ۲۰ لیٹر فلٹر شدہ پانی خریدنے کے لیے ۱۰ کلو میٹر دور ڈالٹن گنج جاتے ہیں۔

پرینکا ہر روز کھیتوں میں جاتی ہیں۔ لیکن وہ اب آہستہ اور احتیاط سے دوڑتی ہیں، ان کے گھٹنے یہ طے کرتے ہیں کہ وہ خود پر کس حد تک دباؤ ڈال سکتی ہیں۔ وہ اب پوری رفتار سے نہیں بھاگتیں۔ انہوں نے اس رفتار کو امتحان کے دن کے لیے بچا رکھا ہے – ایک آخری کوشش کے لیے جب اس کی سب سے زیادہ ضرورت ہوگی۔

لیکن اس ٹیسٹ کو پاس کرنے کے بعد ایک اور ٹیسٹ ان کا منتظر ہوگا – ان کے خوابوں کی نوکری کے لیے میڈیکل ٹیسٹ۔

نندو سنگھ اپنے سر پر ۵۰ کلو دھان اٹھا لیتے تھے۔ اب وہ سارا دن چارپائی پر پڑے رہتے ہیں۔ ’’میرے پورے جسم میں مسلسل درد رہتا ہے، ایسا محسوس ہوتا ہے کہ مجھے بجلی کے جھٹکے لگ رہے ہوں،‘‘ وہ کہتے ہیں۔

اس ۵۶ سالہ شخص کی ٹانگیں سوجی ہوئی اور ہڈیاں مڑی ہوئی ہیں۔ انہیں اسکیلیٹل فلوروسس کا مرض لاحق ہے۔ ’’گاؤں کے کسی بھی گھر میں جائیں، آپ کو وہاں فلورائیڈ ملے گا،‘‘ وہ مزید کہتے ہیں۔ گاؤں والے فلوروسس کو ’فلورائیڈ‘ کہتے ہیں۔

وہ یاد کرتے ہیں کہ کس طرح وہ اپنی پانچ ایکڑ زمین پر خریف کے موسم میں دھان اور مکئی اور ربیع میں گندم اور سرسوں کاشت کیا کرتے تھے۔ خالی موسم کے دوران، وہ یومیہ اجرت پر مزدوری کرنے کے لیے دوسرے مقامات کا رخ کیا کرتے تھے۔ ’’میں سالانہ دو لاکھ روپے کماتا تھا، میں نے بہت محنت کی ہے۔‘‘

آخری مرتبہ وہ ۲۰۱۵ میں کام کے لیے باہر گئے تھے۔

جب نندو بات کررہے ہوتے ہیں، تو ان کی بہو سارو دیوی قریب کے سرخ کراس کے نشان والے ہینڈ پمپ سے پانی لے کر اندر داخل ہوتی ہیں۔

سارو کی عمر بمشکل ۳۰ سال ہے۔ ان کے جوڑوں، کمر اور سر میں درد رہتا ہے۔ ’’یہ بجلی کے جھٹکے کی طرح محسوس ہوتا ہے،‘‘ وہ کہتی ہیں۔

سی ایم او شریواستو کا کہنا ہے کہ اعصاب سے گزرنے والے برقی سگنلز کے لیے کیلشیم کی ضرورت ہوتی ہے، انہوں نے مزید کہا، ’’اس کی غیرموجودگی میں آپ کو جھٹکا محسوس ہوگا۔‘‘

نندو کا کہنا ہے کہ اب کوئی بھی اپنی بیٹیوں کی شادی اس گاؤں میں نہیں کرنا چاہتا۔ انہیں ڈر ہے کہ وہ معذور ہو جائیں گی۔ ’’ہماری بہو کو دیکھو،‘‘ وہ کہتے ہیں، ’’دیکھو، وہ کتنی کمزور ہو گئی ہے۔‘‘

گھر کے اندر عارضی چولہے پر پانی ابل رہا ہے۔ ’’کچھ لوگ کہتے ہیں کہ پانی ابالنے سے فائدہ ہوتا ہے۔ اس لیے وہ اپنی دو بیٹیوں اور دو بیٹوں کی حفاظت کے لیے پانی ابالتی ہیں۔ ’’بچے یہی پانی پیتے ہیں،‘‘ وہ مزید کہتی ہیں۔

حالانکہ سارو کو معلوم نہیں ہے کہ ابالنے سے پانی میں فلورائیڈ کی مقدار بڑھ جاتی ہے۔

جب ہم بات کر رہے ہوتے ہیں تو بچے جمع ہو کر ہنستے ہوئے کیمرے کے سامنے پوز دینے لگتے ہیں۔ ان کے دانت داغدار اور بے رنگ ہو چکے ہیں۔ یہ وہ پہلی نشانی ہے جو پانی جسم کی گہرائیوں میں سرایت کرنے سے پہلے پیچھے چھوڑ جاتا ہے۔

’’اتنے چھوٹے بچے کہتے ہیں، ’ممی، میرا جسم درد کر رہا ہے، میرا سر درد کر رہا ہے‘،‘‘ سارو کہتی ہیں۔ ان چاروں میں سب سے بڑا ۱۰ سال کا ہے اور سب سے چھوٹا ۲سال کا۔ ’’ہم کیا کر سکتے ہیں، جب درد ختم نہیں ہوتا اور وہ بہت زیادہ روتے ہیں، تو ہم انہیں وہی درد کش دوا دے دیتے ہیں، جسے لے کر وہ سو جاتے ہیں۔‘‘

فلوروسس کی روک تھام ممکن ہے۔ ضرورت صرف پینے کے صاف پانی کی فراہمی کی ہے۔

چیف میڈیکل آفیسر کہتے ہیں، ’’زمین کی سطح کا پانی لیں، خواہ وہ کسی ندی کا ہو یا تالاب کا، اسے فلٹر کریں، اور لوگوں کو دے دیں۔ یہی سب سے بہترین حل ہے۔‘‘

سال ۲۰۱۷ میں فلورائیڈ سے متاثرہ گاؤوں کے ۱۰۰۰ سے زائد لوگوں نے صاف پانی کی فراہمی کا مطالبہ کرتے ہوئے احتجاجی مارچ نکالا تھا۔ نندو بتاتے ہیں کہ اس احتجاج کے بعد رانچی اور دہلی سے آنے والی ٹیموں نے وہاں کا دورہ کیا، ’’انہوں نے گاؤں کے ہر ہینڈ پمپ کی جانچ کی جن کا پانی پینے کے قابل نہیں تھا، اور ان پر سرخ نشان لگا دیا۔‘‘

اسی دوران ریاستی حکومت نے پینے کے پانی کی فراہمی کے لیے ایک پائپ لائن بچھائی۔ وہ مزید کہتے ہیں، ’’ایک سال تک اس سے پانی ملا۔‘‘ کچھ ہینڈ پمپوں پر فلٹریشن سسٹم بھی نصب کیا گیا، ’’لیکن ایک بار جب یہ خراب ہوا تو اسے دوبارہ کبھی ٹھیک نہیں کیا گیا۔‘‘

نندو کہتے ہیں، ’’جو ’صاحب‘ [افسران] یہاں آتے ہیں وہ اپنا پانی ساتھ لاتے ہیں، وہ ہمارا پانی نہیں پیتے۔‘‘

جل جیون مشن کا آغاز ۲۰۲۴ تک ہر دیہی کنبے کو پائپ کے ذریعہ صاف پانی فراہم کرنے کے لیے کیا گیا تھا، جس میں فلورائیڈ جیسے آلودہ عناصر والے علاقوں کو ترجیح دی گئی تھی، لیکن اب اس کی آخری تاریخ کو بڑھا کر دسمبر ۲۰۲۸ کر دیا گیا ہے۔ ہوروہ کہتے ہیں، ‘‘پچھلے ڈھائی سالوں سے مرکزی فنڈنگ روک دی گئی ہے، حالانکہ ریاستی حکموت نے اب قسطوں میں کچھ فنڈز جاری کرنا شروع کر دیا ہے۔‘‘

چُکرو کے بہت سے لوگوں کے لیے شاید اب بہت دیر ہو چکی ہے۔

گاوں والوں کا کہنا ہے کہ گزشتہ ایک دہائی کے دوران شدید فلوروسس میں مبتلا کم از کم ۲۰ سے ۳۰ افراد ہلاک ہو چکے ہیں۔ لال دیو ناموں کا شمار کرنا شروع کرتے ہیں: ’’ستروآ کے گھر کے دو لوگ چلے گئے، نانہو، پھر نوین پال اور جادھو پال، دونوں بھائی…‘‘

’’اوسط مدت حیات کم ہو رہی ہے، لوگ معذور ہو رہے ہیں، وقت سے پہلے بوڑھے ہو رہے ہیں اور مر رہے ہیں،‘‘ وہ کہتے ہیں۔ ’’جب تک انسان چل پھر رہا ہے، وہ چل رہا ہے۔ ایک بار جب وہ چارپائی سے لگ گیا، تو اس کا قصہ ختم۔‘‘

اوپیندر کمار سنگھ کی عمر ۱۰ سال تھی جب انہیں ۶۰۰ روپے معذوری پنشن ملنا شروع ہوئی تھی۔ اب وہ ۱۹سال کے ہیں۔ ان کی ٹانگیں ۲۰۱۲ کے موسم گرما میں ٹیڑھی ہونا شروع ہو گئی تھیں، اس وقت وہ صرف پانچ سال کے تھے۔ ان کی ماں سویتا دیوی یاد کرتی ہیں، ’’بائیں ٹانگ ٹیڑھی ہو گئی اور دائیں چپٹی۔‘‘

آئندہ کئی سالوں تک یہ کنبہ ڈالٹن گنج، رانچی اور یہاں تک کہ راجستھان کے ڈاکٹروں سے رجوع کرتا رہا۔ سال ۲۰۲۲ تک انہوں نے کوشش چھوڑ دی۔ ’’میڈیکل کے کاغذات کا ایک پورا ڈبہ جمع ہو گیا تھا،‘‘ سویتا کہتی ہیں۔ اور ۱۰ لاکھ روپے کا قرضہ بھی چڑھ گیا تھا۔ ایک دن مجھے غصہ آ گیا، میں نے تمام کاغذات اکٹھے کیے اور انہیں آگ کے حوالے کر دیا،‘‘ وہ کہتی ہیں۔

مکھیا انجنا سنگھ کے شوہر، رویندر سنگھ کا کہنا ہے کہ چُکرو کی تقریباً ۱۲۰۰ کی موجودہ آبادی میں سے ۱۰۰ سے زیادہ افراد معذوری کی پنشن حاصل کرتے ہیں۔ ۳ء۸ فیصد کی شرح پر، یہ ہندوستان میں معذوری کی اوسط شرح ۲۱ء۲ فیصد سے تقریباً چار گنا زیادہ ہے۔

اوپیندر چھڑی کی مدد کے بغیر کچھ دور تک چل سکتے ہیں، ’’لیکن اگر میں ۱۰ منٹ چلوں تو تکلیف ہونے لگتی ہے،‘‘ وہ کہتے ہیں۔ انہوں نے اسکول جانا چھوڑ دیا ہے۔

جب بھی کوئی سرکاری ٹیم فلورائیڈ کی آلودگی کے اثرات کا جائزہ لینے کے لیے چُکرو کا دورہ کرتی ہے، تو وہ اوپیندر کو بلاتی ہے۔ وہ کہتے ہیں، ’’وہ ٹانگ کی تصویر لیتے ہیں، دانتوں کی تصویر لیتے ہیں اور چلے جاتے ہیں۔ کبھی کبھی مجھے بہت غصہ آتا ہے۔‘‘ وہ اوپر دیکھتے ہیں اور کہتے ہیں، ’’کم از کم آپ ہم سے بات تو کر رہے ہیں؛ وہ کچھ نہیں پوچھتے۔ بس تصویریں لیتے ہیں اور چلے جاتے ہیں۔‘‘

ہیرامتی دیوی (۷۰) بات نہیں کرنا چاہتی ہیں۔ وہ ایک کمرے کے کچے مکان میں اپنے شوہر گنیش رام (۸۰) کے ساتھ رہتی ہیں۔ تاریک کمرے کے ایک کونے میں ایک چولہا ہے اور دوسرے میں، گنیش رام مچھر دانی کے نیچے ایک چارپائی پر لیٹے چھت کو گھور رہے ہیں۔

ہیرامتی انتہائی مشکل سے کمرے میں ایک جگہ سے دوسری جگہ حرکت کرتی ہیں۔ وہ پہلے اپنی دونوں ہتھیلیاں فرش پر سیدھی ٹکاتی ہیں، پھر ایک ایک انچ کر کے اپنے جسم کو اوپر کھینچتی ہیں۔ ان کی ریڑھ کی ہڈی پوری طرح مڑی ہوئی ہے۔ ان کی انگلیاں، ہاتھ اور پاؤں ٹیڑھے ہوچکے ہیں۔ وہ انہیں دکھاتے ہوئے کہتی ہیں، ’’ہر جگہ درد ہوتا ہے، دیکھو سب کچھ کیسے مڑ گیا ہے۔‘‘ لیکن وہ پھر بھی ہمت نہیں ہارتیں اور چلتی رہتی ہیں۔

’’آپ بیٹھیے، میں انہیں کھانا دے کر آتی ہوں،‘‘ وہ کہتی ہیں۔

وہ خود کو آہستہ آہستہ چولہے کی طرف دھکیلتی ہیں، برتن سے ابلے ہوئے چاول نکالتی ہیں، پتوں والی سبزی ڈالتی ہیں، اور پھر پلیٹ کو ان کے قریب کرنے کے لیے ہاتھ سے دھکیلتی ہیں۔

’’تین دن سے اس بوڑھے شخص نے کچھ نہیں کھایا ہے، میں انہیں زبردستی کھلاتی ہوں؛ اگر انہوں نے نہ کھایا تو وہ زندہ نہیں رہیں گے،‘‘ وہ کہتی ہیں۔

یہ جوڑا کبھی ۱۰ ایکڑ زمین کا جوتدار ہوا کرتا تھا۔ ہیرامتی دروازے سے نظر آنے والے خالی کھیتوں کی طرف اشارہ کرتے ہوئے کہتی ہیں، ’’یہ جتنی بھی خالی زمین آپ کو نظر آ رہی ہے، ہم اس پورے قطعے پر ہل چلایا کرتے تھے۔‘‘ پھر، آہستہ آہستہ، فلوروسس نے انہیں جکڑ لیا۔

’’بہت سے لوگ پہلے ہی مر چکے ہیں، اور اب آپ آئے ہیں،‘‘ وہ کہتی ہیں۔ وہ دروازے کی طرف دیکھتی ہیں۔ ‘‘جائیے، جو زندہ ہے اسے دیکھئے، ہم لوگوں کا تو دن اب پورا ہو گیا۔‘‘