پیراگڑھی کے نلوں سے نکلتا زہر آلود پانی

مغربی دہلی کے پیراگڑھی گاؤں میں رہنے والے ۲۲ سالہ روشن پیشہ سے درزی ہیں، جو اس مسئلہ کے بارے میں بتاتے ہوئے کہتے ہیں، ’’گھر کے نل سے کبھی پیلا (زرد)، کبھی نیلا، کالا (سیاہ) یا جھاگ والا پانی آتا ہے۔ پانی سے سیور جیسی بدبو آتی ہے۔ ہم گزشتہ چھ مہینے سے اسی پانی کا استعمال کر رہے ہیں۔‘‘ وہ مسلسل تین دنوں سے پیٹ درد اور بخار سے پریشان ہیں۔ ان کی چار رکنی فیملی میں کوئی نہ کوئی ہمیشہ بیمار رہتا ہے۔

پیراگڑھی، جو کبھی دہلی کے باہری علاقے کا ایک گاؤں تھا، اب یہاں بھی شہرکاری ہو چکی ہے۔ پیراگڑھی میں رہنے والے درجنوں لوگ ہاضمہ کی خرابی یا بخار جیسے مسائل سے دوچار ہیں۔ جون ۲۰۲۴ سے اس علاقہ کے تقریباً ۱۰۰۰ گھروں میں سے ہر ایک کو میونسپل کارپوریشن کی طرف سے بدبودار پانی کی سپلائی کی جا رہی ہے۔

پیراگڑھی کی گلیوں میں کئی چھوٹے بڑے کارخانے ہیں۔ مقامی لوگوں کے مطابق، تقریباً دو دہائی قبل یہاں بنیادی طور پر پلاسٹک کے سامان بنانے والے کارخانے تھے، لیکن وقت کے ساتھ پینٹ، ڈائی، جوتے، الیکٹرانکس اور موٹر بنانے والی اکائیاں بھی قائم ہو گئیں۔

روشن کے والد بشو ناتھ انھیں میں سے ایک فیکٹری میں دہاڑی مزدوری کرتے ہیں۔ جب وہ ۱۵ سال پہلے بہار سے دہلی آئے تھے، تو پیراگڑھی ان کے لیے سب سے اچھی جگہ تھی، کیوں کہ یہاں انہیں روزگار سے لے کر کھانا اور پانی جیسی بنیادی سہولیات دستیاب تھیں۔

لیکن اب بشو ناتھ کی فیملی سمیت زیادہ تر گھروں کو پینے کے صاف پانی کے لیے بھی اپنی ماہانہ آمدنی کا تقریباً ۱۰ فیصد، یعنی روزانہ اوسطاً ۱۰ روپے خرچ کرنا پڑ رہا ہے۔

یہاں کی ایک اور رہائشی، نیلم بتاتی ہیں، ’’پیراگڑھی میں سبھی بیمار ہیں۔‘‘ پیٹ درد اور بخار کے مریضوں کے علاوہ، یہاں کچھ لوگوں کی جلد پر دھبے بھی ہو گئے ہیں۔ نیلم کا کہنا ہے، ’’یہ سب اس آلودہ پانی کی وجہ سے ہو رہا ہے۔ ہم سپلائی سے ملنے والے آلودہ پانی کا استعمال غسل کرنے، کپڑے و برتن دھونے سے لے کر صاف صفائی جیسے گھریلو کاموں میں کرتے ہیں۔ پینے کے لیے ہمیں باہر سے واٹر کین خریدنا پڑتا ہے۔‘‘

نیلم اس چھوٹے سے تین منزلہ مکان کی مالکن ہیں، جس میں بشو ناتھ کی فیملی کرایہ پر رہتی ہے۔ نیلم سوال کرتی ہیں، ’’صرف پینے کے پانی کے لیے ہم روزانہ ۵۶ روپے کہاں سے لائیں، جب کہ میرے شوہر کافی بیمار ہیں اور میرا بیٹا بے روزگار ہے؟‘‘

ایک پانچ رکنی فیملی کو اوسطاً روزانہ ۲۰ لیٹر پانی کے دو واٹر کین کی ضرورت پڑتی ہے، جسے وہ یہاں کے تین مقامی کاروباریوں سے ۶۰ روپے فی کین (ڈبہ) خریدتے ہیں۔

زیر زمین پانی کی سطح کو برقرار رکھنے کے لیے دہلی آلودگی کنٹرول کمیٹی (ڈی پی سی سی) نے ۲۰۱۹ سے زمین سے پانی نکالنے والا موٹر پمپ لگانے پر پابندی لگائی ہوئی ہے، اس لیے پانی کے مسئلہ کے حل کے لیے پیراگڑھی کے رہائشی واٹر پمپ نہیں لگا سکتے۔ یہ فیملی پانی کی سپلائی کے لیے صرف اپنے گھر کے نل پر منحصر ہے، جس سے آلودہ پانی آنے کے سبب انہیں واٹر کین خریدنا پڑ رہا ہے۔

پچھلے سال ۲۲جولائی ۲۰۲۴ کو سوشل میڈیا پر پیراگڑھی گاؤں کے نلوں سے نکلتے چمکدار نیلے اور جھاگ والے پانی کے کئی ویڈیو وائرل ہوئے۔ ان میں سے ایک ویڈیو میں ایک مقامی باشندہ نے اپنے نل کے پانی کو ’زہر‘ کہا تھا۔

جس کے بعد دہلی کی اس وقت کی وزیر آب آتشی نے دہلی جل بورڈ (ڈی جے بی) کے چیف سکریٹری نریش کمار کو معاملے کی جانچ کا حکم دیا تھا۔ دہلی جل بورڈ نے ایک جانچ کمیٹی بنائی تھی، جس کی رپورٹ ابھی تک عام نہیں کی گئی ہے۔

حالانکہ، اخباروں میں دہلی جل بورڈ کے اہلکاروں کے حوالے سے کہا گیا کہ ایک خراب سیور لائن سے رساؤ کے سبب گاؤں میں پانی کی سپلائی کا مسئلہ پیدا ہوا ہے۔ لیکن مقامی لوگوں کو مسئلہ کی وجہ معلوم تھی۔

پیراگڑھی میں پمپ رپیئر کی ایک دکان پر کام کرنے والے سبودھ پاسوان کہتے ہیں، ’’جے سی بی مشین آئی اور ہمارے سامنے ہی سبھی پائپ لائنیں اکھاڑ دی گئیں۔ انہوں نے پانی کی پائپ لائن اور سیور لائن میں کوئی فرق نہیں کیا۔ تبھی سے ہمارے نلوں سے گندا پانی آ رہا ہے۔‘‘

مقامی لوگوں کے مطابق، پیراگڑھی میٹرو اسٹیشن کی تعمیر کے سبب زیر زمین پائپ لائن اور سیور لائنوں کو نقصان پہنچا، جس سے نہ صرف جل کی سپلائی آلودہ ہوئی، بلکہ سیور لائنوں کا بہاؤ بھی رک گیا۔

گرین لائن میٹرو لائن پر پیراگڑھی میٹرو اسٹیشن کی تعمیر دہلی میٹرو ریل کارپوریشن (ڈیم ایم آر سی) کے چوتھے مرحلہ میں کی جا رہی توسیع کا حصہ ہے۔ یہ اسٹیشن میجنٹا اور گرین لائن میٹرو کے درمیان انٹر چینج (بدلنے کا) پوائنٹ ہوگا۔ تعمیراتی کام مکمل ہونے کے بعد، پیراگڑھی میٹرو اسٹیشن پر مسافروں کی تعداد میں پانچ گنا اضافہ ہونے کی امید ہے۔

کئی کوششوں کے باوجود، علاقہ میں سڑک کھدائی کے سبب پانی کی پائپ لائنوں کو ہوئے نقصان اور آبی آلودگی کے مسئلہ پر دہلی جل بورڈ (ڈی جے بی) اور دہلی میٹرو ریل کارپوریشن (ڈی ایم آر سی) کے اہلکاروں نے کوئی جواب نہیں دیا۔

پرہلاد مزدور ہیں، جنہیں دہلی جل بورڈ (ڈی جے بی) نے ٹھیکہ پر پیراگڑھی اور اس کے آس پاس کی سیور لائنوں کو صاف کرنے کا ذمہ سونپا ہے۔ وہ ہر دن کم از کم چھ سیور مین ہولز کی صفائی کرتے ہیں، جو کالے اور بدبودار گندے پانی سے لبالب بھرے ہوتے ہیں۔ کئی بار مین ہول میں جمع گاد ہٹانے کے لیے انہیں سکشن مشین کا سہارا لینا پڑتا ہے، جب کہ دوسرے موقعوں پر وہ ایک پورٹیبل موٹر، ٹیوب یا پھر بالٹی اور رسی کا استعمال کر کے کیچڑ باہر نکالتے ہیں۔

پرہلاد بتاتے ہیں، ’’یہ سارا سیور کا گندا پانی ٹریٹمنٹ کے لیے کیشو پور ٹریٹمنٹ پلانٹ جانا تھا، لیکن میٹرو کی تعمیر کے سبب سیور لائنیں ٹوٹ گئیں۔‘‘ پرہلاد بہار سے آئے مہاجر مزدور ہیں، جو بدن سے دبلے پتلے، لیکن توانائی سے بھرپور ایک سنجیدہ انسان ہیں۔

دہلی جل بورڈ کا کیشو پور سیویج ٹریٹمنٹ پلانٹ (ایس ٹی پی) گاؤں سے ۳ کلومیٹر دور ہے اور روزانہ تقریباً ۸۰۰۰ لیٹر سیویج کا ٹریٹمنٹ کر سکتا ہے۔

آلودہ پانی کا مسئلہ لگاتار رہنے کی وجہ سے پیراگڑھی گاؤں نے فوری حل کے طور پر یہاں کے مقامی مندر کے احاطہ میں واقع باؤڑی (کنواں) کا سہارا لیا ہے۔ مندر کے پجاری ہری شنکر شاستری کا کہنا ہے، ’’گاؤں میں اب یہی واحد تازہ پانی کا ذریعہ بچا ہے۔ پہلے یہاں کئی کنویں تھے، لیکن وہ سبھی سوکھ گئے۔‘‘ وہ بتاتے ہیں کہ پیراگڑھی کے لوگ اس باؤڑی کے پانی کو مقدس مانتے ہیں۔

پردیپ کوشک، جو اپنی پیدائش کے وقت سے ہی پیراگڑھی میں رہتے آئے ہیں، بتاتے ہیں کہ کچھ ہفتے پہلے مندر کے احاطہ میں پینے کے پانی کے مسئلہ پر مقامی برادری کے رہنماؤں کے درمیان ایک میٹنگ ہوئی تھی۔ پردیپ نے بتایا، ’’اس میٹنگ میں ڈی ایم آر سی اور دہلی جل بورڈ کے لوگ بھی موجود تھے۔ انہوں نے ہمیں بتایا کہ اس علاقہ کی سیور لائنیں بہت پرانی ہیں اور پورے پائپ لائن سسٹم کو بدلنے کی ضرورت ہے۔‘‘

شاستری کے مطابق، دہلی جل بورڈ (ڈی جے بی) کے اہلکاروں نے باؤڑی کا جائزہ لینے کے لیے مندر کا دورہ بھی کیا تھا، تاکہ باؤڑی میں پانی کی سطح کی جانچ کی جا سکے، جو برسوں سے گھٹتی جا رہی ہے۔ صدر پجاری کہتے ہیں، ’’ایسے عام جائزوں کے علاوہ باؤڑی کے لیے آج تک کبھی زیادہ کچھ نہیں کیا گیا ہے۔‘‘

دہلی جل بورڈ کے ذریعہ جون ۲۰۱۴ میں تیار کیے گئے سیویج ماسٹر پلان ۲۰۳۱ کے تحت ریاست میں ۷۴ نئے سیویج ٹریٹمنٹ پلانٹس (ایس ٹی پی) نصب کرنے کی تجویز پیش کی گئی۔ حالانکہ، اس منصوبہ میں پہلے سے نصب کردہ سیویج ٹریٹمنٹ پلانٹ کی بہتری کے لیے کوئی واضح رہنما خطوط نہیں ہے۔ اس میں یہ تسلیم کیا گیا ہے کہ پانی کے ٹریٹمنٹ کے باوجود اکثر خراب پائپ لائنوں کے سبب یہ پانی سے پھر سے آلودہ ہو جاتا ہے۔

دہلی میں موجودہ سیور نیٹ ورک تقریباً ۸۳۰۰ کلومیٹر لمبا ہے، جو اب پرانا اور خستہ ہو چکا ہے۔ پیراگڑھی کے رہائشیوں کو معلوم ہے کہ بھلے ہی آگے چل کر ان سیور لائنوں کو بدلا جائے، لیکن شہری گاؤوں میں یہ تبدیلی سب سے آخر میں پہنچے گی۔

سیور لائنوں کے لیے تیار کیے گئے اس ماسٹر پلان میں پیراگڑھی جیسے شہری گاؤوں کی جگہ نہیں ہے۔ اس درمیان پیراگڑھی میں جہاں ایک طرف کئی سرکاری ایجنسیاں بنیادی ڈھانچہ کی تعمیر یا رکھ رکھاؤ کر رہی ہیں، وہیں دوسری طرف یہاں رہنے والے محنت کش لوگ بد سے بدتر ہوتی جا رہی صحت کی حالت کے حل کے لیے مہینوں سے انتظار کر رہے ہیں۔

ترجمہ نگار: قمر صدیقی