பீராகாரின் விஷ நீர் குழாய்கள்

“வீட்டில் உள்ள குழாய்நீர் சில சமயம் மஞ்சள், நீலம், கருப்பு நிறங்களில் அல்லது நுரையுடன் வருகிறது. நீரில் துர்நாற்றம் வீசுகிறது. இதைதான் நாங்கள் ஆறு மாதங்களாக பயன்படுத்துகிறோம்,” என்கிறார் மேற்கு டெல்லியின் பீராகாரி கிராமத்தில் வசிக்கும் 22 வயதான தையல்காரர் ரோஷன். அவருக்கு தொடர்ந்து மூன்று நாட்களாக வயிற்று வலியும், காய்ச்சலும் உள்ளது. நான்கு பேர் கொண்ட அவரது குடும்பத்தில் மேலும் சிலருக்கு உடல்நிலை சரியில்லை.

ஒருகாலத்தில் தலைநகரின் புறநகர் கிராமமாக இருந்த பீராகாரி, இப்போது நகர்ப்புற விரிவாக்கத்தால் முற்றிலும் மாறிவிட்டது. இங்கு வசிக்கும் டஜன் கணக்கான மக்கள் மாசடைந்த குழாய் நீரை குடித்ததால் வயிறு சார்ந்த தொந்தரவுகள் அல்லது காய்ச்சலால் பாதிக்கப்பட்டுள்ளனர். இப்பகுதியில் வசிக்கும் 1000 வீடுகளுக்கு 2024 ஜூன் முதல் நகராட்சி வழங்கி வரும் நீரில் துர்நாற்றம் வீசுகிறது.

பீராகாரியின் சந்துகளில் டஜன் கணக்கான சிறு, பெரு தொழிற்சாலைகள் உள்ளன. இரு தசாப்தங்களுக்கு முன்பு வரை இங்கு பிளாஸ்டிக் பொருட்கள் உற்பத்தி செய்யும்ஆலைகளே அதிகம் இருந்ததாக உள்ளூர் மக்கள் சொல்கின்றனர். கால போக்கில், பெயின்ட், டைகள், ஷூக்கள், எலக்ட்ரானிக்ஸ், மோட்டார்கள் போன்ற பிற பொருட்களை தயாரிக்கும் தொழிற்சாலைகளும் வரத் தொடங்கின.

இந்த ஆலைகளில் ஒன்றில் தினக்கூலியாக ரோஷனின் தந்தை பிஸ்வாநாத் வேலை செய்கிறார். பீகாரிலிருந்து 15 ஆண்டுகளுக்கு முன்பு டெல்லியின் பீராகாரிக்கு வந்த அவருக்கு உணவு, குடிநீர், வேலைவாய்ப்பு போன்ற அடிப்படை தேவைகளை வழங்கி சொந்த ஊராக உணரச் செய்துவிட்டது.

பிஸ்வாநாத் குடும்பத்தைப் போன்று பீராகாரியின் பெரும்பாலான குடும்பங்கள் தங்கள் மாத குடும்ப வருமானத்தில் இருந்து சுத்தமான குடிநீருக்காக தினமும் ரூ.100 செலவிடுகின்றனர்.

“பீராகாரியில் எல்லோருமே நோயாளிகள்,” என்கிறார் மற்றொரு குடியிருப்புவாசி நீலம். வயிற்று வலி, காய்ச்சலுடன் சிலருக்கு தோளில் சொறி வந்துள்ளது. “எல்லாம் இந்த கழிவு நீரால் தான். நாங்கள் இதைக் கொண்டு வீட்டை சுத்தம் செய்தல், குளித்தல், கழிவறைக்கு பயன்படுத்துதலை செய்கிறோம். குடிநீருக்கு மட்டும் கேனில் வாங்க வேண்டும்.”

பிஸ்வாநாத் குடும்பம் வசிக்கும் குறுகிய மூன்றடுக்கு வீட்டின் உரிமையாளர் நீலம். ”என் கணவர் நீண்ட கால நோயாளியாகவும், மகன் வேலையின்றியும் இருக்கும் போது தினமும் 56 ரூபாய் செலவழித்து என்னால் எப்படி குடிநீர் வாங்க முடியும்?” என நீலம் கேட்கிறார்.

ஐந்து பேர் கொண்ட ஒரு குடும்பத்திற்கு சராசரியாக ஒருநாளுக்கு 20 லிட்டர் கேன், இரண்டு தேவைப்படுகிறது. ஒரு கேன் ரூ.60 என உள்ளூரில் உள்ள மூன்று கடைகளில் ஒன்றில் வாங்க வேண்டும்.

அடிபம்ப் அமைக்கும் பேச்சுக்கே இங்கு இடமில்லை- நிலத்தடி நீர் மட்டத்தை பராமரிக்க டெல்லி மாசு கட்டுப்பாட்டு குழு 2019 முதல் கொண்டு வந்த விதிமுறைகளால் இது தடை செய்யப்பட்டுள்ளது. எனவே குடியிருப்புவாசிகளுக்கு குழாய் நீர் மட்டுமே நீராதாரமாக இருந்தது. இப்போது கேன் தண்ணீரும் வாங்கப்படுகிறது.

பீராகாரி கிராமத்தின் குழாய்களில் நீல நிறத்தில் நுரையுடன் தண்ணீர் வரும் வீடியோக்கள் 2024 ஜூலை 22ஆம் தேதி சமூக வலைதளங்களில் வைரலானது. ஒரு வீடியோவில் கிராமவாசி ஒருவர் குழாய் நீரை ‘விஷம்‘ என்று அழைக்கிறார்.

இதற்கு பதிலளிக்கும் விதமாக டெல்லியின் அப்போதைய நீர்வளத்துறை அமைச்சர் அதிஷி, இது குறித்து விசாரணை நடத்தும்படி டெல்லி நீர் வாரியத்தின் (DJB), தலைமைச் செயலாளர் நரேஷ் குமாருக்கு உத்தரவிட்டார். DJB விசாரணைக் குழு அமைத்து கண்டறிந்தவற்றை வெளியிடவில்லை.

கழிவுநீர் குழாய் சேதமடைந்து கழிவுகள் தண்ணீர் குழாயில் கலந்து மாசுபட்டதாக DJB அதிகாரிகள் கூறியதாக செய்தித்தாள்கள் தெரிவித்தன. ஆனால் உண்மையில் என்ன நடந்தது என்பது எங்களுக்குத் தெரியும் என்று குடியிருப்புவாசிகள் கூறினர்.

“ஜேசிபி (பூமியைத் தோண்டும் இயந்திரம்) வந்து எங்கள் கண் முன்னே அனைத்து குழாய்களையும் பிடுங்கிப்போட்டன. அவர்களுக்கு குடிநீர் குழாய்கள், கழிவுநீர் குழாய்கள் என்ற வேறுபாடு கிடையாது. அவர்கள் சாலையை தோண்டியது முதல் குழாய்களில் மாசடைந்த நீர் வருகிறது,” என்கிறார் பீராகாரி கிராமத்தில் குழாய்களை பழுதுபார்க்கும் சுபோத் பஸ்வான்.

பீராகாரி மெட்ரோ ரயில் நிலைய கட்டுமான பணிக்காக அண்மையில் தோண்டியபோது பூமியில் புதைக்கப்பட்ட குடிநீர் குழாய்கள், பாதாள சாக்கடை கால்வாய்கள் சேதமடைந்தன. இதனால் குடிநீர் குழாய் மாசடைந்ததுடன், கழிவு நீர் குழாய்களிலும் அடைப்பு ஏற்பட்டுவிட்டதாக குடியிருப்புவாசிகள் கூறுகின்றனர்.

பசுமை பாதையில் அமைந்துள்ள பீராகாரி மெட்ரோ நிலையத்தின் கட்டுமானம், டெல்லி மெட்ரோ ரயில் நிறுவனத்தின் (DMRC) நான்காவது கட்ட விரிவாக்கத்தின் ஒரு பகுதியாகும். இந்த நிலையம் மெஜந்தா மற்றும் கிரீன் லைன்களுக்கான பரிமாற்ற புள்ளியாக வெளிப்படும். கட்டுமானப் பணிகள் முடிந்ததும், பீராகாரி மெட்ரோ நிலையத்தில் பயணிகளின் வருகை ஐந்து மடங்கு அதிகரிக்கும் என்று எதிர்பார்க்கப்படுகிறது.

சாலை தோண்டப்பட்டதால் இப்பகுதியில் ஏற்பட்ட குடிநீர் பிரச்னை குறித்து கருத்துகளைப் பெற DJB, DMRC அதிகாரிகளிடம் பல முறை முயற்சித்தும், அவர்கள் பதிலளிக்கவில்லை.

பீராகாரியை சுற்றியுள்ள பகுதியின் பாதாள சாக்கடைகளை சுத்தப்படுத்த ஒப்பந்த அடிப்படையில் பிரஹலாத் என்ற தொழிலாளியை DJB நியமித்துள்ளது. அவர் தினமும் குறைந்தது ஆறு கழிவுநீர் துளைகளை சுத்தம் செய்கிறார், அவை சாக்கடை நீரால் நிரம்பியுள்ளன. பெரும்பாலும், அவர் பாதாள சாக்கடை மூடிகளை தூர்வார உறிஞ்சும் இயந்திரத்தை அழைக்கிறார், சில நேரங்களில் சிறிய மோட்டார், குழாய் அல்லது வாளி, கயிறு மூலம் கசடுகளை அவர் வெளியே எடுக்கிறார்.

"இந்த கழிவுநீர் அனைத்தும் மறுசுழற்சிக்காக கேஷோபூர் சுத்திகரிப்பு நிலையத்திற்கு செல்லும், ஆனால் மெட்ரோ கட்டுமான பணிகள் காரணமாக கழிவுநீர் குழாய்கள் உடைந்துவிட்டன," என்று பீகாரில் இருந்து புலம்பெயர்ந்த தொழிலாளி பிரஹலாத் கூறுகிறார். அவர் மெலிந்த தேகத்துடன் தீர்க்கமானவராக தோன்றுகிறார்.

DJBன் கேஷோபூர் கழிவுநீர் சுத்திகரிப்பு நிலையம் (STP) கிராமத்திலிருந்து 3 கிலோமீட்டர் தொலைவில் அமைந்துள்ளது, அங்கு தினமும் 80,000 லிட்டர் சாக்கடை நீர் சுத்திகரிக்கப்படுகிறது.

நீர் விநியோகம் தொடர்ந்து மாசுபட்டுள்ள நிலையில், பீராகாரி கிராம மக்களுக்கு உள்ளூர் கோயில் வளாகத்தில் உள்ள 'பாவோரி' அல்லது கிணற்று நீர் வரப்பிரசாதமாக அமைந்துள்ளது. தலைமை பூசாரி ஹரி சங்கர் சாஸ்திரி கூறுகையில், "கிராமத்தில் எஞ்சியிருக்கும் ஒரே நன்னீர் ஆதாரம் இதுதான். முன்பு பல கிணறுகள் இருந்தன. ஆனால் அவை அனைத்தும் இப்போது வறண்டுவிட்டன." இந்த கிணற்று நீரை பீராகாரி கிராமவாசிகள் புனிதமாக கருதுவதாக அவர் கூறுகிறார்.

குடிநீர் விவகாரம் தொடர்பாக கோயிலுக்குள் உள்ளூர் சமூக தலைவர்களின் கூட்டம் நடைபெற்றதாக பிறந்தது முதலே பீராகாரி கிராமவாசியாக இருந்து வரும் பிரதீப் கவுசிக் கூறுகிறார். ” DMRC, டெல்லி நீர் வாரியத்தை சேர்ந்தவர்களும் அதில் பங்கேற்றனர், பாதாள சாக்காடை குழாய்கள் மிகவும் பழமையாகிவிட்டதாகவும், ஒட்டுமொத்த குழாய்களையும் மாற்ற வேண்டும் என்றும் அவர்கள் எங்களிடம் கூறினர்,“ என்கிறார்.

சில ஆண்டுகளாக சரிந்து இருந்த கிணற்று நீர் மட்டத்தையும் DJB அதிகாரிகள் ஆராய்ந்தனர். "வழக்கமான ஆய்வைத் தவிர, கிணற்றுக்கு பெரிதாக எதுவும் செய்யவில்லை," என்று தலைமை பூசாரி கூறுகிறார்.

ஜூன் 2014-ல் தயாரிக்கப்பட்ட டெல்லி ஜல் வாரியத்தின் பாதாள சாக்கடை திட்டம் 2031, 74 புதிய கழிவுநீர் சுத்திகரிப்பு நிலையங்களை (STPs) அமைக்க முன்மொழிகிறது. எனினும், பழுதடைந்த குழாய்களால் சுத்திகரிக்கப்பட்ட நீரில் கழிவுநீர் கலந்து மாசுபடுவதாக இத்திட்ட குழுவினர் ஒப்புக்கொள்கின்றனர்.

டெல்லியில் தற்போதுள்ள 8,300 கி.மீ நீளமுள்ள கழிவுநீர் குழாய்கள் பழையதாகவும், சேதமடைந்தும் உள்ளன. கழிவுநீர் குழாய்கள் மாற்றப்பட்டாலும், நகர்ப்புற கிராமங்களுக்கு இறுதியாகவே மாற்றப்படும் என்பதை குடியிருப்புவாசிகள் அறிவார்கள்.

இந்த பாதாள சாக்கடை திட்டத்தில் பீராகாரி போன்ற நகர்ப்புற கிராமங்கள் இணைக்கப்படவில்லை. இதற்கிடையில், கிராமத்தில், பல அரசு நிறுவனங்கள் உள்கட்டமைப்பை உருவாக்குதல் அல்லது பராமரிக்கும் பணிகளை மேற்கொண்டாலும் உழைக்கும் மக்களின் சுகாதார சீர்கேட்டிற்கு தீர்வு காண பல மாதங்கள் காத்திருக்க வேண்டும்.

தமிழில்: சவிதா