मुर्मू के दु गो उल्लू

“ऊ आन्हर ह, तबो तोहरा के देखता”, मदनलाल मुर्मू कहलन. गोल चमचमात लाल आंख हमके मोहित कर देले रहे – एहिजा आस पास में खाली एह आंख के रंग ही गहरा बा न त सभ धूल आ रेत के रंग में डूबल बा. हम ओकरा भीरी जा के ओकर फोटो लेल चाहत रहीं, लेकिन ऊ दूर भाग गईल. हम फेर ओकरा भीरी गइनी आ एह बार मेहनत सफ़ल हो गईल.

मदन लाल मुंह से कुछ आवाज निकालत रहन, जवन कि कुछ संकेत रहे आ उल्लू ओकर जवाब देत लागत रह सन. ऊ आपन दुनो पालतू उल्लू से हमार परिचय करवलन, सिद्धू मुर्मू और कान्हु मुर्मू. “ई लोग हमरा परिवार के हिस्सा ह”, ऊ बतवलन.

बिहार के बांका जिला में, जब हम कहानी के खोज में चिहोटिया गांव से गुजरत रही थी तब मदन लाल के देखनी. ऊ जमीन प बइठ के झाड़ू बनावे में व्यस्त रहन. हम तनी देर उनसे बतियइनी, ओकरा बाद ऊ हमके आपन बस्ती के किनारे ले गईलन. उहंवा देखनी कि उनका घर के बाहर दु गो उल्लू पहिले हमके आ फिर आपस में एक दूसरा के घूम के देखत रह सन. (उल्लू सब के रात में ठीक से सब दिखाई देला, दिन में दिखाई ना देवेला).

ई दुनो के नाम दु गो प्रसिद्ध आदिवासी नेता, सिद्धू-कान्हु के नाम प रखल गईल बा. ऊ लोग 1855 में अंग्रेज़न के खिलाफ़ संथाल विद्रोह के नेतृत्व कईले रहन जा. ऊहो लोग मुर्मू रहन जा – जवन कि एगो संथाल जनजाति ह. (मदनलाल हमके बतवलन कि ऊ तिलक मांझी आ उनका जिंदगी से बहुत प्रभावित हवन, मांझी एगो आदिवासी नेता रहन जे 1784 में अंग्रेजन के खिलाफ़ हथियार उठवले रहन, मंगल पांडे के 1857 के विद्रोह के कई दशक पहिले ही).

मदनलाल, संथाल जनजाति के हवन आ अभी उनकर लगभग 40 साल के आयु बा. उनका भीरी आपन कवनो जमीन नइखे. ऊ माटी आ फूस के बनल एगो कोठी वाला झोपड़ी में अपना मेहरारू साथे रहेलन. ई झोपड़ी जवना जमीन प बनल बा उहो उनकर ना ह, ऊ बिहार के बांका जिला के चिहोटिया गांव के कक्वाड़ा टोला के पास के वन विभाग के जमीन ह.

ऊ आस-पास मिले वाला कोशा घास से झाड़ू बनावेलन आ ओके पास के गांव में 40 रूपया झाड़ू के हिसाब से बेचेलन. एकरा अलावे बोवाई आ कटाई के मौसम में ऊ गांव के खेत में कामो करेलन.

हम उनसे पूछनी कि, ई अनोखा चिड़िया उनके पाले खातिर कहां से मिलल? त उनकर जवाब रहे कि, “एक दिना हम जंगल में लकड़ी बीनत रहीं, त एहनी के ओहिजे देखनी आ अपना साथे घरे ले अईनी”.

“हमनी के एह दुनो के विशेष देखभाल करीला जा. उल्लू बहुते पवित्र होल सन काहे के ई लक्ष्मी जी के सवारी ह,” लगे के झोपड़ी के बाहर बईठल मुर्मू के एगो पड़ोसी कहलन. मुर्मू हामी में मुड़ी हिलईलन. आ एकरा अलावा जब ई बड़ होईहसन त एहेनी के दाम बहुत बढ़ जाई.

अभी कान्हु आ सिद्धू लगभग एक महीना के हवन सन, जबकि दुनो के वजन एक किलो के आस-पास बा, मदन लाल बतवलन. एहनी के अउर बड़ हो जइहनसन त, एहनी के खूबसूरती भी बढ़ी आ वजन भी,” ओहनी के ओरी खुशी से देखत ऊ आगे बतवलन. एहनी के अभी बच्चा बाड़न सब तबो पंख बड़-बड़ बा. अभी त छोट बाड़न सन त उड़ ना सकेलसन, एहिसे पिंजरा में अभी नइखे धईल एहनी के. लेकिन एहनी के पैर बहुत मज़बूत बा.

मदन लाल के उम्मीद बा कि अच्छा से बड़ होखला प एहनी के वजन 6-7 किलो तक पहुंच जाई. अगर अइसन भईल त ओहनी के खूब बड़ आ सामान्य उल्लू से भारी हो जईहसन, जेकर वजन लगभग 3 किलो के आस-पास होला.

कान्हु आ सिद्धू मांसाहारी हव सन. मदन लाल कहलन कि, “हम एहनी के थोड़ा भात दीहिला, लेकिन एहनी के कीड़ा पसंद ह.” मदन लाल के उम्मीद बा कि एक महीना के अंदर एहनी के चूहा जइसन शिकार पकड़े लगीहसन.

ई पहिला बेर नइखे कि एह गांव में कोई उल्लू पलले बा, मुर्मू के पड़ोसी बतवलन कि, दलाल या ब्रोकर आ के एहिजा से चिड़िया खरीदले रह सन. एह घड़ी भी मंडल के उम्मीद बा कि कुछ दलाल अईहसन आ हर उल्लू के 50 से 60 हजार लगईह सन. ओकरा बाद एहनी के का होई पता ना. “हमरा ठीक से नइखे मालूम लेकिन, ओहनी के शायद एहनी के गुर्दा के इस्तेमाल करेल सन… डॉक्टर प्रयोगशाला में उल्लू पर प्रयोग करेलनजा.”

आ एहीसे सिद्धू आ कान्हु फेर से शिकार हो जइह सन. एह बार अपने ही लोग के हांथे.

अनुवाद: सिल्की