رباریوں کے کارواں سے غائب ہوتے اونٹ

سڑک ختم ہونے سے پہلے ہی جی پی ایس سنگل غائب ہو جاتا ہے۔

ناگپور سے جنوب کی سمت میں، ایک گھنٹہ کی مسافت پر واقع بھنسولی (ساوَنگی) گاؤں کے باہر تارکول کی ایک پتلی سڑک آگے ایک دھول بھرے راستے میں گم ہو جاتی ہے، اور کپاس اور مٹر کے کھیتوں سے ہو کر گزرتی ہے۔

وہاں، کِرسَن جگمال رباری (۴۵) ایک موٹر سائیکل پر انتظار کر رہے ہیں۔ وہ کہتے ہیں کہ ہمیں اپنی چار پہیہ گاڑی کو یہیں چھوڑنا پڑے گا۔ ان کے قافلہ میں تقریباً ۲۵۰۰ بھیڑ اور بکریاں ہیں، جنہوں نے اس راستے میں آنے والی ایک چھوٹی سی ندی کو پار کیا ہے۔ اب ان کے پاس کار سے پہنچنا ممکن نہیں ہے۔

دوسری جانب، کرسن کے لگاتار سفر کرنے والے ڈیرہ میں شامل چار کنبے آگے کی جانب بڑھ رہے ہیں۔ ان کی ضروریات کے معمولی سامان، جیسے چارپائیاں، اسٹیل کے برتن، کپڑوں کے گٹھر، پانی کے گھڑے، رسیاں، جال، اور بکسے دھات کی دو بیل گاڑیوں پر لدے ہوئے ہیں، جنہیں مضبوط بیل کھینچ رہے ہیں۔ ان بیل گاڑیوں کو عورتیں ہانک رہی ہیں، جو تین جاموں – چولی (بلاؤز)، گھاگھرا (اسکرٹ)، اور لُڈکی (پردہ کے لیے استعمال ہونے والی اوڑھنی) – پر مشتمل اپنی روایتی پوشاک میں ملبوس ہیں۔ بھیڑ بکریوں کے چھوٹے بچے ممیا رہے ہیں، جب کہ کتے کا ایک بچہ رسی کو کھینچ رہا ہے، شاید وہ ریوڑ کو سنبھالنے کی مشق کر رہا ہے جو اسے آگے جا کر کرنا ہے۔

کارواں روانہ ہو چکا ہے۔

جب وہ اپنی مقررہ منزل تک پہنچ جاتے ہیں، جہاں انہیں اگلے تین چار دنوں تک قیام کرنا ہے، تو عورتیں اور مرد اپنے بندھے ہوئے سامانوں کو کھولتے ہیں؛ بیلوں کو گاڑیوں سے کھول دیا جاتا ہے؛ ان بیل گاڑیوں کے سہارے خیمے تان دیے جاتے ہیں؛ عورتیں کھیت پر موجود کھلے کنویں سے پانی بھرنے چلی جاتی ہیں۔

لیکن ایک چیز کی کمی ہے۔ کارواں میں کوئی اونٹ دکھائی نہیں دے رہا ہے، جو کہ پہلے خانہ بدوش برادری کی خاص پہچان ہوا کرتے تھے۔ ان کی غیر موجودگی کی وجہ سے ہمارے چہروں کی حیرانی کو کرسن بھانپ لیتے ہیں۔

’’میں نے انہیں پچھلے سال ہی بیچ دیا،‘‘ وہ آہستہ سے کہتے ہیں، ان کے چچا جے مال رباری بھی ان کے بغل میں بیٹھتے ہوئے حمایت میں اپنا سر ہلاتے ہیں۔ ’’ہم آئندہ اب صرف بیل گاڑیاں ہی استعمال کریں گے۔ یہاں پر موجود کوئی بھی آدمی اب اونٹ نہیں رکھے گا۔‘‘

آبائی طور پر گجرات کے کچھّ-بھُج خطہ سے تعلق رکھنے والے رباری خانہ بدوش نسلوں سے اپنے اونٹوں کے ساتھ ودربھ کا دورہ کرتے رہے ہیں، جہاں کا زرعی منظرنامہ اب تیزی سے تبدیل ہو رہا ہے۔ رباری لوگ سال میں ایک یا دو بار مقامی کاروباریوں کو بڑی تعداد میں بکرے اور بھیڑ بیچتے ہیں، یہی ان کی آمدنی کا ذریعہ ہے۔ جیسا کہ کرسن اپنی ملی جلی ہندی اور کچھّی زبان میں کہتے ہیں، ’’یہ بکریاں ہی ہماری چلتی پھرتی سمپتّی [سرمایہ] ہیں بھائی۔‘‘

یہ اونٹ کسی زمانہ میں نہ صرف برتنوں اور بستر کو ڈھونے کا کام کرتے تھے، بلکہ ان چھوٹے چھوٹے بچوں کو بھی لاد کر چلتے تھے جو ان لمبے راستوں پر پیدل چلنے کے قابل نہیں ہوتے تھے۔ ان کی اونچائی کی وجہ سے لوگ انھیں کئی میل دور سے ہی دیکھ لیتے تھے؛ ان کی گھنٹیوں کی آواز کسی نئے علاقہ میں ان کی آمد کا اعلان ہوا کرتی تھی۔ قافلوں کی نقل و حرکت اور پہچان انہی اونٹوں سے تھی۔

اونٹ اس برادری کے لیے بیحد ضروری کام کاجی جانور رہے ہیں – صرف سامان ڈھونے کے لیے نہیں، بلکہ ان کی موسمی خانہ بدوش زندگی کی بنیاد بھی تھے۔ مہاراشٹر میں رباری چرواہے رات کے قیام کے درمیان گھر کا سامان ڈھونے کے لیے نر اونٹوں کا استعمال کرتے تھے۔ ہر سال کی اپنی مہاجرت میں وہ سینکڑوں کلومیٹر کا راستہ طے کرتے ہوئے کٹے ہوئے کپاس کے کھیتوں، جنگلوں کی کنارے اور کھلے چراگاہوں سے گزرتے تھے۔

اب وہ ان کے بغیر ہی چلنا سیکھ رہے ہیں۔ پچھلے کچھ سالوں میں بار بار درج ہونے والے پولیس معاملوں نے مہاراشٹر بھر کے رباری چرواہوں کو پریشان کیا ہے، جس کی وجہ سے کئی بار اونٹ ضبط کیے گئے اور انہیں واپس بھیج دیا گیا۔ اہلکاروں اور کچھ کارکنوں نے کبھی کبھی یہ الزام بھی لگایا کہ سامان ڈھونے والے اونٹوں کو مارنے کے لیے لے جایا جا رہا تھا یا ان کی نقل و حمل ٹھیک طرح سے نہیں ہو رہی تھی۔ جب کہ حقیقت یہ ہے کہ چرواہے ان اونٹوں کا استعمال اپنی فیملی اور ریوڑ کو ایک جگہ سے دوسری جگہ لے جانے کے لیے کام کاجی جانوروں کی طرح کرتے ہیں۔

یہیں سے پاس ہی کے ایک معاملہ میں، رباری برادری کے ۵۰ سے زیادہ اونٹ ضبط کر لیے گئے تھے۔ ان پر غیر قانونی طریقے سے نقل و حمل کا الزام لگایا گیا تھا – جب کہ رباریوں کے پاس اونٹوں کے مالک ہونے کے کاغذات بھی تھے اور یہ ثابت کرنے کے ثبوت بھی کہ ان کا مقصد صرف مہاجرت کرنا تھا۔ پڑھیں: پولیس کی حراست میں: کچھّ کے ریگستانی جہاز

حال ہی میں، دسمبر ۲۰۲۵ میں بھی، شمالی مہاراشٹر کے دھولے ضلع میں ۳۰ سے زیادہ اونٹ ضبط کر لیے گئے تھے۔ وہ اب بھی حراست میں ہیں، اور ان کے مالکوں کو تشویش ہے کہ چارے کی کمی کے باعث ان میں سے کچھ کی موت ہو سکتی ہے۔

ودربھ کے رباری قائدین ہر بار کی طرح دھولے پہنچ گئے، جیسا کہ وہ ہر بار کرتے ہیں، جب بھی پولیس ان کے اونٹ ضبط کرتی ہے۔ کرسن کہتے ہیں کہ اس بے وجہ کی پریشانیوں اور اونٹوں کو واپس لانے میں ہونے والی تاخیر سے اونٹ مالک کافی پریشان ہیں۔ وہ کہتے ہیں، ’’اس میں پیسہ بھی جائے گا اور وقت بھی، اور پریشانی جو ہوگی وہ الگ۔‘‘

اس لیے اب ودربھ اور وسطی ہندوستان کے دوسرے علاقوں میں زیادہ تر رباری چرواہے اپنے اونٹوں کو چھوڑتے جا رہے ہیں۔

کرسن ساتھ میں یہ بھی کہتے ہیں کہ اونٹوں کو رکھنا اب بہت مشکل اور مہنگا ہو گیا ہے۔

پچھلے سال (۲۰۲۵) تک کرسن کے ڈیرے میں تین اونٹ تھے۔ اب ایک بھی نہیں ہے۔ کرسن اندازہ لگا کر کہتے ہیں، ’’ناگپور اور وردھا میں شاید اب بھی پانچ خاندانوں کے پاس اونٹ ہوں گے۔ پہلے تقریباً ۲۰۰۰ اونٹ تھے۔ اب مٹھی بھر ہی بچے ہیں۔‘‘ وہ ہم سے ان پھیلے ہوئے کپاس کے کھیتوں کے درمیان بات کر رہے ہیں، جہاں ان کا ڈیرہ ابھی ابھی ٹھہرا ہے۔ وہ بتاتے ہیں کہ ان کی بھیڑ بکریوں کے ریوڑ کہیں آس پاس چر رہے ہیں۔

ناگپور میں واقع سنٹر فار پیپلز کلکٹیو کے سجل کلکرنی کہتے ہیں، ’’ودربھ کے زیادہ تر رباریوں نے اپنے اونٹ مہاراشٹر کے باہر اپنے جاننے والے لوگوں کو دے دیے ہیں، جہاں انہیں ایسی پریشانیوں کا سامنا نہیں کرنا پڑتا۔‘‘ اب انہیں خریدنے کے لیے بہت کم لوگ تیار ہوتے ہیں۔ جو کبھی ان کی ملکیت ہوا کرتی تھی، وہ اب بوجھ بن گئی ہے۔ کرسن نے اپنے ہر اونٹ کو ۳۰ سے ۳۵ ہزار روپے کے بیچ چھتیس گڑھ میں رہنے والی رباری دوستوں کو فروخت کر دیا ہے۔ وہیں ایک بیل کی قیمت زیادہ، یعنی تقریباً ۵۰ ہزار روپے ہوتی ہے۔ اس لیے یہ کوئی فائدہ کا سودا نہیں ہے، بلکہ مجبوری میں کیا گیا ایک عملی سودا ہے۔

اونٹ اس علاقہ کے لیے بہت مفید جانور ہیں۔ وہ خشک حالات کا بھی سامنا کرنے کے قابل ہوتے ہیں اور کم چارے میں بھی بوجھ ڈھو سکتے ہیں۔ وہ نیم، ببول، پیپل جیسے مقامی درختوں کی پتیاں بھی چر لیتے ہیں۔ جن جگہوں پر سڑکیں نہیں تھیں اور ٹریکٹر یا ٹرک چلانا مشکل تھا، وہاں ایسی برادریوں کے لیے اونٹ ایک بڑا سہارا تھے۔

لیکن اب چارہ کھوجنا مشکل ہوتا جا رہا ہے۔ کھیتی کے طور طریقے بدل گئے ہیں؛ کھیتوں میں لمبی لمبی باڑ لگ گئی ہے، فصل کا بچا ہوا حصہ جلدی صاف کر دیا جاتا ہے، اور چرائی کے راستے کم ہوتے جا رہے ہیں۔ رباری خاندانوں کی تعداد بھی بڑھی ہے۔ ان کے قافلہ میں پہلے جہاں تین خاندان تھے، اب سات ہو گئے ہیں، جس سے زمین پر دباؤ اور بڑھ گیا ہے۔

بوڑھے ہوتے اونٹوں کی جگہ جوان اونٹ لانا بھی مشکل ہو گیا ہے۔ ودربھ کے رباری قائدین میں سے ایک، مشرو ماما کہتے ہیں، ’’کچھّ سے اونٹ لانا بہت مشکل ہو گیا ہے۔ بڑی پرابلم ہے۔‘‘

سجل کلکرنی کہتے ہیں کہ مسئلہ کا ایک حصہ ضابطوں کے بارے میں پھیلے بھرم بھی ہیں۔ بار بار ہونے والی ضبطی اور کاغذی اڑچنیں دراصل چرواہوں کے طرز زندگی کو ٹھیک سے نہ سمجھ پانے کی طرف اشارہ کرتی ہیں۔

اونٹ کوئی آسائش کی چیز نہیں ہے؛ وہ ان چرواہا برادریوں کے لیے آنے جانے کا ذریعہ رہے ہیں جو ان بڑے کھیتی باڑی والے علاقوں میں مسلسل گھومتے رہتے ہیں۔

ہر سال کرسن رباری کا ڈیرہ مشرقی ودربھ میں ایک لمبا چکر لگاتا ہے – ناگپور سے سندھی، بیلا اور بوٹی بوری؛ پھر بھنڈارا، موہاڑی اور تُمسر؛ اور کامٹھی، کنہان اور کونڈھالی کے آس پاس سے ہو کر واپس۔ ان کی یہ آمد و رفت فصل کٹنے کے موسم کے ساتھ چلتی ہے، اور ہر پڑاؤ کا ایک مقصد ہوتا ہے۔

بھیڑ بکریاں کٹائی کے بعد کھیتوں میں بچی فصل کے حصے کھاتی ہیں۔ ان کے فضلہ سے مٹی کو کھاد ملتی ہے اور زمین زرخیز بنتی ہے۔ اس لین دین کو ’پیننگ‘ کہا جاتا ہے۔ یہ ایک روایتی زراعت-چرائی چلن ہے، جس میں چرواہے اپنے ریوڑ کو کسانوں کے کھیتوں میں – اکثر کھلے میں اور جال سے گھیر کر – کچھ وقت کے لیے ٹھہرتے ہیں، تاکہ وہاں غذائیت سے بھرپور کھاد جمع ہو سکے۔ کسان اس سروس کے لیے رباریوں کو تھوڑے پیسے دیتے ہیں۔ ان کا کہنا ہے کہ ریوڑ کے گزرنے کے بعد کھیت کی مٹی کی بناوٹ بہتر ہوتی ہے اور پیداوار بھی بڑھتی ہے۔

چرواہوں، مٹی اور فصلوں کے درمیان یہ تال میل ایک طرح کا حیاتیاتی لین دین ہے، جو معاش اور کھیتی – دونوں کو سہارا دیتا ہے۔

کرسن کہتے ہیں، ’’بھیڑوں کے گزرنے کے بعد مٹی بہتر ہو جاتی ہے۔‘‘ یہی وجہ ہے کہ رباری اتنے لمبے عرصہ سے اس علاقہ میں ٹکے رہے ہیں۔ ’’یہاں کے کئی کسانوں سے ہماری دوستی ہے، وہ ہمیں خود بلاتے ہیں۔‘‘ لیکن اونٹوں کے بغیر ان کی یہ آمد و رفت بدل رہی ہے۔ بیل گاڑیاں کم ہیں، انہیں اکثر مرمت کی ضرورت پڑتی ہے، اور وہ ایک دن میں کم دوری طے کرپاتی ہیں۔ جن راستوں پر اونٹوں کے ساتھ چلنا آسان تھا، وہ اب مشکل یا پہنچ سے باہر ہو گئے ہیں۔ اونٹ ندیوں، جنگلوں، چھوٹے چھوٹے ٹیلوں اور مشکل راستوں کو آسانی سے پار کر لیتے تھے۔ کرسن کہتے ہیں، ’’ہم عام طور پر کچے راستوں سے ہی چلتے تھے،‘‘ اور پھر آگے کہتے ہیں، ’’اب ویسا کرنا مشکل ہو گیا ہے۔‘‘

دوپہر کی دھوپ لوہے کی صندوقوں اور بندھے ہوئے بستروں پر پڑ رہی ہے۔ گھونگھٹ اوڑھے رباری عورتیں اپنے کاموں میں لگ جاتی ہیں۔ بیل بھی سر جھکا کر کھڑے ہیں۔

اونٹوں کے بغیر ہی یہ کارواں یہاں دو دن رکے گا، پھر آگے بڑھ جائے گا۔

ترجمہ نگار: قمر صدیقی