किरसन के कारवां से ऊंट काहे गायब हो गइलन?

सड़क से पहिले जीपीएस सिग्नल गायब हो जाला.

नागपुर से दक्षिण के ओर एक घंटा दूर स्थित भंसोली (सावंगी) गांव के बाहर एगो पतला डामर के पट्टी धूल भरल रास्ता में बदल जाला आ कपास आ अरहर के खेतन के बीच में एगो रेखा लेखिन खिंच गईल बा.

किरसन जगमाल रबारी एगो मोटरबाइक पर इंतजार कर रहल बाड़ें. किरसन (45) जोर देलें कि हमनी के आपन चारपहिया गाड़ी एइजे छोड़ दिहल जाओ. उनकरा के कारवां में लगभग 2,500 भेड़ आ बकरी शामिल बा जवन सड़क पर एगो उथला नाला के पार कर चुकल बा आ अब कार से ओइजा ले ना पहुंचल जा सकेला.

दूसरी ओर, चार गो परिवार – किरसन के लगातार चले वाला डेरा – चल रहल बा. बरियार बैल लोहा के दू गो गाड़ी खींच रहल बाड़ें सन, जेमे उनकर अलग-अलग सामान जईसे – चारपाई, स्टील के बर्तन, बंधल कपड़ा, घड़ा, रसरी, जाल आ संदूक रखल बा. महिला लोग आपन तीन पीस वाला पारंपरिक पोषक -चोली, घाघरा आ लुड़की (घूंघट) पहिनले लोहागाड़ी हांक रहल बाड़ी. भेड़ आ बकरियन के बच्चा में-में कर रहल बाड़ें सन; एगो पिल्ला रसरी से बन्हाइल जा रहल बा आ पशुअन के मैनेजर बने के अभ्यास कर रहल बा.

कारवां चल रहल बा.

जब उ लोग अपनी निर्धारित गंतव्य तक पहुंच जाला, जहां अगिला तीन-चार दिन बितावे के बा, त मेहरारू आ आदमी लोग आपन सामान खोल देला, बैलन के गाड़ियन से निकाल दिहल जाला, गाड़ी तम्बू बन जाले, आ महिला लोग खेत में खुलल कुआं से पानी ले आवे शुरू कर देवेलीं.

बाकिर कुछ गायब बा. कारवां में कवनो माल ढोए वाला ऊंट नईखे – जवन पशुपालक समुदाय के स्थायी प्रतीक होला. उनकर गायब भईल एकदम साफ बा आ किरसन हमनी के चेहरा पर ई भाव देख लेवेलें.

“हम पिछला साल ओके बेच दिहनी,” उ मुस्करात के कहेलन, जबकि उनकर चाचा जैमाल रबारी ओनकरे लगे बईठल मुड़ी हिलावेलें. “अब से हमनी के खाली बैल के इस्तेमाल कईल जाई. एइजा अब केहू ऊंट ना राखी.”

पीढियन से – मूल रूप से गुजरात के कच्छ-भुज इलाका के पशुपालक – रबारी लोग विदर्भ के बदलत खेतीबाड़ी के हालात में ऊंटन के संघे चलत रहल आईल बा. रबारी (जेके रेबारी भी कहल जाला) लोग साल में एक चाहे दू बेर स्थानीय व्यापारी नेटवर्क के नर बकरियन आ भेड़न के थोक में बेच के आपन आय कमाएलें. किरसन आपन कच्छी भाषा में हिंदी मिलावत के कहेलन, “ये बकरियां ही हमारी चलती-फिरती संपत्ति हैं भाई [ई बकरिए कुल हमनी के चलत-फिरत संपत्ति बा भाई जी].”

एक समय रहे जब ऊंट खाली बर्तन आ बिस्तरे ना ढोयें सन, संघे में छोट बच्चन के भी ले जाएं, जे लम्बा दूरी ले ना जा सके. उनकर ऊंचाई के वजह से उ लोग दूरे से देखाई पड़े, उनकी घंटियन के आवाज कवनो नया बसेरा में ओ लोगन के प्रवेश के मुनादी जइसन रहे. उ कुल पहचान के संघे-संघे चलत जाए के भी प्रतीक रहें सन.

ऊंट ए समुदाय के जरूरी कामगार पशु हवे, एकर इस्तेमाल खाली परिवहन खातिर नईखे, बल्कि ई बदलत मौसमी चक्र में पशुपालकन खातिर और भी कई काम करेला. महाराष्ट्र में, रबारी गड़ेरिया लोग नर ऊंट के इस्तेमाल रात के डेरा ले घरेलू उपकरण ले जाए खातिर भी करें; एमे उनकरा के सालाना प्रवास के सैकड़ों किलोमीटर भी रहे, जेमे कपास के तुड़ाई, जंगल के सीमा आ खुला चारागाह होखल करे.

अब उ लोग ऊंटन के बिना चलल सीख रहल बा. हाल के सालन में कई-कई बेर पुलिस रबारी चरवाहा लोगन के कई गो मामलन में परेशान कईलस ह, जेमे ऊंट के जब्त कर के दूसरी जगह भेज दिहल गईल रहे. अधिकारी आ कार्यकर्ता लोग कबो-कबो आरोप लगवले बा कि माल ढोए वाला ऊंटन के बूचड़खाना या फिर गलत परिवहन खातिर भेजल जात रहे – जबकि तथ्य ई बा की उ लोग ऊंटन के इस्तेमाल आपन परिवार आ झुण्ड के ले जाए खातिर कामकाजी पशु के रूप में करेला.

एइजा से उ जगह ढेर दूर नईखे, जहवां रबारी समुदाय के 50 से अधिक ऊंटन के जब्त कर के रखल गईल रहे आ अवैध परिवहन के आरोप लगावल गईल रहे – हलांकि, रबारी लोगन के लगे आपन स्वामित्व के देखावे आ ई साबित करे खातिर दस्तावेज रहे कि उनकर मकसद प्रवास रहे. पढ़ीं: पुलिसिया कैद में कच्छ के ऊंट

हाले में दिसम्बर 2025 में भी अइसने भईल, जब महाराष्ट्र के धुले जिला में 30 से अधिक ऊंट पकड़ लिहल गईल; आ अब्बो हिरासत में रखल गईल बा, ओकर मालिक लोग चिंता में बा कि बिना चारा के ओमे से कुछ मर जईहें सन.

जइसहीं पुलिस ओ लोगन के ऊंटन के जब्त करेले, विदर्भ में रबारी के नेता लोग उहां भागेला, जइसे अबकी ऊ लोग धुले पहुंचल. किरसन के कहनाम बा कि ऊंट मालिक लोग बेफालतू के उत्पीड़न आ आपन ऊंट वापस मिले में होखे वाला देरी से बहुत परेशान बाड़ें. “उसमें पैसा भी जायेगा और समय भी, और परेशानी होगी वो अलग [ओमे पैसो लागेला आ समय भी, परेशानी जवन होला उ अलग से],” उ कहेलन.

त अब विदर्भ आ मध्य भारत के अधिकांश चरवाहा लोग ऊंटन के छोड़ रहल बाड़ें.

“ऊंट राखल अब बहुत मुश्किल आ महंग हो गईल बा,” किरसन कहेलन.

पिछला साल (2025) ले किरसन के डेरा में तीन गो ऊंट रहें सन. अब एक्को नईखे बाचल. “नागपुर आ वर्धा में शायद पांच गो परिवार अब्बो ऊंट रखले बाड़ें सन,” किरसन के अंदाजा बा. “पहिले कम से कम 2,000 गो रहें सन, अब शायद कुछे बचल बाड़ें सन.” उ अपने डेरा में हमनी से बतिया रहल बाड़ें जवन दूर ले फइलल कपास के खेत के बीच में बसल बा. उनकर भेड़ आ बकरी के झुण्ड कहीं बाहर चर रहल बा, उ बतावेलन.

“विदर्भ के रबारी लोगन के अधिकांश ऊंट महाराष्ट्र के बाहर अपने लोगन के सौंप दिहल गईल बा, जहां उनकरा के कवनो उत्पीड़न ना झेले के पड़ेला,” नागपुर के सेंटर फॉर पीपल्स कलेक्टिव के सजल कुलकर्णी कहेलन. अब बहुत कम लोग ऊंट खरीदे के इच्छुक बाड़ें. जवन कबो संपत्ति रहे, अब उ जिम्मेदारी बन गईल बा. किरसन आपन हर ऊंट छत्तीसगढ़ में रबारी दोस्तन के लगभग 30,000 से 35,000 रूपया में बेच दिहलें. एगो बैल के दाम एसे काफी जादे, लगभग 50,000 रूपया ले बा – त ई कवनो फायदेमंद विकल्प त नईखे, हं व्यवहारिक जरुर बा.

ऊंट एही वातावरण खातिर बनल बाड़ें सन – सूखा सहे में सक्षम आ बिन जादे भोजन के भारी बोझा उठावे में समर्थ. उ कुल नीम, बबूल, पीपल जइसन स्थानीय पेड़ चरें सन. ऊ अइसन परिवारन खातिर मौसम के हिसाब से साथ देवे वाला जीवन रेखा रहें सन, जवन सड़क आ ईंधन के अभाव में ट्रेक्टर या ट्रक पर निर्भर ना हो सकें.

अब त चारा ले पहुंच मुस्किल हो गईल बा. फसल के मउसमो बदल गईल बा; खेत में दूर-दूर ले बाड़ लागल बा, फसल के बचल-खुचल हिस्सा तेजी से साफ कईल जाता आ चराई वाला जगह कम होखल जाता. रबारी परिवारन के संख्या बढ़ के तीन से सात हो गईल बा, जेसे जमीन पर दबाव बढ़ गईल बा.

बड़ उमिर वाला ऊंट के जगह जवान ऊंट खोजल समस्या बा. “कच्छ से ऊंट लिहल बहुत मुश्किल बा,” विदर्भ के रबारी नेता मशरू मामा कहेलन. “बड़ी समस्या बा.”

समस्या के एगो हिस्सा नियमन के समझे में उलझन हवे; बार-बार के जब्ती आ नौकरशाही के अड़चन ई बता रहल बा कि पशुपालकन के आजीविका के तरीका समझे में गलतफहमी हो रहल बा, ई कुलकर्णी के कहनाम बा.

ऊंट कवनो विलासिता के चीज ना हवे. उ पशुपालक समुदायन में चले फिरे के साधन रहल ह, जे अइसन बड़वार इलाका में आवत-जात रहेला.

हर साल किरसन रबारी के डेरा पूर्वी विदर्भ में एगो बड़ा चक्कर लगावेला – नागपुर से सिन्धी, बेला से बुटीबोरी, भंडारा, मोहाड़ी आ तुमसर के रास्ता से; कामठी, कन्हान आ कोंढाली के लगे आ फेर वापस आ जाला. उनकर यात्रा फसल कटाई के चक्र के पालन करेला आ हर कदम के एगो उद्देश्य होला.

भेड़ आ बकरी कुल फसल के कटाई के बाद बचल माल खायेलें सन. उनकरा गोबर से माटी के उपजाऊपन बढ़ेला. ई लेन-देन के ‘पेनिंग’ कहल जाला, जवन एगो पारम्परिक कृषि-पालल प्रथा हवे, जेमे गड़ेरिया अपने बकरियन आ भेड़न के किसानन के खेतन में आमतौर पर खुला जगह में आ जाल से घेर के ले जालें सन, जेसे पोषक तत्वन से भरपूर खाद जमा हो सके. किसान लोग ए सेवा खातिर रबारी लोगन के तनी पैसा दे देवेला, आ मानेला कि झुण्ड के गईला के बाद माटी के बनावट आ फसल के पैदावार में सुधार होखेला.

चरवाहा, माटी आ फसलन के बीच के ई आपसी तालमेल एगो पारिस्थितिकीय आदान-प्रदान के हिस्सा बनेला, जवन आजीविका आ खेतीबाड़ी दूनो के बनवले रखेला.

किरसन के कहनाम बा, “भेड़न के गुजरला के बाद माटी में सुधार होखेला.” इहे वजह हवे कि रबारी लोग ए इलाका में एतना लम्बा समय से टिकल बाड़ें. “किसानन में हमनी के दोस्त बाड़ें सन, जे हमके बोलावेला.” ऊंटन के बिना ए समीकरण के चेहरा बदल रहल बा. बैलगाड़ियन के संख्या कम हो गईल बा, अक्सर उनकरा के मरम्मत के जरूरत पड़ेला, उ हर दिन कम दूरी तय करेली सन. जवने रास्तन पर पहिले ऊंटन के संघे चलल आसान रहे, अब उ मुस्किल अउर पहुंच से दूर हो गईल बा. ऊंट नदी, जंगल, पहाड़ आ मुस्किल जमीन प यात्रा कर सकेलें सन. “हमनी के अक्सर पर बिना डामर वाला रास्तन से चलल पसंद करीं जा, बाकिर अब हमनी के अइसन ना कर सकेनी जा,” किरसन कहेलन.

दुपहरिया के घाम धातु के बक्सा आ बान्हल बिस्तरन पर पड़ रहल बा. रबारी महिला लोग चेहरा प घूंघट डाल के आपन काम में लाग जाली. बैल आपन मुड़ी झुका लेवे लें सन.

कारवां दू दिन खातिर एइजा रुकी आ ओकरी बाद बिना ऊंटन के आगे बढ़ जाई.

अनुवाद: विमल चंद्र पांडेय