زمینی حقوق کے لیے ایک بار پھر لمبا مارچ

کرن گہلا (۵۴ سالہ) اور ان کے جیسے دیگر کئی آدیواسی کسانوں کے جذبات بالکل ایک جیسے ہیں۔

کل، یعنی ۱۹ جنوری، ۲۰۲۶ کو وہ پالگھر ضلع میں واقع ڈولھاری بُدرُک گاؤں سے لال رنگ کی ٹی شرٹ پہنے اور رومال لپیٹے اپنے چھوٹے سے گھر سے باہر نکلے۔ وہ چند آدیواسی کسانوں کے ساتھ وہاں انتظار کر رہے ایک ٹیمپو ٹرک میں سوار ہوئے اور چاروٹی گاؤں کی طرف روانہ ہو گئے، جہاں سے مہاراشٹر کی آل انڈیا کسان سبھا (اے آئی کے ایس) کے ذریعہ ایک بار پھر ایک بڑا مارچ نکلنے والا تھا۔

یہاں ہزاروں کسانوں کا مجمع ہے۔ میڈیا کی رپورٹوں اور اے آئی کے ایس کے تخمینہ کے مطابق، ان کسانوں کی تعداد شاید ۵۰ ہزار یا اس کے آس پاس ہے۔ یہ لوگ بنیادی طور پر پالگھر ضلع کے رہنے والے ہیں اور قبائلی برادریوں سے ان کا تعلق ہے۔ انہوں نے کلکٹریٹ کی جانب اپنا مارچ شروع کیا تھا، ان مطالبات کے ساتھ کہ زمینی حقوق کو بہتر طریقے سے نافذ کیا جائے، منریگا کو بحال کیا جائے، واڑھ وَن بندرگاہ کو منسوخ کیا جائے اور پینے اور سینچائی کے لیے پانی مہیا کرایا جائے۔

احتجاجی گیت گاتے، اپنے مقصد کے ساتھ تیزی سے آگے بڑھتے اور نعرے لگاتے ہوئے یہ مظاہرین ۲۰ جنوری کی شام کو پالگھر کے کلکٹریٹ آفس پہنچے، جہاں وہ تب تک ٹھہرنے کا ارادہ رکھتے ہیں جب تک کہ ان کے سبھی مطالبات مان نہ لیے جائیں۔ ان میں سب سے طویل مدتی مطالبہ زمین سے متعلق حقوق کے نفاذ کا ہے۔ آدیواسی لوگ صدیوں سے جنگل اور چراگاہوں کی زمین کو جوتتے اور فصل اُگاتے آ رہے ہیں، لیکن انہیں ابھی تک اس کا مالکانہ حق نہیں مل پایا ہے۔

سال ۲۰۰۶ کا حقوق جنگلات قانون اُن درج فہرست قبائلیوں اور روایتی طور پر جنگل میں رہنے والے دیگر لوگوں کو جنگل کی زمین اور وہاں موجود وسائل کے حقوق عطا کرتا ہے، جو ان علاقوں میں نسلوں سے رہتے چلے آ رہے ہیں۔ اس کے لیے دعوے گرام سبھاؤں کے ذریعہ کیے جاتے ہیں، جن کی تصدیق سب ڈویژن اور ضلع کی کمیٹیاں کرتی ہیں اور وہاں رہنے والوں کو اُجاڑے جانے سے بچاتی ہیں، جب تک کہ انہیں ان کے حقوق دے نہیں دیے جاتے۔ لیکن اِس ریلی میں شامل زیادہ تر قبائلی کسانوں کے دعووں کو ابھی تک منظوری نہیں مل پائی ہے۔

مہاراشٹر میں قبائلی کسانوں کے ذریعہ کیا جانے والا یہ کوئی پہلا احتجاج نہیں ہے۔ اور شاید یہ آخری بھی نہ ہو۔ گہلا سال ۲۰۱۸ میں ناسک سے ممبئی کے آزاد میدان تک نکالی گئی ۱۸۰ کلومیٹر لمبی اُس بڑی ریلی میں بھی شریک ہوئے تھے، جس میں یہ کسان ایک ہفتہ تک پیدل چلے تھے اور ان میں سے بہت سے لوگ ننگے پیر تھے۔

آدیواسیوں کے درمیان موجود وارلی برادری سے تعلق رکھنے والے گہلا کہتے ہیں، ’’میں اُس ریلی میں بھی سب سے آگے تھا۔ جب ہم ممبئی پہنچے، تو ہمارے پاؤں آبلوں سے بھرے ہوئے تھے۔‘‘

کسانوں کے لیے وہ ایک تاریخی لمحہ تھا، کیوں کہ اس وقت پورے ممبئی شہر نے ان کا کھل کر ساتھ دیا تھا۔ شاہراہ پر پیدل چلتے وقت بھی لوگوں نے ان کی مدد کی تھی۔ ریلی کے اختتام پر، وزیر اعلیٰ دیوندر پھڑنویس کی قیادت والی مہاراشٹر حکومت کو کسان رہنماؤں کے ساتھ میز پر بیٹھنا پڑا تھا، جہاں انہوں نے ان کے مطالبات کو تسلیم کیا تھا۔

تقریباً آٹھ سال بعد، پھڑنویس دوبارہ مہاراشٹر کے وزیر اعلیٰ ہیں، اور گہلا جیسے کسان ایک بار پھر مارچ کر رہے ہیں۔ وہ کہتے ہیں، ’’حکومت صرف وعدے کرتی ہے، تاکہ ہم اپنے گاؤوں لوٹ جائیں۔ لیکن وہ ان وعدوں کو کبھی پورا نہیں کرتی۔‘‘

گہلا اندازہ لگاتے ہوئے کہتے ہیں کہ ۲۰۱۸ سے ۲۰۲۶ کے درمیان، کسان سبھا سے تعلق رکھنے والے کسانوں نے انتظامیہ اور حکومت پر اپنے مطالبات کو پورا کرنے کا دباؤ بنانے کے لیے چھوٹی بڑی ۳۰-۴۰ ریلیاں نکالی ہوں گی۔ یہ ریلیاں ایک دن کی بھی تھیں اور ایک ہفتہ کی بھی، اور بعض تو اس سے بھی زیادہ دنوں کی تھیں۔ لیکن اگر آپ ایک ریلی کو اوسطاً تین دنوں کا بھی مان لیں، تو قبائلی کسانوں نے گزشتہ آٹھ برسوں میں صرف اپنے حقوق کے لیے احتجاج کرنے میں تقریباً چار مہینے لگائے ہیں۔ جو لوگ ان تمام ریلیوں میں لگاتار شامل ہوئے وہ اب تھک چکے ہیں اور بوڑھے ہو چکے ہیں، لیکن ان کا جذبہ کسی بھی طرح کم نہیں ہوا ہے۔

پہلے کے مارچوں کی طرح یہ لوگ آج بھی لال رنگ کی قمیضوں میں ملبوس اس جم غفیر میں موجود ہیں۔ اے آئی کے ایس کا الحاق ہندوستانی کمیونسٹ پارٹی (مارکس وادی) کے ساتھ ہے۔

’’میری ٹانگ اور گھٹنوں میں درد ہوتا ہے،‘‘ ایشوَتی گہلا بتاتی ہیں۔ انہیں اپنی عمر معلوم نہیں ہے، لیکن اندازہ لگاتے ہوئے کہتی ہیں ’’ساٹھ چا پوڑھے‘‘، یا ۶۰ سال سے زیادہ۔ ’’جب ہم ممبئی گئے تھے تب میری عمر اتنی نہیں تھی،‘‘ وہ مزید کہتی ہیں۔ وہ منور پھاٹا (جنکشن) کے قریب کھلے آسمان کے نیچے بیٹھی ہوئی یہ باتیں بتا رہی ہیں، جہاں ان کسانوں نے سردی کی اس رات میں قیام کیا تھا۔ ان میں سے کچھ لوگوں نے اپنے ہزاروں ساتھیوں کے لیے کھچڑی پکانے کی ذمہ داری لی تھی۔ باقی لوگ سرد رات میں خود کو گرم رکھنے کے لیے اس چولہے کے آس پاس بیٹھ گئے، جہاں بڑے برتنوں میں کھانا پکایا جا رہا تھا۔ ’’دوسرے کسانوں کے ساتھ مارچ کرنے سے ہمیں توانائی حاصل ہوتی ہے،‘‘ ایشوَتی مزید کہتی ہیں۔ ’’اس سے ایک امید بندھتی ہے۔ اچھا لگتا ہے کہ ہم نے ابھی ہار نہیں مانی ہے۔‘‘

ایشوَتی کا تعلق بھی وارلی برادری سے ہے، اور وہ پالگھر ضلع کے جمشیٹ گاؤں میں رہتی ہیں۔ ان کی فیملی کے تین لوگ اس ریلی میں شامل تھے۔ گاؤں میں ان کے پاس کھیتی کی ۲ ایکڑ زمین ہے، جس پر وہ دوسرے لوگوں کی طرح ہی برسات کے موسم میں چاول اُگاتے ہیں۔ وہ مجھے بتاتی ہیں، ’’ہم صرف ایک فصل ہی اگاتے ہیں۔ آبپاشی کے بغیر، باقی موسموں میں ہم زیادہ کچھ نہیں کر سکتے۔‘‘

پالگھر ضلع میں، آدیواسی کسانوں کے لیے مزدوری کا کام ہی بقا کا واحد ذریعہ ہے، کیوں کہ فصل سے وہ بمشکل ہی گزر بسر کر پاتے ہیں۔ اس تناظر میں دیکھا جائے تو منریگا کو ختم کر دینا اُن کے لیے ایک بڑا دھچکہ ہے۔

ہندوستانی حکومت نے دسمبر ۲۰۲۵ میں، ’مہاتما گاندھی قومی دیہی روزگار گارنٹی قانون‘ کو بدل کر ’وِکست بھارت – جی رام جی ایکٹ (وی بی-جی رام جی)‘ کر دیا تھا۔ حکومت نے کاغذ پر ضمانت شدہ کام کے دنوں کی تعداد ۱۰۰ سے بڑھا کر ۱۲۵ تو کر دی ہے، لیکن اس نئے قانون میں پیسے کی فراہمی کا زیادہ تر بوجھ ریاستوں کے اوپر ڈال دیا گیا ہے۔ اس حقیقت کے مدنظر کہ زیادہ تر ریاستوں کی مالی حالت کافی خستہ ہے، ماہرین کا خیال ہے کہ ایسا کرنے سے ایک ایسی اسکیم ختم ہو سکتی ہے، جو کبھی دیہی ہندوستان میں لوگوں کو کام کی ضمانت دیتی تھی۔

ان کسانوں کے ساتھ مارچ کرنے والے، پالگھر ضلع کے ڈَہانو سے موجودہ ایم ایل اے (رکن اسمبلی) ونود نِکوڑے کہتے ہیں، ’’منریگا کے ساتھ بھی مسائل تھے۔ کام زیادہ نہیں ملتا تھا، اور اجرت بھی کم تھی، اور وہ بھی تاخیر سے ملتی تھی۔‘‘ لیکن اسے بند کر دینا کوئی حل نہیں تھا۔ ’’ہم لوگ مزدوروں کے لیے بہتر اجرت اور کام کے زیادہ دنوں کا مطالبہ کر رہے ہیں۔‘‘

جب تک مطالبات پورے نہیں ہو جاتے، کسانوں کا پالگھر کے کلکٹریٹ سے واپس جانے کا کوئی ارادہ نہیں ہے۔ ’’اگر حکومت نے سال ۲۰۱۸ میں کیے گئے وعدوں کو پورا کر دیا ہوتا، تو آج ہمیں دوبارہ مارچ نہیں کرنا پڑتا،‘‘ ۴۵ سال کے رُوبڈی آڈگا کہتے ہیں۔

آڈگا اُن لوگوں میں شامل ہیں جنہیں معاوضہ کا پیکج اس لیے نہیں مل پایا، کیوں کہ ان کے پاس اُس زمین کا مالکانہ حق نہیں ہے جس پر ان کی فیملی نسلوں سے کھیتی کرتی آ رہی ہے۔ ’’ایک سپر فاسٹ ہائی وے پروجیکٹ کی وجہ سے میری زمین کو اس میں ملا دیا گیا، اب میرے پاس آمدنی کا کوئی ذریعہ نہیں ہے،‘‘ وہ مزید کہتے ہیں۔

اُس زمین پر وہ چاول اور جوار کی کھیتی کرتے تھے، اور اس میں اننّاس اور کھجور کے درخت بھی تھے۔ اگر ان کے پاس زمین کا مالکانہ حق ہوتا، تو وہ ۲ کروڑ روپے سے زیادہ کے معاوضہ کے حقدار ہو جاتے۔ لیکن انہیں کچھ بھی نہیں ملا، بلکہ ان کا ذریعہ معاش بھی ان سے چھین لیا گیا۔ ’’پالگھر کے جھاری گاؤں میں میرے جیسے ۴۵ لوگ ہیں،‘‘ وہ بتاتے ہیں۔ ’’ہماری ایسی کتنی نسلوں کو اس طرح لُوٹا جائے گا؟ صرف وعدے کرنے سے اس بار کام نہیں چلے گا۔‘‘

ترجمہ نگار: قمر صدیقی