ساتھی کی تلاش میں بھٹک رہی دمپا کی آخری ہتھنی

’’اس نے اپنے دانت کے ایک وار سے سات تھیلوں کے اناج کو برباد کر دیا۔‘‘

ایک سال کا وقت گزر چکا ہے، لیکن رامپارا کو دَمپارے ہنگپوئی گاؤں میں واقع اپنے گھر میں تنہا ہتھنی کے ذریعہ کیا جانے والا نقصان یاد ہے۔

اناج کی سات بوریاں ٹِن کے پانچ ڈبوں کے برابر سرسوں سے بھری ہوئی تھیں، جن کا کل وزن تقریباً ۱۰ سے ۱۲ کلوگرام تھا۔ یہاں میزورم میں ٹن کے ڈبے روایتی طور پر میزان یا خوراک ذخیرہ کرنے والے تھیلوں کے وزن کے لیے بطور پیمانہ استعمال میں لائے جاتے ہیں۔

’’ہتھنی کے منہ لگانے کے بعد سرسوں اب خراب ہو چکی ہے،‘‘ وہ مزید کہتے ہیں۔ اس نے اپنے سونڈ کے زور سے بانس سے بنے ان کے نگرانی شیڈ کے اندر ذخیرہ شدہ دھان کو بھی تباہ کر دیا۔

لیکن ۷۳ سالہ رامپارا درگزر کرنے والے انسان ہیں۔ ’’میونگ [ہتھنی] اچھی ہے۔ اس نے کبھی انسانوں پر حملہ نہیں کیا۔ وہ زیادہ سے زیادہ فصلوں کو تباہ کرتی ہے۔ کھانے کے لیے آتی ہے اور چلی جاتی ہے۔‘‘ رامپارا ایک کسان اور بانس کی اشیاء بنانے والے دستکار ہیں۔ ان کا تعلق ریانگ قبائلی برادری سے ہے۔

وہ پاری کو بتاتے ہیں کہ ہتھنی شرمیلی ہے۔ ’’جب بھی یہ انسانی آواز سنتی ہے تو اپنے لمبے کان نیچے جھکا لیتی ہے۔‘‘ اور اب اس کے کھیتوں کے دورے کم ہو گئے ہیں – ۲۰۲۲ اور ۲۰۲۳ میں تین یا چار دوروں سے، ۲۰۲۴ میں دو اور ۲۰۲۵ میں صرف ایک رہ گئے ہیں۔

ایک دہائی سے زیادہ عرصہ سے یہ ہتھنی جنگل، گاؤں اور کھیتوں کی سرحدوں کے درمیان چکر لگا رہی ہے۔ یہ ہمیشہ تنہا ہوتی ہے۔ ہندوستان کے دوسرے حصوں کے برعکس جہاں ہاتھی (الیپھس میکسمس) جھنڈ میں رہتے ہیں اور مادہ سربراہ (ہتھنی) اور بچے ایک دوسرے کے قریب مضبوط بندھن کے ساتھ چلتے ہیں، دمپا کی یہ ہتھنی میزورم کے مامِت ضلع میں واقع دمپا ٹائیگر ریزرو میں تنہا گھومتی ہے۔ یہ ریزور ریاست میں جنگلی حیات کی سب سے بڑی پناہ گاہ ہے، جو میزورم میں موجود تقریباً ۱۶ ہاتھیوں کے لیے ممکنہ طور پر آخری پناہ گاہ بنتی جا رہی ہے۔ ہاتھیوں کی یہ تعداد ہندوستان کے ۲۲ ہزار ۴۴۶ ہاتھیوں کا ایک نہایت ہی معمولی حصہ ہے۔

’’میں نے ایک سال میں اس [تنہا] ہتھنی کو دو بار دیکھا ہے۔ یہ اس ماں کے بچہ کو دیکھنے جیسا ہے جو ایک طویل عرصہ تک میری نگہداشت میں تھی،‘‘ ریانگ برادری سے تعلق رکھنے والے ایک سابق فیل بان نوندیا کہتے ہیں۔

یہ ہتھنی ہمیشہ تنہا نہیں ہوتی تھی۔ تین دہائی قبل یہاں تقریباً ۲۵ ہاتھی تھے۔ ان میں سے صرف ایک پالتو تھا، باقی جنگلی تھے۔ نوندِیا کے مطابق کچھ بنگلہ دیش میں ہجرت کر گئے، کچھ کو شکاریوں نے مار ڈالا۔

محکمہ جنگلات کے اہلکاروں نے آسام کے ایک پالتو ہاتھی کے ساتھ اس ہتھنی کی افزائش نسل کا انتظام کیا تھا۔ اس نے جڑواں (ایک نر اور ایک مادہ) بچوں کو جنم دیا، لیکن ۲۰۰۶ میں درد زہ کے باعث اس کی موت ہو گئی، نوندیا بتاتے ہیں۔ نر بچہ زندہ نہیں بچا۔ ایک سال کے اندر اس کے باپ کی بھی موت ہو گئی۔

’’ہاتھی کا ایک بچہ جنگل میں کھیلتا رہا،‘‘ نوندیا مامت ضلع کی تنہا ہتھنی کا حوالہ دیتے ہوئے کہتے ہیں۔

دمپارے ہنگپوئی اور تیئیریئی میں جھوم کھیتوں، ندی نالوں اور روایتی گزرگاہوں کے قریب ہتھنی کو دیکھے جانے کی زیادہ تر اطلاعات موصول ہوئی ہیں۔

دمپارے ہنگپوئی کے کسان کاولا (۵۳) کی فصلوں کو ہتھنی نے نقصان پہنچایا ہے۔ وہ الگ الگ فصلوں کی کاشت کاری اور دہاڑی مزدوری پر زندگی گزارتے ہیں اور روزانہ ۴۰۰ سے ۵۰۰ روپے کماتے ہیں۔

سال ۲۰۲۵ میں اس ہتھنی نے ان کے گاؤں سے سات کلومیٹر کے فاصلہ پر واقع ماوبُوا میں ان کی دو ہیکٹیئر زمین پر موجود بانس سے بنے نگرانی والے شیڈ کو روند ڈالا اور دھان، مرچ، سرسوں، کدو اور بیگن کی ۱۵ بوریوں کو تباہ کر دیا۔

’’نگرانی کے شیڈ کو دوبارہ بنوانے پر ۱۵ ہزار روپے کی لاگت آئی اور تقریباً تین ماہ کا وقت لگا،‘‘ چھ بچوں کے والد کاولا کہتے ہیں۔ ’’ایک ایک روپیہ ہماری جیب سے چرخ ہوتا ہے، کوئی معاوضہ نہیں ملتا۔ میں مزدوروں کے اخراجات برداشت نہیں کر سکتا، اس لیے میں مزدوروں کو معاوضہ کے طور پر دو ٹِن چاول دیتا ہوں۔‘‘

انہوں نے ۲۰۱۰ اور دوبارہ ۲۰۱۲ میں معاوضہ کے لیے درخواست دی تھی، اور دونوں درخواستیں مسترد کر دی گئی تھیں۔

اپنے لکڑی کے گھر کے ایک کونے میں موجود چھوٹے سے باورچی خانہ میں کام کرتے ہوئے، کاولا کہتے ہیں، ’’میں جس قدر بچت کر سکتا ہوں وہ کرتا ہوں، لیکن مجھے نہیں معلوم کہ یہ کب تک چلے گا۔‘‘

اور رامپارا سوچتے ہیں، ’’بلونگ بائی منوسُتونگمو جاگا لے مایونگراؤ پھو کھکھومکھے یہ تونگمائیمو جاگا اونگمائیو آناہینگ یہ ماچونگوؤ [ہمارے خیال میں جنگل اور عوام دونوں ہتھنی کے لیے محفوظ مقام بن گئے ہیں]۔‘‘

یہاں کے زیادہ تر باشندے ریانگ اور میزو قبائل سے تعلق رکھتے ہیں اور میزو اور کاؤ بُرو بولتے ہیں۔ ان کا بنیادی ذریعہ معاش الگ الگ فصلوں پر مبنی زراعت یا جھوم کھیتی ہے۔ یہاں تنہا ہتھنی بھی فصلوں اور گھروں کو ناقابل تلافی نقصان پہنچا سکتی ہے۔

یہ ریزرو بادل دار تیندوؤں (نیوفیلس نیبوسا) کی ایک بڑی تعداد کا مسکن ہے، اور ہندوستان کے ۱۵ پرائمیٹ (حیوانات رئیسہ) میں سے آٹھ یہاں پائے جاتے ہیں، جیسے پھائرے کا پتّہ کھانے والا بندر (ٹریکائپی تھیکس پھائریئی) اور ہولاک گبن (جینس ہولاک)۔ چھوٹا کالا ریچھ (ہیلارکٹوس ملایانَس) نیچے زمین پر موجود جھاڑیوں میں خوراک تلاش کرتے ہیں۔ باگھ (پینتھیرا ٹائیگرس)، مرمریں بلی اور ایشیائی سنہری جنگلی بلیاں (پارڈوفیلس مارمورَیٹا اور کیٹوپوما ٹیمِنکیائی) سائے کی طرح شکار کی طاق میں رہتی ہیں۔

تنہا ہتھنی کے ساتھ ۶۳ سالہ نوندیا کا رشتہ بہت پرانا ہے۔ انہوں نے ۱۹۸۷ کے بعد سے دو دہائیوں تک اس کی ماں کے فیل بان کے طور پر کام کیا۔ وہ آسام سے لائی گئی ایک پالتو ہتھنی تھی۔ ’’جب بھی میں اس ہتھنی کو دیکھتا ہوں، تو میرے اندر جذبات کی ایک لہر اٹھنے لگتی ہے۔ مجھے خوشی محسوس ہوتی ہے،‘‘ تنہا ہتھنی کا ذکر کرتے ہوئے نوندیا کہتے ہیں۔ جب وہ پالتو ہتھنی کے ساتھ اپنے لگاؤ کا ذکر کرتے ہیں تو ان کے پاس کھڑی ان کی بیوی، ہموئیتی مسکراتی ہیں۔ ہم ستونوں پر کھڑے ان کے روایتی برو ہاؤس کے اندر بیٹھے ہوئے ہیں۔ بستر کی چادروں کو عارضی پردہ بنایا گیا ہے، جس کی وجہ سے کمرہ قدرے تاریک ہے۔

اس بات پر یقین کرتے ہوئے کہ یتیم ہتھنی جماع کے لیے ایک نر ساتھی کی تلاش میں ہے، نوندیا اس وقت پریشان ہوتے ہیں جب وہ بے چین ہو جاتی ہے اور دور دراز علاقوں کا سفر کرتے ہوئے کبھی کبھی میزورم-تریپورہ سرحد کے قریب ساگوان کے باغات میں دکھائی دیتی ہے۔ یہ ایک پرخطر علاقہ ہے۔

آسام سے تعلق رکھنے والے تین پالتو ہاتھی پہلے ہی وہاں ساگوان کی کٹائی کے کام میں لگے ہوئے تھے، اور جنگلات کے اہلکاروں کو خدشہ تھا کہ ساگوان مافیا جنگلی ہتھنی کو پکڑ سکتے ہیں۔ لہٰذا جب وہ بہت قریب پہنچتی ہے، تو وہ لوگوں کو بھیج کر اسے دور بھگا دیتے ہیں۔

للہہ میلتھا (۴۵) دمپا کے تیئیریئی میں گزشتہ ۱۰ برسوں سے بیٹ افسر ہیں۔ وہ کہتے ہیں کہ ہاتھی کی افزائشِ نسل کے بارے میں بات چلی تھی۔

’’اس میں کوئی شک نہیں کہ جنگل میں تنہا رہنا دمپا کی ہتھنی کے لیے ذہنی دباؤ کا باعث ہے۔ اگر محکمہ اس کے جماع (ملاپ) کے لیے ایک ہاتھی کا انتظام کر دے – اور یہ کوئی بہت زیادہ خرچ طلب بھی نہیں ہے – تو ہاتھیوں کو مقامی سطح پر معدوم ہونے سے بچایا جا سکتا ہے،‘‘ انوارالدین چودھری کہتے ہیں۔ وہ میزورم میں ہاتھیوں کی آبادی میں کمی پر تحقیق کرنے والے جنگلی حیات کے ماہر ہیں۔

سال ۲۰۰۱ کے ایک تحقیقی مطالعہ میں نشاندہی کی گئی تھی کہ روایتی طور پر ہاتھیوں کا شکار کیا جاتا تھا اور ان کا گوشت مقامی قبائل، جن میں میزو، لائی، مارا، برو، چکما اور ہمار شامل ہیں، استعمال کرتے تھے۔

’دی وائلڈ ایلیفینٹ ایلیفس میکسیمس اِن میزورم‘ کے عنوان سے شائع ہونے والی اس تحقیق میں کہا گیا ہے کہ ۱۹۶۰ کی دہائی میں عسکریت پسندی اور جدید آتشیں اسلحے کے پھیلاؤ کے باعث غیر قانونی شکار میں ’’غیر معمولی طور پر اضافہ‘‘ ہوا۔ شدت پسندوں نے ہاتھیوں کو نہ صرف گوشت کے لیے بلکہ ہاتھی دانت کے حصول کے لیے بھی مارا، جسے وہ جنوب مشرقی ایشیا کی منڈیوں میں فروخت کر کے ہتھیار خریدنے کے لیے فنڈز حاصل کرتے تھے۔

سال ۱۹۸۰ اور ۱۹۹۰ کی دہائی تک بقیہ ہاتھیوں کو مغربی اور جنوبی علاقوں کے چھوٹے اور ایک دوسرے سے کٹے ہوئے حصوں میں محدود کر دیا گیا، جن میں دمپا سینکچری اور نگینگپوئی وائلڈ لائف سینکچری شامل ہیں۔ اس شدید بکھراؤ نے مسکن کے نقصان اور داخلی تولید (انریڈنگ) کے خطرے کے باعث باقی ماندہ جھنڈ کے ’’مستقبل‘‘ کو خطرے میں ڈال دیا۔

’’دمپا کا سب سے بڑا جانور ہاتھی ہے۔ حالانکہ عمودی ڈھلوان پہاڑیوں پر گھنے، ناہموار جنگل میں کسی بھی جانور کو دیکھنا بہت مشکل ہے، لیکن ہاتھیوں کو دیکھنا نسبتاً آسان ہوتا ہے، خواہ وہ کبھی کبھی ہی کیوں نہ دکھائی دیں،‘‘ للہہ میلتھا کہتے ہیں۔ ’’جب بھی میں ہتھنی کو دیکھتا ہوں، مجھے لگتا ہے کہ اسے تنہا رہنے دینے کی بجائے افزائش نسل کا موقع دیا جانا چاہیے، اس کا اپنا ایک خاندان ہونا چاہیے،‘‘ ریانگ قبائلی برادری سے تعلق رکھنے والے للہہ میلتھا مزید کہتے ہیں۔ لیکن وہ اس تشویش کو بھی تسلیم کرتے ہیں: ’’یہ خدشات بھی ہیں کہ اگر ہاتھیوں کی آبادی میں اضافہ ہوتا ہے، تو ہمارے جیسا جنگلاتی عملہ مزید حملوں کا شکار ہو سکتا ہے۔‘‘

’’میں نے اس جانور کو ۵۰ سے۶۰ بار دیکھا ہے،‘‘ ایس سیموئل بے پروائی سے کہتے ہیں۔ وہ دمپا فاریسٹ انسپیکشن بنگلہ سے کچھ فاصلہ پر ایک عمارت کے باہر سم کارڈ اور کھانے پینے کی چیزیں بیچنے والی دکانوں کے درمیان بیٹھے ہیں۔ تیئیریئی کے یہ ۵۰ سالہ رہائشی آسانی سے اس بات کی نشاندہی کر سکتے ہیں کہ یہ جانور ممکنہ طور پر کہاں دکھائی دے سکتا ہے۔

دمپا میں زیادہ تر فاریسٹ گارڈز کنٹریکٹ پر رکھے جاتے ہیں، جنہیں معمول کی گشت کے دوران دیکھے جانے والے جانوروں کی چیک لسٹ بنانے کا کام سونپا جاتا ہے۔ میزو قبائلی برادری سے تعلق رکھنے والے سیموئل کہتے ہیں، ’’جب ہم جانوروں کو اپنی فہرست میں نشان زد کرتے ہیں، تو یہ بجائے خود ایک کامیابی کی طرح محسوس ہوتا ہے۔‘‘

یہ ہتھنی فصل کی کٹائی کے موسم میں تیئیریئی ندی کے بہاؤ کے مخالف سمت میں دو سے تین کلومیٹر کے فاصلہ پر لوئیہنار میں ان کے دو ہیکٹیئر میں پھیلے کھیت کا بھی دورہ کرتی ہے۔ سیموئل پورے سال دَوری بنیاد پر دھان، مکئی، کدو، سرسوں، تارو، اسٹنکی بین (پیٹائی)، گاجر، گوبھی اور بیگن اگاتے ہیں۔

’’اس نے کبھی کسی انسان پر حملہ نہیں کیا، لیکن آپ کچھ کہہ نہیں سکتے،‘‘ وہ کہتے ہیں۔ ’’یہ کھانے کی تلاش میں غیر قانونی شکار کے کیمپ کے نگرانی شیڈ کے قریب آ جاتی ہے۔ سائی [ہتھنی] دبے پاؤں چلنے کی کوشش کرتی ہے، مگر جب وہ بانس کی جھاڑیوں سے ہو کر گزرتی ہے، تو ڈنڈوں کے ٹوٹنے اور چٹخنے کی آوازیں اس کی موجودگی کو ظاہر کر دیتی ہیں۔‘‘

سیموئل نے ہاتھی اور سانبھر ہرن کے ذریعہ فصلوں کی تباہی کی وجہ سے ہونے والے مالی نقصانات کی حقیقت کو تسلیم کر لیا ہے۔ ہر سال ان کی کم از کم ۲۵ فیصد فصل ایسے حملوں کی وجہ سے ضائع ہو جاتی ہے۔ ان کے سات بچے ہیں، ان میں سے دو بیٹیاں آئزول میں کام کرتی ہیں اور کنبے کی کفالت میں مدد کے لیے گھر پیسے بھیجتی ہیں۔

انہوں نے ۱۰ سالوں میں کبھی معاوضے کا دعویٰ پیش نہیں کیا۔ ان کا کہنا ہے کہ بڑے پیمانے پر فصلوں کے نقصانات کے لیے صرف ۴۰۰ سے ۵۰۰ روپے حاصل کرنے کے لیے افسر شاہی کے پیچیدہ عمل سے گزرنا بے معنی ہے۔ ’’جب دعوے منظور ہو جاتے تھے، تب بھی ادائیگیاں بہت کم تھیں۔ بعض اوقات کچھ بھی نہیں،‘‘ وہ مزید کہتے ہیں۔

’’میں سبزیوں کے موسم میں، اکتوبر سے مارچ تک ڈیڑھ لاکھ [روپے] کماتا ہوں،‘‘ سیموئل مزید کہتے ہیں۔ ’’فصلوں پر حملوں کے دوران ایک لاکھ [روپے] یعنی۵۰ فیصد کا نقصان ہوتا ہے۔ اگر میری فصلوں کو ہاتھی سے محفوظ کر لیا جائے تو میں مزید ایک لاکھ کما سکتا ہوں۔‘‘

کبھی کبھی سیموئل سوچتے ہیں کہ اگر محکمہ جنگلات ہتھنی کو جنگل میں اپنا ایک ساتھی تلاش کرنے میں مدد کرے، تو وہ ان کے کھیت کو تباہ کرنے کی کوشش کرنا چھوڑ دے گی۔ جب انہوں نے ۱۹۹۳ سے ۲۰۱۸ تک فاریسٹ گارڈ کے طور پر کام کیا اور جب وہاں ہاتھیوں کی تعداد زیادہ تھی، تو انسانوں کے ساتھ ان کے تصادم کم ہوا کرتے تھے۔

وہ کہتے ہیں، ’’یہ کہا جا سکتا ہے کہ معاشی نقصان سے ہمیں پریشانی ہوئی ہے اور ہتھنی کی موت سے ہمیں فائدہ ہو سکتا ہے، لیکن سچ تو یہ ہے کہ محکمہ جنگلات میں بدعنوانی ہے۔ اگر وہ فصلوں کے نقصان کا مناسب معاوضہ دے دیتے، تو ہم کسی نہ کسی طرح نقصانات کے ساتھ جینا اور گھر کے اخراجات کا انتظام کرنا سیکھ سکتے تھے۔‘‘

رامپارا کا خیال ہے کہ اس ہتھنی کے ساتھی کے بغیر اور افزائش نسل کے محفوظ منصوبہ کی عدم موجودگی میں، اس کے مرنے کے بعد اس نوع کے جانور سے برادری کا تعلق ہمیشہ کے لیے منقطع ہو جائے گا۔

’’منوسُراؤ مانگ لے پال کمَمیَگ یہ ما تونگ یگیہ وا۔ بلونگ نیتاؤمنگتوجاراؤ پھو کم مایاگوؤ۔ مایونگ کتھانگچینی بسکانگ تونگمو لے بیتھاجلاکھے یہ نیتھاؤیاگ یہ نو چُنگ ما تونگ یوؤ [خواہ نر ہو یا مادہ، ایسا محسوس ہوتا ہے کہ یہ ہتھنی جنگل میں اپنے ساتھی کی تلاش میں بھٹک رہی ہے۔ تنہائی صرف انسان ہی محسوس نہیں کرتے، جانور بھی محسوس کرتے ہیں۔]‘‘

رپورٹر اس اسٹوری کے ترجمہ اور معلومات فراہم کرنے میں تعاون کے لیے روڈنگلیانا اور لال ووہبیکا کا شکریہ ادا کرنا چاہتے ہیں۔

اس اسٹوری کو ششانک شری نواسن-پاری فیلوشپ ۲۰۲۵ کا تعاون حاصل ہے۔