डम्पा के आखिरी हाथी

“वो ह एकेच बेर मं सात बोरी चट कर गीस.”

बछर भर गुजर चुके हवय, फेर रमपारा अपन गाँव डंपरेनपुई मं ये अकेल्ला हाथी के अपन घर ला पहुँचाय नुकसान ला भूलाय नइ ये.

सात बोरा उपज, पांच टिन सरसों के बराबर होथे, जेकर वजन करीबन10 ले 12 किलो होथे. इहाँ मिजोरम मं खाय के जिनिस रखे के बोरा मन के नाप-जोख बर पारंपरिक रूप ले टिन के डब्बा बउरे जाथे.

“हाथी के चट कर जाय के बाद अब सरसों खइता होगे हवय,” वो ह बताथे. हाथी ह अपन सूंड ले एकेच बेर मं बांस के बने ओकर मचान कुरिया के भीतरी राखे धान के घलो सतियानास कर दीस .

फेर 73 बछर के रमपारा माफ करेइय्या मइनखे आय. “मायुंग [हाथी] बढ़िया जानवर आय. वो ह लोगन मन के उपर कभू हमला नइ करय. जियादा ले जियादा फसल के सतियानास करे देथे. वो ह खाय बर आथे अऊ चले जाथे.” एक किसान अऊ बांस के हस्तशिल्प कारीगर, रमपारा रियांग (जेन ला रेंग घलो लिखे जाथे) आदिवासी समाज ले हवय.

वो ह पारी ला बतावत जाथे के ये हाथी लजकुरिया आय. “जब घलो वो ह लोगन मन के आवाज सुनथे, त अपन कान ला झुका लेथे.” खेत मं ओकर अवई-जवई घलो कम होगे हवय – साल 2022 अऊ 2023 मं तीन धन चार बेर हमला करे ले घटके, साल 2024 मं दू बेर अऊ साल 2025 मं सिरिफ एकेच बेर रहिगे हवय.

दस बछर ले घलो जियादा बखत ले, ये हाथी जंगल, गाँव अऊ खेत मन मं घूमत हवय. हमेसा अकेल्ला. देस (भारत) के दीगर जगा के उलट, जिहां हाथी गोहड़ी मं किंजरत रहिथें – जेन मं माई हाथी अऊ ओकर लइका एके संग, जावत रहिथे – मिजोरम के मामित जिला मं, जिहां राज के सबले बड़े वन्यजीव अभयारण्य, डम्पा टाइगर रिजर्व बने हवय, डम्पा के ये हाथी अकेल्ला घूमेइय्या परानी आय. ये ह रिजर्व इहाँ रहेइय्या 16 ठन हाथी बर मिजोरम मं सायेद आखिरी ठीहा बने हवय. ये देस के कुल 22, 446 हाथी मन के एक ठन नान कन हिस्सा आय.

बछर भर मं दू बेर मोला वो ह (अकेल्ला) हाथी दिखे मं आथे. ठऊका वइसनेच, जइसने वो हथिनी के लइका ला देखे, जेकर देखभाल मंय लंबा बखत तक ले करे रहेंय,” रियांग समाज के महावत रह चुके नोंदिया कहिथे.

पहिली हाथी अकेल्ला नइ रहिस. तीस बछर पहिली, इहाँ करीबन 25 ठन हाथी किंजरत रहिन जेन मं सिरिफ एकेच ठन पोसे रहिस, बाकि सब्बो जंगली. नोंदिया के मुताबिक, कुछेक हाथी बांग्लादेश चले गीन. बांचे मन ला शिकारी मन मार डारिन.

वन अफसर मन वो हथिनी के मिल्न असम के एक ठन पोसे एंर्रा हाथी ले करवाइन. नोंदिया बताथे के वो ह जुड़वा लइका- एक ठन एंर्रा अऊ एक ठन माई ला जनम दीस, फेर साल 2006 मं जने बखत वो ह मर गीस. एंर्रा जिये नइ सकिस. ओकर ददा घलो बछर भर के भीतर मर गीस.

“लइका हाथी जंगल मं खेलत रहिथे,“ नोंदिया कहिथे, जेन ह मामित जिला के इकलौता हाथी के बात करत हवय.

डंपरेनपुई अऊ तेइरेई के झूम खेत मन मं, छोटे नदिया मन मं अऊ हाथी मन के पारंपरिक रद्दा के तीर मं हाथी मन ला देखे के खबर सबले जियादा मिले हवय.

डंपरेनपुई मं, किसान कोला के फसल हाथी मन के सेती बरबाद होगे हवय.53 बछर के कोला झूम खेती अऊ रोजी-मजूरी करके गुजारा करथे, वो ह रोज के 400 ले 500 रूपिया कमा लेथे.

साल 2025 मं,हाथी ह ओकर गाँव ले दू कोस ले जियादा दूरिहा, मावबुआ मं ओकर दू हेक्टेयर के खेत मं बने बांस के मचान ला उजार दीस, जेन मं 15 बोरी उपज – धान, मिर्चा, सरसों, मखना अऊ भाटा – बरबाद हो गीस.

“मचान ला फिर ले बनाय मं 15,000 रूपिया खरचा अऊ करीबन तीन महीना लगथे,” छै लइका के ददा कोला कहिथे. “एक-एक रूपिया हमर खीसा ले जाथे, कोनो मुआवजा नइ मिलय. मंय मजूरी के खरचा उठाय नइ उठाय सकंव, ते पायके मंय मजूर मन ला बदला मं दू टिन चउर देथों.”

वो ह साल 2010 अऊ 2025 मं मुआवजा बर अरजी दे रहिस. दूनोंच दावा अरजी ख़ारिज हो गीस.

“मंय जतक बचाय सकथों, बचाय के कोसिस करथों, फेर मोला नइ पता के ये ह कब तक ले चले सकही,” अपन लकरी के घर के एक ठन कोनहा मं बने नान-कन रंधनी मं काम करत कावला कहिथे.

अऊ रामपारा मानथे, “ब्लोउंग बाई म्नु्सु तोंगमो जगा ले मायुंग राओ फो खाखोम खे ये तोंगमाई मो जगा ओंग माई उआनो हिंग ये मा चोउंग उओ [हमर हिसाब ले अब जंगल घलो अऊ लोग मन घलो हाथी बर सुरच्छित ठीहा बनगे हवय].”

इहाँ के अधिकतर बासिंदा रियांग अऊ मिजो जनजाति के हवंय, मिज़ो अऊ काऊ ब्रू भाखा कहिथें. ओकर मन के जीविका के सबले बड़े सहन झूम खेती आय. हाथी, इहाँ तक के एक ठन अकेल्ला हाथी घलो फसल अऊ घर मन के सतियानास कर सकथे.

ये अभयारण्य बनेच अकन क्लाउडेड लेपर्ड (नेओफ़ेलिस नेबुलोसा) के ठीहा औ. इहां देस (भारत) के 15 प्राइमेट प्रजाति मन ले आठ ठन मिलथे, जइसने फ़ेयर्स लीफ़ मंकी (ट्रैचिपिथेकस फ़ेयरेई) अऊ हूलॉक गिब्बन (हूलॉक). मलायन सन बियर (हेलार्क्टोस मलायनस) घन झाड़ी मन मं चारा खोजत रहिथे. उहिंचे बघवा (पैंथेरा टाइग्रिस), मार्बल्ड वाइल्ड कैट (पारडोफ़ेलिस मार्मोराटा) अऊ एशियाई गोल्डन कैट (कैटोप्यूमा टेमिन्की)छाँव मं घात लगाके सिकार करथें.

नोंदिया के ये अकेल्ला हाथी संग बनेच जुन्ना नाता हवय. 63 बछर के नोडिया ह 1987 ले सुरु करके, बीस बछर तक ले ये हाथी के दाई के महावत रहे हवय. वो ह एक ठन पोसे हथिनी रहिस जेन ला असम ले लाय गे रहिस. वो अकेल्ला हाथी के बात बतावत नोंदिया कहिथे, जब घलो मंय ये हाथी ला देखथों, त मोर भीतरी मया बोहाय लगथे. मोला भारी बने लागथे.” ओकर बगल मं बइठे ओकर घरवाली, हामोइती, मुचमुचाय लागथे जब नोंदिया वो पोसे हथिनी के बात बताथे जेन ला वो ह भारी मया करत रहिस. हमन ओकर पारंपरिक 'ब्रू' स्टिल्ट हाउस (ऊंच खंभा मं टिके घर) के भीतरी बइठे हवन ; खोली मं चद्दर मन ला परदा बनाय गे सेती थोकन अंधियार हवय.

ये देख के वो अनाथ हथिनी मिलन बर कोनो एंर्रा संगी ला खोजत हवय, नोंदिया ला वो बखत चिंता हो जाथे जब वो ह उतइल होवत दूरिहा निकर जाथे – कभू-कभू त वो ह मिज़ोरम-त्रिपुरा सीमा मं बने एक ठन सागौन प्लांटेसन तीर घलो दिखथे. ये ह एक ठन खतरा ले भरे इलाका आय.

असम ले लाय तीन ठन पोसे हाथी पहिलीच ले उहाँ सागौन के कटाई मं लगे हवंय, अऊ वन अफसर मन ला डर हवय के सागौन माफिया वो जंगली हथिनी ला धर सकथे. जब वोह बनेच लकठा आ जाथे, त वो मन ओला उहाँ ले भगाय बर लोगन मन ला भेजथें.

45 बछर के लालहमेल्था, डम्पा के तेइरेई मं बीते 10 बछर ले बीट अफसर हवंय, अऊ ओकर कहना आय के हथिनी के जने के उपाय ला लेके कतको चर्चा होय रहिस.

“ ये मं कोनो दू मत नइ ये के डम्पा मं हथिनी बर जंगल मं अकेल्ला रहे चिंता ले भरे आय. गर विभाग ओकर मिलन बर कोनो हाथी के इंतजाम कर सके –जेन मं जियादा खरचा घलो नइ होवय- त हाथी ला इहाँ के स्तर मं नंदाय ले बचाय जा सकथे,” ये कहना आय वन्यजीव विशेषज्ञ अनवरुद्दीन चौधरी के, जेन ह मिजोरम मं हाथी मन के आबादी घटे के अध्ययन करे हवय.

साल 2001 के एक ठन अध्ययन मं ये बताय गे रहिस के पारंपरिक रूप ले हाथी मन के सिकार करे जावत रहिस अऊ ओकर गोस/ मांस ला इहाँ के जनजाति मिज़ो, लाई, मारा, ब्रू, चकमा अऊ हमर मन खावत रहिन.

‘द वाइल्ड एलिफेंट इलिफ्स मैक्सिमस इन मिजोरम’ नांव के एक ठन रिपोर्ट मं बताय गे हवय के साल 1960 के दसक मं उग्रवाद अऊ नवा जमाना के हथियार के बढ़त चलन सेती हाथी के गैरकानूनी सिकार मं ‘भारी बढ़ोत्तरी’ होइस. उग्रवादी, हाथी मन ला न सिरिफ ओला खाय बर मारत रहिन, फेर ओकर दांत बर घलो मारत रहिन: ये दांत मन ला दक्खिन-उत्ती एशिया के बाजार मं बचके हथियार बिसोय बर पइसा जुटाय जावत रहिस.

1980 अऊ 1990 के दसक तक, बांचे हाथी मन बूड़ति अऊ दक्खिन इलाका मं छोटे-छोटे, अलग-थलग हिस्सा मं सिमटके रहिगे रहिन – जेन मं डम्पा अभयारण्य अऊ न्गेंगपुई वन्यजीव अभयारण्य घलो सामिल रहिस. भारी ख़राब ढंग ले बिखर जाय सेती, बांचे गोहड़ी के ‘कोनो भविष्य नइ’ रहिगे रहिस; येकर सबले बड़े कारन ठीहा के खतम होय अऊ आपस मं मिलन करके जने के खतरा रहिस.

“डम्पा मं सबले बड़े जानवर हाथी आय. काबर के डोंगरी वाले घन अऊ खंचवा-डीपरा जंगल मं कोनो घलो जानवर ला देखे बनेच मुस्किल आय, ते पायके बाकी जानवर मन के बनिस्बत थोकन आसान होथे, भले वो ह घेरी बेरी झन दिखत होय,” लालहमेल्था कहिथे. “जब घलो मंय हथिनी ला देखथों, त मोला लागथे के वोला मिलन के मउका मिले ला चाही, ओला अकेल्ला रहे के जगा अपन खुद के बंस बढ़ाय के मउका मिले ला चाही,” रियांग आदिवासी समाज के लालहमेल्था बोलत जाथे. फेर वोला एक ठन आने चिंता घलो लगे हवय: “ये चिंता घलो हवय के गर हथिनी के बंस बढ़थे, त हम जइसने वन कर्मी मन के उपर हमला के खतरा घलो बढ़ सकथे.”

“मंय वो जानवर ला 50-60 पईंत देखे हवंव,” एस. सैमुअल ह भारी अचिंता जइसने कहिथे. वो ह डम्पा फ़ॉरेस्ट इंस्पेक्शन बंगला ले कुछेक कदम दूरिहा, एक ठन इमारत के बहिर वो दुकान मन के बीच मं बइठे हवय, जिहां सिम कार्ड अऊ कलेवा मिलथे. तेइरेई के बासिंदा 50 बछर के सैमुअल, भारी आसानी ले ये बता सकथे के वो जानवर कहां दिखे सकत हवय.

डम्पा मं अधिकतर फर्स्ट गार्ड मन ला संविदा मं राखे जाथे, अऊ वो मन ला रोज के गस्त बखत देखेइय्या जानवर मन के लिस्ट बनाय के काम देय जाथे. मिज़ो आदिवासी समाज के सैमुअल कहिथे, “जब हमन जाँच लिस्ट मं जानवर मन के नांव के आगू सही निशान लगाथन, त हमन ला कुछु हासिल करे जइसने लागथे.”

लुवई के सीजन मं, वो हाथी तेइरेई नदी के बोहाय डहर आधा-एक कोस दूरिहा ऊपर कोती, लुइहनार मं सैमुअल के दू हेक्टेयर खेत मं घलो आथे. सैमुअल बछर भर एक-एक करके कतको किसम के फसल कमाथे - धान, जोंधरा, मखना, सरसों, कोंचई, झुनगा, गाजर, बंधी अऊ भाटा.

“ये ह कभू कोनो घलो मइनखे उपर हमला करे नइ ये, फेर कुछु कहे नइ जाय सकाय,” वो ह कहिथे. “ये ह सिकार रोके बर बने कैंप के मचान तक ले आ जाथे; चारा खोजत. ये साईं (हाथी) कलेचुप आय के कोसिस करथे, फेर जब वो ह बांस खइरखा ले होवत जाथे, बांस के टहनी टूटे के आवाज ले येकर पता चल जाथे.”

सैमुअल ह हाथी अऊ सांभर हिरन सेती फसल ले होवेइय्या नुकसान ला झेले बर तियार रहिथे. हरेक बछर, ये मन के चर जाय ले ओकर करीबन 25 फीसदी फसल के सतियानस हो जाथे. ओकर सात झिन लइका हवंय, अऊ ओकर दू झिन बेटी, जेन मन आइजोल मं काम करथें, घर चलाय मं मदद सेती पइसा भेजथें.

वो ह बीते 10 बछर मं मुआवजा बर कोनो दावा अरजी नइ दे हवय. ओकर कहना आय के भारी नुकसान होय के बाद घलो सिरिफ 400 ले 500 रूपिया पाए बर सरकारी कागजी कार्रवाई के झंझट उठाय कोनो काम के नइ ये. वो ह कहिथे, दावा मंजूर होय ले घलो, मिलेइय्या रकम बनेच कम होवत रहिस. अऊ कभू-कभू त कुछु घलो नइ मिलत रहिस.”

साग–भाजी बेचे के सीजन मतलब अक्टूबर ले मार्च के बीच, मंय 1.5 लाख [रूपिया] कमाथों, सैमुअल बतावत जाथे. जब हाथी फसल मं धावा मारथे, त एक लाख [रूपिया] के नुकसान हो जाथे – मतलब 50 फीसदी. गर मोर फसल हाथी ले बांचे रइतिस, त मंय अऊ एक लाख कमा सकत रहेंय.”

कभू-कभू सैमुअल सोचथे के भगवान करे वन विभाग जंगल भीतरिच ओ हथिनी बर कोनो जोड़ खोज लेतिस, जेकर ले ओकर बहिर आके ओकर खेत के सतियानस करे बंद हो जातिस. जब वो ह साल 1993 ले 2018 तक फारेस्ट गार्ड रहिस अऊ बनेच अकन हाथी रहिन, वो बखत लोगन मन के संग आमना-सामना कमेच होवत रहिस.

“कोनो ला लग सकथे के पइसा के नुकसान ले हमन हमन ला मार पहुचे हवय अऊ हाथी के मर जाय ले हमन ला फायदा होही, वो ह कहिथे. फेर असल बात तो ये आय के वन विभाग भ्रष्ट हवय. गर वो मन फसल के नुकसान के बरोबर मुआवजा देतिन, त हमन अइसने नुकसान ला झेले सीख जातन अऊ घर चला लेतन.”

रमपारा के मानना आय के ये हथिनी बर कोनो साथी बिन खोजे अऊ मिलन के योजना नइ होय ले, जब ये हथिनी मर जाहि, त ये जीव के संग समाज के मया सब्बो दिन बर खतम हो जाही.

"मनुसुराओ मांग ले पाल कमम्यग ये मा टोंग यज्ञवा. ब्लौंगनिताउमुंगतौजाराओ फो कममायागुओ. मायुंगकथांगचीनीबसकांगटोंगमो ले बेथाजलाखे ये नैथाओयाग ये नो चुंग मा टोंग यूओ [एंर्रा धन माई हाथी, अइसने लागथे के हाथी जोड़ी खोजत जंगल मं किंजरत हवय. सिरिफ मइनखेच ह नो हे जेन ला अकेलापन मसूस होथे, जानवर घलो अइसने मसूस करथें].”

रिपोर्टर, ये कहिनी मं अनुवाद अऊ जानकारी मं मदद बर रोडिंगलियाना अऊ लालवोबिका के आभार जतावत हवय.

ये कहिनी ह शशांक श्रीनिवासन-पारी फेलोशिप 2025 के तहत मिले मदद ले लिखे गे हवय.

अनुवाद: निर्मल कुमार साहू