साथी के आस में डम्पा के हाथी

“हाथी एके झटका में सात बोरा फसल जियान कर देलक.”

सउंसे साल गुजर गइल, बाकिर रमपारा आजो डंपरेनपुरी गांव में अकेला बचल हाथी के कइल बरबादी नइखन भुलल.

फसल के सात बोरा मतलब पांच टिन, मोटा-मोटी 10 से 12 किलो सरसों. इहंवा मिजोरम में खाना के सामान रखे वाला बोरा के माप, चाहे वजन बतावे खातिर पारंपरिक रूप से टिन के डिब्बा ही काम में लावल जाला.

ऊ बतइलन, “हाथी के जूठ कइला के बाद त अब सरसों कवनो काम के ना रहल,” ऊ कहलन. हाथी के सूंढ़ के एक झटका लागल आ उनकर बांस के मचान पर धइल धानो बरबाद हो गइल.

बाकिर 73 बरिस के रमपारा बहुते बड़ दिल के बाड़न.

“मायुंग (हाथी) नीमन बा. आदमी लोग के कवनो नुकसान ना पहुंचाए. जादे से जादे, फसल खराब करेला. आएला, खाएला आउर चल जाला.” रियांग (जेकरा रेंग भी लिखल जाला) आदिवासी समुदाय से आवे वाला किसान आ बांस कारीगर, रमपारा बतइलन.

ऊ पारी के इहो बतइलन कि ई हाथी बड़ा लजपोकर बा. “कवनो आदमी के आहट मिलते, आपन लमहर-लमहर कान नीचे कर लेवेला.” वइसे अब खेत पर ओकर अनाइयो कम हो गइल बा. सन् 2022 आ 2023 में जहंवा ऊ तीन से चार बेर आइल रहे, 2024 में दू बेर आ 2025 में बस एके बेर आइल.

दस बरिस से जादे से ई हाथी जंगल, गांव आ खेत के मेड़ पर अकेले बउरा रहल बा. एकदम अकेले. भारत के बाकी इलाका में हाथी सब झुंड में रहेला, मादा आ बच्चा संगे. बाकिर मिजोरम के मामित जिला के सबले बड़का वन अभयारण्य, डम्पा टाइगर रिजर्व के ई हाथी अकेला पड़ गइल बा. अब ई रिजर्व धीरे-धीरे मिजोरम के बचल-खुचल 16 ठो हाथी सब के अंतिम ठिकाना बनत देखाई दे रहल बा. भारत के कुल 22,446 हाथी के गिनती के सामने ई छटांक भर बा.

“पूरा एक साल में ई अकेला हाथी बस दुइए बेरा नजर आइल. ई हमरा ओह हथिनी के बच्चा लागेला, जेकर देखभाल हमनी पहिले करत रहीं,” नोंदिया कहलन. ऊ रियांग समुदाय के पुरान महावत बाड़न.

हाथी हरमेसा से अकेला ना रहे. तीस बरिस पहिले के बात बा, इहंवा कोई 25 ठो हाथी सब घूमत देखाई देवत रहे. एकरा में एके गो पालतू रहे, बाकिर सब जंगली. नोंदिया के मानल जाव, त कुछ हाथी बांग्लादेस चल गइल, आ कुछ के शिकार हो गइल.

वन अधिकारी लोग असम से लावल पालतू हाथी संगे हथिनी के प्रजनन करवइले रहे. एकरा से जुड़ंवा बच्चा भइल, एगो नर, एगो मादा. बाकिर 2006 में जचगी घरिया हथिनी खतम हो गइली, नोंदिया बतावेलन. नर बच्चा ना बचल, आउर बापो एक साल में चल बसल.

नोंदिया मामित जिला के अकेला हाथी के जिकर करत कहलन, “अकेला बच्चा आजो जंगल में घूम रहल बा.”

झूम खेती, छोटका नाला आ पार उतरे के पुरनका रस्ता पर हाथी लउके के बात सबले जादे डंपरेनपुई आ तेइरेई में सुनाई पड़ेला.

डंपरेनपुई में हाथी किसान कोला के फसल खराब कर देलक. 53 बरिस के ई किसान के घर झूम खेती आ दिहाड़ी मजूरी से चलेला. उनकर रोज के कमाई 400-500 रुपइया बा.

सन् 2025 में हाथी मावबुआ (गांव से कोई 7 किमी दूर) में दू हेक्टेयर जमीन पर बनल बांस के मचान तहस-नहस कर देलक. एह में धान, मरिचाई, सरसों, कद्दू आ बैंगन समेत 15 बोरा फसल बरबाद हो गइल.

“मचान ठीक करे में 15 हजार रुपइया खरचा भइल आ कोई तीन महीना के समयो,” छव बचवन के बाप कोला कहलन. “एक-एक रुपइया हमनी के अपने खरचा करे पड़ेला. कवनो मुआवजा ना मिले. मजूरी देवे के हालत नइखे, एह से हमनी दू टिन चाउर देके काम कराइला.”

ऊ सन् 2020 में आ फेरु 2025 में मुआवजा खातिर अपील कइले रहस. बाकिर दुनो बेरा नाकाम रहलन.

आपन लकड़ी के घर के एक कांत में बनल छोट चौका में काम करत कोला कहे लगलन, “जेतना बचा सकिले, बचावे के कोसिस करत बानी. बाकिर ई सब कबले चली, पता ना.’

रमपारा के मानना बा, “ब्लोउंग बाई म्नुसु तोंगमो जगा ले मायुंग राओ फो खाखोम खे ये तोंगमाई मो जगा ओंग माई उआनो हिंग ये मा चोउंग उओ (हमरा हिसाब से त हाथी खातिर अब जंगल आउर गांव, दुनो सुरक्षित ठिकाना बन गइल बा).”

इहंवा के जादेतर लोग रियांग आ मिजो आदिवासी समुदाय से बा आ मिजो आ काउ ब्रू भाषा बोलेला. एह लोग के आमदनी के मुख्य जरिया झूम खेती (जगह बदल-बदल के खेती कइल) बा. हाथी भले एगो होखे, फसल आ घर के एतना नुकसान कर सकेला कि ओकर भरपाई कइल बहुते मुस्किल हो जाला.

ई रिजर्व कइएक तरह के जगंली जानवर सब के घर बा. इहंवा क्लाउडेड लेपर्ड (नेओफेलिस नेबुलोसा) अच्छा खासा तादाद में मिल जाई. भारत में जेतना 15 किसिम के प्रजाति के बंदर होई, ओकरा में से 8 रउआ इहंई देख सकिला. जइसे कि फेयर्स लीफ मंकी (ट्रेचिपिथेकस फेयरेई) आ हूलॉक गिब्बन (हूलॉक). जंगल के निचलका हिस्सा में झाड़-झंखाड़ के बीच मलायन सन बियर (हेलाक्टोर्स मलायनस) खाना खोजत फिरेला.

बाघ (पैंथेरा टाइग्रिस), मार्बल्ड वाइल्ड कैट (पारडोफेलिस मार्मोराटा) आ एशियाई गोल्डन कैट (कैटोप्यूमा टेमिन्की) जइसन जानवर सब अन्हार में घात लगा के घूमत रहेला.

नोंदिया के नाता एह अंतिम बचल हाथी से बहुते पुरान बा. 63 बरिस के नोंदिया 1987 से लेके कोई 20 बरिस ले एह हाथी के माई के महावत रह चुकल बाड़न. ऊ असम से लावल एगो पालतू हथिनी रही. नोंदिया अकेला हाथी के बारे में बतावे लगलन, “हम एह हाथी के जबो देखिला, भीतरी कइएक तरह के भाव उमड़ेला. बहुते खुसी होखेला.” जब ऊ ओह पालतू हाथी के बहुते दुलार से याद करेलन, त संगे बइठल उनकर घरवाली हमोइती मुस्काए लागेली. हमनी ऊंच खंभा पर बनल उनकर पुरान ब्रू घर में बइठल बानी. कमरा में चद्दर के परदा लगावल बा.

नोंदिया के लागेला कि ई अनाथ हथिनी अब आपन जोड़ा खोजत बा. उनका बहुते चिंता होखेला जब हथिनी बेचैनी में बहुते दूर चल जाली, कबो-कबो त मिजोरम-त्रिपुरा सीमा से लागल सागौन बगइचा ले. काहेकि ई इलाका सब ठीक नइखे.

सागौन के कटाई खातिर चल रहल काम में असम से लावल तीन ठो पालतू हाथी सब पहिले से लागल बा. वन अधिकारी लोग डेराइल बा कि कहीं सागौन माफिया एह जंगली मादा हाथी के पकड़ ना लेवे. जब ऊ जादे लगे आवेली, त उनका दूर भगावे खातिर लोग भी भेजल जाला.

पैंतालीस बरिस के लालहमेल्था पछिला दस बरिस से डम्पा के तेइरेई में बीट अधिकारी बाड़न. ऊ बतावत बाड़न कि एह हाथी के प्रजनन के लेके पहिले कइएक बेरा चरचा होखत रहल बा.

वन्यजीव मामला के जानकार अनवरुद्दीन चौधरी के कहनाम बा, “एह में कवनो शक नइखे कि डम्पा के ई मादा हाथी जंगल में अकेले दुखी रहत होई. जदि विभाग एकरा खातिर कवनो नर हाथी खोजे, आउर जेकरा में जादे पइसो ना लागेला, त इहंवा मिजोरम में विलुप्त होखे के कगार पर पहुंच चुकल हाथी के बचावल जा सकेला.” अनवरुद्दीन मिजोरम में कम होखत हाथी के आबादी के मामला पर शोध कर चुकल बाड़न.

सन् 2002 में भइल एगो शोध के हिसाब से, पारंपरिक रूप से मिजो, लाई, मारा, ब्रू, चकमा आ हमार जइसन स्थानीय समुदाय के लोग हाथी के शिकार करेला आउर ओकरा खइबो करेला.

‘द वाइल्ड एलिफेंट: एलेफस मैक्सिमस इन मिजोरम’ नाम के एह शोध से पता चलेला कि सन् 1960 के दसक में उग्रवाद आ आधुनिक हथियार के बढ़े से शिकार ‘बहुते जादे’ होखे लागल. उग्रवादी लोग हाथी के खाली मांसे खातिर ना, बलुक ओक दांत (हाथीदांत) खातिर भी मार देत रहे. एह दांत के दक्खिन-पूर्व एशिया के बजार में बेचके हथियार कीनल जात रहे.

1980 आ 1990 के दसक ले जेतना हाथी एह सबसे बचल, ऊ सब पस्चिमी आ दक्खिनी इलाका में छोट-छोट आ अलग-थलग हिस्सा में सिमट के रह गइल. एकरा में डम्पा आ न्गेंगपुई जइसन वन्यजीव रिजर्व भी रहे. एह तरहा बिखर जाए से ओह लोग के रहे के जगह कम पड़त चल गइल. प्रजनन के मौका कम होखत चल गइल, जेकरा चलते एह झुंड सब के भविष्य लगभग अन्हार हो गइल.

लालहमेल्था कहेलन, “डम्पा में हाथिए सबले बड़ जनावर बा. इहां के जंगल घना आ ऊबड़-खाबड़ वाला जमीन में बा. पहाड़ी ढलान पर होखे के चलते कवनो जानवर के देखल मुस्किल होखेला. अइसन में हाथी बाकी जानवर के बनिस्पत तनी आसानी से लउक जाला, भले अक्सरहा ना लउकत होखे.” ऊ इहो कहेलन, “हम जब कबो एह हाथी के देखिला, त इहे लागेला कि एकरा अकेला रहे के बजाय प्रजनन के मौका मिले के चाहीं, एकरो आपन एगो परिवार होखे के चाहीं.” रियांग आदिवासी समुदाय से आवे वाला लालहमेल्था के एगो आउरो चिंता सतावेला, “इहो डर लागल रहेला कि हाथी के गिनती बढ़ल, त हमनी जइसन वनकर्मी पर हमलो बढ़ सकेला.”

एस. सैमुअल बिंदास कहेलन, “हम एह जानवर के 50 से 60 बेर देखले बानी.” ऊ डम्पा फारेस्ट निरीक्षण विश्रामगृह से तनिए दूरी पर एगो इमारत के बाहर बइठल बाड़न. उहंवा लगहीं सिम कार्ड आ नस्ता करे के छोट-मोट दोकान सब बा. तेइरेई के 50 बरिस के निवासी सैमुअल आसानी से बता देवेलन कि ई जानवर कहंवा देखल जा सकेला.

डम्पा में जादेतर वनरक्षक लोग ठेका पर काम करेला. ओह लोग के नियम से, गश्त लगावे के दौरान देखाई पड़े वाला जानवर सब के सूची बनावे के होखेला. मिजो आदिवासी समुदाय से आवे वाला सैमुअल कहेलन, “हमनी जब आपन सूची में जानवर सब के नाम के सामने टिक लगाइला, त एक तरह के उपलब्धि महसूस होखेला.”

खेत में कटनी घरिया ई हाथी तेइरेई नदी के ऊपर ओरी, दू से तीन किमी दूर लुइहनार में पड़े वाला उनकर दू हेक्टेयर के खेतो में आवेला. सैमुअल साल भर दोसर-दोसर किसिम के अनाज सब उगावेलन. एह में धान, मकई, कद्दू, सरसों, अरबी, स्टिंकी बीन, गाजर, पत्तागोई आ बैंगन आदि शामिल बा.

उनकर कहनाम बा, “ई कबो कवनो आदमी पर हमला नइखे कइले. बाकिर कुछ कहलो ना जा सके. खाए-पिए के चीज खोजत एंटी-पोचिंग कैंप के मचान ले आ जाला. साई (हाथी) चुप्पे आवे के कोसिस करेला. बाकिर जब ऊ बांस के बीच से रस्ता बनावत रहेला, त डंडी सब टूटे के आवाज आवे चलते पता चल जाला.”

सैमुअल, हाथी आ सांभर से होखे वाला फसल के नुकसान त जइसे-तइसे स्वीकार कर लेले बाड़न. हर साल एह तरह के हमला में उनकर कमो ना त एक चौथाई फसल चौपट हो जाला. उनकर सात ठो बच्चा लोग बा. आइजोल में रहे आ कमाए वाली उनकर दू गो बेटी लोग घर खरचा में मदद खातिर पइसा भेजेला.

ऊ पछिला दस बरिस से मुआवजा खातिर कवनो तरह के अपील नइखन कइले. ऊ कहेलन कि एतना कागजी कार्रवाई भइला के बादो बड़ नुकसान खातिर मामूली 400 से 500 रुपइया मिलेला, जेकर कवनो मतलब नइखे. उ कहेलन, “नुकसान के दावा मंजूर भइला के बादो पइसा बहुत कम मिलत रहे. केतना बेरा त कुछ ना.”

सैमुअल इहो कहलन, “तरकारी बेचे के सीजन में, अक्टूबर से मार्च के बीच हमरा मोटा-मोटी डेढ़ लाख रुपइया के घाटा हो जाला, माने लगभग आधा. जदि हमार फसल हाथी से बचित, त हमहूं एक लाख रुपइया आउरो कमा सकत रहीं.”

बाकिर कबो-कबो सैमुअल के मन करेला कि वन विभाग जंगल के भीतरे एह हाथी खातिर कवनो साथी खोज देवल जाए, ताकि ऊ बाहिर आके उनकर फसल खराब कइल बंद कर देवे. ऊ बतावेलन कि जब ऊ सन् 1993 से 2018 के बीच वनरक्षक रहस आउर इहंवा हाथी के तादाद जादे रहे, तब आदमी लोग से टकरावो कम होखत रहे.

“लोग के लाग सकेला कि एतना नुकसान से हमनी के दुख होखेला आउर हाथी सब के मर जाए से फायदा. बाकिर सांच बात त ई बा कि वन विभाग में बहुते भ्रष्टाचार बा. जदि फसल के नुकसान के सही मुआवजा मिले, त हमनी एह नुकसान संगे जियल सीख सकत बानी आउर घर के खरचा भी चल जाई,” ऊ कहलन.

रमपारा मानेलन कि हाथी के जदि कवनो साथी ना मिलल, आउर प्रजनन खातिर कवनो पक्का योजना ना बनल, त एकरा मरते एह जीव से समुदाय के रिस्ता हरमेसा खातिर टूट जाई.

“म्नुसु राओ मंग ले पाल कमाम याग ये मा तोंग याग या. ब्लोउंग नी ताउमंग ताउजा राओ फो कमाम याग उओ. मायुंग क्थांग चिनि बुस्कांग तोंगमो ले बेथा जाला खे ये नैताओ याग ये नो चुंग मा तोंग उओ (नर होखे चाहे मादा, लागेला कि ई हाथी जंगल में एगो साथी खोज रहल बा. अकेलापन खाली आदमिए के ना लागे, जानवर सब के भी महसूस होखेला.)”

रिपोर्ट खातिर अनुवाद करे आ जानकारी हासिल करमें में मदद करे खातिर रिपोर्टर रोडिंगलियाना आ लालवोहबिका के आभार प्रकट करे के चाहत बानी.

कहानी शशांक श्रीनिवासन-पारी फेलोशिप 2025 के सहजोग से लिखल गइल बा.

अनुवाद: स्वर्ण कांता