पानी मं बूड़े दलित मछुआरिन मन के मिहनत

अपन खपरा छानी वाले घर के बहिर बइठे 48 बछर के कोमदी बीरयन बिहनिया-बिहनिया अपन घर के लोगन मन बर लउहा-लउहा रांधथे. ये ह अन्नानगर के जाने चिन्हे नजारा आय, जेन ह मइलाडदुरई जिला के सिरगाड़ी तालुक के पलइयार ले दू कोस मं बसे तांडवनकुलम गाँव के एक ठन दलित बस्ती आय. ये इलाका के अधिकतर माइलोगन मन के जइसने, कोमदी के दिन घलो कुकरा बासा ले पहिलीच सुरु हो जाथे. बिहनिया के रोज के काम-बूता मं नल ले पानी भरे, घर के झाड़ू-पोंछा अऊ लकरी के चूल्हा मं रांधे हवय.

“गैस सिलेंडर हवय, फेर ये ह सस्ता आय,” बगिया के बरतन-भाड़ा ला हेरत कोमदी बताथे. जब ​​तक ले वो ह अपन घरवाला, सास अऊ बेटा मन बर कलेवा अऊ मंझनिया खाय बर रांध नइ लेवय, ओकर तीर अपन खाय के बखत नइ बांचय.

वो ह लउहा-लउहा पलइयार जाथे, जिहां वो ह मछरी धरे के बंदरगाह मं मछरी सूखाय के बूता करथे.नदिया मन के धार अऊ चंदा के पाख मुताबिक ओकर काम सुरु ले आखिर तक ओकर दिन के बूता ला तय करथे.

एक-एक करके, माइलोगन मन अपन घर के काम बूता ला निपटाथें अऊ ज्वार (समंदर के पानी के लहर उठे) आय के पहिली नदिया पार मं हबर जाथे. गर ओकर बूता पलइयार मं मछरी मन ला सूखाय के रहिथे, त वो ह बस मं बइठे बर आठ बजे लकठा के बस टेसन मं हबर जाथे. ओकर बखत ज्वार के मुताबिक होथे. “पलइयार हमर लोगन मन बर जिनगी के रेखा आय! ये इहाँ के तीर-तखार के गाँव के लोगन मन बर सब्बो कुछु आय,” पलइयार मछरी धरेइय्या बंदरगाह मं मछरी सूखेइय्या कोमदी कहिथे.

पलइयार मछरी धरे के बंदरगाह आय जेन ह कोल्लिडम नदी के मुहाना मं हवय जिहां ये ह बंगाल के खाड़ी मं गिरथे. मइलाडदुरई जिला (2020 मं नाहपट्टिनम जिला ले अलग) मं बसे, ये तमिलनाडु के 12 ठन मछरी धरेइय्या बंदरगाह मन ले एक ठन आय, अऊ ये ह तीर-तखार के गाँव मन ले अवेइय्या हजारों मजूर मन के पेट भरथे जेन मन के जीविका मछरी के भरोसे हवय.

कोमदी बीरयन कतको बछर ले पलइयार मछरी धरेइय्या बंदरगाह मं मछरी सूखावत हवय. गोमती बताथे, “माइलोगन मन के जिनगी बंदरगाह ले गहिर ले जुड़े हवय. हमन इहींचे जन्मेन, इहिचे बिहाव होईस अऊ इहींचे अपन जिनगी गुजारत हवन. पहिली हमन खेत मं बूता करत रहेन, धान, रागी धन बिल्कुले नइ गिरे अऊ फसल सूखा जाथे.”

वो ह कहत जाथे, “मंय 15 बछर के उमर ले नदिया मं अपन दूनों हाथ ले चिंगरी [कैरीडिया] धरत हवं. मोर दाई अऊ सास घलो इहीच करत रहिन,” वो ह बतावत जाथे के, “मंय गरभ धरे बखत घलो चिंगरी धरे हवं. मंय येकर कमई ले अपन लइका मन के पढ़ई के खरचा उठाय हवं. जब तक ले परान हवय, मंय चिंगरी धरत रइहूँ.”

बंदरगाह ले दू कोस दूरिहा ओकर इलाका के 20 ले जियादा माईलोगन मन घलो ये काम मं लगे हवंय. परियर समाज (राज मं अनुसूचित जाति के रूप मं सूचीबद्ध) के कोमदी कहिथे, “माईलोगन मन बिहनिया 6 बजे के बस मं बइठ के बूता करे जाथें. हमन चिंगरी, मछरी अऊ स्क्विड ला चार धन पाँच बर निमारथन, नून लगाथन, जतन करके राखथन अऊ सूखाथन, हर किसम के चिंगरी मन ला निमार के अलग-अलग जगा मं राखथन.”

साल 2011 के जनगणना मुताबिक, तमिलनाडु के मइलाडुतुरई जिला के तांडवनकुलम गाँव मं करीबन 1, 510 दलित मन रइथें.

कोमदी अपन संगी माइलोगन मन के जिकर करत कहिथे,” हमन पलइयार मं जेन भरोसा करथन, ओकरे आधार ले हमन मंडली बनाथन,” वो ह बतावत जाथे,“हमन उहिच भरोसा ला लेके बिहाव करथन, रहिथन अऊ अपन जिनगी गुजारथन. मोर जनम इहींचे होइस अऊ बिहाव घलो इहींचे होइस.”

48 बछर के गोमदी जइसने, तांडवनकुलम, पुलियनतुरइ, तरकस अऊ तीर-तखार के इलाका मन के कतको मछरी सूखेइय्या मन प्राकृतिक संसाधन के भरोसे रहेइय्या समाज ले हवंय.वो मन उप्पनार, बकिंगम अऊ कोल्लिडम नदिया के नुनछुर पानी मं कतको पीढ़ी ले चिंगरी, केंकरा अऊ मछरी धरत चले आवत हवंय.

कोमदी जइसने कतको माइलोगन मन पारंपरिक पर्यावरन तंत्र वाले समाज ले आथें जेन मन कतको पीढ़ी ले चिंगरी, केंकरा अऊ मछरी धरे बर कोल्लिडम नदिया अऊ ओकर उलट के पानी के भरोसे हवंय. ये माइलोगन मन ला नदिया के भारी थाह हवय, जेन मं ये घलो सामिल हवय के कइसने चंदा के जवार (पानी चढ़े) अऊ चिंगरी मिले उपर असर डारथे.

समुंदर के मछरी उत्पादन के मामला मं तमिलनाडु देस मं तीसर जगा मं हवय - समुंदर धन नुनछुर पानी वाले इलाका मन मं मछरी धरे के काम सलाना 5.95 लाख टन हवय, मत्स्य सांख्यिकी 2022 पुस्तिका मं ये बात कहे गे हवय.

अन्ना नगर मं, जिहां कोमदी रहिथे, पांच कम एक कोरी ले जियादा माईलोगन मन हाथ ले मछरी धरे के काम करथें. फेर बरसात के सीजन मं, खास करके तमिल महिना कारथेय्यी अऊ मागली मं, जेन ला इहाँ के लोगन मन ‘अकाल’ कहिथें, जियादा काम बूता नइ मिलय.

कोमदी बताथे,“चिंगरी अक्सर अमावस अऊ पुन्नी के बखत ज्वार आय के बेरा बहिर चले जाथें. ये सीजन के सुरु के आय. सीजन सुरु होय के तीन दिन बाद, हमन चिंगरी धरे जाथन.” कोल्लिडम नदिया थोकन ऊँच हवय, ते पायके पानी के धार तेज रइथे अऊ बोहा जाथे. कोमदी कहिथे के गर वोला बिहनिया सात बजे चिंगरी धरे ला सुरु करथे, त वो ह बिहनिया 10 बजे तक ले धरत रइथे अऊ ज्वार बढ़े के बाद लहूट जाथे.

कोमदी जइसने चिंगरी धरेइय्या मन चंदा के पाख, बढ़े अऊ घटे ज्वार के तरीका, नदिया के ऊंचाई अऊ ज्वार वाले इलाका मन ला बढ़िया करके जानत हवंय. “अमावस के दिन बिहनिया 6 बजे तक ले ज्वार आ जाथे. तीसर दिन, ये ह घंटा भर बाद होही. ओकर बाद ले हमन घटत चंदा के दिन ला गिनथन, अऊ तेरवां दिन चंदा कमजोर हो जाथे. 11 दिन के बाद, पानी के धार कमजोर हो जाथे अऊ ज्वार धीमा हो जाथे, धीरे-धीरे कमतियाथे फेर तेजी ले बढ़थे. ते पायके हमन अक्सर कम ज्वार ले बखत मछरी धरथन, अंधियार पाख के पहिली अऊ आखिरी तीन दिन ला छोड़के, जब ज्वार बढ़े रहिथे,” कोमदी बताथे.

अक्सर वो मन पुन्नी अऊ अमावस के पहिली अऊ ओकर बाद सिरिफ छै दिन चिंगरी धरे नइ जांय- तेज लहरा सेती. ये बखत ला ‘सीजन’ घलो लहे जाथे, काबर के ये वो बखत होथे जब समंदर के जीव नदिया डहर चले आथें.

बदलत मऊसम सेती महासागर के अम्लीकरन ले उपर के गरमी बढ़े सेती मछरी मन के आय के तरीका ह बदल जाथे.

कोमदी के संगी बूता करेइय्या बिलम्ब कहिथे के अब चिंगरी कमतिया गे हें. “पहिली लोगन मन 500-1,000 रूपिया के चिंगरी धर लेवत रहिन.” अब पानी कम होय सेती, किस्मत ले चिंगरी मिलथे, अऊ माइलोगन मन जुच्छा हाथ घर लहूटथें. “कालि जेन मन ऊपर डहर जाय रहिन, वो मन सिलेपी [अफ्रीकी तिलापिया] धरिन, जेन ला हमन 50 रूपिया मं बेचेंन, कभू-कभू 100 रूपिया मं,” वो ह बतावत जाथे.

भारत के समुंदर पार के पानी मं, 86 फीसदी धरे के ताकत पहिली के 100 मित्र मं हवय, जेन ह पहिली 200 मीटर बाढ़के 92 फीसदी हो जाथे. ये दूनों इलाका नान नान मछुआरा समाज के पहुँचले बहिर हवय. ब्ल्यू इकोनोमी आफ इंडिया के एक ठन रिपोर्ट मं कहे गे हवय, “वइसे, ये क्षेत्र संसाधन समुंदर तीर के विकास ले बनेच असर मं आय हवय.”

बिलम्ब चिन्नकन्न 35 बछर ले चिंगरी के बेपारी आय अऊ अब पलइयार बंदरगाह मं मछरी सूखाय के काम करथे. पचास बछर पार, वो ह अपन बिहाव के बाद ले ये काम मं लगे हवय. “लोगन मन चिंगरी धरत रहिन, अऊ जब वो मन पार मं आवत रहिन, त हमन वोला बिसो लेवत रहेन, अऊ पलइयार मं बेच देवत रहेन. बेचे के बाद, हमन वो मन ला वो मन के कमई 1,000 धन 2,000 रूपिया दे देवत रहेन. फेर वो कमई कभू भरपूर नइ होवत रहिस. हमन कतको जगा ले पइसा उधार मं लेगेन, अक्सर पहिली के करजा ला छूटे बर अऊ जियादा उधार लेन, बस कइसने करके गुजार चलय. पोंगल अऊ दीपावली (देवारी) बखत, हमन मजूर मन ला पइसा देवत रहेन अऊ वो मन बर कपड़ा लत्ता बिसोवत रहेन. वो बखत के जिनगी बढ़िया रहिस,” बिलम्ब सुरता करथे.

बीमारी मं अपन घरवाला अऊ बेटी के गुजर जाय के बाद, बिलम्ब ह बांचे अपन एक झिन बेटी अऊ 90 बछर के सास के गुजारा बर पलइयार मं मछरी सूखाय के मजूरी करे लगिस. “मंय अपन घरवाला के गुजर जाय के बाद 10 बछर तक ले चिंगरी बिसोंय. गर 2,000 रूपिया मं चिंगरी बिसोय जाय त ले घलो 100 ले 200 रूपिया के नुकसान होथे. मोर बड़े बेटी हे मोला ये कारोबार बंद करे ला कहिस, चेताइस के करजा वसूली करेइय्या मन हमर घर आहीं. ते पायके, मंय काम छोड़ देंय. गर पइसा पटाय नइ सकबे, त गारी खाबे. मंय वो बूता करे जाय ला बंद कर देंय अऊ पलइयार मं काम करे सुरु करेंय,” बिलम्ब कहिथे. अपन मरजी के पारंपरिक कारोबार बंद करके मजूरी करे जाय ले ओकर चिंता अऊ बाढ़गे.

जब वो ह चिंगरी नइ धरय धन मछरी नइ सूखावय, त बिलम्ब ख़ास करके मनरेगा के भरोसे रहिथे- 100 दिन के रोजगार कार्यक्रम. वो ह ऑफ-सीजन बखत, अपन समाज के आन लोगन मन के जइसनेच नीम (अज़ादिराच्टा इंडिका) के बीजा संकेलत दिन पहा देथे.

बिलम्ब कहिथे, “हमन सब्बो किसिम के बूता करथन- मछरी के तराजू हेरे, उठाय, धोय अऊ सूखाय.हमन ये सब्बो करथन.” ओकर दिन भारी बिहनिया ले सुरु हो जाथे, वो ह बिहनिया 8 बजे बस मं बइठके अपन गाँव के आन माईलोगन के संग निकर परथे. वो ह सिरकाड़ी ले बस चढ़थे अऊ 15 मिनट के रद्दा के बाद सिंगारवेलर मछरी धरेइय्या बंदरगाह मं हबर जाथे.

बूता के बखत अक्सर 12 घंटा के होथे अऊ वोला रोजी मं 400 रूपिया मिलथे. “वो [मालिक] दू बेर चाहा देथे अऊ एक बखत खाय के – माईलोगन मन ला आधा अऊ मरद लोगन मन ला पूरा. कभू-कभू,गर मछरी जियादा होथे, त हमन ला निमारे ला परथे अऊ हो सकथे के हमन 9 धन 10 बजे तक ले घर लहूटे नइ सकन . गर हमन जियादा बखत तक ले रुकथन, त वो ह उपराहा 100 रूपिया देथे,” बिलम्ब कहिथे.

बरसात ह बिलम्ब के बोझ ला दुगुना कर दे हवय. वोला डर हवय के गर वो ह मछरी मन ला झड़ी ले बचाय नइ सकही त ओकर 70 बछर के मलकिन अंजम्मा भारी खिसियाही. बिलम्ब के कहना आय के घाम मं बेबखत बरसात होइस, जेकर सेती वोला सूखाय बर राखे गे मछरी ला घर लाय ला परत हवय.

“मछरी मन ला सूखाय भारी मुस्किल आय. गर हमन घाम मं बइठके मछरी के सूखाय ला अगोरत घला रइबो, त अंजम्मा कतको सवाल करही. घाम मं त ये ह भारी मुस्किल आयेच, फेर बरसात मं अऊ घला मुस्किल. हमन ला ला तुरते सब्बो ला संकेले ला परथे. पानी गिरे ले तोपे ला परथे, बरफ डारे ला परथे अऊ नून घलो डारे ला परथे ... ये ह भारी चुनौती वाले आय! फेर हमर करा कोनो उपाय नइ ये,” बिलम्ब कहिथे.ओकर परिवार ओकर कमाई के भरोसे हवय.

“मोला अपन तीन झिन पोता-पोती मन के देखरेख करना हे; मोर बेटी के परिवार मोर संग रइथे. घर मं चूल्हा तभे जलथे जब मंय कमाओं,” वो ह बताथे. ओकर पोता-पोती मन ला स्कूल जाना हे अऊ वो ह वो मनके एडमिसन सेती 5,000 रूपिया उधर लेगे हे, फेर ये पैसा ड्रेस अऊ बैग बिसोय मं खरचा होगे.“गर मंय चार धन पाँच दिन काम कर लेहूँ, त वो मन के एडमिसन के फीस जोर लिहूँ,” वो ह आस भरे बोली मं कहिथे.

जेकर सेती, मछरी धरे के बखत कम हो जाथे, जेकर ले बिलम्ब अऊ ओकर जइसने आन लोगन मन जेन मन मछरी धरे के भरोसे हवंय, बिपत मं पर जाथें. येकर छोड़, मछरी धरे मं रोक के बखत (जने के सीजन) 15 अप्रैल ले 14 जून तक, मछरी धरे बर कुल 61 दिन तक ले, वो मन ला बगेर कोनो मदद के तकलीफ उठाय ला परथे.

कोमदी कहिथे, “वो मन [सरकार] महीना भर सेती [रोक के बखत] मदद देथे, फेर ओकर बाद, वो कुछु घलो नइ देवय. गर हमन ला काम बूता मिला जातिस त बहुत बढ़िया होतिस.”

असंगठित क्षेत्र के मजूर, जेन मन कतको पीढ़ी ले मछरी धरे के भरोसे हवंय, वो मन ला केंद्र धान राज सरकार ले कोनो मदद नइ मिलय. चक्रवात अऊ लहर बढ़े बखत, जब समुंदर अशांत होथे, त अधिकतर माईलोगन मन ठलहा रइथें अऊ बगेर कोनो मदद के जूझत रइथें. वो ह कहिथे, “हमन ला खाय बर कमाय के जरूरत हवय. वो मन ला हमन ला काम देय के जरूरत हवय.”

ये कहिनी मूल रूप मं तमिल मं लिखे गे रहिस

अनुवाद: निर्मल कुमार साहू