दलित मछुआरिन: मछरी ना, बेकदरी के कांटा गड़ेला

आपन झोपड़ी के बाहिर मड़ई के नीचे बइठल 48 बरिस के गोमती वीरयन भोरे-भोरे चूल्हा पर खाना चढ़इले बाड़ी. अन्ना नगर के ई रोज के कहानी बा. ई पलैयार से छव किमी दूर, थंदावनकुल गांव के दलित बस्ती में पड़ेला. एहिजा के दोसर मेहरारू लोग के दिन, गोमतिए जेका भिनसरे चार बजे सुरु हो जाला. पहिले लगे के नल से पानी भरके लावल जाला, फेरु छोटहन घर के साफ-सफाई आउर तब अंगना में खाना बनावे खातिर चूल्हा जरावल जाला.

“गैस के सिलिंडर त मिल जाला, बाकिर ई सस्ता पड़ेला,” गोमती चूल्हा पर चढ़ल तसली में कलछुल घुमावत समझइली. घरवाला, सास आ लइका लोग खातिर नस्ता आ खाना बनावत बनावत, उनका अपना खाए के टाइमे ना बचे.

ऊ हाली-हाली पलैयार भागेली. उहंवा ऊ मछरी घाट पर मछरी सुखावे के काम करेली. उनकर पूरा दिन के काम नदी के धार आ चनरमा के घट-बढ़ के हिसाब से तय होखेला.

मछुआरिन लोग एक-एक करके घर के काम निपटावत जाली आ पानी घटला पर, घाट पहुंचत जाली. पलैयार में मछरी सुखावे के काम करे वाला ई मेहरारू लोग आठ बजे लगे के बस स्टैंड पहुंच जाला. उनकर दिनचर्या नदी में पानी के चढ़ाव-उतराव पर टिकल रहेला. पलैयार में मछरी सुखावे वाली गोमती कहेली, “पलैयार हमनी के जिए के आधार बा! इहंवा गांव-गिरांव के लोग खातिर ई सब कुछ बा.”

पलैयार मछरी पकड़े वाला घाट बा. कुल्लिडम नदी के धार जहंवा बंगाल के खाड़ी में मिलेला, ई उहंई पड़ेला. मइलाडुतुरई जिला में पड़े वाला (जे नागपट्टिनम जिला से 2020 में अलग कइल गइल रहे) एह घाट सहित, तमिलनाडु में कुल बारह गो मछरी वाला घाट बा. लगे के गांव के हजारन मजूर लोग के रोजी-रोटी इहे घाट पर टिकल बा, जहंवा ऊ लोग मछरी पकड़े के काम करेला.

गोमती वीरयन कइएक बरिस से पलैयार मछरी घाट पर काम करे आवत बाड़ी. उनकर कहनाम बा, “ई घाट त हमनी मेहरारू लोग के जिनगी के आधार बा.” “हमनी इहंई जनम लेनी, हमनी के बियाहो इहंई भइल, आउर इहंई जिनगी गुजर रहल बा. पहिले खेत में काम करत रहीं. धान, कोदो-बाजरा आ दाल-तिहलन बोअत रहीं. बाकिर अब ऊ काम सब कहंवा बचल. कबो त बहुते पानी गिर जाला, आ कबो एक्को बूंद ना होखे, फसल सूख जाला, मर जाला.”

ऊ इहो बतावेली, “पनरह बरिस के रहीं, तब्बे से नदी के पानी में उतरके हाथ से झींगा पकड़ रहल बानी. माई आउर हमार सासो इहे करत रहस. पेट से रहीं, तबो पानी में हाथ डार के टटोल-टटोल के झींगा पकड़ले बानी. एहि कमाई से हमार लरिका-फरिका लोग पढ़ल. जबले हमार सांस चली, झींगा पकड़ल ना छोड़ब.”

घाट से छव किमी दूर, गोमती के इलाका से 20 से जादे मेहरारू लोग एह काम में लागल बा. अनुसूचित जाति में गिनल जाए वाल पेरियार समुदाय से आवे वाली गोमती कहेली, “मेहरारू लोग 6 बजे भोरे वाला बस पकड़के इहंवा आवेला. इहंवा हमनी मछरी, झींगा आ स्किवड के पांच से छव बेर धोवे, नीमक लगावे आउर सुखा के बंडल बनावे के काम करिला.”

सन् 2011 के जनगणना के हिसाब से तमिलनाडु के मइलाडुतुरई जिला के तांडवनकुलम गांव में मोटा-मोटी 1,510 दलित लोग बसल बा.

गोमती संगे काम करे वाला मेहरारू के बारे में बतावत कहेली, “पलैयार पर भरोसा बा, एहि से हमनी मेहरारू लोग आपन टोली बनइले बानी. एकरे भरोसे आपन घर-दुआर बसइनी, बियाह-सादी कइनी, आ आज आपन जिनगी जियत बानी. हमार जनम इहंई भइल आउर बियाहो इहंई भइल.”

अड़तालीस बरिस के गोमतिए जइसन तांडवनकुलम, पुलियनतुरई, तरकस आ लगे के इलाका से मछरी सुखावे आवे वाला बहुते मेहरारू लोग बा, जे कुदरती संसाधन पर निर्भर जाति-समाज से जुड़ल बा. ई लोग केतना पीढ़ी से उप्पनार, बकिंघम आ कुल्लिडम के खारा पानी से झींगा, केकड़ा आ मछरी पकड़ के आपन पेट पालत आइल बा.

गोमती जइसन बहुते मेहरारू लोग बाप-दादा के जमाना से झींगा, केकड़ा आ मछरी पकड़े खातिर कुल्लिडम नदी आ ओकर पछियारी धार पर निर्भर बा. एकरे से ऊ लोग आपन कमाई करत आ रहल बा. एह लोग के नदी के चाल-ढ़ाल के गहिर समझ बा. ऊ लोग जानेला चनरमा के घटत-बढ़त से ज्वार-भाटा कइसे आवेला आउर झींगा कब मिली.

समुंदरी मछरी पकड़े के मामला में तमिलनाडु देस में तेसर नंबर पर आवेला. समुंदर आ खारा पानी से हर साल मोटा-मोटी 5.95 लाख टन मछरी पकड़ाला. ई बात ‘फिशरीज स्टैटिस्टिक्स 2022’ में लिखल बा.

अन्ना नगर, जहंवा गोमती रहेली, में पनरह से जादे मेहरारू लोग हाथ से मछरी पकड़े के काम करेला. बाकिर बरसात में, खास करके गांव में तमिल में ‘अकाल’ के महीना कहल जाए वाला- कार्तिकई आ मारगरी में काम के बहुते मारा-मारी रहेला.

“अमावस आ पूरनमासी घरिया जब जवार आवेला, झींगा बह के आवेला. एहि घरिया सीजन सुरु मानल जाला. सीजन सुरु होखे के तीन दिन बाद हमनी झींगा पकड़े निकलिला,” गोमती फरिया के बतइली. कुल्लिडम नदी तनी ऊंच पड़ेला, जेकरा चलते पानी जल्दी चढ़ेला आ जल्दी उतर जाला. भोरे सात बजे से काम सुरु हो जाला, आ तीन घंटा बाद दस बजे ले चलेला. ओकरा बाद पानी फेरु चढ़ी, त हमनी काम पर लउट आएम.

गोमती जइसन झींगा पकड़े वाला मछुआरिन लोग के चनरमा के घटनाई-बढ़नाई, जवार-भाटा के तरीका, नदी के पेंदी के ऊंचाई-गहिराई आ जवार-भाटा के इलाका, सब बात के गहिर समझ होखेला. “अमावस में छव बजे भोरे जवार चढ़ेला. तिसरका दिन पानी एक घंटा देर से चढ़ेला. ओकरा बाद से हमनी चनरमा के तिथि गिने लागिला. तेरहमा दिन ले चनरमा धीरे-धीरे घटे लागेला. ग्यारहमा दिन के बाद पानी के बहाव कमजोर होखे लागेला, जवार धीरे-धीरे उतरेला, बाकिर फेरु तेजी से चढ़ जाला. एहि से हमनी अक्सरहा सात दिन ले जवार के बखत मछरी पकड़िला. आ चनरमा के सुरु के तीन दिन आ आखिर के तीन दिन लहर बहुत तेज रहेला, त मछरी पकड़े से बचिला,” गोमती बतावत बाड़ी.

अमूमन ऊ लोग अमावस आ पूरनमासी के पहिला आ अंतिम छव दिन झींगा पकड़े से परहेज करेला. काहेकि एह घरिया खूब तेज लहर आवेला. एह समय के ‘सीजन’ कहल जाला, काहेकि एहि दौरान समुदरी जीव सब नदी ओरी आवेला.

गोमती संगे काम करे वाली विल्लम्ब कहेली कि अब झींगा बहुते कम हो गइल बा. “पहिले लोग 500 से 1,000 रुपइया के झींगा पकड़ लेत रहे.” अब त पानी घटला से झींगा मुस्किल से मिलेला. केतना बेरा त मेहरारू लोग खालिए हाथे लवट आवेला. “काल्हे, जे लोग ऊपर के धार में गइल रहे, सिलप्पी (अफ्रीकी तिलापिया) पकड़ के ले आइल. एकरा खातिर हमनी ने कबो 50, त कबो 100 रुपइया मिल जाला.”

भारत के समुंदरी इलाका में मछरी पकड़े के जेतना मौका उपलब्ध बा, पहिल 100 मीटर के भीतर 86 प्रतिशत बा. 200 मीटर ले गइला पर ई 92 प्रतिसत हो जाला. छोट-मोट मछुआरा लोग आसानी से एह दुनो इलाका में पहुंच जाला. भारत के सुमंदरी अर्थव्यवस्था (बुल्लू इकोनॉमी) पर बनल रिपोर्ट में बतावल गइल बा, “बाकिर अब एह समुंदरी इलाका में धड़ल्ले से जे बिकास के काम हो रहल बा, ओकरा से बहुते नुकसान हो रहल बा.”

विल्लम्ब चिनकन्न पैंतीस बरिस से झींगा बेचे के काम करत रहस, आउर अब पलैयार मछरी घाट पर मछरी सुखावेली. पचपन-साठ के विल्लम्ब बियाह के बादे से एह काम में लागल बानी. “लोग झींगा पकड़ के किनारे लावत रहे. हमनी ओह लोग से कीन के पलैयार में बेच देत रहीं. बेचला के बाद ऊ लोग के हजार-दू हजार रुपइया दे देवल जात रहे. बाकिर ऊ आमदनी कब्बो पूरा ना पड़त रहे. हमनी कइएक जगहा से करजा उठावत रहीं, आउर पहिले से लेवल करजा चुकावे खातिर फेरु से करजा लेवे पड़त रहे. पोंगल आ देवाली पर मजूर लोग के कपड़ा आ कुछ रुपइया देवल जात रहे. तब जिनगी बढ़िया चलत रहे,” विल्लम्ब इयाद करत बाड़ी.

बेमारी से घरवाला आ लइकी के खतम भइला के बाद, आपन इकलौता बचल बेटी आ नब्बे बरिस के सास के संभारे खातिर विल्लम्ब पलैयार में मछरी सुखावे के काम करे लगली. “घरवाला के मरला के बाद दस साल ले झींगा कीने-बेचे के काम कइनी. दू हजार के माल में भी सौ-दू सौ के घाटा लाग जात रहे. बड़की लइकी कहे लगली, ‘माई ई धंधा छोड़ द, ना त करजा वाला दरवाजा पीटी.’ तब जाके हम ई काम छोड़ देनी. करजा ना चुकाएम, त गारी त सुनही के पड़ी नू. हम ऊ काम पर जाएले बंद कर देनी आ पलैयार में मजूरी करे लगनी,” विल्लम्ब बतइली. आपन पुरनका काम छोड़के मजूरी करे से उनकर मन पर आउर बोझ बढ़ गइल.

विल्लम्ब जब झींगा ना पकड़स, चाहे मछरी ना सुखावस, त जादेतर मनरेगा के काम करेली, उहे 100 दिन रोजगार वाला मनरेगा. जब मनरेगा ना रहेला, ऊ आपन समाज के दोसर लोग जेका नीम (अजादिराच्टा इंडिका) के बिया चुन के आपन दिन काटेली.

विल्लम्ब कहेली, “हमनी माछ काटे, छीले, उठावे, धोवे, सुखावे हर तरह के काम करिला.” उनकर दिन भोरे जल्दी सुरु हो जाला. चूल्हा-चौका के काम खतम करके सबेरे आठ बजे के बस पकड़ के ऊ गांव के दोसर मेहरारू लोग संगे चल देवेली. सिरगारी से बस चढ़ेली आ पनरह मिनट के बाद सिंगारवेलर मछरी घाट पहुंच जाली.

आमतौर पर 12 घंटा के काम रहेला आउर एकरा खातिर 400 रुपइया मजूरी मिलेला. “मालिक लोग हमनी के दू बेर चाय आउर एक बेर के खाना, मेहरारू के आधा पेट आउर मरद के पेट भर देवेला. कइएक बेरा जब मछरी अफरात में होखेली, हमनी के ओकरा साफ कइल जरूरी होखेला. ओह दिन हमनी के घरे लउटे में 9 से 10 बज जाला. जदि आउर टाइम रुके पड़ल, त हमनी के 100 रुपइया एकस्ट्रा मिल जाला,” विल्लम्ब बतावेली.

बरखा से विल्लम्ब के आफत दोगुना हो जाला. माछ जदि बरखा में भींज गइल, त उनका आपन 70 बरिस के मलकिनी अंजम्मा से गारी सुने के मिली. विल्लम्ब कहेली कि गरमी में बेबखत बरखा भइल, आ उनका सूख रहल माछ के हाली-हाली समेटे के पड़ल.

“मछरी सुखावल आसान काम नइखे. घाम में बइठ के मछरी सुखे के इंतिजारी ताकीं, तबो अंजम्मा हमनी से ढेरे सवाल पूछिहन. घाम में त आफत बड़ले बा, बाकिर बरखा में त हालत पस्त हो जाला. सब कुछ जल्दी-जल्दी समेटे के पड़ेला. पानी गिरते मछरी के झांपे पड़ेला, बरफ लगावे पड़ेला, नून डाले पड़ेला... बहुते मुस्किल काम बा! बाकिर बिना कमइले गुजारो त नइखे,” विल्लम्ब कहेली. घरवाला लोग उनकरे कमाई पर निर्भर बा.

“हमार लइकी के परिवार हमरे संगे रहेला. हमरा आपन नाती-नतिनी के भी देखे पड़ेला. हम कमाइला तबे घर में चूल्हा जरेला,” ऊ बतइली. उनकर नाती-नतिनी लोग स्कूल जाला. ओह लोग के स्कूल में नाम लिखावे खातिर 5,000 रुपइया करजा लेवे पड़ल. बाकिर ई पइसा स्कूल ड्रेस आ बस्ता में खरचा हो गइल. ऊ आस लगइले कहली, “जदि हमरा चार, चाहे पांच दिन काम मिल जाव, त हम एडमिशन खातिर पइसा जुटा लेहम.”

पानी-बयार बदले से समुंदर के पानी में एसिड बढ़ रहल बा. एकरा चलते पानी के सतह गरम होखे लागेला, जेकरा से मछरी के प्रवास के तरीका भी बदल रहल बा. नतीजा, मछरी पकड़े के दिन घट गइल बा, आ विल्लम्ब आ उनकर जइसन लोग के रोजी-रोटी पर आफत आ गइल बा. इहे ना, जब 15 अप्रिल से 15 जून के बीच, मछरी के अंडा देवे के समय, 61 दिन ले पूरा मछरी मारे पर रोक रहेला उहो घरिया ओह लोग के कवनो तरह के मदद ना मिले.

“सरकार एक महीना (जब रोक लागेला) मदद त करेला, बाकिर ओकरा बाद कुछ ना मिले. जदि काम मिल जाव, त बढ़िया होई,” गोमती कहे लगली.

असंगठित क्षेत्र के मजूर, जे लोग बाप-दादा के जमाना से मछरी पकड़े के काम करत आइल, के केंद्र चाहे राज्य सरकार से कवनो तरह के सहायता नइखे. अन्हड़-पानी आ समुंदर उफनला के समय, जब समुंदर में लहर जोर मारेला, मछुआरिन लोग बेरोजगार हो जाला. एह घरिया ओह लोग के कवनो सरकारी मदद ना मिले. ऊ कहेली, “कमाएम ना, त खाएम का. सरकार के चाहीं कि हमनी के काम देवे.”

कहानी मूल रूप से तमिल में रिपोर्ट कइल गइल रहे.

अनुवाद: स्वर्ण कांता