یمنا کی آلودگی پر بھاری چھٹھ پوجا کی رسم

’’پانی سے بدبو آتی ہے، لیکن ہم کر بھی کیا سکتے ہیں؟‘‘

جب سورج غروب ہونے لگتا ہے، تو بچہ دیوی دہلی میں دریائے یمنا میں غوطہ لگانے کے لیے تیار ہو رہی ہوتی ہیں۔ وہ کالندی کنج گھاٹ پر موجود نوئیڈا، دہلی اور فرید آباد سے آئے ان ہزاروں افراد میں شامل ہیں جو نومبر کے پہلے ہفتہ میں سورج، پانی، ہوا اور فطرت سے منسوب سالانہ تہوار، چھٹھ مہا پرو منانے کے لیے جمع ہوئے ہیں۔ ’’ہمارے لیے چھٹھ سب سے بڑا تہوار ہے، دیوالی سے بھی بڑا،‘‘ راجیش منڈل (۴۵ سالہ) کہتے ہیں، وہ بہار کے کھگڑیا سے ہجرت کرکے دہلی آئے ہیں۔

چار روزہ چھٹھ پوجا کے تیسرے اور سب سے مقدس دن – سندھیا ارگھیہ – کو شادی شدہ خواتین کمر تک گہرے پانی میں دو گھنٹے تک کھڑے ہوکر غروب ہوتے سورج کی پوجا کرتی ہیں۔ دہلی اور آس پاس کے علاقوں میں مقیم عقیدت مندوں کے لیے خطرناک حد تک آلودہ یمنا ندی ہی واحد متبادل ہے۔

چھٹھ کا تہوار بہار، جھارکھنڈ اور اتر پردیش کے کچھ علاقوں میں منایا جاتا ہے۔ روایتی طور پر، چھٹھ کی تقریبات میں تالابوں یا دیگر آبی ذخائر میں ڈبکی لگانا شامل ہوتا ہے۔ لیکن یمنا ظاہری طور پر آلودہ ہے۔ اس کی سطح پر گاڑھا سفید جھاگ تیرتا رہتا ہے، اور پانی سے بدبو آ تی ہے۔

صحافی شالنی سنگھ لکھتی ہیں، ’’یمنا کے بہاؤ کا صرف ۲۲ کلومیٹر (یا بمشکل ۶ء۱ فیصد) حصہ قومی دارالحکومت کے علاقہ میں آتا ہے، لیکن اس چھوٹے سے حصہ سے خارج ہونے والا فضلہ اور زہر دریا کے ۱۳۷۶ کلومیٹر کے بہاؤ میں ہونے والی تمام آلودگی کا تقریباً ۸۰ فیصد ہے۔‘‘ (پڑھیں: جب یمنا کی ’مری ہوئی مچھلی تازہ ہوگی‘)

اپنی عمر کی چالیس کی دہائی میں پہنچ چکیں بچہ دیوی، بہار کے دربھنگہ ضلع سے تعلق رکھتی ہیں اور ایک مہاجر ہیں۔ وہ ۱۵ سال قبل دہلی آئی تھیں اور دہلی کی جے جے کالونی میں مقیم ایک گھریلو ملازمہ ہیں۔ آج جھاگ والے یمنا کے کنارے اپنے ساتھی عقیدت مندوں کے ساتھ کھڑی وہ اس جھاگ اور صحت پر پڑنے والے اس کے مضر اثرات کو لے کر فکرمند ہیں۔ لیکن عقیدت کے سامنے وسائل محدود ہوتے ہیں۔ یہاں بھی عقیدت نے ان کے خدشات کو مات دے دی ہے۔

’’یہاں ہر شخص مجبوری میں آیا ہے۔ ہمیں بھی جھاگ نظر آتے ہیں، لیکن [دہلی انتظامیہ کے ذریعہ بنائے گئے] تالاب بہت دور ہیں۔ ہم تمام اشیاء کے ساتھ طلوع آفتاب کے وقت وہاں کیسے پہنچ سکتے ہیں؟‘‘ وہ پوچھتی ہیں۔

بچہ دیوی کہتی ہیں کہ وہ ۱۵ برسوں سے یہاں آ رہی ہیں اور اس دوران یمنا کی آلودگی میں اضافہ ہی ہوا ہے۔ ’’جب میں یہاں پہلی بار آئی تھی تو جھاگ نہیں تھا، لیکن اب پانی میں تیز بو اور اس پر جھاگ کی ایک موٹی تہہ موجود ہے،‘‘ وہ مزید کہتی ہیں۔

دہلی کی آلودگی کنٹرول کمیٹی کی واٹر لیبارٹری کی ۸ اکتوبر ۲۰۲۴ کی رپورٹ کے مطابق یمنا میں فضلہ اور بغیر صاف کیا ہوا سیوریج ۱۸ لاکھ ایم پی این /۱۰۰ ایم ایل (سب سے زیادہ ممکنہ سطح فی ملی لیٹر)، جو کہ منظور شدہ سطح سے ۱۰۰ گنا زیادہ ہے جب کہ اسے ۲۵۰۰ ایم پی این/۱۰۰ ایم ایل سے تجاوز نہیں کرنا چاہیے۔ لہٰذا، کالندی کنج گھاٹ پر غسل کی رسم ادا کرنے ۵ سے ۱۰ کلومیٹر دور سے آئیں بچہ دیوی اور دیگر عقیدت مندوں کو یہاں پانی میں اترنے سے جلد اور صحت کے دیگر خطرات لاحق ہو سکتے ہیں۔

’’کہاں ہے وہ پونڈ (تالاب)؟ ہم کو تو نہیں دکھائی دیتا، پونڈ ڈھونڈیں یا کام پہ جائیں،‘‘ بچہ دیوی دہلی حکومت کے بنائے ان ۱۰۰۰ مصنوعی پونڈوں کے بارے میں پوچھتی ہیں۔

اپنی پوجا مکمل کرنے کے بعد، ایک اور عقیدت مند سریتا دیوی اپنی ساڑی سے سفید جھاگ صاف کرتے ہوئے پانی سے باہر نکلتی ہیں۔ وہ گزشتہ ۲۰ سالوں سے یہاں آ رہی ہیں اور آلودہ پانی سے لگنے والی کسی بھی بیماری سے تحفظ کے لیے اپنے بھگوان کی شکتی پر یقین رکھتی ہیں۔ ’’بھگوان کا نام لیتے ہیں، کچھ نہیں ہوتا،‘‘ وہ بے فکر ہو کر کہتی ہیں۔

ترجمہ نگار: شفیق عالم