"ପାଣି ଦୁର୍ଗନ୍ଧ କରୁଛି, କିନ୍ତୁ ଆମ ପାଖରେ କ'ଣ ବିକଳ୍ପ ଅଛି?"
ସୂର୍ଯ୍ୟାସ୍ତ ହେବାକୁ ଯାଉଛି, ବଚ୍ଛା ଦେବୀ ଦିଲ୍ଲୀର ଯମୁନା ନଦୀରେ ବୁଡ଼ ପକାଇବା ଲାଗି ପ୍ରସ୍ତୁତ ହେଉଛନ୍ତି। କାଳିନ୍ଦୀ କୁଞ୍ଜ ଘାଟଠାରେ, ନୋଏଡ଼ା, ଦିଲ୍ଲୀ ଓ ଫରିଦାବାଦକୁ ବୁଡ଼ ପକାଇବାକୁ ଆସିଥିବା ହଜାର ହଜାର ମହିଳାଙ୍କ ମଧ୍ୟରେ ସେ ଅନ୍ୟତମ। ନଭେମ୍ବର ପ୍ରଥମ ସପ୍ତାହରେ ସୂର୍ଯ୍ୟ ଦେବତା, ଜଳ, ବାୟୁ ଏବଂ ପ୍ରକୃତିକୁ ସମର୍ପିତ ଏକ ବାର୍ଷିକ ପର୍ବ ଛଠ୍ ମହାପର୍ବ ପାଳନ କରିବାକୁ ସେମାନେ ଏଠାରେ ଏକାଠି ହୋଇଛନ୍ତି । ‘‘ଆମ ପାଇଁ ଛଠ୍ ସବୁଠୁ ବଡ଼ ପର୍ବ, ଦୀପାବଳିଠାରୁ ମଧ୍ୟ ବଡ଼,’’ ରାଜେଶ ମଣ୍ଡଳ କୁହନ୍ତି। ବିହାର ଖଗରିଆରୁ ଆସିଥିବା ଏହି ୪୫ ବର୍ଷୀୟ ବ୍ୟକ୍ତି ଜଣଙ୍କ ଦିଲ୍ଲୀରେ ଜଣେ ପ୍ରବାସୀ।
ଚାରି ଦିନିଆ ଛଠ୍ ପୂଜାର ତୃତୀୟ ଏବଂ ସବୁଠାରୁ ଶୁଭ ଦିନ - ସନ୍ଧ୍ୟା ଅର୍ଘ୍ୟ ସମୟରେ ବିବାହିତ ମହିଳାମାନେ ଦୁଇ ଘଣ୍ଟା ଧରି ଅଣ୍ଟା ପର୍ଯ୍ୟନ୍ତ ପାଣିରେ ବୁଡ଼ି ରହି ଅସ୍ତଗାମୀ ସୂର୍ଯ୍ୟଙ୍କୁ ପ୍ରାର୍ଥନା କରନ୍ତି। ଦିଲ୍ଲୀ ଓ ଏହାର ଆଖପାଖ ଅଞ୍ଚଳରେ ରହୁଥିବା ଶ୍ରଦ୍ଧାଳୁଙ୍କ ପାଇଁ ବିପଜ୍ଜନକ ଭାବେ ପ୍ରଦୂଷିତ ଯମୁନା ନଦୀରେ ବୁଡ଼ ପକାଇବା ଏକମାତ୍ର ବିକଳ୍ପ।
