بنیا چھاپر گاؤں کی دؤری بُننے والی خواتین

’’دلہن کی ماں نے صاف کہہ دیا ہے کہ مجھے صرف ہاتھ سے بُنی ہوئی کچھ دؤریاں ہی تحفے میں دینی ہیں،‘‘ چندراوتی دیوی مسکراتے ہوئے کہتی ہیں۔ ’’ہم مہنگے تحفے نہیں دے سکتے، لیکن ہماری روایت میں یہی تحفہ ہوتا ہے،‘‘ ان کا اشارہ اپنی بھانجی کی جلد ہی ہونے والی شادی کی طرف ہے۔

چندراوتی دیوی (۴۵)، جو بنیا چھاپر گاؤں کی رہنے والی ہیں، سوکھی مونج کی گھاس سے دؤری بنانے میں ماہر ہیں۔ یہ ہاتھ سے بنائی گئی دؤریاں دلہنوں کو تحفے میں دی جاتی ہیں اور شادی کی رسموں میں بھی ان کا استعمال ہوتا ہے۔ چندراوتی کھیتی باڑی کرتی ہیں اور ان کے پاس آدھا بیگھہ کھیت ہے۔ اپنے خالی وقت میں وہ دؤری بُنتی ہیں۔

دؤری ایک ضروری اور کثیر الاستعمال سامان ہے۔ ’’ہمارے پاس اناج، مٹھائی، آٹا یا سبزیاں رکھنے کے لیے الماری نہیں ہے۔ ہم ان سامانوں کو دؤری میں ہی رکھتے ہیں،‘‘ چندراوتی کی ۱۸ سال کی بیٹی پُشپا کہتی ہے۔

بہار کے گوپال گنج ضلع میں واقع ان کے گھر میں مونج کی گھاس کے گٹھر دیواروں کے سہارے رکھے گئے ہیں۔ دسمبر کا مہینہ ہے اور اس جنگلی گھاس کو ابھی ابھی اکٹھا کیا گیا ہے، جسے گرمیوں کی دھوپ میں سُکھایا جائے گا۔

مونج کی گھاس عام طور پر دلدلی علاقوں میں پائی جاتی ہے۔ گوپال گنج ضلع سے ہو کر گنڈک اور اس کی پانچ معاون ندیاں بہتی ہیں، اور اس علاقہ کے پوکھروں اور چھوٹے تالابوں کے ارد گرد مونج خوب پھلتی پھولتی ہے۔

بنیا چھاپر گاؤں کی ایک اور رہائشی اُرملا دیوی کہتی ہیں، ’’سردیوں میں کھیتی کا کام زیادہ نہیں ہوتا ہے، اس لیے ہم گھر پر رہ کر تھوڑا بہت بُنائی کا کام کر سکتے ہیں۔‘‘ ارملا دیوی (۵۲) بھی کسان ہیں اور ان کی فیملی کے پاس تین بیگھہ زمین ہے۔ ’’لیکن ہم دؤری بُننے کا کام سال بھر کرتے ہیں،‘‘ وہ مزید بتاتی ہیں۔

اپنے دو کمروں والے پختہ مکان کے برآمدے میں بیٹھیں ارملا مونج گھاس سے دؤری بُن رہی ہیں، جسے پچھلی گرمیوں میں سُکھایا گیا تھا۔

مونج گھاس کی ایک ڈنڈی تقریباً ۵ میٹر لمبی ہوتی ہے۔ اس ڈنڈی کی سب سے باہری پرت کو بروآ کہتے ہیں، جسے ہاتھ سے چھیل کر دؤری بنانے کے کام میں لایا جاتا ہے۔ ایک ڈنڈی سے تقریباً ۳-۴ بروآ کی پٹّی ملتی ہے۔ کوئی بھی پیٹرن بناتے وقت ایک موٹی سوئی کی مدد سے ارملا پوری توجہ کے ساتھ بروآ کو کھینچتی اور کستی جاتی ہیں، تاکہ بُنائی میں کوئی ڈھیلاپن نہ رہے۔ بیچ بیچ میں وہ بروآ کو پانی میں بھگو دیتی ہیں، تاکہ ان میں لچیلاپن بنا رہے۔ وہ جو بروآ استعمال کر رہی ہیں اسے گلابی اور ہرے رنگوں میں رنگا گیا ہے۔ ’’میرے بیٹے سیمرا بازار سے رنگ لاتے ہیں، جو یہاں سے صرف دو کلومیٹر دور ہے،‘‘ ارملا بتاتی ہیں۔ رنگوں کو پانی میں ملا کر بروآ کے گٹھروں کے ساتھ ۱۰-۱۵ منٹ اُبالا جاتا ہے، پھر رات بھر کے لیے انہیں رنگ میں ڈُبا کر چھوڑ دیا جاتا ہے۔

’’بروآ کو صحیح وقت پر نکالنا بہت ضروری ہے، ورنہ پرانی ڈنڈی کالی اور بھربھری ہو جاتی ہے، اور تب اسے بُننے کے کام میں نہیں لایا جا سکتا،‘‘ ارملا کہتی ہیں۔ وقت پر نکالی گئی خشک بروآ کا گچھا بنا کر اسے ان کے کمرے کی چھت سے لٹکے ہوئے ہُک میں ٹانگ دیا جاتا ہے۔

عورتیں مونج گھاس کے ہر حصہ کو کسی نہ کسی طرح استعمال کر لیتی ہیں۔ ’’بروآ نکالنے کے بعد بچا ہوا سخت حصہ ’سیک‘ کہلاتا ہے اور اس سے سوپ بناتے ہیں،‘‘ ارملا بتاتی ہیں۔ سوپ ایک قسم کی بڑی پلیٹ ہوتی ہے، جس کا استعمال اناج پھٹکنے اور اسے صاف کرنے میں ہوتا ہے۔ دؤریوں کے علاوہ مونج کی مدد سے ہاتھ کے پنکھے (ترکُل) اور یہاں تک کہ جھونپڑیاں بھی بنائی جاتی ہیں۔

بُنائی میں سالوں کی مشق اور تجربہ ہونے کے سبب ارملا ایک دؤری مشکل سے ۸-۹ دنوں میں بنا سکتی ہیں، بشرطیکہ کھیت پر انہیں زیادہ کام نہ ہو۔ پھر بھی، ان کا پورا دن مصروفیت میں گزرتا ہے، کیوں کہ اپنے گھر کے کام کاج کے ساتھ ساتھ انہیں اپنی تین گایوں کی بھی دیکھ بھال کرنی پڑتی ہے۔ ’’میں ہر سال ۶-۴ دؤریاں بنا لیتی ہوں،‘‘ وہ بتاتی ہیں۔ عمر کے ساتھ ساتھ ان کی نظر کمزور پڑنے لگی ہے، جس کی وجہ سے بُنائی جیسے باریک کام پر توجہ مرکوز کرنا خاصا مشکل ہو گیا ہے۔

’’ہم دؤری کی بُنائی کو کاروبار بنانے کا ارادہ نہیں رکھتے ہیں،‘‘ ارملا سرے سے انکار کرتی ہیں، اور بتاتی ہیں کہ بُنائی کا کام وہ تبھی کرتی ہیں، جب انہیں فرصت ملتی ہے۔ ’’یہ کوئی شہر یا قصبہ نہیں ہے، جہاں دؤری بیچی جا سکے۔ ہمارے گاؤں میں ہر گھر میں عورتیں دؤری خود اپنے استعمال کے لیے بناتی ہیں۔‘‘

ارملا کی طرح شیلا دیوی کے آنگن میں بھی بروآ کا ایک صاف ستھرا گٹھر رکھا ہوا ہے۔ ’’میری ماں نے مجھے دؤری بُننا سکھایا تھا۔ میں بچپن سے ہی دؤریاں بنا رہی ہوں،‘‘ ۴۰ سالہ شیلا بتاتی ہیں، جو بنیادی طور پر اتر پردیش کی ہیں اور شادی کے بعد ۱۰ سال کی عمر میں بنیا چھاپر آئی تھیں۔ شیلا کبھی اسکول نہیں گئیں، کیوں کہ ’’پڑھائی کا رواج نہیں تھا،‘‘ وہ کہتی ہیں۔ میں پڑھی لکھی نہیں ہوں، لیکن کم از کم بُنائی اچھی طرح سے کر سکتی ہوں،‘‘ وہ مسکراتے ہوئے اپنی بات مکمل کرتی ہیں۔

شیلا کا تعلق کُرمی برادری سے ہے، جسے بہار میں پس ماندہ طبقہ کے زمرہ میں رکھا گیا ہے۔ ان کی فیملی آس پاس کے بازاروں میں چاٹ اور پھُچکا (گول گپے) بیچنے والا ایک فوڈ کارٹ چلاتی ہے۔ ’’جب میری بڑی بیٹی کی شادی تھی، تب میں نے ایک مہینہ میں چھ دؤریاں بُنی تھیں،‘‘ وہ فخر سے کہتی ہیں۔ شادی میں مقبول تحفہ کے طور پر تسلیم شدہ دؤری کے بارے میں شیلا بتاتی ہیں، ’’لوگ شادی بیاہ میں دؤریوں کی گنتی اور تنوع کی خوب تعریفیں کرتے ہیں۔‘‘

تقریباً ۱۰-۱۲ انچ کی گولائی کی ایک چھوٹی دؤری بنانے میں تقریباً ۲۰-۲۵ بروآ کی پٹیوں کی ضرورت ہوتی ہے۔ شیلا ۸-۱۲ گھنٹے میں ایک دؤری بنا سکتی ہیں، لیکن گھریلو کاموں کے سبب وہ بُنائی مسلسل نہیں کر پاتیں۔

بروآ کے دھاردار ہونے کے سبب بُنائی کرتے ہوئے انگلیاں کٹ جاتی ہیں اور لمبے وقت تک اتنا باریک کام کرنے کی وجہ سے آنکھوں پر بھی زور پڑتا ہے، لیکن ’’بُنائی کرتے وقت نئے نئے ڈیزائن دماغ میں آتے رہتے ہیں اور میں انہیں آزمانا پسند کرتی ہوں،‘‘ وہ مزید کہتی ہیں۔

ترجمہ نگار: قمر صدیقی