दर्द-शिन म्यूजियम के रखवार

एक ठन जुन्ना लकरी के काठी, एक ठन जुन्ना करघा, लकरी के पोलो मैलेट (छड़ी), घास के जुन्ना चप्पल, चांदी के जुन्ना जेवर, टूटे -फूटे शिना कविता के पांडुलिपि. बिहाव मन मं माईलोगन मन के पहिरे के पारंपरिक कंघा (ककई) अऊ घलो बनेच कुछु. ये रोज के जिनगी के कुछु जुन्ना जिनिस मन हवंय जेन ला बशीर अहमद टीरू ह अपन म्यूजियम मं रखे हवय.

बशीर दर्द-शिन जनजाति ले हवय जेन मन अधिकतर गुरेज अऊ द्रास मं रहिथें. बीते पांच बछर ले, गुरेज घाटी के लोगन मन नोहर पुरखौती अऊ रोजमर्रा के कतको जुन्ना जिनिस मन ला दवार मं बने दर्दशिन म्यूजियम ला सौंपत हवंय, येकर संचालन बशीर करथें.

वो ह सुरता करथे, “मंय लोगन मन ला अपन घर ले जुन्ना जिनिस मन ला फेंकत देखे हवं काबर के वो मन ला लागथे के ये जिनिस मन वो मन के काम के नो हें, जुन्ना कपड़ा मन ला जरावत, खेती के अऊजार मन ला फेंकत देखे हवं जेन ला अब वो मन बऊरत नइ ये.” त, जेन जिनिस मन ला जुन्ना समझ के फेंक दे जावत रहिस, धन जरा दे जावत रहिस, वो मन ला अब ओकर म्यूजियम मं एक ठन मयारू जगा मिल गे हवय.

बशीर के मानना आय के सरकार के स्वास्थ्य सेवा कार्यकर्ता के रूप मं ओकर नऊकरी ह वोला अपन लोगन मन के इतिहास के ये म्यूजियम ला बनाय मं मदद करे हवय. 44 बछर के सियान सरकारी कर्मचारी के कहना आय के लोगन मन ओकर ऊपर भरोसा करथें, अऊ येकरे सेती म्यूजियम बनाय के काम अतक सुभीता ले हो गीस. इहाँ कश्मीर के गुरेज घाटी मं, जड़कल्ला मं बरफ गिरे सेती साल के छै महिना लोगन मन के आय-जाय मं दिक्कत होवत रहिथे, अऊ सरकारी इलाज के सेवा कमजोर हवय. बशीर जइसने सामुदायिक स्वास्थ्य कार्यकर्ता मन के काम भारी महत्तम हवय,अऊ ओकर उपर लोगन मनके भारी बिस्वास हवय.

“मंय बनेच कम उमर ले जिनिस मन ला संकेलत रहंय, चाहे वो ह जुन्ना सिक्का होय, नोट होय, खेती के अऊजार होय,’” वो ह बताथे के बालपन ले वोला कहिनी सुने अऊ नान-नान जिनिस मन ला संजोके राखे बर मजा आवत रहिस. वो ह अपन नाना के संग घलो बइठे जेन ह वोला लोककथा सुनावत रहिस.

“[बाद मं], मंय हर घड़ी कलाकृति मन ला खोजत रहंव. ये मोर दिमाग मं भरे रहय,” वो ह कहिथे. अऊ कोविड बखत, जब वो ह आने स्वास्थ्यकर्मी मन के संग टीकाकरन अभियान के बखत घर घर जावत रहेय, तब ले घलो वो ह खोजत रहय. वो ह पारी ला बताथे, “अब मोर म्यूजियम मं करीबन 400 कलाकृति हवंय. ये ह गुरेज के लोगन मन के अऊ प्रशासन के सहयोग लेच संभव हो सकिस.”

जइसने 50 बछर जुन्ना जालीदार कोट, जेन ला समाज के बड़े सियान मन पहिरत रहिन. बशीर बताथे के वो ह येला पाए बर कतको चक्कर लगाइस, अऊ करीबन 8 कोस दूरिहा जुनरैल गाँव मं छठवां पईंत जाय के बाद आखिर मं येकर मालिक घर मं मिलिस अऊ वो ह ओकर ले, ले आइस.

“ये कोट ला अपन म्यूजियम मं लाय बर मोला करीबन 10,000 रूपिया खरचा करे ला परिस. फेर काबर के ये ह हमर पुरखौती ले जुड़े हवय, ते पायके ये खरचा ह नइ अखरिस.” वो ह पारी ला बताथे, गरब अऊ गंभीर होके, वो ह वो गरम कोट पहिरे हवय जेन ह अब तक ले बढ़िया हालत मं हवय.

हमन दावर गाँव मं मस्तान रोड पर बने ओकर म्यूजियम के पहुना खोली मं बइठे हवन. वो ह मोला बिस्कुट के संग ताते-तात चाय पियाइस, जेन ह श्रीनगर ले ऊंच पहाड़ मन तक ले आय के बाद मोर भर भारी मनभावन रहिस. वो ह थोकन बखत बर अपन गंभीर भाव ला छोड़ दीस अऊ म्यूजियम के बारे मं गोठ-बात सुरु करे के पहिली मोला एक ठन शिना गीत सुनाइस. वो ह एक ठन लोहा के चंग (मोर्सिंग जइसने जुन्ना बाजा) अपन मुंह मं लगाके गाये अऊ बजाय सुरु कर दीस. ये चांग घलो ओकर म्यूजियम के हिस्सा आय.

दर्दिक लोगन मन के एक ठन खास संस्कृति हवय, अऊ गुरेज घाटी कश्मीर के लोगन मन बर रेशम के रद्दा होवत रहिस, जेन ह बेपार अऊ तिरिथ करे बर बांडीपोरा ले गुरेज होवत गिलगित जावत रहिस. हज यात्री घलो इहिच रद्दा ले जावत रहिन. घाटी मं लोगन मन के सरलग आवाजाही ह इहाँ कतको किसम के असर डारिस. बशीर ह कहिथे के येला शिना लोगन मन के पहिनावा, वो मन के गीत अऊ संगीत मं देखे जा सकथे, जेन ह सरहद पार पाकिस्तान के गिलगित अऊ भारत के द्रास के बासिंदा शिना समाज ले मिलथे-जुलथे.

दर्द-शिन एक ठन नान-कन समाज आय (साल 2011 के जनगणना मुताबिक दर्दिक आबादी 37,992 हवय). बशीर कहिथे, “हमन जेन भाखा कहिथन वो अलग आय, बोली ले निच्चट अलग आय.” वो मन के भाखा –शिना – पाकिस्तान ले लगे सरहद मं पलायन अऊ सेना के ठीहा बने सेती खतरा मं हवय. पढ़व: ‘अपन भाखा ला बिसोरे अपन पहिचान बिसोरे जइसने’

पाँच बछर पहिली, म्यूजियम बर कतको कलाकृति देवेइय्या पहिली मइनखे ओकर अपन दाई रहिस. वो ह बताथे, “मोर दाई तजा बेगम ह मोला अपन पारंपरिक बिहाव के टोपी अऊ घड़ी समेत 70 ठन जिनिस दीस अऊ ये मन ला जतन करके रखे ला कहिस. इहीच बखत मंय अपन घर मं म्यूजियम बनाके येला संभाल के रखे के बिचार करेंय.”

तब ले बशीर घाटी के कोनहा-कोनहा मं किंजरत शिना संस्कृति ले जुड़े जिनिस मन ला संकेलत हवंय, चाहे वो ह कपड़ा होय, अऊजार होय, किताब होय धन अऊ घलो कुछु. कभू-कभू अवेइय्या मन म्यूजियम बर समान लेके आवंय, जेकर ले ये जाहिर होथे के समाज के लोगन मन वोला अपन मानथें. धन वो मन वोला लेगे बर बलावंय: “हालेच मं एक झिन नोनी ह मोला अपन दाई के बिहाव के मुंदरी देय बर बलाइस, जेन ह 70 बछर जुन्ना रहिस. तो, अब लोगन मन खुद होके मोला बलाथें अऊ मोला वो मन जुन्ना जिनिस मन ला देथें जेन ला वो मन जतन करके रहे, देखे चाहथें.”

फेर सुरु के महीना मं, बशीर ला लोगन मन ला म्यूजियम अऊ गुरेज घाटी के इतिहास मं येकर महत्ता ला बताय बर जागरूक करे बर भारी मिहनत करे ला परिस. “हमर नवा पीढ़ी अपन इतिहास ला करीबन बिसोर दे हवय. हमन अपन भाखा ला घलो खोवत जावत हवन. ये म्यूजियम के उदेस हमर नवा पीढ़ी के लइका मन ला गुरेज के सुग्घर बीते बखत ले चिन्हारी करे हवय.”

साल 2020 मं खुले, दर्दशिन म्यूजियम एक ठन दू मंजिला इमारत मं हवय, जेकर तरी के हिस्सा ईंटा ले बने हवय अऊ उपर के हिस्सा लकरी के. बशीर तरी मं अकेल्ला रहिथें. ओकर परिवार, दाई-ददा, ओकर घरवाली अऊ पांच लइका बांडीपोरा मं रहिथें. ओकर दू झिन बाबू अऊ तीन झिन नोनी उहिंचे पढ़त हवंय. दावर गाँव मं ओकर घर के उपर के मंजिल मं दू ठन खोली मं म्यूजियम हवय. एक ठन खोली मं कपड़ा अऊ गहना-जेवर सुग्घर तरीका ले रखाय हवय, अऊ दूसर मं खेती के अऊजार, बाजा अऊ ऐतिहासिक कागजात रखाय हवय. बशीर कहिथे, “पारंपरिक गहना अऊ बिहाव के टोपी मं सबके नजर लगे रहिथे. म्यूजियम मं अवेइय्या हरेक मइनखे ये गहना अऊ टोपी मन ला पहिर के देखथे.”

सुरु होय पांच-छै बछर होवत, ये बगेर एंट्री फीस वाले म्यूजियम मं बनेच अकन सैलानी मन आथें. बशीर कहिथे, “गर ये म्यूजियम बढ़िया ढंग ले चलही, त मंय कम से कम एंट्री फीस के बिचार करत हवं अऊ येकर ले होवेइय्या आमदनी ला बेवा अऊ ओकर लइका मन के पढ़ई-लिखई मं करे जाही.”

बशीर के काम करे के जगा - दावर गुरेज मं बने सामुदायिक स्वास्थ्य केंद्र, जिहां ओकर तैनाती हवय- ओकर घर ले मिनट भर ले घलो कम दूरिहा मं हवय. काम के जगा के लकठा मं घर होय सेती अवेइय्या मन के आये बखत वोला सुभीता होथे काबर के वो ह तुरते इहाँ हबर सकथे.

फेर जब वो ह काम मं भारी लगे रहिथे, त समाज के दीगर लोगन मन घलो मदद करथें. जइसने 65 बछर के मोहम्मद हुसैन अखून, जेन ह बशीर ला शिना इतिहास ला बचाय मं मदद करे ला चाहत हवय. अखून कहिथे, “ काबर के बशीर स्वास्थ्य कार्यकर्ता आय, ते पायके कभू-कभू वो ह काम मं भारी लगे रहिथे. येकरे सेती, मंय सैलानी मं ला म्यूजियम के भीतरी ले जाथों अऊ वो मन ला म्यूजियम ला दिखाथों अऊ उहाँ रखाय जिनिस-पतर के बारे मं बताथों.”

वो ह बतावत जाथे, “अब तक ले मंय करीबन 30-40 ठन टोली ला ओकर म्यूजियम के भीतर ले जा चुके हवं अऊ वो सब्बो झिन ये देख के भारी खुस होइन के एक जमाना मं तुलैल मं लोगन मन कइसने कपड़ा पहिरत रहिन अऊ कइसने काम करत रहिन. बशीर बहुत बढ़िया काम करत हवंय अऊ मोला लागथे के ओकर जतक होय सके ओतक मदद करे मोर जिम्मेवारी आय. वो हमर इतिहास ला संजोवत हवय.”

34 बछर के मुनीर अहमद डार व्लॉगर आंय, जेन ह 50 कोस दूरिहा मध्य कश्मीर के बडगाम जिला के बीरवाह ले ये म्यूजियम ला देखे बर आय हवंय. वो ह कहिथे, “मोला कतको लोगन मन शिना संस्कृति के असल झलक देखे बर दर्दशिन म्यूजियम जाय के सलाह देय रहिन.”

बशीर अपन संग्रह ला बढ़ाय अऊ वोला आगू बढ़ाय बर आतुर हवंय. वो ह पारी ला बताथे, “ मोर लक्ष्य येला गुरेज घाटी के सबले बढ़िया म्यूजियम बनाय आय जिहां लोगन मन शिना के इतिहास के असल झलक पाय सकंय. हमर इतिहास भारी सुग्घर रहे हवय अऊ मोर साध हवय के जियादा ले जियादा लोगन मन येकर बारे मं जानंय.”

येकहिनी पारी सीनियर फेलोशिप 2025 के मदद ले लिखे गे हवय.

अनुवाद: निर्मल कुमार साहू