बशीर के हाथ में सुरक्षित बा दर्द-शिन के धरोहर

एगो पुरान लकड़ी के काठी, पुरान करघा, लकड़ी के पोलो वाली एगो छड़ी, घास के चप्पल, पुरान चांदी के जेवर, खराब रूप में एगो शिना कविता के पाण्डुलिपि, बियाह में महिला लोगन खातिर उपयोग होखे वाला पारम्परिक कंघी आ अउर भी बहुत कुछ. ई कुछ अइसन प्राचीन सामान हवे जेकर बशीर अहमद टेरू के संग्रहालय में सहेज के रखल बा.

बशीर, जादेतर गुरेज आ द्रास में रहे वाला दर्द-शिन जनजाति से आवेलन. पिछला पांच बरिस से गुरेज घाटी के लोग मूल्यवान विरासत के सामान आ अन्य पुरान दैनिक उपयोग के चीजन के दर्दशिन संग्रहालय में सौंप रहल बा जेके ऊ दावर में राखेलन आ संचालित करेलन.

“हम देखनी लोग अपनी घर के पुरान सामान फेंक देला काहें कि उनके बुझाला कि ई चीज बेकार बा, पुरान कपड़ा जरा देवेला लोग आ खेती के औजार काम ने ना अइला पर फेंक देला,” उ याद करेलन. त जवन पहिले पुरान समझ के फेंकल गईल बा या जरा दिहल गईल बा, ओके उनकी संग्रहालय में आपन घर मिल गईल बा.

बशीर के मानल बा कि राज्य स्वास्थ्य कार्यकर्ता के रूप में उनकर नोकरी उनकी लोगन के इतिहास के ई संग्रहालय तैयार करे में मदद कईले बा. बशीर (44) कहेलन कि लोग उनकरी पर विश्वास करेला जेकरी वजह से संग्रहालय के सामान जुटावे के काम बहुत आसान बन गईल. कश्मीर के गुरेज घाटी में सर्दियन के बरफ इहां के निवासी लोगन के छव महिना ले सबसे काट देला, आ सरकारी स्वास्थ्य सुविधा भी बहुत कम बा. बशीर जईसन सामुदायिक स्वास्थ्य कार्यकर्ता लोगन के काम बहुत मायने रखा, आ लोगन के उनकरी ऊपर पूरा विश्वास बा.

“हमके बहुत छोट उमिर से सामान एकट्ठा करे के शौक रहे चाहे सिक्का होखे, करंसी चाहे खेती के औजार,” उ आपन बचपन याद करत के कहेलन जब उनके कहानी सुने में मजा आवे आ छोट-छोट निशानी जुटावे के शौक रहे. उनके अपनी दादाजी के संघे बईठल भी बहुत पसंद रहे जे उनके लोककथा सुनावत रहें.

“(बाद में) हम कलाकृतियन के खोज में रहे लगनी. ई हमेशा से हमरी दिमाग में रहे,” उ कहेलन. कोविड के दौरान, जब उ अन्य स्वास्थ्यकर्मियन संघे टीकाकारण अभियान में घरन के दौरा करत रहें, उ आपन खोज जारी रखलें. “अब हमरी संग्रहालय में करीब 400 कलाकृति बा. ई खाली गुरेज के स्थानीय लोग आ एइजा के प्रशासन के वजह से सम्भव भईल ह,” उ पारी से बतावेलन.

जईसे ई पचास बरिस पुरुन कोट जवन समुदाय के मुख्य लोगन द्वारा पहिनल जाला. बशीर बतावेलन कि एके पावे खातिर उ कई बेर यात्रा कईलें आ आखिरकार एइजा से करीब 25 किलोमीटर दूर जुनरैल गांव के अपनी छठवीं यात्रा में एकरी मालिक के घरे पर ओके पकड़लें आ एके दिहला पर ओके राजी कईलें.

“ए कोट के अपनी संग्रहालय में ले आवे में हमके करीब 10,000 रुपिया के खर्चा पड़ल बाकिर ई हमनी के इतिहास से जुड़ल बा एसे ई खर्चा कुछु नईखे,” गर्व भरी आवाज में उ गरम कोट पहिनत पारी के कहेलन जवन अब्बो बढ़िया हालत में बा.

हमनी के उनकी संग्रहालय से जुड़ल बैठक में बईठल बानी जा जवन दावर गांव में मस्तान रोड पर स्थित बा. उ हमके बिस्किट संघे चाय पेश कईले बाड़ें जवन श्रीनगर में उंच पहाड़न के लम्बा यात्रा के बाद मिलल नीक लागता. ऊ आपन गंभीरता थोड़ी देर खातिर छोड़ के हमके एगो शिना गीत गावे के प्रस्ताव दे रहल बाड़ें ओकरी बाद हमनी के संग्रहालय के बारे में बात करब जा. गाना शुरू कईला के संघही उ लोहा के चंग (एगो पुरान वाद्य उपकरण जवन मुरली चाहे मोरसिंग निहर होला) उठावेलन आ बजावे लागेलन. चंग भी उनकी संग्रहालय के हिस्सा हवे.

दर्दिक लोगन के एगो खास संस्कृति हवे आ गुरेज घाटी कश्मीर के लोगन खातिर रेशम मार्ग रहे जवन बांडीपुरा से गुरेज होत के व्यापार आ तीर्थ यात्रा खातिर गिलगित जात रहे. इहे रास्ता हज जाए वाला तीर्थयात्री लोग भी उपयोग करत रहें. घाटी के माध्यम से लोगन के लगातार आवाजाही से एइजा अलग अलग तरह के असर पड़ल. बशीर के कहनाम बा कि एके शिना लोगन के कपड़ा पहिने आ उनकरी गीत संगीत में देखल जा सकेला जवन पाकिस्तान के सीमा पर गिलगित में आ भारत में द्रास के शिना समुदाय निहर बा.

दर्द शिन एगो छोट समुदाय (जनगणना 2011 के अनुसार 37,992 दर्दिक लोग) बा. “हमनी के अलग भाषा बोलेनी जा आ बोली एकदमे अलग बा,” बशीर कहेलन. उनकर भाषा – शिना पलायन आ पाकिस्तान से लागल सीमा के सैनिकीकरण के वजह से खतरा में बा. पढ़ीं: गुरेज में घर त बा बाकी बोली बेघर हो गईल बा

पांच बरिस पहिले उनकरी संग्रहालय खातिर पहिला चीज देवे वाला उनकर आपन माई रहली. “हमार माई ताजा बेगम हमके 70 गो ले चीज दिहली जेमे उनकर पारम्परिक बियाह के टोपी आ घड़ी शामिल रहे. उ कहली हम ए चीजन के सुरक्षित राखीं. इहे ऊ समय रहे जब हम अपनी घरे एगो संग्रहालय खोले के विचार कईनी,” उ कहेलन.

तब से बशीर शिना संस्कृति से जुड़ल चीजन के एकट्ठा करे खातिर घाटी क कोना-कोना के यात्रा कर चुकल बाड़ें चाहे उ कपड़ा होखे, उपकरण औजार, किताब या फिर कवनो अन्य चीज. कबो-कबो आवे वाला लोग कवनो चीज संग्रहालय खातिर ले के आवेला आ बतावेला कि ई चीज के तरह से ओ लोगन के समुदाय से जुड़ल बा. या फिर लोग इनके फोन कर के बोला लेवेला. “हाले में एगो लईकी हमके कॉल कर के बोलवलस आ अपनी माई के बियाह के अंगूठी हमके दिहलस जवन करीब 70 बरिस पुरान रहे. त ई बात त बा, लोग खुदे हमके फोन कर के बोलावेला आ अइसन पुरान चीज हमरी हवाले कर देवेला जेके उ लोग संरक्षित कईल चाहेला.

बाकिर शुरुआती महीनन में बशीर के लोगन के संग्रहालय आ गुरेज घाटी के के इतिहास के महत्व के बारे में जागरूक करे में कड़ा मेहनत करे के पड़ल. “हमनी के युवा पीढ़ी अपना इतिहास के लगभग भुला गईल बा. हमनी के आपन भाषा भी भुलात जात बानी जा. ए संग्रहालय के उद्देश्य हमनी के युवा लोगन के गुरेज के सुंदर अतीत के बारे में जागरूक कईल हवे.”

दर्दशिन संग्रहालय 2020 में शुरू भईल आ दू मंजिल के इमारत में बा, नीचे वाला ईंटा के बनल आ ऊपर वाला लकड़ी के बनल बा. बशीर नीचे वाला मंजिल पर अकेले रहेलन. उनकर परिवार, माई बाप, उनकर मेहरारू आ पांच गो बच्चा बांडीपुरा में रहेलन सन. उनकर दू गो बेटा आ तीन गो बेटी ओइजा पढाई करेली सन. दावर गांव में उनकी घर के ऊपरी मंजिल में संग्रहालय बा जवन दू गो कमरा में फईलल बा. एक कमरा में कपड़ा आ जेवरन के संग्रह अच्छी तरह से व्यवस्थित बा आ दूसरा कमरा में कृषि उपकरण, संगीत वाद्ययन्त्र आ ऐतिहासिक दस्तावेज राखल बा. “पारम्परिक जेवर आ बियाह के टोपी मुख्य आकर्षण बन गईल बा,” बशीर कहेलन, “जे भी संग्रहालय में घुसेला, ई जेवर आ टोपी जरूर पहिनेला.”

अपनी शुरू भईला के पांच से छव बरिस के भीतर ई निशुल्क संग्रहालय बहुत से मेहमानन के आकर्षित कर रहल बा. “अगर ई संग्रहालय सफलतापूर्वक चलत रहल त हम एगो न्यूनतम प्रवेश शुल्क लगावे के सोचतानी जेसे मिले वाला पईसा विधवा आ उनकरी बच्चन के पढ़ाई लिखाई पर खर्चा होखी,” बशीर कहेलन.

बशीर के काम करे वाला जगह – दावर गुरेज में उनकर सामुदायिक स्वास्थ्य केंद्र जहां उ काम करेलन – उनकी घर से एक मिनट के दूरी पर बा. उनकर घर काम वाली जगह से नजदीक बा त एकर उनके फायदा मिलेला, जब मेहमान आवेलें सन त उ तुरंत ओइजा पहुंच जालें.

बाकिर जब उ व्यस्त होखेलन त समुदाय के अन्य सदस्य लोग मदद करेला. जईसे 65 बरिस के मोहम्मद हुसैन आखून जे बशीर के मदद करेलें ताकि उ शिना इतिहास के बचा के रख सकें. “बशीर स्वास्थ्यकर्मी हवें त कबो-कबो बहुत व्यस्त हो जालें. ओ समय हम पर्यटकन के संग्रहालय के भीतर ले जायेनी, ओइजा के दौरा करावेनी आ ओइजा राखल चीजन के बारे में बतावेनी,” आखून कहेलन.

“अब ले हम करीब 30-40 समूहन के संग्रहालय के भीतर घुमा चुकल बानी आ उ लोग ई देख के बहुत खुश रहे कि एक समय में तुलैल में लोग कईसे कपड़ा पहिने, कईसे रहत रहे आ कईसे काम करे. बशीर बहुत कमाल के काम करत बाड़ें आ हमरा बुझाला हम जईसे भी उनकर मदद कर सकीं, हमरा करे के चाहीं. उ हमनी के इतिहास के संरक्षण कर रहल बाड़ें,” उ कहेलन.

मुनीर अहमद डार 34 बरिस के व्लोगर हवें जे केन्द्रीय कश्मीर के बडगाम जिला के बीरवाह से संग्रहालय के दौरा करे आईल बाड़ें जवन एइजा से 150 किलोमीटर दूर बा. “हमके बहुत लोग दर्दशिन संग्रहालय जाए के कहले रहे ताकि शिना संस्कृति के असली इतिहास के झलक मिल सके,” उ बतावेलन.

बशीर अपनी संग्रह के बढ़ावे आ आगे ले जाए खातिर उत्साहित बाड़ें. “हम एके गुरेज घाटी के सबसे बढ़िया संग्रहालय बनावे के लक्ष्य रखले बानी जहां लोग के असल में शिना अतीत के झलक मिल सके. हमनी के अतीत बहुत सुंदर रहल हवे आ हम चाहेनी कि ज्यादा से ज्यादा लोग एकरी बारे में जान सकें,” उ पारी से कहेलन.

ईस्टोरी पारी सीनियर फेलोशिप 2025 के अंतर्गत प्रकाशित भइल बा.

अनुवाद: विमल चन्द्र पाण्डेय