سل بٹّہ کے سہارے زندگی گزارتے لال بابو مہتو

’’شل کٹا-ؤ-ؤ-ؤ!‘‘

لال بابو مہتو کی تیز، تیکھی آواز گریا میں گونجتی ہے، جو شمالی سونار پور کے پاس ایک جگہ ہے۔ دوپہر کے ساڑھے بارہ بجے ہیں، اور ان کی آواز کے علاوہ یہاں کولکاتا کے اس حصہ میں قریب کے بازار سے آتی تھوڑی بہت آوازیں ہی سنائی دیتی ہیں۔

’’شِل کٹا-ؤ-ؤ-ؤ!‘‘ گلی میں تیز قدموں سے چلتے ہوئے وہ پھر آواز لگاتے ہیں۔ انہیں امید ہے کہ کوئی گاہک مل جائے گا جو اپنے شِل نورا پر نقاشی کروانا چاہتا ہو۔ بنگال میں شِل کٹاؤ، گرینائٹ کے پتھر – شِل – اور ہاتھ میں پکڑے جانے والے پیسنے کے اوزار – نورا پر ڈیزائن کندہ کرنے کا روایتی کام ہے۔ شِل نورا، سِل بٹّہ یا تمل امّی کلّو کی ایک شکل ہے، جس کا استعمال ثابوت مسالوں کو گیلے، خوشبودار پیسٹ یا پاؤڈر میں بدلنے کے لیے کیا جاتا ہے، جو ہندوستان میں کھانا بنانے کا ایک مرکزی حصہ ہے۔ ہندوستانی باورچیوں کا ماننا ہے کہ جب نورا کا مضبوط دباؤ سخت شِل پر پڑتا ہے تبھی پتّے اور مسالے اپنا اصلی ذائقہ چھوڑتے ہیں۔

’’اس کا بنیادی کام مسالے کو اور باریک بنانا ہے۔ کوئی بھی جدید مکسر آپ کو ویسی باریکی اور ذائقہ فراہم نہیں کر سکتا،‘‘ باورچی خانہ کے اس اہم اوزار کے بارے میں لال بابو کی یہی حتمی رائے ہے۔

’’اب بہت کم نئے لوگ شِل کٹاؤ کو پیشہ کے طور پر اپنا رہے ہیں۔ ہم ہی آخری نسل ہیں،‘‘ بہار کے سیوان ضلع سے آئے مہاجر مزدور لال بابو کہتے ہیں۔ ’’تقریباً ۱۰ سال قبل جب میں یہاں آیا تھا تب صرف کِھدِر پور میں ہی ہم تقریباً ۲۵۰ لوگ تھے۔ اب زیادہ تر بوڑھے ہو چکے ہیں۔ وہ اس کام کو چھوڑ چکے ہیں اور اتنی محنت والے کام کو مزید کرنے کی استطاعت نہیں رکھتے۔‘‘

کھدر پور وہ جگہ ہے، جہاں لال بابو اپنے جیسے ہی کام کرنے والے تین دیگر لوگوں کے ساتھ کرایے کے ایک کمرہ میں رہتے ہیں۔ ان کا تعلق کُرمی برادری سے ہے، جو بہار اور مغربی بنگال دونوں ریاستوں میں دیگر پس ماندہ طبقہ میں شامل ہے۔ ’’ہم کام کے لیے پورے شہر [کولکاتا] میں پیدل گھومتے ہیں۔ میں زیادہ تر جنوبی حصہ کا احاطہ کرتا ہوں، ہر دن الگ الگ علاقوں میں جاتا ہوں۔ آج میں گریا میں ہوں، کل بالی گنج جاؤں گا، اس کے اگلے دن سنتوش پور،‘‘ چالیس کی عمر پار کر چکے لال بابو بتاتے ہیں۔ شہر بھر میں پبلک ٹرانسپورٹ سے آنے جانے میں انہیں روزانہ تقریباً ۳۰ روپے خرچ کرنے پڑتے ہیں۔

بس سے ایک گھنٹہ کا سفر اور خاصا دور تک پیدل چلنے کے بعد، گریا میں انہیں دن کا پہلا گاہک ملتا ہے۔

وہ فٹ پاتھ پر بیٹھ جاتے ہیں اور اپنے ساتھ لائے بھورے بیگ سے نکلی ہاتوڑی (ہتھوڑی) اور چھینی سے پتھر پر چوٹ کرنے لگتے ہیں۔ پتھر سے گرد اور ذرات کا غبار اٹھتا ہے، جو ان کے ہاتھ پیروں پر جم جاتا ہے۔

ٹھُک- ٹھُک- ٹھُک- ٹھُک۔

لال بابو کے ہتھوڑا چلانے سے ہم آہنگ اور مسلسل آواز آتی ہے، جو شِل پر ٹوٹی ہوئی لکیروں کا ایک پیٹرن بناتی ہے۔ ’’کچھ کاریگر اوپر مچھلی، کمل یا ہاتھی کے ڈیزائن بناتے ہیں۔ لیکن مجھے ان کے نقش کندہ کرنا نہیں آتا۔ اس کے لیے خاص ٹریننگ چاہیے،‘‘ وہ کہتے ہیں۔ لیکن ان کے ہاتھ کام کرتے رہتے ہیں اور وہ اب نورا پر ہتھوڑی چلانے لگتے ہیں۔ لال بابو بتاتے ہیں کہ ان ڈیزائنوں میں ایک خاص قسم کی دھار ہوتی ہے، جو مسالے پیسنے کے لیے ضروری ہے۔

شل نورا کی کارکردگی اس کی کھدائی پر منحصر ہے۔ ’’شل نورا عام طور پر چکنے، پالش کیے ہوئے پتھر سے بنے ہوتے ہیں۔ لیکن جب ہم ان پر نقاشی کرتے ہیں، تو اس چکنائی کو کاٹ دیتے ہیں،‘‘ لال بابو کہتے ہیں۔ وہ بتاتے ہیں کہ وقتاً فوقتاً استعمال سے گھس جانے کے سبب اس رگڑ کو پھر سے بحال کرنا پڑتا ہے۔ یہی کام لال بابو جیسے لوگ کرتے ہیں۔ لیکن ایک بار تراشے جانے کے بعد، شل نورا تقریباً ایک سال تک چل سکتا ہے۔

بنگال میں مسالوں کے علاوہ، شل نورا کا استعمال سیم (پھلی)، کدو کے پتے یا پوستو (خس خس) کو پیس کر ملائم پیسٹ یا ’باٹا‘بنانے کے لیے بھی کیا جاتا ہے۔

باورچی خانہ کے باہر بھی، اس اوزار کا استعمال اوڈیشہ میں شیتل ششٹھی (شیو اور پاروَتی کا ملن) اور مغربی بنگال میں رنّ پوجو جیسے ہندو تہواروں میں ہوتا ہے۔

حالانکہ، ایک شِل پر کام کرنے میں انہیں ۱۰ منٹ سے بھی کم وقت لگتا ہے، لیکن کام ملنا طے نہیں ہوتا۔ اس لیے وہ سونار پور کی ایک آٹا چکّی میں پارٹ ٹائم کام بھی کرتے ہیں۔

لال بابو نے یہ کام تب سیکھنا شروع کیا، جب وہ ۱۵ سال کے تھے۔ ’’ہمارے گھر میں ایک شِل تھا، لیکن اس کا زیادہ استعمال نہیں ہوتا تھا۔ اس لیے میں اسی پر نقاشی کی مشق کرتا تھا، اور جب بابو [والد] گاؤں میں اس کام کے لیے باہر جاتے تھے، تو میں ان کے ساتھ چلا جاتا تھا،‘‘ وہ یاد کرتے ہیں۔

’’جب میں اپنے والد سے سیکھ رہا تھا، تب ایک شِل پورا کرنے میں مجھے کم از کم ۱۵ منٹ لگتے تھے،‘‘ لال بابو ہنستے ہوئے کہتے ہیں۔ ’’اگر مجھ سے غلطی ہو جاتی تو پتھر کے ٹکڑے زور سے میرے ہاتھوں پر آ کر لگتے تھے۔ کبھی کبھی میں اوزاروں کو ٹھیک سے نہیں سنبھال پاتا تھا، اور اگر وہ زنگ لگے ہوتے تو حالت اور خراب ہو جاتی تھی،‘‘ وہ یاد کرتے ہیں، اور یہ بھی کہتے ہیں کہ جب انہوں نے شہر میں کام شروع کیا تھا تو اس کے لیے تقریباً ۵۰ روپے لیتے تھے۔

جیسے جیسے وہ بڑے ہوئے، لال بابو اپنے پُشتینی کھیت پر بھی کام کرنے لگے۔ ’’ہم اپنی ۲۰ کٹھہ [تقریباً ۷ء۰ ایکڑ] زمین پر گَم [گندم]، دھان، گوٹا [بینگن] اُگاتے ہیں۔ انہیں بیچنے سے فیملی کی تھوڑی آمدنی بھی ہو جاتی ہے۔ لیکن یہ کافی نہیں ہے،‘‘ وہ افسوس کا اظہار کرتے ہیں۔

اور اس طرح لال بابو نے اپنا گھر چھوڑ دیا۔ وہ بہار سے کام کی تلاش میں باہر جانے والے مہاجرین کی اُس مسلسل جماعت کا حصہ ہیں، جہاں سے کام کے لیے مہاجرت کرنے والوں کی تعداد ملک میں دوسرے مقام پر ہے (مردم شماری ۲۰۱۱)۔

’’ہمارے گاؤں میں سال بھر سینچائی کرنے کا کوئی انتظام نہیں ہے؛ کھاد کی قیمتیں بھی بڑھ گئی ہیں،‘‘ لال بابو کہتے ہیں۔ شہر لال بابو کو ایک قسم کی ضمانت دیتا ہے۔ ’’یہاں ہمیں کچھ نہ کچھ کام مل جاتا ہے، بھلے ہی وہ بہت زیادہ نہ ہو،‘‘ وہ کہتے ہیں۔ جب وہ یہاں آئے تھے تب اپنی فیملی میں وہ تنہا کمانے والے فرد تھے، جن پر بیوی اور بیٹے کی ذمہ داری تھی۔

کسی کسی دن شام تک گھر لوٹ کر، لال بابو خود کے لیے ایک کپ چائے بناتے ہیں یا پھر رات کے کھانے کے لیے سبزی خریدنے باہر نکل جاتے ہیں، جسے وہ چاروں مل کر بناتے ہیں۔ عام طور پر وہ ہر دن روٹی سبزی بناتے ہیں۔ اس کمرہ میں، جہاں دروازے پر مرجھائی ہوئی گیندے کی مالا لٹکی ہے، لال بابو اور ان کے ساتھی اپنی ہی زبان میں لوٹ آتے ہیں جو ’’ہندی اور میتھلی کی آمیزش ہوتی ہے،‘‘ لال بابو کہتے ہیں۔

ایک صدی سے بھی زیادہ پہلے، شل نورا کو روایتی جانتا چکتی (اناج پیسنے کا پتھر) کے ساتھ بیچا جاتا تھا، جس کا استعمال گیہوں پیسنے کے لیے ہوتا تھا۔ انیسویں صدی کے بنگال کے پھیری والے آواز لگاتے تھے – ’’کٹاؤ شِل چکتی جانتا،‘‘ جس میں وہ اسی طرح لمبا کھینچ کر آواز لگاتے تھے، جیسے آج لال بابو کرتے ہیں۔ بیسویں صدی کی شروعات میں، خاص کر آٹا ملوں میں گیہوں پیسنے والی مشینوں کے بڑھنے کے ساتھ، جانتا اور چکتی اس طرح سے فروخت کیا جانا بند ہو گئے۔

لال بابو کو عام طور پر مل سے تبھی بلاوا آتا ہے، جب کام ہوتا ہے – شاید ہر کچھ ہفتوں میں ایک دو بار۔ انہیں وہاں ایک دن کے ۲۰۰ روپے ملتے ہیں۔

’’وہاں ایک شل کو گیہوں کو باریک پیسنے کے لیے ایک بڑی مشین سے جوڑا جاتا ہے۔ میں اس شِل کو تراشتا ہوں اور مشین چلانے میں بھی مدد کرتا ہوں،‘‘ وہ کہتے ہیں۔ ’’لیکن کبھی، وہ مجھے مہینوں تک نہیں بلاتے،‘‘ وہ دن کے اپنے پہلے کام کو نمٹاتے ہوئے کہتے ہیں۔

جس شل کو لال بابو نے تراشا ہے، وہ ۵۳ سالہ پرمتا سین گپتا کا ہے، جو کہتی ہیں، ’’ہمارے پاس یہ شل ۳۰ سال سے ہے، اور وہ [لال بابو] بہت احتیاط سے اس کی دیکھ بھال کرتے ہیں۔‘‘