सील-लोढ़ा कस जूझत जिनगी

“शिल कटा-आ-ओ-ओ!”

उत्तरी सोनारपुर के तीर बसे एक ठन इलाका गोड़िया मं लालबाबू महतो भारी तेज अऊ ऊँच आवाज मं नरियावत हवय. मंझनिया के साढ़े बारह बजे हवय अऊ ओकर आवाज के छोड़, इहाँ कोलकाता के तीर के बजार मं बस धीरे-धीरे गोठियाय के आवाज सुने मं आवत हवय.

“शिल कटा-आ-ओ-ओ!” वो ह गली मं लउहा-लउहा रेंगत फिर ले इहीच नरियाथे, ये आस मं के कोनो ग्राहेक मिल जाय जेन ह अपन अपन शिल-नोरा ला टंकवाय ला चाहत होय. बंगाल मं शिल-कटाओ एक ठन पारंपरिक काम आय, ये मं ग्रेनाइट पथरा वाले शिल अऊ हाथ ले पीसे जवेइय्या एक ठन अउजार नोरा उपर टाँके जाथे. शिल-नोरा जेन ह सिल-बट्टा धन तमिल के अम्मिक्कल्लू जइसने आय, येला खड़ा मसाला पीसे बर बउरे जाथे. ये ह देसी रंधनी के बड़े हिस्सा आय. देस के रसोइय्या मन के कहना आय के जब नोरा ला शिल उपर रगड़े जाथे, तभेच जड़ी-बूटी अऊ मसाला अपन असल सुवाद अऊ महक देथे.

“येकर बड़े काम मसाला ला अऊ घलो चिकना बनाय आय. कोनो घलो मिक्सर तुमन ला येकर गुन नइ दे पावय,” रंधनी के ये जरूरी जिनिस ला लेके लालबाबू कहिथे.

“शिलकाटाओ ला पेशा के रूप मं अपनाय नवा लोगन मन अब सायदेच कोनो बांचे हवय. हमन आखिरी पीढ़ी हवन,” बिहार के सीवान जिला ले अवेइय्या लालबाबू कहिथे, “करीबन 10 बछर पहिली, जब मंय पहिली बेर इहाँ आय रहेंय, वो बखत अकेल्ला खिदिरपुर मं हमन 250 झिन रहेन. अब, अधिकतर डोकरा सियान हो गे हवंय, काम करे नइ सकंय, अऊ अइसने थका देवेइय्या काम के लइक नइ रहिगे हवंय.”

खिदिरपुर वो जगा आय जिहां लालबाबू रहिथे. वो ह कुर्मी समाज ले हवय (जेन ला बिहार अऊ पश्चिम बंगाल, दूनों राज मं अन्य पिछड़ा वर्ग के रूप मं सूचीबद्ध करेगे हवय) अऊ एक ठन भाड़ा के खोली मं, अपन जइसने काम करेइय्या तीन झिन आने लोगन मन के संग रहिथे. “ हमन काम खोजत शहर भर मं (कोलकाता) मं रेंगत किंजरत रहिथन. मंय अधिकतर शहर के दक्खिन हिस्सा मं जाथों,अऊ हरेक दिन नवा इलाका मं जाथों. आज मंय इहाँ गोड़िया मं हवं. कालि बालीगंज जाहूँ अऊ परन दिन संतोषपुर,” लालबाबू कहिथे, जेकर उमर करीबन 40 बछर के हवय. शहर भर मं बस-ऑटो मं आय-जाय मं ओकर रोज के 30 रूपिया खरचा हो जाथे.

गोड़िया मं, बस मं घंटा भर बइठे अऊ बनेच रेंगत जाय के बाद, वोला दिन के अपन ग्राहेक मिलथे.

वो ह फुटपाथ मं बइठ जाथे अऊ अपन संग लाय भूरुवा रंग के थैला ला निकारे हातुरी (हथौड़ा) अऊ छेनी ले पथरा ला टाँके के काम सुरु कर देथे. पथरा ले धुर्रा अऊ फूदका उठे लगथे, जेन ह ओकर हाथ-गोड़ मं जम जाथे.

ठक-ठक-ठक-ठक.

लालबाबू के काम एक धुन मं सरलग चलत रहिथे, जेकर ले पथरा मं टाँके के धारी के एक तरीका बन जाथे. कुछु (कारीगर) उपर कोती मछरी, कमल धन हाथी के डिज़ाइन बनाथें. फेर मोला ये टाँके नइ आवय. येकर बर खास ट्रेनिंग के जरूरत परथे, वो ह कहिथे, फेर ओकर हाथ चलत रहिथे अऊ अब वो ह नोरा के काम करही. लालबाबू बताथे के ये डिज़ाइन मं एक ठन खास किसम के धार होथे, जेन ह मसाला मन ला पीसे बर भारी ज़रूरी आय.

शिल-नोरा के काम करे के ताकत ओकर घिसे उपर रहिथे. लालबाबू कहिथे, “वो ह अक्सर चिकना सतह वाले पालिस करे पथरा ले बने होथे. फेर जब हमन शिल-नोरा ला टांकथन, त चिकनाई ला निकार देथन.” वो ह बताथे के बखत बखत मं, काम मं लाय सेती येकर सही पिसई बर येला फिर ले सुधारे जरूरी होथे. इहीच ला सुधारे बर लालबाबू जइसने लोगन मन ये काम करथें. फेर एक बेर टंका जाय के बाद, शिल-नोरा बछर भर तक ले चल सकथे.

बंगाल मं, मसाला के छोड़, शिल-नोरा सेमी, कोंहड़ा पाना धन पोस्तो (खसखस) ला पिसके चटनी बनाय धन बाटा बनाय बर घलो बउरे जाथे

रसोई के छोड़, ये अऊजार ला हिंदू पूजा-पाठ मं घलो बउरे जाथे, जइसने के ओडिशा मं शीतल षष्ठी (शिव अऊ पार्वती के मिलन) अऊ पश्चिम बंगाल मं रन्ना पूजो.

एक ठन शिल के काम मं लालबाबू ला 10 मिनट ले घलो कम बखत लागथे अऊ वो ह येकर 100 रूपिया लेथे. फेर काम मिले पक्का नइ रहय, अऊ वो ह सोनारपुर के एक ठन आटा चक्की मं पार्ट-टाइम नउकरी घलो करथे.

लालबाबू ह जब 15 बछर के रहिस तब ले ये काम सीखे सुरु करे रहिस. वो ह सुरता करत बताथे, “हमर घर मं एक ठन शिल (पथरा) रहिस, फेर वोला जियादा बउरे नइ जावत रहिस. ते पायके, मंय वो मं टांका लगाय के उदिम करत रहेंय, अऊ जब बाबू (ददा) ये काम करे गाँव ले बहिर जावत रहिस, त मंय घलो ओकर संग जावंव.”

“जब मंय अपने ददा ले सीखत रहेंय, त एक ठन शिल बनाय मं मोला कम से कम 15 मिनट लागत रहिस,” वो ह हांसत कहिथे. “गर मोर ले कोनो गलती हो जावय त छिटके पथरा भारी जोर ले हाथ मं लगय. कभू-कभू अऊजार मन ला धरे घलो नइ सकत रहेंय, अऊ गर वो मं मोरचा लगे रहय, त भारी खराब होवय,” वो ह सुरता करत बताथे. वो ह ये घलो बताथे के जब वो मन शहर मं काम करे सुरू करेन, त ये काम के वो मन ला करीबन 50 रूपिया मिलत रहिस.

जइसने-जइसने वो ह बड़े होइस, लालबाबू अपन परिवार के खेत मं घलो बूता करिस. “हमन अपन 20 कट्ठा करीबन 0.7 एकड़] खेत मं गोम [गहूँ], धान, गोटा [भटा] कमावत रहेन. वोला बेचके परिवार ला थोर-बहुत आमदनी घलो हो जावय. फेर ये ह भरपूर नइ ये,” वो ह दुख जतावत कहिथे

अऊ अइसने करके, लालबाबू ह घर छोड़ दिस. वो ह बिहार ले पलायन करेइय्या लोगन मन के वो धार के हिस्सा आय, जेन ह काम बूता करे बर बहिर जाय के मामला मं देस मं दूसर जगा मं हवय (जनगणना 2011).

हमर गाँव मं बछर भर अपासी के कोनो इंतजाम नइ ये: खातू के दाम घलो बढ़ गे हवय, लालबाबू कहिथे. शहर ह लालबाबू ला एक ठन गारंटी देथे. “इहाँ हमन ला कुछु न कुछु बूता मिला जाथे, भलेच जियादा झन होय,” वो ह कहिथे. जब वो ह गाँव छोड़े रहिस, तब वो ह घर के अकेल्ला कमेइय्या रहिस अऊ वोला अपन घरवाली अऊ लइका ला पाले-पोसे रहिस.

संझा घर लहूटे के बाद, कुछेक दिन त लालबाबू अपन बर एक कप चाय बना लेथे, धन ओकर बाद रतिहा के खाय बर साग-भाजी बिसोय फिर ले चले जाथे; चरों झिन मिलके रांधथें – जेन ह अक्सर रोटी-सब्जी (साग) होथे. ये खोली मं, जिहां फेरका मं गेंदा के फूल के एक ठन जुन्ना माला लटकत हवय, लालबाबू अऊ ओकर संगवारी मन अपन भाखा मं गोठियाय लागथें – “ये ह हिंदी अऊ मैथिली के मेंझरा बोली आय,” लालबाबू बताथे.

सौ बछर पहिली शिल-नोरा(सिल-बट्टा) के संग गहूं पीसे बर पारंपरिक जांता-चाकती (पथरा के जांता) के जोड़ा घलो बेचे जावत रहिस.19 वीं सदी के बंगाल के फेरीवाला मन आवाज़ लगावत रहिन,”कटाओ-शिल-चक्की-जांता,” ​​ठऊका वइसनेच जइसने आज लालबाबू जोर ले नरियाथे. 20 वीं सदी के सुरू मं, आटा मिल मं गहूं पीसे के मशीन के चलन के संगे-संग जांता अऊ चाकती जइसने येकर बिक्री बंद हो गीस.

लालबाबू ला अक्सर जब काम होथे त मिल ले फोन आथे – हरेक हफ़त मं कुछु दिन अऊ रोजी मं 200 रूपिया मिलथे.

“ऊहां, गहूँ के बारीक पिसाई बर एक ठन सिल ला एक ठन बड़े मसीन ले जोड़े जाथे. मंय ये शिल ला टांकथों, अऊ मसीन चलाय मं मदद घलो करथों,” वो ह कहिथे. “फेर कभू-कभू वो मन मोला महीनों तक ले नइ बलावंय- ये बतावत वो ह अपन दिन के पहिली काम ला निपटा लेथे.

जेन शिल के टंकई लालबाबू ह पूरा करे हवय, वो ह 53 बछर के परमिता सेनगुप्ता के आय, जेन ह कहिथे, “ये शिल हमर करा 30 बछर ले हवय, अऊ वोला हमन जतन करके राखत हवन.”