सिलौटी-लोढ़ा कूटत, परंपरा बचावत लालबाबू

“शिल कटा-आ-ओ-ओ!”

लालबाबू के तेज कर्कश आवाज उत्तरी सोनारपुर के मोहल्ला, गरिया में गूंज रहल बा. दुपहरिया के साढ़े बारह बज रहल बा उनकी आवाज के अलावा कुछ सुनाई पड़ रहल बा त उ हवे पास के बाजार में कुछ एने-ओने के गपशप.

“शिल कटा-आ-ओ-ओ!” तेज कदम से गलियन में टहलत कवनो ग्राहक के उम्मीद में उ फिर से चिल्लालें कि केहू आ के अपनी शील नोरा (सिलौटी-लोढ़ा) कुटवा लेओ. बंगाल में शिल कटाओ ग्रेनाईट के पिसाई वाला पत्थर शिल आ हाथ से पीसे वाला सामान, नोरा पर डिजाईन बनावे के पारंपरिक काम हवे. शिल-नोरा, सिल-बट्टा चाहे तमिल के अम्मी कल्लू के एगो रूप हवे जेकरा से साबुत मसाला के गीला सुगन्धित पेस्ट या पाउडर में बदलल जाला. ई मसाला भारत में भोजन के आधार हवे. रसोइया लोग मानेला कि जब नोरा के स्थिर दबाव कठोर शिल पर पड़ेला तब्बे जड़ी-बूटी आ मसाला में असली स्वाद आवेला.

“एकरा मसाला के और महीन बनावे के काम में लावल जाला. कवनो शानदार मिक्सर भी एकरा जइसन ना पीस पाई,” लालबाबू रसोई के एह जरूरी चीज के बारे में बतावेलें.

“शिल कटाओ के अपनी काम के रूप में अपनावे आ अभ्यास करे वाला नया लोग मुश्किल से मिलता. हमनी के आखिरी पीढ़ी के हईं जा,” बिहार के सिवान जिला से आईल प्रवासी लालबाबू कहेलन. जब हम शुरू में दस साल पहिले एइजा आईल रहनी त खाली खिदिरपुर में ही हमनी के 250 लोग रहनी जा. अब ज्यादातर लोग बूढ़ हो गईल बा, रिटायर हो गईल बा, या अइसन थकावे वाला काम खातिर पूरा स्वस्थ नईखे.”

कुर्मी बिरादरी (बिहार आ पश्चिम बंगाल में अन्य पिछड़ा वर्ग के रूप में सूचीबद्ध) के लालबाबू खिदिरपुर में तीन गो अउरी लोगन के संघे एगो किराया के कमरा में रहेलन. उहो लोग इहे काम करेला. “हमनी के काम खातिर पूरा शहर (कोलकाता) में चलेनी जा. हम ज्यादातर दक्षिणी हिस्सा कवर करेनी, हर दिन कवनो अलग क्षेत्र में जायेनी. आज हम एइजा गरिया में बानी, काल्ह बालीगंज जाईब, अगिला दिन संतोषपुर जाईब,” चालीस के फेंटा में पहुंचल लालबाबू कहेलन. शहर में पब्लिक सवारी से यात्रा करे में उनके लगभग 30 रूपया प्रतिदिन के खर्चा पड़ेला.

गरिया में एक घंटा के बस यात्रा आ काफी पैदल चलला के बाद उनके अपने दिन के पहिला ग्राहक मिलल बा.

उ फुटपाथ पर बैठ जालें आ अपनी सलेटी बैग में निकलल हथौड़ी आ छेनी से कुटाई शुरू कर देलें. पत्थर से धूल आ कण के एगो बादल उठ रहल बा जवन उनकी हाथ गोड़ पर जमल जाता.

ठक-ठक-ठक-ठक.

लालबाबू के काम के ठक-ठक लगातार आ लय में चलता. एसे शिल पर टूटल रेखा के एगो पैटर्न बन रहल बा. “कुछ (कारीगर) लोग ऊपर मछरी, कमल या हाथी के डिजाईन बनावेला बाकिर हमके उकेरे ना आवेला. एकरी खातिर विशेष प्रशिक्षण के जरूरत होला,” उ कहेलन जबकि उनकर हाथ लगातार चल रहल बा आ अब नोरा के ओर बढ़ता. लालबाबू बतावेलन कि डिजाईन में एगो खास धार होला जवन मसालन पीसे खातिर जरूरी होला.

शिल-नोरा कइसन काम करी, ई घिसाई पर निर्भर करेला. “उ आमतौर पर चिकना सतह वाला पालिश कईल गईल पत्थर से बनावल जाला. जब शिल नोरा के कुटाई करेनी जा त हमनी के ए चिकनाई के काट देवेनी जा,” लालबाबू कहेलन. उ बतावेलन कि लगातार काम कईला से एकर धार भोथर हो जाला, जेके फिर से कुटवावे के पड़ेला. एकरी खातिर लालबाबू जइसन कारीगर लोगन के जरूरत पड़ेला. बाकिर एक बेर कुटाई हो गईला के बाद शिल नोरा एक साल तक ले चल सकेला.

बंगाल में शिल-नोरा के उपयोग मसाला के अलावा सेम के फली, कद्दू के पत्ता या पिस्ता (खसखस) के बारीक़ मुलायम पेस्ट बनावे में भी कईल जाला.

रसोई के अलावा एकर उपयोग हिन्दू पूजा-पाठ जईसे ओडिशा में सीतल सश्ठी (शिव पार्वती के मिलन) आ पस्चिम बंगाल में रन्ना पूजा में कईल जाला.

एगो शिल पर काम करे में लालबाबू के 10 मिनट से भी कम के समय लागेला आ उ 100 रूपया लेलें. बाकिर काम मिलल पक्का ना रहेला आ एकरी वजह से उ सोनारपुर में एगो आटा मिल में आधा दिन के काम भी करेलें.

लालबाबू ई काम 15 साल के उमिर में सीखे शुरू कईलें. “हमरी घर में एगो शिल रहे बाकिर एकर खास इस्तेमाल ना होखत रहे. एसे हम ओपर कुटाई के काम करे के कोशिश करीं आ गांव में जब बाबू (पिता) काम खातिर बाहर जाए त हमहूं उनकी संघे चल दिहल करीं,” उ याद करत के कहेलन.

“जब हम अपनी पिताजी से सीखत रहनी त हमके एगो शिल पूरा करे में कम से कम 15 मिनट लागे,” उ हंसत के कहेलन. “अगर हम गलत करीं त पत्थर के टुकड़ा जोर से हमरी हाथ पर लागे. कबो-कबो हम औजार के गलत तरीका से उपयोग करीं आ ई खासकर तब बहुत बुरा होखे जब ओमे मुर्चा लागल होखे,” उ याद करेलन. उ इहो बतावेलन कि जब उ ए शहर में काम करे शुरू कईलें तब ए काम खातिर लगभग 50 रूपया लिहल करें.

जब उ बड़ भईलें त लालबाबू अपनी खानदानी जमीन पर भी काम कईलें. “हमनी के अपनी 20 कट्ठा (लगभग 0.7 एकड़) जमीन पर गेंहूं, धान, गोटा (बैंगन) उगावत रहनी जा. परिवार के कुछ आमदनी एकरी बिक्री से भी होला बाकिर उ पर्याप्त नईखे,” उ अफ़सोस भरल आवाज में कहेलन.

त एसे लालबाबू के घर छोड़े के पड़ल. उ बिहार से पलायन करे वाला प्रवासियन में से एक बाड़ें जेकर स्थान काम खातिर बाहर जाए के मामला में देश में दूसरा स्थान पर बा (जनगणना 2011).

“हमनी के गांव में पूरा साल सिंचाई के कवनो पक्का व्यवस्था नईखे, खाद भी महंगा हो गईल बा,” लालबाबू कहेलन. शहर में लालबाबू के गारंटी मिलेला. “एइजा हमनी के कुछ काम मिल सकेला, भले ढेर ना होखे,” उ कहेलन. अपनी पलायन के समय अपनी परिवार में उ इकलौता कमाऊ सदस्य रहलें जिनके अपनी मेहरारू आ लईका के देखभाल करे के रहे.

सांझी ले घरे लौट के लालबाबू अपनी खातिर एक कप चाय बनावेलें या फिर रात के खाना खातिर सब्जी लेवे बाहर चल जालें. आमतौर पर खाना में सादा रोटी-सब्जी बनेला जेके चारों लोग मिल के बनावेला. कमरा में दरवाजा पर एगो पुरान गेंदा के माला टंगल बा, एइजा पहुंचते लालबाबू आ उनकर साथी लोग अपनी भाषा में लौट आवेला. “हिंदी आ मैथिली के मिलल-जुलल रूप,” लालबाबू बतावेलन.

एक सदी पहिले ले गेंहूं पीसे खातिर शिल-नोरा के संघे एगो परम्परागत जांता-चकती (पत्थर के चक्की) भी बेचल जाओ. बंगाल के ठेला वाला लोग 19वीं सदी के बंगाल में एके पुकारें, “कटाओ-शिल-चकती-जांता”, आवाज के लम्बा खींच के लालबाबू बतावेलन. आटा मिलन में गेंहूं पीसे के मशीन चलन में अइला के संघे विशेष रूप से 20वीं सदी के शुरुआत में जांता आ चकती ए तरीका बिकल बंद हो गईल.

मिल में अगर कवनो काम होला त आमतौर पर लालबाबू के मिल से फोन आवेला. हर कुछ हफ्तन पर दू बेर आ उ दिन के कोई 200 रूपया मजदूरी में मिलेला.

“ओइजा एगो शिल गेंहूं के बारीक पिसाई खातिर एगो बड़ मशीन से जुड़ल होला. हम ए शिल के तरासेनी आ मशीन में भी मदद करेनी. बाकिर कबो कबो उ लोग महीनन ले ना बोलावेला,” अपना पहिला दिन के काम खतम करत के उ बतावेलन.

लालबाबू जवनी शिल तरास के तइयार कइलन, उ 53 बरिस के पारमिता सेनगुप्ता के हवे. ऊ कहेली, “हमनी के लगे ई शिल 30 साल से बा ई एकर बढ़िया से ध्यान रख रहल बाड़ें.”