تریپورہ: سرلا گاؤں کے دوتارا نواز بڑھئی

ایک تالاب جسے بوڑو کالی باڑیر دِگھی کہا جاتا ہے، شیو کے ایک عظیم الشان مجسمہ کے گرد پھیلا ہوا ہے۔ شیو کا یہ مجسمہ تریپورہ کے اس غیر مانوس قصبہ دھرم نگر کے مرکز کی حیثیت رکھتا ہے۔ شہر کی بھاگ دوڑ بھری زندگی کے درمیان یہ ایک ایسی جگہ ہے جہاں مقامی لوگ اور سیاح ہر شام سکون کی تلاش میں کھنچے چلے آتے ہیں۔ انجنوں کے شور، گاڑیوں کی سیٹی، اور بھیڑ کی گہما گہمی کو چیرتی ہوئی یہاں اکثر ایک پُرسکون اور دل آویز دھن سنائی دیتی ہے، جو لوگوں کی توجہ اپنی طرف کھینچ لیتی ہے۔

اپنی عمر کی ۶۰ کی دہائی میں پہنچ چکا ایک شخص جھیل کے کنارے بیٹھا ایک لمبی گردن والے طنبورہ نما ساز ​​پر ایک مقبول لوک گیت کی دھن بجا رہا ہے۔ اس کی آنکھیں بند ہیں۔ وہ ایک ہاتھ سے تاروں کو چھیڑتا ہے، اور دوسرے ہاتھ کی انگلیوں کو پتلے فنگر بورڈ پر پھیرتا ہے۔ اس کے ارد گرد جمع ہونے والے چند متجسس لوگ نہ تو اس کے ساز کو پہچانتے ہیں نہ راگ کو، اور نہ ہی مالی برادری سے تعلق رکھنے والے اس فنکار کو۔ خیال رہے کہ مالی برادری کو تریپورہ میں درج فہرست ذات کے طور پر درج کیا گیا ہے۔

لیکن محض ۱۵ کلومیٹر دور شمالی تریپورہ ضلع کے کدم تلّا بلاک کے تحت آنے والی سرلا گرام پنچایت میں ہر شخص رتیش مالاکار کو ’دوتارا نواز‘ کے طور پر پہچانتا ہے۔

’’ہم سب انہیں جانتے ہیں۔ یہ وہ شخص ہیں جن کی وجہ سے لوگ ہمارے گاؤں کو پہچانتے ہیں،‘‘ ایک ۲۶ سالہ مقامی رکشہ والا فخریہ لہجہ میں کہتا ہے۔ لیکن رتیش کے لہجہ میں جھجک ہے، ’’میں پیشہ ور موسیقار نہیں ہوں، میں ایک بڑھئی ہوں، میں نے اس گھر میں لکڑی کے تمام کام خود ہی کیے ہیں۔‘‘ ہم چائے کے پرسکون باغات کے درمیان اینٹوں اور مٹی سے بنے ان کے دو کمروں کے گھر کے اندر ایک اونچی جگہ پر بیٹھے ہیں۔ ’’موسیقی ایک ایسی چیز ہے، جو مجھے سکون بخشتی ہے۔ جب بھی میرے پاس کوئی کام نہیں ہوتا ہے تو میں دوتارا بناتا اور بجاتا ہوں۔‘‘

ثقافتی اور تاریخی اہمیت کے حامل اس تار والے عوامی ساز سے رتیش ہمیں متعارف کراتے ہیں۔ دوتارا، دوتار یا سوراج بنگلہ دیش، مغربی بنگال، آسام اور مشرقی بہار میں صدیوں پرانی روایات کا ایک لازمی حصہ رہا ہے۔ اس کی جھلک ’باؤل‘ جیسی روحانی لوک موسیقی، دیہی علاقوں کے ’بھوائیہ‘ اور ’بھٹیالی‘ جیسے لوک گیتوں اور زبانی قصہ گوئی میں بھی ملتی ہے۔ ’’لوگ اسے دوتارا کہتے ہیں، لیکن زیادہ تر سازوں میں کم از کم چار تار اور بعض اوقات چھ تار بھی ہوتے ہیں۔ میں اسے سوراج کہنا پسند کرتا ہوں،‘‘ رتیش کہتے ہیں۔

’’جب بھی میں پیمائش کے کسی مسئلہ یا کسی اور کام میں الجھ جاتا ہوں، تو میں کام سے تھوڑا سا وقفہ نکال کر اس ساز کو بجاتا ہوں۔ اس سے مجھے دوبارہ کام پر توجہ مرکوز کرنے میں مدد ملتی ہے۔‘‘ رتیش زیر تکمیل دو تاروں کی تازہ کھیپ میں سے ایک ساز اٹھاتے ہیں اور اس کے مختلف حصوں کی نشاندہی کرتے ہیں: گونجنے والا حصہ (باٹی)، اس پر چڑھی جھلی، گردن (دھور)، چار سے چھ تار، اور ٹیوننگ کی کھونٹیاں۔ وقت گزرنے کے ساتھ اور مختلف علاقوں کی اپنی ضرورتوں کے لحاظ سے اس ساز کی تیاری اور ڈیزائن میں تبدیلیاں آئی ہیں۔

رتیش کے خاندان میں کسی نے بھی، جو کئی نسلوں سے لکڑی کے ماہر کاریگر رہے ہیں، ان سے پہلے کبھی موسیقی کا ساز نہیں بنایا تھا۔ کم عمری میں ہی رتیش نے اسکول چھوڑ دیا تھا اور اپنے کنبے کی کفالت کے لیے اپنے والد کے ساتھ کام کرنے لگے تھے۔ ’’کبھی کبھی ہم کدم تلا یا چورائی باڑی کے قریبی بازاروں میں جاتے تھے۔ ایک دن میں نے فنکاروں کے ایک گروپ سے ملاقات کی جو مختلف تار والے ساز بجا رہے تھے اور جو ساز مجھے پسند آیا اسے دوتارا کہا جاتا تھا۔‘‘ اسی وقت انہوں نے فیصلہ کیا کہ وہ خود اسے بنائیں گے۔

’’بعد میں دھرم نگر میں ایک نابینا دوتارا نواز نے مجھے اس ساز کی پیمائش سکھائی۔ سال ۱۹۸۲ میں ۲۰ سال کی عمر میں، میں نے اپنا پہلا ساز ایک مقامی دکاندار سے خریدی گئی کُما کی نرم لکڑی سے بنایا تھا،‘‘ وہ بتاتے ہیں۔ اس وقت انہیں ریگ مال کے استعمال کی کوئی جانکاری نہیں تھی۔ وہ لکڑی کو ہموار کرنے کے لیے ایک موٹے کپڑے اور باریک پسے ہوئے شیشے کے برادے کا استعمال کرتے تھے۔ ’’میں نے ایک پھٹے ڈھولک کے چمڑے کا ایک ٹکڑا اور دھات کے کچھ پرانے پرزے لیے اور انہیں اپنے کام میں استعمال کیا۔ پک [مضراب] بھینس کے سینگ سے بنایا گیا تھا۔ اب ہم صرف پلاسٹک کے پک استعمال کرتے ہیں۔‘‘ رتیش کو ہر تفصیل یاد ہے۔

’’تاروں کے لیے میں مختلف موٹائی کی میوزکل وائر استعمال کرتا ہوں،‘‘ رتیش دھرم نگر میں موسیقی کے ساز کی دکان سے حاصل کی گئی کانسی، اسٹیل اور تانبے کی تاریں نکالتے ہوئے کہتے ہیں۔ ’’ٹیوننگ (سُر ملانا) مکمل طور پر میری سماعت پر منحصر ہے۔ میں ساز بجاتا ہوں اور اس کا سُر درست کرتا ہوں۔‘‘ اس میں گھنٹوں لگ سکتے ہیں۔ اگرچہ انہوں نے اپنی زندگی کے ابتدائی دور میں ہی دوتارا بنانا اور بجانا سیکھ لیا تھا، لیکن اپنی مالی مشکلات سے نمٹنے کے لیے انہوں نے حال ہی میں اسے فروخت کرنا شروع کیا ہے، جن میں سب سے حالیہ ضرورت ان کی ۵۲ سالہ اہلیہ جیوتسنا کا علاج ہے۔

’’پچھلے کچھ سالوں سے وہ کینسرکے عارضہ میں مبتلا ہے۔ ہم علاج کے لیے اسے آسام کے سلچر [۱۲۰ کلومیٹر دور] لے جاتے ہیں۔ یہ دورہ اکثر مہینہ میں ایک سے زیادہ بار ہو جاتا ہے۔ میں اس کے علاج پر پہلے ہی تقریباً پانچ لاکھ [روپے] خرچ کر چکا ہوں۔ اور چونکہ مجھے یہ رقم ادھار لینا پڑی تھی، اس لیے میں اب قرض میں ڈوب چکا ہوں۔ یہ صورتحال اس وقت ہے جب ہم نے اپنے کٹہل کے کچھ درخت لکڑی تاجروں کے ہاتھوں فروخت کر دیے ہیں۔ آخری درخت ۴۰۰۰ روپے میں فروخت ہوا تھا،‘‘ رتیش کہتے ہیں۔

جب بڑھئی کا کام ہوتا ہے، تو رتیش کو ایک دن کے ۵۰۰ روپے ملتے ہیں۔ ایک مہینہ میں وہ زیادہ سے زیادہ ۷۰۰۰ روپے کماتے ہیں۔ لیکن پھر ایسے مواقع بھی آتے ہیں جب دو تین ماہ تک انہیں کام نہیں ملتا۔ ’’اس طرح میں نے ساز بیچنے کے لیے دھرم نگر جانا شروع کیا۔ یہی ہماری آمدنی کا واحد ذریعہ ہو سکتا تھا۔ میرے پاس شاید ہی کوئی بچت تھی۔ میرا بڑا بیٹا قصبہ میں زیورات کی ایک دکان پر کام کرتا ہے اور جتنا ہو سکتا ہے ہماری مدد کرتا ہے،‘‘ رتیش کہتے ہیں۔ ان کے چار بچے ہیں – تین بیٹے اور ایک بیٹی۔ یہ بچے جیوتسنا کے ہسپتال کے دوروں کے دوران ان کا خیال رکھتے ہیں۔ سب سے چھوٹی بیٹی رِمیتا ۱۷ سال کی ہے اور ابھی ہائی اسکول میں ہے۔

اس فنکار کو صرف اپنی موسیقی میں سکون ملتا ہے۔ ’’میں کوئی گیت یا دھن منتخب کرتا ہوں اور خود ہی بجاتا رہتا ہوں۔ مجھے کبھی کسی نے نہیں سکھایا۔ جب میں دوتارا بجاتا ہوں تو مجھے وقت کا احساس نہیں ہوتا۔ اس فن کو ذریعہ معاش بنانے کا خیال میرے ذہن میں کبھی نہیں آیا تھا۔ یہ صرف پانچ سال پہلے کی بات ہے، جب میں مالی طور پر جدوجہد کر رہا تھا، کسی نے دوتارا بنا کر فروخت کرنے کا مشورہ دیا۔‘‘ وہ اب تک ۱۳ ساز فروخت کر چکے ہیں۔ ایک ساز کی قیمت ۵۰۰۰ روپے تک مل سکتی ہے۔ ’’ایک ساز کے لیے ضروری خام مال کی قیمت بجائے خود ۲۰۰۰ روپے ہے۔ لیکن میں نے اپنا بنایا ہوا پہلا دوتارا کبھی فروخت نہیں کیا۔ میں اس سے بہت زیادہ لگاؤ محسوس کرتا ہوں۔‘‘ یہ کہتے ہوئے رتیش کا چہرہ چمک اٹھتا ہے۔

اب انہیں گاہک مل جاتے ہیں۔ ’’میں موسیقی کا دلدادہ ہوں اور رتیش خود بھی کافی اچھے موسیقار ہیں۔ جب مجھے معلوم ہوا کہ وہ دوتارا بناتے ہیں، تو میں نے فوراً ان سے کہا کہ وہ میرے لیے ایک دوتارا بنائیں،‘‘ سائنس کے ۴۵ سالہ استاد سریندر ناتھ کہتے ہیں۔ وہ رتیش کے پہلے خریدار تھے۔ انہوں نے ریتش کو مزید ساز بانے کی ترغیب دی اور انہیں مقامی کلب میں پرفارم کرنے کے لیے مدعو بھی کیا۔

تاہم، برادری میں رتیش کو ملنے والی پہچان کو لے کر ان کے اہل خانہ بہت پرجوش نہیں ہیں۔ ’’شادی کے وقت ہمیں معلوم تھا کہ وہ موسیقی سے جڑے ہوئے ہیں۔ ہم نے ان سے ساز بجانے کی فرمائش شاید ہی کبھی کی ہو، یہ سوچتے ہوئے کہ پورے دن کام کرنے کے بعد وہ تھک گئے ہوں گے۔ بیٹی کی شادی کے دوران ہمارا بنیادی سروکار ایک مستحکم آمدنی اور مستقل رہائش سے تھا،‘‘ اپنی بیٹی سے ملنے آئیں رتیش کی۷۰ سالہ ساس ساردا مالاکار کہتی ہیں۔

رتیش کو معلوم ہے کہ یہ ایک ایسی میراث ہے جسے وہ اپنے بچوں کو کبھی نہیں دیں گے۔ ’’یہ میرے ساتھ ختم ہونے والا ہے۔ میرے بچوں میں سے کسی کو بھی اس دستکاری میں دلچسپی نہیں ہے۔ ان کے پاس اس کام کے لیےنہ تو کوئی جوش ہے، نہ صبر ہے اور نہ جھکاؤ ہے۔‘‘ لیکن یہ بے حسی صرف ان کے ہی اہل خانہ تک محدود نہیں ہے۔ ان جیسے تجربہ کار فنکاروں کو کسی سرکاری اسکیم سے کوئی راحت نہیں ملی۔ ’’میں نے دستکاروں کے لیے مخصوص تین مختلف پنشن اسکیموں کے لیے درخواست دی ہے، جن میں شلپی بھتّہ اور بڑھئی بھتّہ شامل ہیں۔ لیکن مجھے کچھ نہیں ملا،‘‘ وہ کہتے ہیں۔

’’میں یہ نہیں کہتا کہ مجھے پہچان کی خواہش نہیں ہے، لیکن کاش میں اور زیادہ باصلاحیت ہوتا۔ تب میں موسیقی کو بطور پیشہ منتخت کرتا۔ جب والدہ زندہ تھیں تو وہ مجھ سے گیتوں کی فرمائش کیا کرتی تھیں۔ میں دوتارا بجاتا اور کوئی بھجن گاتا تھا۔ وہ اس وقت کے لیے کافی ہوتا تھا…‘‘

ترجمہ نگار: شفیق عالم